मर्कूस 3
3
येशूजी प्रिबै त्हिंइर यो ओलेल् आतबै म्हि सल् लमिंब
(मत्ती १२:९-१४; लूका ६:६-११)
1येशू च्हों धिंर धबै ह्यामा चर यो कारयासि ओलेल् आतबै म्हि घ्रि मुँल। 2“के लल् आतबै प्रिबै त्हिंइरै येशूजी च म्हि सल् लमिंम् उ?” बिसि छ्याब् ल्हैदिबै सैंले को-कोइ म्हिमैं येशूए छैं लरिल। 3येशूजी च यो ओलेल् आतबै म्हिने, “क्हि छुइ खो,” बिइ। 4च लिउँइँ येशूजी चर मुँब्मैंने बिइ, “प्रिबै त्हिंइर परमेश्वरए छ्वेर बिब् धोंले खैबै के लब छ्याँब मुँ, छ्याँबै के लब् उ, आछ्याँबै के लब? म्हि जोगेदिब् उ, नास लब, तो छ्याँब मुँ?” छबिमा चर्बै म्हिमैं तोइ आबिल्ले टिरिइ। 5च म्हिमैंए छाबै सारो सैं म्रोंसि येशूए सैं नसि ह्रिस खइ। धै चर खागु तबै म्हिमैं ङाँइ ङ्ह्योसि च नबै म्हिने “क्हिए यो स्योंन्!” बिमा च म्हिइ यो स्योंइ। धै स्योंबै तोदोंन् चए यो सयाइ। 6छतब् म्रोंसि यहूदी ठिम बेल्ले छेनाले म्हाँदिबै टोलिर्बै फरिसीमैं च्हों धिंउँइँले बैरु त्होंइ ह्यासि येशूलाइ खैले सैले बिसि हेरोद म्रुँए म्हिमैंने सल्ला लबर होंइ।
तालए छ्योगर ल्हें म्हिमैं
7च लिउँइँ येशू ह्रोंसए चेलामैंने तालउँइँ ह्यामा चर म्हिए हुल येशूए लिलि खइ। गालील ह्युलउँइँले, यहूदीया ह्युलउँइँले, 8यरूशलेम सहरउँइँले, इदुमिआ ह्युलउँइँले, यर्दन क्योंजाउँइँले, टुरोस नेरो सीडोन बिबै सहरजरेबै ल्हें म्हि येशूजी लबै औदिबै छ्याँबै केमैंए बारेर थेसि खी ङाँर खइ। 9म्हिए हुलइ खीलाइ आप्लेरिगे बिसि येशूजी ह्रोंसए ल्हागिर चेलामैंने डुँङ्गा पखबर ल्हैदिइ। 10तलेबिस्याँ खीजी ल्हें नबै म्हिमैं सल् लमिंल, छतसि नब् छब्मैंइ येशूलाइ छुइबै ल्हागिर क्हि खगा ङ खगा लरिल।#मर्क ४:१; लूक ५:१-३ 11मोंइ स्याबै म्हिमैंइ येशूलाइ म्रोंसि पत्खु तसि “क्हि परमेश्वरए च्ह ग बिसि चिरमल।” 12दिलेया येशूजी च मोंमैंने हौदिसि “ङ खाब् जा बिसि क्हेमैंइ खाबलाज्यै आबिद्,” बिइ।
येशूजी च्युसे ङ्हि कुल्मिंबै चेला चिब्मैं त्हाँब
(मत्ती १०:१-४; लूका ६:१२-१६)
13च लिउँइँ येशू कोंर ह्यासि खीजी त्हाँबै चेलामैं हुइमा चमैं येशू ङाँर खइ। 14खीने बालु टिबर नेरो परमेश्वरउँइँले खबै सैं तोंबै ताँ बिप्रबर येशूजी च्युसे ङ्हि चेलामैं त्हाँइ। 15धै मोंमैं ल्हाबै हग या चेलामैंलाइ पिंइ। 16च च्युसे ङ्हिं चेला चिब्मैंए मिं छाब् मुँल:
सिमोन, चए मिं येशूजी पत्रुस थेंइ, 17जब्दियाए च्ह याकूब नेरो याकूबए अलि यूहन्ना। येशूजी चमैंए मिं बोअनरिगेश थेंइ, चए अर्थ मु ङ्हेबए च्हमैं ग। 18झाइले अन्द्रियास, फिलिप, बारथोलोमाइ, मत्ती, थोमा, अल्फयसए च्ह याकूब, थेदियास, सिमोन कनानी,#3:18 कनानी अरमि क्युइरि चु मिंए मतलब “ह्रोंसए ह्युललाइ म्हाँया लबै टोलिर्बै म्हि” 19छलेन येशूलाइ धोका पिंसि क्हाल् पिंबै यहूदा इस्करियोत।
येशू नेरो बालजिबुल बिबै मोंमैंए चिब
(मत्ती १२:२२-३२; लूका ११:१४-२३; १२:१०)
20च लिउँइँ येशू धिंर ह्यामा चर म्हिए हुल खागु तखइ। छतमा येशू नेरो खीए चेलामैंइ चब् चलै आयों। 21चु ताँ थेसि येशूए परवाइ खी किंबर खइ, तलेबिस्याँ म्हिमैंइ “येशूए सैं क्ल्ह्योर आरे” बिमल।
22यरूशलेमउँइँले खबै को-कोइ शास्त्रिमैंइ “येशूने बालजिबुल#3:22 बालजिबुल दुष्टए अरू मिं बिबै मों मुँ, च मोंमैंए चिबउँइँले शक्ति योंसि चइ मोंमैं ल्हाल् खाँमना बिसि छ्याब् ल्हैदिइ!”#मत्ती ९:३४; १०:२५
23छ बिब् थेसि येशूजी चमैं खी ङाँर हुइसि ताँ क्होमिंबै ल्हागिर चु अहान् बिइ, “दुष्टइ खैले दुष्ट ल्हाल् खाँमुँ? 24ह्युल घ्रिर्बै म्हिमैं आक्ह्रिस्याँ च ह्युल लिउँइँ समा टिक्दिल् आखाँ। 25छलेन धिं घ्रिर्बै म्हिमैं या आक्ह्रिस्याँ च धिं लिउँइँ समा टिक्दिल् आखाँ। 26च धोंलेन् दुष्ट ह्रोंसनेन् आक्ह्रिस्याँ चै या लिउँइँ समा टिक्दिल् आखाँ, छतसि च युनन् नास तयाब्मुँ।
येशूजी दुष्टलाइ ट्होल् खाँम्
27“खाबज्यै या भोंबै म्हिए धिंर होंसि चर्बै सैमैं ह्योदा ङ्हाँस्याँ, चइ ओंसों च भोंबै म्हि फैथेंल् त्हुम्, धै बल्ल ह्योल् खाँम्।
28“क्ह्रोंसेंन ङ क्हेमैंने बिमुँ, म्हिमैंइ लबै पापमैं नेरो परमेश्वरए बिरोधर खैबै ताँमैं पोंलेया क्षमा योंल् खाँम्, 29दिलेया परमेश्वरए पबित्र प्ल्हए बिरोधर पोंब्मैंइ क्षमा योंल् आखाँ। च खोंयोंन् बिलै दोषिन् ठर्दिब्मुँ।”#लूक १२:१० 30शास्त्रिमैंइ खीने बालु मों मुँ बिल, छतसि येशूजी चु ताँ बिइ।
येशूए आमा नेरो अलिमैं
(मत्ती १२:४६-५०; लूका ८:१९-२१)
31झाइले येशूए आमा नेरो अलिमैं चर खइ, धै बैरुन् रासि येशूलाइ हुइबर ल्हैदिइ। 32येशूए कारग्युले म्हिए हुल मुँल, च म्हिए हुल न्होंर्बै म्हिमैंइ बिइ, “ओ गुरु, क्हिए आमा नेरो अलिमैंइ क्हिलाइ बैरु हुइमुँ।”
33दिलेया येशूजी चमैंने बिइ, “ङए आमा नेरो अलिमैं खाब जा?” 34झाइले खीजी ह्रोंसए कारग्युले टिबै म्हिमैं ङाँइ ङ्ह्योसि बिइ, “ङ्ह्योद्, ङए आमा नेरो अलिमैं चुमैंन् ग। 35तलेबिस्याँ परमेश्वरजी बिब् धोंले लब्मैंन् ङए अलि, अङाँ, नेरो आमा ग।”
Currently Selected:
मर्कूस 3: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
