मर्कूस 15
15
क्रथे पिलातसए उँइँर येशू राब
(मत्ती २७:१-२,११-१४; लूका २३:१-५; यूहन्ना १८:२८-३८)
1झाइले न्हाँगर मि म्रोंबै तोदोंन् ख्रो पिंबै खेगि चिब्मैं, चिबनाँब्मैं, शास्त्रिमैं नेरो थेबै म्हि च्होंर खागु तबै म्हिमैंइ सल्ला लसि येशूलाइ फैसि पिलातस बिबै रोमी क्रथे ङाँर बोयाइ।
2पिलातसइ येशूने “क्हि यहूदीमैंए म्रुँ वा?” बिसि ङ्योएमा
खीजी चने ज्वाइ पिंइ, “क्हिइन छ बिरिइमुँ दि।”
3ख्रो पिंबै खेगि चिब्मैंइ येशूए फिर ल्हें छ्याब् ल्हैदिइ। 4झाइले पिलातसइ धबै येशूने बिइ, “ङ्ह्योद्! चमैंइ क्हिए फिर ल्हें छ्याब्मैं ल्हैदिरिइमुँ। चमैंइ क्हिए फिर ल्हैदिबै छ्याबल क्हिइ तोइ ज्वाफ आपिं वा?” 5छान् बिलेया येशूजी तोइ ज्वाफ आपिं। छतमा पिलातस प्लेटोयाइ।
येशूलाइ सिबै सजैं पिंब
(मत्ती २७:१५-२६; लूका २३:१३-२५; यूहन्ना १८:३९—१९:१६)
6बर्ष ह्रोंसे दुःखने फ्रेबै चाड खमा पिलातसइ म्हिमैंइ त्हाँबै म्हि घ्रि झेलउँइँले पिमिंमल। 7च त्हेर रोमी म्रुँए बिरोधर राब्मैं झेलर मुँल। चमैंइ प्होंब् नेब् लसि म्हिमैं सैल। चमैं न्होंरि बरब्बा बिबै म्हि घ्रि मुँल। 8म्हिए हुल खसि पिलातसने “क्हिइ ओंसों लब् धोंले ङिइ त्हाँबै म्हि पिमिंन्,” बिसि बिबर होंइ।
9पिलातसइ चमैंने बिइ, “क्हेमैंए ल्हागिर यहूदीमैंए म्रुँ पिमिंरिगे ङ्हाँइमुँ वा?” 10तलेबिस्याँ ख्रो पिंबै खेगि चिब्मैंइ येशूए फिर ह्रिस म्हाँदिसि खी ङाँर पखब् ग बिसि पिलातसइ सेल।
11दिलेया ख्रो पिंबै खेगि चिब्मैंइ “बरब्बा पिमिंन् बिद् ओ!” बिसि म्हिए हुललाइ सुरिदिवाइ।
12पिलातसइ धबै चमैंने “छ बिस्याँ क्हेमैंइ यहूदीमैंए म्रुँ बिबै म्हिलाइ ङइ तो लले दि?” बिसि ङ्योएइ।
13चमैंइ धबै कै तेसि “चलाइ क्रूसर च्योवाद्,” बिइ।
14पिलातसइ चमैंने “तले? चइ आछ्याँबै के तो लइमुँ?” बिसि ङ्योएमा
चमैं झन थेबै कै तेसि “चलाइ क्रूसर च्योवाद्,” बिइ।
15छतमा पिलातसइ च म्हिमैंए सैं तोंन् लबर बरब्बालाइ पिमिंइ, येशूलाइ बिस्याँ कोर्राइ प्रुल् पिंसि क्रूसर च्योवाबर पिंवाइ।
सिपाइमैंइ येशूए बिल्लि लब
(मत्ती २७:२७-३१; यूहन्ना १९:२-३)
16सिपाइमैंइ येशूलाइ दरबार न्होंर बोसि चर्बै अरू सिपाइमैं या ताँन् खागु लइ। 17झाइले चमैंइ खीलाइ सुपारि रङर्बै क्वें खिमिंसि पुजुए मुकुट या लसि खीए क्रर कुमिंइ। 18झाइले चमैंइ “यहूदीमैंए म्रुँ जय!” बिदै फ्योब् धों लसि बिल्लि लबर होंइ। 19झाइले चमैंइ येशूए क्रर प्हरेइ प्रिंसि थुइ, धै च्हि तुँसि येशूलाइ फ्योब् धों लइ। 20छले येशूए बिल्लि लसि चमैंइ सुपारि रङर्बै क्वें प्लिवासि खीए क्वेंन् खिमिंसि क्रूसर च्योबै ल्हागिर येशू बैरु बोइ।
येशूलाइ क्रूसर च्योवाब
(मत्ती २७:३२-४४; लूका २३:२६-४३; यूहन्ना १९:१७-२७)
21खेंमैं घ्याँर ह्यारिमा कुरेनीथें सिमोन बिबै म्हि नाँसउँले बजार ह्याब् बिसि खरिब् त्होइ। च म्हि अलेक्जेन्डर नेरो रूफसए आबा मुँल। सिपाइमैंइ च म्हिने येशूए क्रूस कर ल्हैदिसि नोबर ल्हैदिइ।#रोम १६:१३ 22च लिउँइँ चमैंइ येशूलाइ गलगथा बिबै क्ल्ह्योर बोइ। गलगथाए अर्थ क्र खोप्लें ग। 23चर फेनेसि चमैंइ येशूलाइ मूर्र#15:23 मूर्र नल् आलबै मै कोंबै प्हा थुँबर पिंइ, दिलेया येशूजी थुँल आङिं। 24झाइले चमैंइ येशूए यो प्हलेर काँटि क्योसि क्रूसर च्योवाइ, धै येशूए क्वेंमैं चिट्ठा झोंसि चमैंइ चुइ।#भज २२:१८
25चमैंइ येशूलाइ क्रूसर च्योवामा न्हाँगर्बै कु ह्राल।
26झाइले
“यहूदीमैंए म्रुँ”
बिसि खीए फिर छ्याब् ल्हैदिबै ताँ क्रूसर प्ह्रिथेंल। 27चमैंइ येशूलाइ क्रूसर च्योवामा ह्योमैं ङ्हिं या घ्रि खीए क्योलो हार, घ्रि खीए त्हेब्रेहार क्रूसर च्योवाइ।#यशै ५३:१२ 28छले परमेश्वरए छ्वेर बिबै ताँ पूरा तइ, “खी पापि म्हि धोंन् तसि पापिमैंने बालु च्योमिंइ।”#15:28 छले परमेश्वरए छ्वेर बिबै ताँ पूरा तइ, “खी पापि म्हि धोंन् तसि पापिमैंने बालु च्योमिंइ।” धाँसे ओंसोंबै योइ प्ह्रिबै को-कोइ कितबमैंरि चु ब्राकेट न्होंर्बै ताँफुँमैं आप्ह्रिल।
29च घ्याँर प्रब्मैंइ क्र लादै “ओहो, क्हिम् मन्दिर फुवासि धबै सोंरोर्न बनेम् बिबै म्हि आङिं वा? बिसि येशूए बिल्लि लइ।#भज २२:७; १०९:२५; मर्क १४:५८; यूह २:१९ 30ल्हु, तारे च क्रूसउँइँले तयुसि ह्रोंसलाइन जोगेद्।”
31छलेन ख्रो पिंबै खेगि चिब्मैं नेरो शास्त्रिमैंज्यै या छ बिसि येशूए बिल्लि लबर होंइ, “चुइ अरूलाइ जोगेमिंइ दिलेया ह्रोंसलाइ जोगेल् आखाँ। 32च यहूदीमैंए म्रुँ बिबै ख्रीष्ट मुँस्याँ तारे क्रूसउँइँले तसि युरिगे। च क्रूसउँइँले तसि युब् म्रोंस्याँ मत्त्रे ङिइ चए फिर बिश्वास लब्मुँ।”
खीने बालु क्रूसर च्योवाबै म्हिमैंज्यै या येशूए बिल्लि लइ।
येशू सियाब
(मत्ती २७:४५-५६; लूका २३:४४-४९; यूहन्ना १९:२८-३०)
33त्हिंयाँर्बै च्युसे ङ्हिं ह्राबै त्हेसेरो सों ह्राबै त्हे समा ह्युल तिगोंन् मिछु तयाइ। 34सों ह्राबै त्हेजरे येशूजी थेबै कैले बिइ, “इलोइ, इलोइ, लामा सबखथनि?”#भज २२:१ (छ बिबै अर्थ “ओ ङए परमेश्वर, ओ ङए परमेश्वर, क्हिजी ङलाइ तले पिवाल?” बिब् ग।)
35चर राबै कोइ म्हिमैंइ येशूजी बिबै ताँ आक्होसि बिइ, “थेत्ति, चइ स्योंम्बै एलिया हुइरिइमुँ।” 36झाइले म्हि घ्रि न्हेह्यासि प्हा क्युँर ह्रुइ प्ल्हुँइ। धै चइ म्वोए प्हरेर फैसि खीलाइ थुँल् पिंमा बिइ, “तारे, एलिया खनदै युसि चलाइ क्रूसउँइँले तमिंम् उ, ङ्ह्योले!”#भज ६९:२१
37झाइले येशूजी थेबै कै तेसि सो पिवाइ। 38च तोंदोंन् यरूशलेमरि मन्दिरर्बै पर्दा ताइले माइ समा म्हाँजोर्न ङ्हिबाँ फैले टोह्याइ।#प्रस २६:३१-३३
39येशूजी सो पिब् म्रोंसि खीए ओंसों रारिबै कप्तानइ “चु म्हिम् क्ह्रोंसेंन परमेश्वरए च्ह मुँन,” बिइ।
40चर च्हमिरिमैं या ह्रेंगोउँइँले ङ्ह्योरिल। चमैंए म्हाँजोरि मरियम बिबै मग्दालाथेंस्यो, च्योंब याकूब, योसेफए आमा मरियम नेरो सलोमि बिबै च्हमिरि मुँल। 41येशू गालीलर मुँमा चमैंइ येशूए सेवा लदै खीने प्रमल। झाइले येशूने बालु यरूशलेमर खबै अरू ल्हें च्हमिरिमैं या चर रासि ङ्ह्योरिल।#लूक ८:२-३
येशू पाब
(मत्ती २७:५७-६१; लूका २३:५०-५६; यूहन्ना १९:३८-४२)
42प्रिबै त्हिंइए ओंसोंबै त्हिंइ तसेरो च त्हिंइ “प्रिबै त्हिंइए ल्हागिर चैदिबै सैमैं तौदु लथेंबै त्हिइ” बिमल। 43छतमा अरिमाथियाथें योसेफ च ङेसार आङ्हिंन्ले पिलातस ङाँर ह्यासि येशूए सिनु ह्रिइ। (च योसेफ थेबै म्हि च्होंर्बै चिब मुँल। चइ परमेश्वरए ग्याल्स खोंयों युब् ङ्हे बिसि घ्याँ ङ्ह्योरिल।) 44येशू सिल् खाँइ बिब् थेसि पिलातस अचम्मा ङ्हाँइ। छतसि कप्तानलाइ खी ङाँर हुइसि “क्ह्रोंसेंन येशू सिल् खाँइ वा?” बिसि ङ्योएइ। 45येशू सिल् खाँइ बिब कप्तानउँइँले था सेसि पिलातसइ येशूए सिनु योसेफने बोयाल् पिंइ।
46झाइले योसेफइ सुतिए क्वें किंसि पखइ धै येशूए सिनु क्रूसउँइँले तसि क्वेंर म्होरसि म्हिमैंइ युँमा कोप्दिसि लबै उ धों तबै छगोंर थेंइ, झाइले च उए सुँर युँमाइ हुथेंइ। 47मग्दालाथेंस्यो मरियम नेरो योसेफए आमा मरियमइ येशूलाइ छगोंर थेंब ङ्ह्योरिल।
Currently Selected:
मर्कूस 15: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.