लूका 22
22
यहूदा इस्करियोतइ येशू क्हाल् पिंब
(मत्ती २६:१-५,१४-१६; मर्कूस १४:१-२,१०-११; यूहन्ना ११:४५-५३)
1च त्हेर प्लेढा आझोंबै क्हें चबै चाड खबि छेल। च त्हिंइने दुःखने फ्रेबै चाड बिमल।#प्रस १२:१-२७ 2ख्रो पिंबै खेगि चिब्मैं नेरो शास्त्रिमैं बिस्याँ येशू खैले सैब् ङ्हे बिसि दाउ ङ्ह्योरिल। दिलेया म्हिमैं म्रोंसि चमैं ङ्हिंमल। 3च त्हेर्न यहूदा इस्करियोतए सैंर दुष्ट होंइ। च यहूदा येशूए च्युसे ङ्हिं चेलामैं न्होंर्बै घ्रि मुँल। 4यहूदा ख्रो पिंबै खेगि चिब्मैं नेरो मन्दिर रुँबर टिबै सिपाइमैं न्होंर्बै कप्तानमैं ङाँर ह्यासि, “ङइ येशू ङो सेमिंस्यो बिसि सल्ला लइ।”
5यहूदाए ताँ थेसि चमैं सैं तोंसि “ङिइ क्हि मुइ पिंस्यो,” बिसि बाछा फैइ।
6चमैंइ छबिमा इस्करियोतइ “तम्” बिसि म्हिए हुल आरेबै त्हेर येशू क्हाल् पिंबै दाउ ङ्ह्योइ।
येशूजी चेलामैंने दुःखने फ्रेबै चाडए भोज चब
(मत्ती २६:१७-३०; मर्कूस १४:१२-२६; यूहन्ना १३:२१-३०; १ कोरिन्थी ११:२३-२५)
7प्लेढा आझोंबै क्हें चबै चाडर म्हिमैंइ क्यु झज ख्रो पिंसि दुःखने फ्रेबै चाड म्हाँदिमल। 8खीजी पत्रुस नेरो यूहन्नालाइ “ह्यासि ङ्योए ल्हागिर दुःखने फ्रेबै चाडए भोज तौदु लद्,” बिसि कुलइ।
9चमैंइ खीने “ओ गुरु, ङिइ चु भोज खनिर तौदु लले?” बिसि ङ्योएइ।
10येशूजी चमैंने बिइ, “क्हेमैं सहरर फेमा क्युए गौरि नोबै च्हमिरि घ्रि क्हेमैंने त्होब्मुँ। चए लिलिन् च होंबै धिंर्न ह्याद्। 11झाइले च धिं क्ल्हेने ‘ङइ ह्रोंसए चेलामैंने दुःखने फ्रेबै चाडए भोज चबै कोठा खनिर जा? बिसि गुरुजी क्हिने ङ्योएमुँ,’ बिद्। 12छले ङ्योएमा चइ क्हेमैं फितलर्बै छेनाले सजेथेंबै कोठा उँइँमिंब्मुँ। चर्न क्हेमैंइ भोजए तौदु लद्।” 13छले चमैं ह्यामा खीजी खै बिल छाबन् स्याइ। झाइले चमैंइ दुःखने फ्रेबै चाडए भोज चर्न तयार लइ।
14लिउँइँ चब् चबै त्हे तमा येशू कुल्मिंबै चेला चिब्मैंने बालु चब् चबर क्हुँइ। 15येशूजी चमैंने बिइ, “ङइ दुःख नोब् भन्दा ओंसों क्हेमैंने बालु दुःखने फ्रेबै चाडए भोज चबै सैं मुँ। 16तलेबिस्याँ ङ क्हेमैंने बिमुँ, परमेश्वरए सैंर मैंब् धों आतन् समा#२२:१६ परमेश्वरए सैंर मैंब् धों आतन् समा ग्रिक क्युइर, परमेश्वरए ग्याल्सर तारे ङइ चु भोज धबै चरिब आरे।”
17च लिउँइँ येशूजी प्हेला छेसि परमेश्वरलाइ धन्यबाद पिंसि चेलामैंने बिइ, “चु प्हेला किंसि क्हेमैं न्होंरि चुसि थुँन्। 18तलेबिस्याँ ङ क्हेमैंने बिमुँ, परमेश्वरजी खन्तोंदोंन् ग्याल्स आलन् समा#२२:१८ ग्रिक क्युइर, परमेश्वरए ग्याल्स आखन् समा ङइ अँगुरए खु धबै थुरिब् आरे।”
19झाइले येशूजी योर क्हें किंइ धै परमेश्वरलाइ धन्यबाद पिंसि क्हें लुँसि चेलामैं चुमिंसि बिइ, “चु क्हें ङए ज्यु ग। क्हेमैंए ल्हागिर ङए ज्यु ख्रो पिंब् ग। छतसि ङ मैंबै ल्हागिरि छलेन् क्हें चब्रें लद्।” 20छलेन क्हें चल् खाँबै लिउँइँ येशूजी प्हेला घ्रि छेइ, झाइले चमैंने पिंसि बिइ, “चु क्हेमैंए ल्हागिर बगेबै ङए को ग। चु को परमेश्वरजी क्हेमैंने फैबै छारा बाछाए छाप ग।#यर ३१:३१-३४
21“दिलेया ङ्ह्योद्! ङलाइ क्हाल् पिंबै म्हि ङने बालुन् चरिइमुँ।#भज ४१:९ 22तलेबिस्याँ परमेश्वरजी बिब् धोंलेन् म्हिए च्ह सिलन् त्हुब्मुँ। दिलेया धिक्कार मुँ ङ शत्तुरमैंए योर पिंवाबै म्हि चइ थेबै दुःख योंब्मुँ।” 23चु ताँ थेसि चेलामैंइ “ङ्योए न्होंरि छाबै के लब खाब मुँगे?” बिसि खें-खेंमैंन् ङ्योएबर होंइ।
खाब् थेब बिबै बारेर
24च लिउँइँ “ङ्योए न्होंर ताँन् भन्दा थेब खाब् तब् ङ्हें?” बिसि चेलामैंए न्होंरि हानथाप तबर होंइ।#मत्ती १८:१; मर्क ९:३४; लूक ९:४६ 25छतब् म्रोंसि येशूजी चमैंने बिइ, “चु ह्युलर्बै म्रुँमैंइ जनताए फिर हुकुम लम्। छले हुकुम लब्मैंइ खेंमैंलाइ छ्याँबै के लबै म्हि बिद् बिसि बिबर ल्हैदिम्। 26दिलेया क्हेमैं न्होंरि छ तल् आत। क्हेमैं न्होंरि ताँन् भन्दा थेबै म्हि ताँन् भन्दा च्योंने तल् त्हुम्। धै चिबै के लबै म्हिइ अरूमैंए सेवा लल् त्हुम्।#मत्ती २३:११; मर्क ९:३५#मत्ती २०:२५-२७; मर्क १०:४२-४४ 27चब् चबर टिबै म्हि नेरो चब् पामिंबै म्हि न्होंरि खाब् थेब् जा? च ब् चबर टिबै म्हि थेब् आङिं वा? दिलेया क्हेमैं न्होंरि ङम् सेवा लबै म्हि धों तइमुँ।#यूह १३:१२-१५
28“छतसि क्हेमैं ङए दुःखर ल्होल् खाँब्मैं तद्। 29ङए आबाजी ङलाइ ग्याल्स घ्रि पिंइ। ङज्यै या क्हेमैंलाइ पिंमुँ। 30झाइले क्हेमैं या ङए ग्याल्सर ङने बालु चल् योंब्मुँ, थुँल् योंब्मुँ। धै राजगद्दिर क्हुँसि इस्राएलर्बै च्युसे ङ्हिं कुलए निसाफ लब्मुँ।”#मत्ती १९:२८
पत्रुसइ “खी ङो आसे” बिम् बिसि येशूजी ओंसोंन् बिब
(मत्ती २६:३१-३५; मर्कूस १४:२७-३१; यूहन्ना १३:३६-३८)
31“ओ सिमोन, सिमोन, थेद्! म्हिमैंइ नौलिर गहुँ टाब् धोंले दुष्टइ क्हि टाल् योंरिगे बिसि यो छ्युँ लइमुँ। 32दिलेया क्हिए बिश्वास आम्हरिगे बिसि ङइ क्हिए ल्हागिर प्राथना लइ। छतसि क्हि धबै ङ ङाँइन एखब्मुँ, क्हिए सैं ङ ङाँइ एबै लिउँइँ ह्रोंसए आघें अलिमैंए सैं भोंब् लमिंन्।”
33छबिमा सिमोन पत्रुसइ खीने बिइ, “ओ प्रभु, ङ क्हिने बालुन् झेलर टिल् त्हुलेया, सिल् त्हुलेया तयार मुँ।”
34येशूजी पत्रुसने बिइ, “पत्रुस, ङ क्हिने बिमुँ, क्हिइ सोंखे समा ङ ङो आसे आबिन् समा तिंयाँ नग भाले ओररिब् आरे।”
सेलाँ नेरो मुइए ताँ
35येशूजी चमैंने बिइ, “ङइ क्हेमैं मुइ, झोला, जुत्ता तोइ आबोल्ले कुलमा क्हेमैंलाइ तोइ सैलेया खाँचो तल् वा?”#मत्ती १०:९-१०; मर्क ६:८-९; लूक ९:३; १०:४
चमैंइ “अहँ, तोइ सैलेया खाँचो आत,” बिइ।
36येशूजी बिइ, “दिलेया तारेपिरु ‘मुइ मुँब्मैंइ मुइ किंन्, झोला मुँब्मैंइ झोला नोद्’, झाइले ‘सेलाँ आरेब्मैंइ ह्रोंसए बखु चुँसि सेलाँ किंरिगे।’#२२:३६ मतलब, दुःख तबै त्हे खब्मुँ। चु ताँ सैंर मैंरिल् त्हुम्। 37ङ क्हेमैंने बिमुँ, ‘खी अपराधिमैं धोंबन् तइ’ बिसि प्ह्रिबै ताँ ङए छ्हर पूरा तलन् त्हुम्। क्ह्रोंसेंन ङए बारेर प्ह्रिबै ताँ पूरा तसिन् मुँ।”#यशै ५३:१२ 38दिलेया सेलाँए बारेर्बै ताँ तिफुँइ आक्होसि चेलामैंइ बिइ, “ओ प्रभु, ङ्ह्योत्ति! चुर सेलाँ ङ्हिं मुँ।”
छबिमा येशूजी “तइ! मुँरिगे,” बिइ।
जैतून कोंर येशूए प्राथना
(मत्ती २६:३६-४६; मर्कूस १४:३२-४२)
39च क्ल्ह्योउँइँले त्होंसि सोदा ह्याब् धोंले येशू जैतून कोंउँइँ ह्याइ। चेलामैं या खीए लिलिन् ह्याइ। 40च क्ल्ह्योर फेखसि येशूजी चेलामैंने बिइ, “क्हेमैं ङोर आफेरिगे बिसि प्राथना लरिद्।”
41च लिउँइँ येशू दे क्याइ दने ह्यासि च्हि तुँसि छले प्राथना लइ। 42“ओ आबा, क्हिए इच्छा मुँस्याँ ङ ङाँइँले चु दुःख स्योमिंन्। दिलेया ङए इच्छा आङिं, क्हिए इच्छा पूरा तरिगे।”
43च लिउँइँ स्वर्गउँइँले स्वर्गदूत घ्रि येशू ङाँर युसि खीलाइ सैदिल् खाँबै भों पिंइ। 44च त्हेर येशूए सैंर बेल्ले दुःख मुँल। छतमा यो छ्युँ लदै खीजी प्राथना लरिमा खीए छैब् थे-थेब कोए थब्लो धों तब सर तेरिल।
45छले प्राथना लसि येशू ह्रोंसए चेलामैं ङाँर एखमा चमैं शोकइ लमा नारसि रोरिब स्याइ। 46येशूजी चमैंने बिइ, “क्हेमैं तले रोरिल? रेद्, पापर आच्होरिगे बिसि प्राथना लद्।”
येशू क्हाबोब
(मत्ती २६:४७-५६; मर्कूस १४:४३-५०; यूहन्ना १८:३-११)
47येशूजी छ बिरिमा म्हिए हुल चर फेखइ। च्युसे ङ्हिं चेलामैं न्होंर्बै यहूदा च म्हिमैंए ओंसों ओंसों खसि येशूलाइ म्वें लबर खीए ङाँर खइ। 48येशूजी चने बिइ, “ओ यहूदा, ‘क्हिइ’ म्हिए च्हलाइ म्वें लब् धों लसि खीए फिर धोका पिंदा ङ्हाँइमुँ वा?”#२२:४८ म्वें लब म्हाँया उँइँब् ग। यहूदाइ म्हाँया लब् धों लसि येशूलाइ धोका पिंइ।
49येशूने मुँबै चेलामैंइ तबि छेबै ताँमैं क्होसि “ओ प्रभु, ङिइ चमैंलाइ सेलाँइ प्रिंवाले वा?” बिसि ङ्योएइ। 50झाइले चेलामैं न्होंर्बै घ्रिइ सेलाँ (तरबार) ट्हुइसि ख्रो पिंबै खेगि क्रथेए के लबै म्हि घ्रिए क्योलोउँइँबै न्ह च्वाट्टन् थोवाइ।
51दिलेया येशूजी “तै मुँरिगे! छ आलद्!” बिसि खीजी च के लबै म्हिए न्ह छुइसि सल् लमिंइ।
52ख्रो पिंबै खेगि चिब्मैं, मन्दिरर्बै थेबै फौजमैं नेरो यहूदीमैंए चिबनाँब्मैं येशूलाइ क्हाबर खल। छले खब् म्रोंसि येशूजी चमैंने बिइ, “ङ ह्यो वा? छले क्हेमैं सेलाँ नेरो प्हरे छेसि ङ क्हाबर खब? 53ङ त्हिंइ ह्रोंसे क्हेमैंने बालुन् मन्दिरर मुँमा क्हेमैंइ ङ आक्हा। दिलेया तारे क्हेमैंए त्हे तइमुँ। छतसि क्हेमैं तो के लबर खल, च के लद्, तलेबिस्याँ मिछु खैबर्बै शक्तिए#२२:५३ मिछु खैबर्बै शक्तिए मतलब, दुष्ट बिबै मोंमैंए म्रुँए शक्ति। के लबै त्हे चुन् ग।”#लूक १९:४७; २१:३७ 54च त्हेर्न म्हिमैंइ येशू क्हासि ख्रो पिंबै खेगि क्रथेए धिंर बोइ, पत्रुस बिस्याँ दे ह्रेंगोउँइँलेन् खीए लिलि लिलि ह्याइ।
पत्रुसइ “येशू ङो आसे” बिब
(मत्ती २६:५७-५८,६९-७५; मर्कूस १४:५३-५४,६६-७२; यूहन्ना १८:१२-१८,२५-२७)
55ख्रो पिंबै खेगि क्रथेए धिंर्बै ह्युर म्हिमैं मि त्हेरिल। छतसि पत्रुसै या चमैंने बालुन् क्हुँइ। 56केब्स्यो घ्रिइ पत्रुस मि त्हेरिब म्रोंसि च ङाँइ ङ्ह्योसि “चु म्हि या येशूने बालुन् मुँल,” बिइ।
57दिलेया पत्रुसइ च च्हमिरिने “ओ नानि, ङइ खी ङो आसे,” बिइ।
58तिस्याँदे लिउँइँ अर्को म्हि घ्रिइ चलाइ म्रोंसि बिइ, “क्हि या चमैं न्होंर्बै आङिं वा?”
दिलेया पत्रुसइ चने या “अहँ, ङ चए थु आङिं,” बिइ।
59घण्टा घ्रिदे लिउँइँ अर्को म्हि घ्रिइ बिइ, “चु म्हि या येशूनेन् बालु मुँल। तलेबिस्याँ चु या गालीलथेंन् मुँन।”
60दिलेया पत्रुसइ बिइ, “अबुइ, तो ताँ लल? क्हिइ बिबै ताँ ङइ तोइ आक्हो!” पत्रुसइ छ बिरिबै तोंर्न नग भाले ओरइ। 61छतमा प्रभु येशूजी लिग्याँ तोसि पत्रुसलाइ ङ्ह्योमा “क्हिइ सोंखे समा ङलाइ ङो आसे आबिन् समा नग भाले ओररिब् आरे,” बिसि येशूजी बिबै ताँ पत्रुसइ मैंइ। 62झाइले पत्रुस बैरु त्होंह्यासि बेल्ले क्रोइ।
येशूलाइ धोंब
(मत्ती २६:५९-६८; मर्कूस १४:५५-६५; यूहन्ना १८:१९-२४)
63येशू रुँबै म्हिमैंइ खीए बिल्लि लसि धोंइ। 64चमैंइ खीए मि हुवासि प्रिंदै “लु अगमबाणि बिद्, बित्ति क्हिलाइ प्रिंब खाब् जा? बिसि ङ्योएइ।” 65चमैंइ खीए बिरोधर अरू ल्हें आब्रु वाबै ताँमैं या बिइ।
येशू थेबै म्हि च्होंए उँइँर राब
(मत्ती २६:५७-६६; मर्कूस १४:५५-६४; यूहन्ना १८:१३-१४,१९-२४)
66नाँ न्होंबै तोदोंन् यहूदी ह्युलर्बै चिब्मैं, ख्रो पिंबै खेगि चिब्मैं नेरो शास्त्रिमैं ताँन् खागु तसि येशूलाइ थेबै म्हि च्होंए उँइँर बोमा चमैंइ बिइ, 67“क्हि परमेश्वरजी कुल्मिंबै म्रुँ ख्रीष्ट ग बिस्याँ ङिने बिद्।”
येशूजी चमैंने बिइ, “ङइ बिनाबिलेया क्हेमैंइ आक्वें। 68ङइ तो ङ्योएलै या क्हेमैंइ ज्वाफ आपिं। 69दिलेया तारे म्हिए च्ह परमेश्वरए थेबै भों नेरो शक्ति मुँबै क्योलोउँइँ टिब्मुँ।”
70चमैं ताँनइ बिइ, “छ बिस्याँ क्हि परमेश्वरए च्हन् वा?”
येशूजी बिइ, “ङ चन् ग बिसि क्हेमैंइन बिइमुँ।”
71येशूए ताँ थेसि चमैंइ खें-खेंमैंन् बिइ, “ङ्योइ चए सुँउँइँलेन् थेइ, छतसि ङ्योलाइ अरू ग्वाइ तले चैदिइ?”
Currently Selected:
लूका 22: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
