लूका 2
2
येशू फिब
(मत्ती १:१८-२५)
1यूहन्ना फिबै त्हेजरे ह्युल तोगोंर्बै म्हिमैं च्योबै ल्हागिर मिं प्ह्रिल् त्हुम् बिसि अगस्टस बिबै रोमी म्रुँइ बिइ। 2(चु ओंसोंबै जनसंख्या च्योमा क्युरिनियस बिबै म्हि सिरिया ह्युलर्बै रोमी क्रथे मुँल।) 3ताँन् म्हिमैं ह्रों-ह्रोंसए नाँसर मिं प्ह्रिबर ह्याइ।
4छतसि योसेफै या गालील ह्युलर्बै नासरत सहरउँइँले यहूदीया ह्युलए बेथलेहेम बिबै नाँसर ह्याइ, तलेबिस्याँ चए खे दाऊद म्रुँ च बेथलेहेम नाँसर्बै मुँल। 5चइ ह्रिथेंबै मरियम बोसि मिं प्ह्रिबर ह्याइ। च त्हेर मरियम प्हसे नोसिन् मुँल, 6धै बेथलेहेमर मुँमा मरियम सुत्केरि तबै त्हे तइ। 7झाइले चइ ह्रोंसए च्ह थेब फिसि क्वेंइ म्होरसि खेदोमैंइ चब् चबै डोंडर नेथेंइ, तलेबिस्याँ चमैं टिबै ल्हागिर ठाँटिर क्ल्ह्यो आरेल।
प्ह्रोंछैंमैं नेरो स्वर्गदूतमैं
8च बेथलेहेम बिबै नाँसए पखजरे प्ह्रोंछैंमैं ह्रोंसए क्युमैं रुँबर म्हुँइँसर टिरिल। 9च त्हेर्न स्वर्गदूत घ्रि चमैंए उँइँर रायुमा परमेश्वरए चारबै ह्वे चमैंए कारग्युले चारइ। छतमा चमैं बेल्ले ङ्हिंयाँइ। 10दिलेया स्वर्गदूतइ चमैंने बिइ, “आङ्हिंन्! तलेबिस्याँ ङ क्हेमैंने बेल्ले सैं तोंबै छ्याँबै ताँ बिम्। चु ताँ ताँन् म्हिमैंए ल्हागिर तब्मुँ। 11तिंयाँ बेथलेहेम बिबै दाऊदए नाँसर क्हेमैंए ल्हागिर मुक्ति पिंबै म्हि फिइमुँ। खीन परमेश्वरजी कुल्मिंबै प्रभु ख्रीष्ट ग। 12चु ताँ क्हेमैंइ खैले सेम् बिस्याँ च भर्खर फिबै कोलो क्वेंइ म्होरसि खेदोमैंइ चब् चबै डोंडर नेथेंब क्हेमैंइ म्रोंब्मुँ।”
13छ बिरिबै तोदोंन् अरू ल्हें स्वर्गदूतमैं या तिखेर्न चमैं ङाँर रायुसि परमेश्वर बेल्ले थेब मुँ बिसि छले क्वे प्रिंइ,
14“स्वर्गरि परमेश्वए मिं थेब तरिगे,
धै पृथ्बीरि खीजी त्हाँबै म्हिमैंने शान्ति तरिगे!”
15छले परमेश्वरए मिं क्वेसि स्वर्गदूतमैं स्वर्गउँइँ एह्याबै लिउँइँ। प्ह्रोंछैंमैंइ खेंमैंए न्होंर ताँ लइ, “तारे परमेश्वरजी ङ्योलाइ बिब् धोंलेन् बेथलेहेम नाँसर ह्याले धै चर तबै ताँमैं ङ्ह्योले।” 16छ बिसि चमैं आतुरले ह्यामा मरियम, योसेफ नेरो डोंडर नेथेंबै च्युथिरि कोलो म्रोंइ। 17च कोलो म्रोंमा स्वर्गदूतइ खेंमैंने चु कोलोए बारेर बिबै ताँ चमैंइ ताँन् म्हिमैंने बिमिंइ। 18प्ह्रोंछैंमैंइ बिबै ताँ थेब्मैं ताँन् प्लेटोयाइ। 19दिलेया मरियमइ चु ताँन् ताँ छेन्ले मैंसि सैंर थेंइ। 20झाइले स्वर्गदूतइ खै बिल छाबन् प्ह्रोंछैंमैंइ म्रोंल् योंसि चमैंइ परमेश्वरए मिं बेल्ले थेब् लसि खीलाइ धन्यबाद पिंसि क्वे प्रिंदै एह्याइ।
कोलोए मिं येशू थेंब
21प्हसे फिसि प्रेरोर कोलोए ज्युर चिनु लसि खीए मिं येशू थेंइ, तलेबिस्याँ च मिं प्हसे नोब् भन्दा ओंसोंन् स्वर्गदूतइ आमाने बिथेंल।#लेबी १२:३; लूक १:३१
येशूलाइ मन्दिरर पखब
22परमेश्वरजी ङ्योए खे मोशाने पिंबै ठिमर बिब् धोंले चमैंए रो छोंल् खाँबै लिउँइँ चमैंइ कोलो येशू परमेश्वरए ङाँर अर्पण लबर यरूशलेम सहरर बोइ। 23तलेबिस्याँ “च्ह थेब्मैं याहवेहए ल्हागिर पबित्र तब्मुँ,” बिसि परमेश्वरए छ्वेर प्ह्रिइमुँ।#प्रस १३:२,१२ 24झाइले परमेश्वरए छ्वेर बिब् धोंले “तिजोर तोंगु मुँले परेवाए झज तिजोर मुँले” किंसि चमैं ख्रों पिंबर मन्दिरर ह्याइ।#लेबी १२:६-८
25च त्हेर यरूशलेम सहरर शिमियोन बिबै म्हि घ्रि टिमल। च छ्याँबै के लबै म्हि नेरो परमेश्वर म्हाँदिबै म्हि मुँल, चने बालु परमेश्वरए पबित्र प्ल्ह मुँल। इस्राएली म्हिमैंलाइ परमेश्वरजी जोगेमिंब्मुँ बिसि शिमियोनइ ल्हें बर्ष ओंनोंन् परमेश्वरए घ्याँ ङ्ह्योरिल। 26परमेश्वरजी कुल्मिंबै म्रुँ ख्रीष्ट आम्रोंन् समा क्हि आसि बिसि पबित्र प्ल्हजी चने ओंसोंन् था पिंल। 27झाइले पबित्र प्ल्हजी बिब् धोंले शिमियोन मन्दिर न्होंर होंमा। परमेश्वरए छ्वेर बिब् धोंले लबर कोलो येशूलाइ आबा-आमाइ मन्दिर न्होंर पखइ। 28झाइले चइ कोलोलाइ ह्रोंसए क्वेंदर किंसि परमेश्वरलाइ धन्यबाद पिंसि बिइ,
29“ओ प्रभु, तोगो क्हिजी ङने बिबै ताँ पूरा लमिंइमुँ,
तारे ङ छेनाले सियाल् खाँम्।
30तलेबिस्याँ क्हिजी कुल्मिंबै म्रुँ ख्रीष्ट ङए मिइ म्रोंल् योंइ। 31ताँन् ह्रेंर्बै म्हिमैंइ खीलाइ म्रोंरिगे बिसि क्हिजी कुल्मिंब् ग।
32चु कोलोन् अरू ह्रेंर्बै म्हिमैंलाइ क्हिए घ्याँ उँइँमिंबै चारबै ह्वे ग,
छलेन क्हिए इस्राएली ह्रेंर्बै म्हिमैंए मिं थेब् लमिंबै चारबै ह्वे खीन् ग।”#यशै ४२:६; ४९:६; ५२:१०
33चु ताँ थेमा कोलोए आबा-आमा प्लेटोयाइ। 34झाइले शिमियोनइ चमैं फिर आशिक पिंदै मरियमने बिइ,
“थेद्, इस्राएलीमैं न्होंरि ल्हें म्हि नास लबर नेरो ल्हें म्हि जोगेमिंबर
चु कोलो कुलइमुँ।
चु कोलो परमेश्वरजी कुलबै चिनु तब्मुँ,
ल्हें म्हिइ चु कोलोए बिरोधर पोंब्मुँ।
35छतमा खीजी म्हिमैंए सैं न्होंर्बै ताँमैं उँइँमिंब्मुँ।
झाइले सेलाँइ (तरवारइ) म्लोब् धोंले क्हिए सैं बेल्ले नब्मुँ।”
अगमबक्तास्यो हन्ना माँब
36झाइले च मन्दिरर हन्ना अगमबक्तास्यो मुँल। चए आबा फनुएल बिब् मुँल, च आशेरए कुलर्बै मुँल। च हन्ना ब्ह्या लबै ङिदिंर्न प्युँ सियासि म्हरेस्यो तयाल। 37च प्रेच्युसे प्लिदिं बर्ष तयाल। दिलेया च बर्त टिसि प्राथना लसि त्हिंयाँ म्हुँइँसा परमेश्वर सैंर मैंसि मन्दिरर्न टिरिमल। 38च त्हेर्न हन्ना खसि परमेश्वरलाइ धन्यबाद पिंबर होंइ। झाइले परमेश्वरजी यरूशलेम जोगेमिंब्मुँ बिसि घ्याँ ङ्ह्योरिबै ताँन् म्हिमैंने चइ चु कोलोए बारेर ताँ लमल।
नासरत नाँसर एह्याब
39परमेश्वरए छ्वेर बिब् धोंले लल् त्हुबै ताँन् के लल् खाँसि योसेफ नेरो मरियम कोलो बोसि गालील ह्युलर्बै नासरत बिबै ह्रोंसए नाँसर एह्याइ।#मत्ती २:२३ 40परमेश्वरए आशिक खीए फिर मुँल। छतसि कोलो फारदै भोंब नेरो ह्रब-सेब तदै ह्याइ।
कोलो येशू मन्दिरर मुँब
41कोलोए आबा आमा सालै ह्रोंसे दुःखने फ्रेबै चाड म्हाँदिबर यरूशलेमर ह्याब्रें लमल।#प्रस १२:१-२७; व्य १६:१-८ 42येशू च्युसे ङ्हिंदिंर्बै तमा येशूलाइ बोसि चमैं चाड म्हाँदिबर यरूशलेमर ह्याइ। 43चाड म्हाँदिल् खाँबै लिउँइँ येशूए आबा आमा धिंर एह्याइ। येशू बिस्याँ यरूशलेमर्न टिइ। येशू चर्न टियाइ बिसि आबा आमाइ आसेल। 44खी घ्याँर प्रबै म्हिमैंए हुलर मुँलै ङ्हाँसि चमैं तिंगेंबै घ्याँ प्रइ ह्याइ। म्हुँइँस तबै लिउँइँ चमैंइ ह्रजे-म्हजेमैं नेरो ङो सेब् मिं सेब्मैंए न्होंर येशूलाइ म्हैबर होंइ। 45दिलेया येशू खनिरै आयोंमा चमैं धबै येशू म्हैदै यरूशलेमर्न एखइ। 46सोंरो लिउँइँ चमैं मन्दिरर ह्यामा येशू परमेश्वरए ठिम लोमिंबै म्हिमैंए म्हाँजोर क्हुँसि चमैंए ताँ थेसि चमैंने ताँमैं ङ्योएरिब स्याइ। 47खीए क्होबै शक्ति नेरो छ्याँबै ज्वाफमैं पिंब् म्रोंसि खीए ताँ थेब्मैं ताँन् प्लेटोयाइ। 48खी म्रोंसि आबा आमा या प्लेटोयाइ। धै आमाइ खीने बिइ, “ठागु, क्हिजी तले ङि छाबै दुःख पिंल? क्हिए आबा नेरो ङ बेल्ले न्हुँ लसि क्हिलाइ म्हैदै प्रइ!”
49येशूजी चमैंने बिइ, “क्हेमैंइ तले ङलाइ म्हैरिल? ङए आबाए धिंर ङ मुँल् त्हुम् बिब क्हेमैंइ आसेल् वा?” 50दिलेया येशूजी बिबै ताँ मरियम नेरो योसेफइ आक्हो।
51च लिउँइँ येशू चमैंने बालु नासरत नाँसर एह्याइ, धै आबा आमाइ बिब् ङिंसि टिइ। चर म्रोंबै ताँन् ताँमैं आमाइ सैंर थेंइ। 52येशू बिस्याँ ज्ञान बुद्धि नेरो ज्युर फारदै परमेश्वर नेरो म्हिमैंइ खोबै म्हि तदै ह्याइ।#१ शमू २:२६; हितो ३:4
Currently Selected:
लूका 2: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
