लूका 18
18
म्हरेस्यो नेरो नियाधिश
1चेलामैं खोंयोंन् बिलै प्राथना लरिगे धै सैं च्योंब आलरिगे बिबै सैंले येशूजी अहान् घ्रि बिइ। 2“सहर घ्रिर नियाधिश घ्रि मुँल। च परमेश्वर म्रोंसेया आङ्हिंमल, म्हिमैंलाज्यै या तोइ वास्ता आलमल। 3च सहरर म्हरेस्यो घ्रि मुँल। च नियाधिश ङाँर ह्याब्ब्रें लसि ‘ङए शत्तुरइ ङ बेल्ले दुःख पिंइमुँ। छतसि ङए निसाफ लमिंन्,’ बिमल। 4ल्हें त्हे समा नियाधिशइ थेबै न्ह आलल्ले टिइ। दिलेया ‘ङइ परमेश्वरै या आम्हाँदि, म्हिमैंलाज्यै या तोइ वास्ता आल, दिलेया चु म्हरेस्योइमि छोंरों ङ्हाँनन् लइ,’ बिसि चइ सैं न्हों-न्हों मैंइ। 5छतसि तारे चुए निसाफ लमिंल् त्हुइ। निसाफ आलमिंस्याँ च खब्ब्रें लसि ङलाइ छोंरो ङ्हाँन् लब्मुँ।”
6प्रभुजी धबै चमैंने बिइ, “च अधर्मि नियाधिशइ तो बिइमुँ, मैंन्दि। 7छलेन परमेश्वरजी त्हाँबै म्हिमैंइ त्हिंयाँ म्हुँइँस खीने प्राथना लब्मैंए निसाफ खीजी आलमिं रो वा? क्हेमैंए ल्हागिर निसाफ लमिंबर खीजी क्हैल् लम् रो वा? 8ङ क्हेमैंने बिमुँ, खीजी ह्रोंसए म्हिमैंए ल्हागिरि युनन् निसाफ लमिंब्मुँ। दिलेया म्हिए च्ह धबै ह्युलर युमा बिश्वास लसि टिरिब्मैं खीजी त्होल् योंलै रो वा?”
प्राथना लबै म्हि ङ्हिं
9ङ ठिक के लबै म्हि ग बिब् प्हैंसि अरूमैंलाइ तो धोंइ आङ्हाँबै को-कोइ म्हिमैंलाइ येशूजी चु अहान् बिइ, 10“म्हि ङ्हिं मन्दिरर प्राथना लबर ह्याइ। चमैं ङ्हिंर घ्रि फरिसी टोलिर्बै म्हि, अर्को रोमी म्रुँए ल्हागिर बालि रेबै म्हि मुँल।#१८:१० च त्हेर युहूदिमैंइ बालि रेब्मैं हेल लमल, तलेबिस्याँ यहूदीमैंए सैंर चमैंइ रोमी म्रुँए ल्हागिर के लमा यहूदी म्हिमैं लुसि ख्याब चम् बिसि मैंमल। 11फरिसीइ रासि सैं न्हों-न्हों छले प्राथना लइ, ‘ओ परमेश्वर, ङ क्हिलाइ धन्यबाद पिंमुँ, तलेबिस्याँ ङ अरू म्हिमैं धोंले लोब लब, स्योर तेब, च्हमिरिमैंए फिर आछ्याँबै सैं मैंबै म्हि आङिं, धै चु बालि रेबै म्हि धों तबै या ङ आङिं। 12ङ सदर ङ्हिब्ले बर्त टिम्। ङइ योंबै तोन्दोंरि सैमैंउँइँले च्युबाँर्बै तिबाँ क्हिए मिंर पिंम्।’
13“दिलेया च बालि रेबै म्हि ह्रेंगोन् रासि ‘ङम् स्वर्गउँइँ ङ्ह्योबै लायकर्बै आरे’ ङ्हाँइ। धै सैं च्योंने लदै ह्रोंसए तिंर ठौदिदै ‘ओ परमेश्वर, ङ पापि म्हि ग। ङए फिर ल्हयो खमिंन्,’ बिइ।
14“ङ क्हेमैंने बिमुँ, च फरिसी भन्दा बालि रेबै म्हि परमेश्वरए उँइँर ठिक ठर्दिसि धिंर एह्याइ। तलेबिस्याँ तोगो च्योंने तसि कुरब्मैंलाइ परमेश्वरजी थेब लमिंब्मुँ। तोगो ङम् ङन् ग बिसि थेब् प्हैंब्मैं परमेश्वरजी कुरवाब्मुँ।”#मत्ती २३:१२; लूक १४:११
येशूजी कोलोमैं आशिक पिंब
(मत्ती १९:१३-१५; मर्कूस १०:१३-१६)
15खेंमैंए कोलोमैंए फिर येशूजी यो थेंसि आशिक पिंरिगे ङ्हाँसि म्हिमैंइ खी ङाँर कोलोमैं पखइ। कोलोमैं पखब् म्रोंसि चेलामैंइ चमैं हौदिइ। 16दिलेया येशूजी कोलोमैं ह्रोंस ङाँर हुइसि चेलामैंने बिइ, “कोलोमैं ङ ङाँर खल् पिंन्। चमैंलाइ आखो आबिद्, तलेबिस्याँ परमेश्वरए ग्याल्स चुमैं धों तब्मैंल् ग।#१८:१६ ग्रिक क्युइर, परमेश्वरए ग्याल्स चु धोंबै म्हिमैंल मुँ। 17क्ह्रोंसेंन्ले ङ क्हेमैंने बिमुँ, ह्रोंसए आबा-आमाइ बिब चु च्योंबै कोलोमैंइ ङिंम्। छतसि क्हेमैं या परमेश्वरजी बिब् ङिंन्। आङिंइ बिस्याँ क्हेमैं परमेश्वरए ग्याल्सर होंल् योंरिब् आरे।”
प्लबै म्हिए सैं परमेश्वरउँइँ एब गारो तम्।
(मत्ती १९:१६-३०; मर्कूस १०:१७-३१)
18चु ताँ थेसि यहूदी चिब घ्रिइ येशूने “ओ स्वाबै गुरु! खोंयोंइ आखाँबै छ्ह योंबै ल्हागिर ङइ तो लल् त्हुम्?” बिसि ङ्योएइ।
19येशूजी चने बिइ, “क्हिइ ङने तले स्वाब बिमुँ? परमेश्वर बाहेक अरू खाबै या स्वाब आरे। 20परमेश्वरए छ्वेर्बै ताँ क्हिइ आसे वा? ‘व्यभिचार आलदु, म्हि आसैदु, आह्योदु, स्योर आतेदु धै ह्रोंसए आबा-आमाइ बिब ङिंनु,’ बिसि चर प्ह्रिइमुँ,” आङिं वा।#प्रस २०:१२-१६; व्य ५:१६-२०
21चइ बिइ, “चु ताँमैंम् ङइ फ्रेंसि ओंनोंन् लइमुँ।”
22चए ताँ थेसि येशूजी चने बिइ, “अझै क्हिइ लल् त्हुबै के घ्रि चैमुँ। क्हिने मुँबै सैमैं ताँन् चुँसि योंबै मुइ ङ्हाँदुमैं चुमिंन्, धै ङए लिलि प्रद्, छलस्याँ क्हिइ स्वर्गर सै न्होर योंब्मुँ।”
23येशूए ताँ थेसि चए लि छु तयाइ। तलेबिस्याँ च बेल्ले प्लबै म्हि मुँल।
24चए लि छु तब् म्रोंसि येशूजी चने बिइ, “प्लबै म्हिमैं परमेश्वरए ग्याल्सर होंब बेल्ले गारो मुँ! 25तलेबिस्याँ प्लबै म्हिमैं परमेश्वरए ग्याल्सर होंब् भन्दा सलु (ऊँट) ताए मिर क्युलब सजिल् तम्।”
26चु ताँ थेब्मैंइ “छ बिस्याँ खाबइ मुक्ति योंल् खाँमुँ?” बिसि येशूने ङ्योएइ।
27येशूजी चमैंने बिइ, “म्हिमैंइ लल् आखाँबै के परमेश्वरजी लल् खाँम्।”
28छबिमा पत्रुसइ बिइ, “ङिम् ह्रोंसए धिं-नाँ वाथेंसि क्हिए लिलि प्रइमुँ।”
29येशूजी चमैंने बिइ, “क्ह्रोंसेंन ङ क्हेमैंने बिमुँ: परमेश्वरजी बिब म्हाँदिबै ल्हागिर खाबइ धिं-नाँ, म्रिं-प्हसे, अलि-अङाँ आबा-आमा वाथेंमुँ, 30चइ चु जुगर्न अझै च भन्दा ल्हें योंब्मुँ। धै तारे खबै जुगरै या खोंयोंइ आखाँबै छ्ह योंब्मुँ।”#१८:३० खोंयोंइ आखाँबै छ्ह योंब्मुँ मतलब खोंयोन् बिलै परमेश्वरने टिल् योंब्मुँ।
येशूजी ह्रोंस सिल् त्हुबै ताँ बिब
(मत्ती २०:१७-१९; मर्कूस १०:३२-३४)
31च लिउँइँ येशूजी ह्रोंसए च्युसे ङ्हिं चेलामैं तिराइ बोसि बिइ, “तारे ङ्यो यरूशलेम सहरउइ ह्याइन मुँ। म्हिए च्हए बारेर अगमबक्तामैंइ प्ह्रिबै ताँन् ताँ पूरा तब्मुँ। 32चमैंइ प्ह्रिब् धोंले म्हिमैंइ म्हिए च्ह अरू ह्रेंमैंए योर पिंवाब्मुँ। चमैंइ खीए बिल्लि लसि थुइब्मुँ धै खीए आब्रु वाब्मुँ। 33चमैंइ खी कोर्राइ प्रुब्मुँ धै क्रूसर च्योवासि सैवाब्मुँ। दिलेया सोंरोर खी धबै सोगों तसि खब्मुँ।”
34दिलेया चेलामैंइ चु ताँ तिफुँइ आक्हो। चु ताँए अर्थ परमेश्वरजी चमैंउँइँले लोसि थेंइ। छतसि चमैंइ येशूजी बिबै ताँ क्होल् आखाँ।
येशूजी कन म्हि म्रोंल् लमिंब
(मत्ती २०:२९-३४; मर्कूस १०:४६-५२)
35येशू यरिहो सहरर फेखमा चर मि आम्रोंबै म्हि घ्रि घ्याँए रेर क्हुँसि चर प्रब्मैंने बालु मुइ ह्रिरिल। 36घ्याँर ल्हें म्हि प्रबै कै थेसि “तो तरिइमुँ जा?” बिसि चइ ङ्योएइ।
37म्हिमैंइ चने बिइ, “नासरतथें येशू चु घ्याँउँइँलेन् खसिन् मुँ।”
38छ बिब् थेसि चइ “ओ दाऊदए च्ह येशू! ङए फिर ल्हयो लमिंन्,” बिसि ओरइ।
39घ्याँर प्रबै म्हिमैंइ “तले छले ओरल?” बिसि चलाइ हौदिइ।
दिलेया “ओ दाऊद म्रुँए कुलर्बै च्ह! ङए फिर ल्हयो खमिंन्,” बिसि च झन् ओरइ।
40चए कै थेसि येशू प्ररिबै तोंर्न रायाइ, धै “चलाइ ङ ङाँर पउ!” बिइ। धै च मि आम्रोंबै म्हि खी ङाँर पखबै लिउँइँ येशूजी चने 41“क्हिलाइ तो चैदिइ? ङइ क्हिए ल्हागिरि तो लमिंले?” बिसि ङ्योएइ।
चइ येशूने “प्रभु ङए मि म्रोंल् खाँरिगे,” बिइ।
42येशूजी चने बिइ, “क्हिइ ङए फिर बिश्वास लबइले क्हिए मि म्रोंल् खाँब् तयाइमुँ।” 43येशूजी छ बिबै तोदोंन् चए मि म्रोंयाँइ। झाइले च सैं तोंदै परमेश्वरए मिं क्वेदै येशूए लिलि प्रयाइ। छतब् म्रोंसि ताँन् म्हिमैंज्यै या परमेश्वरए मिं क्वेबर होंइ।
Currently Selected:
लूका 18: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
