यूहन्ना 2
2
काना नाँसर ब्ह्या
1चए नुँइँम्धों गालीलर्बै काना नाँसर ब्ह्या मुँल। येशूए आमा या चर्न मुँल। 2येशू नेरो खीए चेलामैं या च ब्ह्यार हुइल। 3चर अँगुरए प्हा नुयामा येशूए आमाइ खीने “चुमैंने प्हा खाँयाँना,” बिइ।
4येशूजी चने बिइ, “ङइ तो लल् त्हुम् बिसि क्हिइ ङने बिल् आत्हु। तलेबिस्याँ ङए के लबै त्हे अझै आतइमुँ।”
5छबिमा येशूए आमाइ चर्बै के लबै म्हिमैंने “खीजी बिब् धोंलेन् क्हेमैंइ लद्,” बिइ।
6यहूदीमैंए छ्यार चोखो तबै ल्हागिरि क्यु ल्हें चैदिमल। छतसि प्र लिटरदे क्यु त्हेबै युँमाए कुँइँडि टुग्लो चर थेंल। 7येशूजी चर्बै के लबै म्हिमैंने “कुँइँडिर क्यु खासि प्लिंल् लद्,” बिमा। चमैंइ ताँन् कुँइँडि तिगोले क्यु प्लिंमिंइ। 8च लिउँइँ खीजी चमैंने “च्युगुदे बोसि भत्यारर्बै चिबने म्ह्योंबर पिंन्,” बिमा चमैंइ च्युगुदे बोसि पिंइ।
9चिबइ च क्यु म्ह्योंमा क्ह्रोंसेंन अँगुरए प्हा तयाल। चु अँगुरए प्हा खनिउँइँले पखए बिसि चइ था आसेल, के लबै म्हिमैंइ बिस्याँ था सेल। छतमा भत्यारर्बै चिबइ प्ह्रेंरो#2:9 प्ह्रेंरो दुलहा, बेउला हुइसि बिइ। 10“म्हिमैंइमि ओंसों लिंबै प्हा थुँल् पिंसि लिउँइँ आलिंबै अँगुरए प्हा पिंम्, दिलेया क्हिइमि ताँन् भन्दा लिंबै अँगुरए प्हा तोगो समा साँथेंना!”
11धाँसे ओंसों येशूजी औदिबै चिनु गालील ह्युलर्बै काना नाँसर लइ। छले खीजी औदिबै के उँइँमिंइ, छाब् म्रोंसि चेलामैंइ खीए फिर बिश्वास लइ।
12च लिउँइँ खी ह्रोंसए आमा, अलिमैं नेरो चेलामैंने कफर्नहुम नाँसर ह्यासि दे त्हिंइ चर्न टिइ।#मत्ती ४:१३
येशूजी मन्दिर चोखो लमिंब
(मत्ती २१:१२-१३; मर्कूस ११:१५-१७; लूका १९:४५-४६)
13च त्हेर यहूदीमैंए दुःखने फ्रेबै चाड#2:13 दुःखने फ्रेबै चाड ताँ फुँच्ह्योङ ङ्ह्योद्। खबि छेमा येशू यरूशलेमर ह्याइ।#प्रस १२:१-२७ 14खी मन्दिरर ह्यामा चर र-क्यु, क्ल्या, तोंगु चुँब्मैं नेरो मुइ त्हेब्मैंइ छों लरिब् स्याइ। 15छतमा खीजी छोए ट्हो बनेसि मन्दिरउँइँले ताँन् म्हिमैं नेरो चमैंए खेदोमैं, र-क्युमैं ताँन् बैरु ल्हवाइ, धै मुइ त्हेब्मैंए टेबलमैं प्लिंमिंसि मुइ ताँन् फ्रुँवाइ 16खीजी तोंगु चुँब्मैंने “क्हेमैंए ताँन् सैमैं छुइले बोह्याद्। ङए आबाए धिंलाइ छों लबै धिं आलद्,” बिइ। 17छ लब् म्रोंसि खीए चेलामैंइ परमेश्वरए छ्वेर प्ह्रिथेंबै चु ताँ चिइ,
“ओ परमेश्वर, क्हिए धिं ङलाइ बेल्ले म्हाँया खम्।
छतसि मिइ ख्रोंब् धोंले ङए सैं बेल्ले ख्रोंइँमुँ।”#भज ६९:९
18दिलेया यहूदी चिबनाँब्मैंइ खीने बिइ, “छले छों लब्मैंलाइ ल्हावाब क्हिने तो हग मुँ? हग मुँ बिस्याँ खैबै औदिबै चिनु उँइँमुँ?”
19येशूजी चमैंने बिइ, “औदिबै के म्रोंदा ङ्हाँस्याँ क्हेमैंइ चु मन्दिर फुवाद्, धै ङइ सोंरोर्न चु बनेमिंब्मुँ।”#मत्ती २६:६१; २७:४०; मर्क १४:५८; १५:२९
20झाइले यहूदीमैंइ बिइ, “चु मन्दिर बनेबर प्लिच्युसे टुदिं छ्युल, क्हिजी सोंरोर्न बनेल् खाँम्मा?” 21दिलेया खीजी बिबै मन्दिर ह्रोंसए ज्युए बारेर मुँल। 22येशू सिसि धबै सोगों तमा खीए चेलामैंइ ओंसोंन् येशूजी बिबै ताँमैं चिइ, धै परमेश्वरए छ्वेर प्ह्रिथेंबै ताँमैं नेरो येशूजी पोंबै ताँमैं चमैंइ क्वेंइ।
23झाइले दुःखने फ्रेबै चाडए त्हेर येशू यरूशलेमर मुँमा। खीजी लबै औदिबै चिनुमैं म्रोंसि ल्हें म्हिमैंइ खीए मिंर बिश्वास लइ। 24दिलेया येशूजी चमैं फिर भर आम्हाँदि। 25तलेबिस्याँ म्हिमैंए सैं खैब तम् बिब खीजी सेइमुँ। छतसि म्हिए बारेर खाबज्यै खीलाइ लोमिंल् आत्हु।
Currently Selected:
यूहन्ना 2: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
