यूहन्ना 13
13
येशूजी ह्रोंसए चेलामैंए प्हले ख्रुमिंब
1खीजी चु ह्युल पिसि परमेश्वर आबा ङाँर ह्याबै त्हे तखइमुँ बिसि दुःखने फ्रेबै चाडए ओंसोंन् येशूजी था सेल। खीजी ह्युलर मुँबै ह्रोंसए चेलामैंने खोंयोंइ म्हाँया लरिमल, धै लिउँइँ समन् चमैंने म्हाँया लरिइ।
2दिलेया ङेसार्बै चब् चबै त्हे भन्दा ओंसोंन् दुष्टइ येशूलाइ क्हाल् पिंबै सैं इस्करयोतथें सिमोनए च्ह यहूदाए सैंर झोंल् खाँल। 3आबाजी तोन्दोंरि सै खीए योर पिंइँमुँ। धै खी परमेश्वरउँइँले युब् ग, झाइले परमेश्वर ङाँर्न ह्यासिन् मुँ बिबै ताँ येशूजी था सेल। 4छतमा खी चबै क्ल्ह्योउँइँले रेइ, धै फिर्बै क्वें प्लिसि पछ्यौर घ्रि खीए क्रेर फैइ। 5झाइले खीजी भाँडोर क्यु झोंसि चेलामैंए प्हले ख्रुमिंसि खीए क्रेर फैबै पछ्यौरइ चमैंए प्हले फ्योबर होंइ।
6खी सिमोन पत्रुस ङाँर खमा चइ खीने बिइ, “प्रभु, क्हिजी ङए प्हले ख्रुमिंब् आ?”
7येशूजी चने बिइ, “ङइ तो लरिइमुँ क्हिइ तोगो आक्हो। लिउँइँ बिस्याँ क्हिइ क्होब्मुँ।”
8पत्रुसइ खीने बिइ, “क्हिजी ङए प्हले खोंयोंइ या ख्रुरिब् आरे!”
येशूजी चने बिइ, “ङइ क्हिए प्हले आख्रुस्याँ क्हि ङए चेला तरिब् आरे।”
9सिमोन पत्रुसइ खीने बिइ, “छ बिस्याँ ओ प्रभु, ङए प्हले मत्त्रे आङिं, ङए यो नेरो क्रया ख्रुमिंन्।”
10येशूजी चने बिइ, “ख्रुल् खाँबै म्हिला प्हले मत्त्रे ख्रुल् त्हुम्, चए अरू ज्यु ताँन् चोखो मुँ। क्हेमैं चोखो मुँ, दिलेया ताँनन् आङिं।” 11तलेबिस्याँ खीलाइ क्हाल् पिंबै म्हि खीजी ङो सेल् खाँल। छतसि खीजी, “क्हेमैं ताँनन् चोखो आरे,” बिल।
12चमैंए प्हले ख्रुल् खाँबै लिउँइँ क्वें खिसि खी धबै चबर टिबै लिउँइँ चमैंने बिइ, “ङइ क्हेमैंए ल्हागिरि तो लइ बिसि क्हेमैंइ क्होइमुँ वा? 13क्हेमैंइ ङने ‘गुरु’ नेरो ‘प्रभु’ बिमुँ। चु क्हमैंइ ठिकन् बिम्, तलेबिस्याँ ङ चन् ग। 14ङ क्हेमैंए प्रभु नेरो गुरु तसेया ङइ क्हेमैंए प्हले ख्रुमिंइँमुँ बिस्याँ क्हेमैंज्यै या घ्रिइ-घ्रिए प्हले ख्रुमिंल् त्हुम्। 15तलेबिस्याँ ङइ लब् धोंले क्हेमैंज्यै या लरिगे बिसि ङइ उँइँमिंइँमुँ। छतसि क्हेमैंज्यै या छान् लद्।#लूक २२:२७ 16क्ह्रोंसेंन ङ क्हेमैंने बिमुँ, केब्छैं ह्रोंसए क्ल्हे भन्दा थेब आत, छलेन स्यार्बो चलाइ कुल्मिंबै म्हि भन्दा थेब आत।#मत्ती १०:२४; लूक ६:४०; यूह १५:२० 17क्हेमैंइ चु ताँ क्होसि छलेन् लइ बिस्याँ क्हेमैं ङ्हो सब्मैं तब्मुँ।
18“ङइ क्हेमैं ताँनए बारेर बिब् आङिं। ङइ त्हाँबै म्हि ङइ सेमुँ। दिलेया ‘ङए क्हें चबै म्हिइ ङए फिर प्हलेइ ह्याँइ’#भज ४१:९ दिलेया ठिमर प्ह्रिबै ताँ पूरा तरिगे बिसि छ तब् ग। 19चु ताँ तब् भन्दा ओंसोंन् तोगो ङ क्हेमैंने बिमुँ। खैंमा चु तखमुँ ‘ङम् ङन् ग’#13:19 ङम् ङन् ग छले पोंमा प्रभु येशूए अर्थ “ङ ख्रीष्ट ग, याहवेह ने ङ घ्रिन् ग।” (फ्रस्थान ३:१४) बिसि क्हेमैंइ क्वेंब्मुँ। 20क्ह्रोंसेंन ङ क्हेमैंने बिमुँ, ङइ कुल्मिंबै म्हिलाइ मान लब्मैंइ ङलाज्यै या मान लमुँ, छलेन ङलाइ मान लब्मैंइ ङ कुल्मिंबै आबालाज्यै या मान लमुँ।”#मत्ती १०:४०; मर्क ९:३७; लूक ९:४८; १०:१६
येशूजी ह्रोंसलाइ क्हाल् पिंबै चेलाए बारेर बिब
(मत्ती २६:२०-२५; मर्कूस १४:१७-२१; लूका २२:२१-२३)
21चु ताँ बिबै लिउइ येशूए सैं खैता-खैता तइ धै ग्वाइ पिंसि बिइ, “क्ह्रोंसेंन ङ क्हेमैंने बिमुँ, क्हेमैं न्होंर्बै म्हि घ्रिइ ङलाइ क्हाल् पिंब्मुँ।”
22खीजी खाबए बारेर बिब् मुँगे बिब आसेसि चेलामैंइ घ्रिइ-घ्रि ङ्ह्योबर होंइ। 23येशूए चेलामैं न्होंर्बै खीजी खोबै चेला येशूए तिंर केंरिल। 24झाइले सिमोन पत्रुसइ चने हस्ता लसि “खीजी चु ताँ खाबै बारेर बिगे? बिसि ङ्योएइ।”
25झाइले च चेलाइ येशूए तिंर केंदै खीने “प्रभु, च खाब् जा?” बिसि ङ्योएमा।
26येशूजी बिइ, “खाबलाइ ङइ क्हें लुँठे प्हेलार तुँइसि पिंमुँ, च चन् ग।” छ बिसि खीजी क्हें लुँठे प्हेलार तुँइसि सिमोनए च्ह यहूदा इस्करियोतथें पिंइ। 27चइ च क्हें लुँठे चबै तोदोंन् चए सैंर दुष्ट होंइ।
झाइले येशूजी चने “क्हिइ तो लल् म्हैल, च युनन् लद्,” बिइ। 28दिलेया येशूजी तले चने छ बिगे बिसि चब् चबर टिब्मैं खाबज्यै आक्हो। 29यहूदाने मुइ झोंबै नेंदो मुँल। छतसि “येशूजी चने ‘चाडए ल्हागिर चैदिबै सैमैं किंन्’ अथवा ‘ङ्हाँदुमैंलाइ च्हौदे मुइ पिंन्,’ बिब् मुँलै,” बिसि को-कोइ चेलामैंइ मैंइ।
30क्हेंए लुँठे चबै तोदोंन् यहूदा बैरु त्होंयाइ। च त्हेर म्हुँइँस तल् खाँल।
येशूजी पिंबै छारा आज्ञा
31यहूदा बैरु ह्याल् खाँबै लिउँइँ येशूजी बिइ, “तारे म्हिए च्हजी थेबै मान योंब्मुँ, धै ङउँइँले परमेश्वरजी थेबै मान योंब्मुँ। 32छले ङउँइँले परमेश्वरजी थेबै मान योंइबिस्याँ परमेश्वरजी ह्रोंसइन म्हिए च्ह थेबै मान पिंब्मुँ, खीजी चु के युनन् लब्मुँ।
33“ओ ङए च्योंनें कोलोमैं, दे त्हे समा मत्त्रे ङ क्हेमैंने बालु तब्मुँ! क्हेमैंइ ङ म्हैब्मुँ, ङइ यहूदी चिबनाँब्मैंने बिब् धोंले तारे क्हेमैंने या बिमुँ, ङ ह्याबै क्ल्ह्योर क्हेमैं खल् आखाँ।#यूह ७:३४ 34लद् बिबै छारा ताँ घ्रि ङइ क्हेमैंने बिमुँ: क्हेमैंइ घ्रिइ-घ्रिने म्हाँया लद्। ङइ क्हेमैंने म्हाँया लब् धोंले क्हेमैंज्यै या घ्रिइ-घ्रिने म्हाँया लद्।#यूह १५:१२,१७; १ यूह ३:२३; २ यूह ५ 35छले क्हेमैंइ घ्रिइ-घ्रिने म्हाँया लइ बिस्याँ, क्हेमैं ङए चेलामैं मुँन बिसि ताँनइ सेब्मुँ।”
येशूजी पत्रुसने “क्हिइ ङ ङो आसे” बिब्मुँ बिब
(मत्ती २६:३१-३५; मर्कूस १४:२७-३१; लूका २२:३१-३४)
36छबिमा सिमोन पत्रुसइ खीने “ओ प्रभु, क्हि खनिर ह्यासिन् मुँ?” बिमा।
येशूजी बिइ, “तोगो क्हि ङ ह्याबै क्ल्ह्योर ङए लिलि खल् आखाँ। लिउँइँ बिस्याँ क्हि ङए लिलि खब्मुँ।”
37पत्रुसइ खीने बिइ, “ओ प्रभु, तोगोन ङ क्हिए लिलि तले खल् आखाँ? क्हिए ल्हागिर ङ सिल् त्हुलेया सिम्।”
38येशूजी बिइ, “ङए ल्हागिरि क्हिइ ह्रोंसए ज्यु पिंम्मा? क्ह्रोंसेंन ङ क्हिने बिमुँ, क्हिइ सोंखे समा ङलाइ ङो आसे आबिन् समा नग भाले ओररिब् आरे।
Currently Selected:
यूहन्ना 13: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
