उत्पत्ति 28
28
याकूब प्ह्रेंस्यो म्हैबर ह्याब
1झाइले इसहाकइ याकूब हुइसि आशिक पिंसि बिइ, “ओ च्हेज्यों, क्हिइ कनानी च्हमिरिमैं खाबै या ब्ह्या आलद्। 2पद्दन-आराम बिबै ह्युलर ङए कें क्हिए बाज्यु बतूएलए धिंर ह्यासि क्हिए मामा लाबानए च्हमि घ्रि ब्ह्या लद्। 3तोन्दोंरि सै लल् खाँबै परमेश्वरजी क्हिए फिर आशिक पिंरिगे, धै क्हिइ प्हसेमैं ल्हें योंसि क्हिए सन्तान बेल्ले ल्हें तरिगे। धै क्हि ल्हें ह्रेंमैंए खे तरिगे। 4क्हि तोगो चुर आगुए ह्युलर टिरिइमुँ, दिलेया परमेश्वरजी चु ह्युल अब्राहामलाइ पिंब् ग। क्हि चु ह्युलर्बै क्ल्हे तरिगे बिसि परमेश्वरजी अब्राहामए फिर पिंबै आशिक क्हि नेरो क्हिए प्हसेंमैंलाज्यै या पिंरिगे।”#उत १७:४-८ 5छबिसि इसहाकइ याकूब कुलइ। धै पद्दन-आराम बिबै ह्युलर एसाव नेरो याकूबए आमा रिबेकाए आघें अरामथें बतूएलए च्ह लाबान ङाँर ह्याइ।
6इसहाकइ याकूबए फिर आशिक पिंसि प्ह्रेंस्यो पखबर पद्दन-आरामर कुलब नेरो “क्हिइ कनानी च्हमिरिमैं खाबै या ब्ह्या लसि आपखो,” बिबै ताँ एसावइ सेइ। 7धै आबा-आमाए ताँ ङिंसि याकूब पद्दन-आराम ह्युलइ ह्यान बिबै ताँ या एसावइ सेइ। 8झाइले “ङए आबाइ कनानी च्हमिरिमैं आखोमन बिबै या एसावइ क्होइ।” 9छतसि एसाव इश्माएल ङाँर ह्यासि चए च्हमि महलत ब्ह्या लसि पखइ। महलत नबायोतए अङाँ मुँल।
याकूबइ बेथेलर म्होंड म्होंब।
10याकूब बेर्शेबा नाँस वाथेंसि हारान बिबै ह्युलउँइँ ह्याइ। 11क्ल्ह्यो घ्रिर फेबै लिउँइँ म्हुँइँस तयाबइले च चर्न टिइ। धै च क्ल्ह्योर्बै युँमा घ्रि किंसि ह्रोंसए क्रेगुँ लसि रोइ। 12छले रोरिमा चइ छाबै म्होंड म्रोंइ: सउँइँले मु समा ह्याबै लि घ्रि मुँन, चए च्हो मुर्न फेनेब् मुँन। धै परमेश्वरए दूतमैं चर क्रेब माइ तब लमन।#यूह १:५१
13याहवेह चए रेर रासि याकूबने बिइ, “ङ याहवेह, क्हिए बाज्यु अब्राहामए परमेश्वर नेरो क्हिए आबा इसहाकए परमेश्वर ग। क्हि तोगो रोरिबै क्ल्ह्यो क्हि नेरो क्हिए सन्तानमैं ङइ पिंब्मुँ।#उत १३:१४-१५ 14क्हिए सन्तानमैं ह्युलर्बै स त्हुल् धोंलेन् ल्हें तब्मुँ। क्हिए सन्तान स्यार (पूर्व) छ्यो-न्हुँ (पश्चिम) च्योंबो (उत्तर) नेरो छ्यो ल्हुइ (दक्षिणाइ) खन्तोंदोंन् ल्हें तदै ह्याब्मुँ। क्हि नेरो क्हिए सन्तानउँइँले ह्युलर्बै ताँन् म्हिमैंइ आशिक योंब्मुँ।#उत १२:३; २२:१८ 15ङ क्हिने बालु तब्मुँ। क्हि खनिर ह्यालेया ङइ जोगेमिंब्मुँ। धै क्हिलाइ चु ह्युलर एपखब्मुँ। ङइ क्हिने बिबै बाछा पूरा आलन् समा ङइ क्हि पिरिब् आरे।”
16झाइले याकूब न्हरुउँइँले छोरसि बिइ, “क्ह्रोंसेंन चु क्ल्ह्योर परमेश्वर मुँन छाबै ताँ ङइ आसेल।” 17च बेल्ले ङ्हिंसि “चु बेल्ले पबित्र क्ल्ह्यो मुँन! चु परेमेश्वरए धिं मुँन! चु क्ल्ह्यो स्वर्गए म्रा ग मुँन,” बिइ।
18याकूब न्हाँकर्न रेसि चइ क्रेगुँ लबै युँमा किंसि त्हो धोंले क्योइ, धै चए च्होर छ्युगु युमिंइ। 19छलसि चइ च क्ल्ह्योए मिं बेथेल#28:19 बेथेल हिब्रू क्युइर बेथेलए अर्थ “परमेश्वरए धिं” बिब ग। थेंइ। ओंसों च क्ल्ह्योए मिं लूज मुँल।
20च लिउँइँ याकूबइ परमेश्वरने छले भकल लइ, “ओ परमेश्वर ङने बालु क्हि तइ बिस्याँ, प्रबै घ्याँर ङ जोगेमिंइ बिस्याँ, धै ङ चबै क्हें नेरो खिबै क्वें पिंइ बिस्याँ, 21ङ छेनाले आबाए धिंर एखल् योंइ बिस्याँ, ङए परमेश्वर क्हि तब्मुँ। 22झाइले ङइ त्हो धोंले क्योथेंबै चु युँमा परमेश्वरए धिं तब्मुँ। धै क्हिजी ङलाइ पिंबै तोन्दोंरि सैमैंउँइँले च्युबाँर्बै तिबाँ ङइ खैलेबिलेन् क्हिए मिंर पिंब्मुँ।”
Currently Selected:
उत्पत्ति 28: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
