उत्पत्ति 22
22
अब्राहामए बिश्वास जाँच लब
1तिस्याँदे लिउँइँ परमेश्वरजी अब्राहामए थेबै जाँच लसि चने बिइ, “ओ अब्राहाम।”
चइ बिइ, “होइ, ङ चुर्न मुँ।”
2झाइले परमेश्वरजी बिइ, “क्हिइ बेल्ले खोबै क्हिए घ्रिदे मुँबै च्ह इसहाक किंसि ङइ तेंबै क्ल्ह्यो मोरियाह ह्युलर्बै कोंर ह्यासि च कोलो ख्रो पिंन्।”#२ इति ३:१
3छबिमा अब्राहाम न्हाँकर्न रेसि ख्रो पिंबै सिं क्लेसि गधाए फिर तेमैं फैइ। धै चए केब्छैं ङ्हिं नेरो च्ह इसहाक किंसि परमेश्वरजी चने बिबै क्ल्ह्योउँइँ ह्याइ। 4छले ह्यारिमा सोंरोर अब्राहामइ च क्ल्ह्यो ह्रेंगोर म्रोंइ। 5धै अब्राहामइ चए केब्छैंमैंने बिइ, “क्हेमैं चुर गधा ङाँर टिरिद्। ङ नेरो चु कोलो ताइ ह्यासि ख्रो पिंसि क्हेमैं ङाँर्न एयुम्।”
6अब्राहामइ ख्रो पिंबै सिं ह्रोंसए च्ह इसहाकलाइ नोमिंइ, झाइले मि नेरो छुरि चए योर किंसि चमैं ङ्हिंना-ङ्हिंन् ह्याइ। 7छले ह्यारिमा इसहाकइ ह्रोंसए आबाने बिइ, “ओ आबा।”
आबाइ बिइ, “तो बिल, च्हेज्यों?”
चइ बिइ, “ङ्योने मि नेरो सिंमैं मुँ, दिलेया ख्रो पिंबै क्यु झज खोइ?”
8अब्राहामइ बिइ, “च्हेज्यों, ख्रो पिंबै क्यु झज परमेश्वरजीन् जुरेमिंम्,” बिसि चमैं ङ्हिं बालुन् ह्याइ।
9धै परमेश्वरजी चने तेंबै क्ल्ह्योर फेबै लिउँइँ अब्राहामइ चर ख्रो पिंबै क्ल्ह्यो घ्रि बनेसि सिं थेंइ। धै ह्रोंसए च्ह इसहाक फैसि सिंए फिर थेंइ।#याक २:२१ 10झाइले अब्राहामइ ह्रोंसए च्ह ख्रो पिंब् बिसि छुरि क्वेइ। 11दिलेया याहवेहए दूत घ्रिइ स्वर्गउँइँले चलाइ कै तेसि बिइ, “ओ अब्राहाम, अब्राहाम!”
चइ बिइ, “होइ, ङ चुर्न मुँ।”
12दूतजी बिइ, “क्हिइ च कोलोए फिर यो आरेद्, चलाइ तोइ आलद्। तारे क्हि परमेश्वरने ङ्हिंमना बिसि ङइ सेइ, तलेबिस्याँ क्हिए च्ह घ्रि, क्हिए घ्रिदे मुँबै च्है या क्हिइ ङ ङाँइले लोइ आथें।”
13झाइले अब्राहामइ कोंउँइँ ङ्ह्योमा क्यु साँढे घ्रि झ्याडिर रु क्होरिब् म्रोंइ। धै अब्राहाम ह्यासि च क्यु साँढे पखसि ह्रोंसए च्हए क्ल्ह्योरि च क्युए ख्रो पिंइ।#हिब्रू ११:१७-१९ 14छतसि अब्राहामइ च क्ल्ह्योए मिं “याहवेहजी जुरेमिंब्मुँ” थेंइ। “याहवेहए कोंर खीजी जुरेमिंब्मुँ” बिसि तिंजरो या म्हिमैंइ बिरिम्।
15याहवेहए दूतजी धबै स्वर्गउँइँले कै तेसि अब्राहामने बिइ, 16“ङ याहवेहजी बिइमुँ, ङइ ह्रोंसए मिंर बाछा फैइमुँ, क्हिए घ्रिदे मुँबै च्है या ङए मिंर ख्रो पिंबै सैं लइ। क्हिइ चु के लबइले ङइ क्हिलाइ आशिक पिंब्मुँ। 17क्हिए प्हसेमैं बडिसि मुर्बै सारमैं नेरो मा ङ्युँइर्बै बालुवा धोंलेन् ल्हें लमिंब्मुँ। क्हिए सन्तानइ खेंमैंए शत्तुरमैंए सहरमैं क्ल्हे लब्मुँ।#हिब्रू ६:१३-१४#हिब्रू ११:१२ 18ङए ताँ क्हिइ ङिंइ। छतसि क्हिए सन्तानउँइँले ह्युलर्बै ताँन् ह्रेंमैंइ आशिक योंब्मुँ।”#चिब्मैं ३:२५
19च लिउँइँ अब्राहाम ह्रोंसए केब्छैंमैं ङाँर एखइ, झाइले चमैं ताँन् बेर्शेबा समा बा-बालुन् एखइ। धै अब्राहाम बेर्शेबार्न टिइ।
नाहोरए सन्तानमैं
20चए दे त्हे लिउँइँ “मिल्काज्यै क्हिए अलि नाहोरउँइँले च्ह प्रेउँलो फिइमुँ” बिबै ताँ अब्राहामइ थेइ। 21थेब ऊज, चए अलि बूज नेरो आरामए आबा कमूएल, 22धै केसेद, हजो, पिलदाश, यिदलाप नेरो बतूएल। 23बतूएल रिबेकाए आबा तइ। चु प्रेउँलो च्हमैं अब्राहामए अलि नाहोरउँइँले मिल्काइ फिब् ग। 24चइ ब्ह्या लसि पखबै रुमा मिं लबै प्ह्रेंस्योज्यै तेबह, गहम, तहस नेरो माका फिइ।
Currently Selected:
उत्पत्ति 22: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
