प्रस्थान 39

खेगिमैंइ खिबै क्वें नेरो एपोद

(प्रस्थान २८:१-१४)

1पबित्र तम्बुर के लबै खेगिमैंए ल्हागिर चमैंइ मु रङ, कलेजी रङ, नेरो ओल्ग्या रङर्बै रुमैंइ रोबै क्वेंमैं टुइ। छलेन याहबेहजी मोशाने बिब् धोंलेन् चमैंइ हारूनइ खेगि के लमा खिबै क्वें या टुइ।

2मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वें छेनाले ख्रिंसि एपोदै या टुइ। 3चमैंइ माराए तारमैं बनेसि च तारइ मु रङ, कलेजी रङ, ओल्ग्या रङ नेरो छेनाले ख्रिंबै सुतिए क्वेंर बुट्टा झोंइ। 4एपोद प्हैदर छ्योरिगे बिसि चमैंइ एपोदए छेउ ङ्हिंर तनामैं प्ह्‍यामिंइ। 5छलेन याहवेहजी मोशाने बिब् धोंलेन् चमैंइ मु रङ, कलेजी रङ, ओल्ग्या रङ, माराए तार नेरो छेनाले ख्रिंबै सुतिए क्वें ख्रिंसि एपोदए फिर खिबै छ्याँबै फगि रोइ। 6चमैंइ माराए स्युउनिर तुथु जोड्दिसि इस्राएलए च्युसे ङ्हिं च्हमैंए मिं तुथुर प्ह्रिइ। 7याहवेहजी मोशाने बिब् धोंलेन् इस्रालए च्युसे ङ्हिं च्हमैं मैंरिगे बिसि चमैंइ तुथु एपोदए प्हैंदर प्ह्‍यामिंइ।#प्रस २८:१-१४

तिंर खिबै क्वें टुब

(प्रस्थान २८:१५-३०)

8एपोद टुब् धोंलेन् बुट्टामैं झोंल् ह्रबै म्हिइ के लब् धोंले चमैंइ मारा, मु रङ, कलेजी रङ, ओल्‍ग्‍या रङर्बै रु नेरो क्वें छेनाले ख्रिंसि तिंर खिबै क्वें बनेइ। 9च तिंर खिबै क्वें बित्ता घ्रि ह्रिंब, बित्ता घ्रि प्ल्हाब ङ्हिथरले ताब चार पाटे मुँल। 10चर मणिमैं ल्हस्यार प्लि लसि मणिमै जोद्डिइ। तिस्यार मानिक, पुष्पराज नेरो बेरुज मुँल। 11ङ्हिस्यारर फिरोजा, निर नेरो पन्‍ना मुँल। 12सोंस्यारर ओल्ग्या मणि, हाकिक नेरो कटेला मुँल। 13प्लिस्यारर पितमणि, आनिक्स नेरो बिल्‍लौर मुँल। चु ताँन् मणिमैं माराइ जोड्दिल। 14इस्राएलए खेमैं मैंबै ल्हागिर च च्युसे ङ्हिं तुथु घ्रि-घ्रिर याकूबए च्युसे ङ्हिं च्हमैंए मिं प्ह्रिथेंल। 15तिंर खिबै क्वें बनेबै ल्हागिर चमैंइ छो धोंले ख्रिंबै छ्याँबै माराए सिक्रिमैं बनेइ। 16चमैंइ माराए न्ह ङ्हिं नेरो न्ह प्ह्‍यबै धिं ङ्हिं बनेसि तिंर खिबै क्वेंए कुना ङ्हिंर न्हमैं ङ्हिं प्ह्‍यामिंइ। 17माराए सिक्रि ङ्हिं तिंर खिबै क्वेंए छेउ-छेउ ङ्हिंर मुँबै न्हमैं ङ्हिंर जोड्दिमिंइ। 18सिक्रि ङ्हिंए छेउ ङ्हिं रिङ प्ह्‍याबै धिंर जोड्दिसि एपोदए प्हैंदर्बै उँइँ हारबै तनिर प्ह्‍यामिंइ। 19चमैंइ माराए रिङ ङ्हिं बनेसि तिंर खिबै क्वेंए अर्को कुना ङ्हिंर एपोदए न्हों हारबै ङाँर प्ह्‍यामिंइ। 20चमैंइ अझै माराए रिङ ङ्हिं बनेसि एपोदए उँइँ हारबै प्हैंद ङ्हिंर्बै तनिर नेरो एपोदए फिर खिबै फगिए फिर्बै सिउनिर प्ह्‍यामिंइ। 21याहवेहजी मोशाने बिब् धोंलेन् एपोदए फिर फगि आसर्दिरिगे बिसि तिंर खिबै क्वेंए रिङमैं नेरो एपोदए रिङमैं मु रङर्बै फिताइ फगिर फैइ।

ख्रो पिंबै खेगिमैंइ खिबै लबेदा

(प्रस्थान २८:३१-४३)

22झाइले एपोदए न्होंर खिबै लबेदामैं मु रङर्बै क्वेंइ टुइ। 23लबेदाए म्हाँजोर क्र क्ल्युलबै सुँ बनेसि चए कारग्युले आटोरिगे बिसि ङाँ सैमिंइ। 24लबेदाए माइबै फरोर मु रङ, कलेजी रङ, ओल्ग्या रु नेरो छेनाले ख्रिंबै सुति क्वें ख्रिंसि अनारमैं बनेइ। 25छ्याँबै माराए स्योंमैं बनेसि च फेरोए कारग्युले अनारए म्हाँ-म्हाँजोर माराए स्योंमैं च्योमिंइ। 26याहवेहजी मोशाने बिब् धोंलेन् सेवा लमा खिबै लबेदाए माइबै फेरोए कारग्युले माराए स्यों नेरो अनार च्योमिंइ।

27हारून नेरो चए च्हमैंइ खिबै ल्हागिर सुति क्वेंए लबेदामैं, 28क्रेगि, कुलेमैं नेरो न्होंर खिबै क्वें चमैंइ टुइ। 29याहवेहजी मोशाने बिब् धोंलेन् छेनाले ख्रिंबै सुति क्वें ख्रिंसि, मु रङ, कलेजी रङ, ओल्ग्या रुइ बुट्टा झोंबै फगि टुइ। 30चमैंइ छ्याँबै माराल पबित्र मुकुट बनेसि चर “याहवेह मिंर पिंब् ग” बिसि कोप्दिइ। 31याहवेहजी मोशाने बिब् धोंलेन् चमैंइ क्रेगिए ओंसों मु रङर्बै पित्ताइ फैइ।

पबित्र तम्बु बनेल् खाँब

(प्रस्थान ३५:१०-१९)

32याहवेहजी मोशाने बिब् धोंलेन् पबित्र तम्बु बनेबै के ताँन् खाँइ। 33झाइले चमैंइ पबित्र तम्बु नेरो चर चैदिबै तोन्दोंरि सैमैं मोशा ङाँर पइ:

अङ्‍कुसिमैं, फ्ल्याकमैं, बार थोबै सैंमैं, नेरो त्होमैं क्योबै क्ल्ह्‍योमैं,

34तम्बु उबै ल्हागिर ओल्ग्या रङर्बै क्यु साँडए ट्हुबि,

बाछाए मुदुस उँइँर थेंबै पर्दामैं,

35ठिम थेंबै मुदुस, मुदुसर क्युलबै प्हरेमैं, नेरो मुदुसए क्हा,

36टेबल नेरो चए चैदिबै सैमैं,

परमेश्‍वरए मिंर पिंबै क्हें,

37छ्याँबै माराए पानस, पलमैं, बत्ति म्रोबै तेल, नेरो चैदिबै तोन्दोंरि सैमैं,

38धुप म्रोबै ल्हागिर माराल ख्रो पिंबै क्ल्ह्‍यो,#प्रस ३०:१-४

अभिषेक लबै छ्युगु नेरो छ्याँब थाँ खबै धुप,

पबित्र तम्बुए म्रार्बै पर्दा,

39काँसाए ख्रो पिंबै क्ल्ह्‍यो,#प्रस ३८:१-२

काँसाए जालि, ख्रो पिंबै क्ल्ह्‍यो नोबै प्हरेमैं नेरो चर चैदिबै सैमैं,

यो प्हले ख्रुबै ल्हागिर क्यु झोंबै बाटा नेरो बाटाए प्हलेमैं,

40ह्‍युर कारग्यु लबै पर्दा,

त्होमैं नेरो चमैंए क्योबै क्ल्ह्‍योमैं,

ह्‍युर्बै म्राए पर्दा,

छोमैं नेरो काँटिमैं,

पबित्र तम्बुर चैदिबै सैमैं,

41पबित्र तम्बुर हारून खेगि नेरो चए च्हमैंइ खेगि के लमा खिबै पबित्र क्वेंमैं।

42छलेन याहवेहजी मोशाने बिब् धोंलेन् इस्राइलिमैंइ ताँन् के लइ। 43मोशाइ चमैंइ लबै ताँन् केमैं ङ्‍ह्‍योमा याहवेहजी बिब् धोंलेन् चमैंइ लइ बिब् म्रोंइ। छतसि मोशाइ चमैं ताँनए फिर आशिक पिंइ।

Currently Selected:

प्रस्थान 39: GCMB

Highlight

Copy