प्रस्थान 36

1“छतसि बजलेल, ओहोलीआब नेरो ल्हें खालर्बै सिप मुँबै म्हिमैंइ याहवेहजी लद् बिब् धोंबै के लरिगे बिसि खीजी चमैंलाइ पबित्र तम्बु बनेबर ज्ञान नेरो सिप पिंइमुँ।”

म्हिमैंइ भेटिमैं पखब

2छतसि बजलेल, ओहोलीआब नेरो याहवेहजी ज्ञान नेरो सिपमैं पिंबै ताँन् म्हिमैं मोशाइ हुइसि के लद् बिसि ल्हैदिइ। 3इस्राएलीमैंइ पबित्र तम्बु बनेबै ल्हागिर पखबै ताँन् भेटिमैं मोशाए योउँइँले चमैंइ किंइ। दिलेया इस्राएलर्बै म्हिमैंइ न्हाँगै ह्रोंसे मोशा ङाँर भेटिमैं पखमल। 4छतसि पबित्र तम्बु छेनाले बनेल् ह्रब्मैं ह्रों-ह्रोंसए केमैं पिसि मोशा ङाँर ह्‍यासि बिइ, 5“याहवेहजी बनेबर ल्हैदिबै केए ल्हागिर चैदिब् भन्दा ल्हें सैमैं म्हिमैंइ परिइमुँ।”

6छतमा पबित्र तम्बु बनेबर तारे खाबज्यै या तो सैया आपखो बिसि मोशाइ ताँन् ब्यारेकजरे बिइ। छबिमा म्हिमैंइ भेटि पखब पिवाइ, 7तलेबिस्याँ तम्बु बनेबर चमैंने बालु चैदिब सैमैं भन्दा ल्हें मुँल।

पबित्र तम्बु बनेबै के

(प्रस्थान २६:१-३७)

8के लब्मैं न्होंर्बै छेनाले बनेल् ह्रब्मैंइ पर्दा च्युउलो मुँबै तम्बु बेनेइ। च पर्दामैं मु रङ, कलेजी रङ नेरो ओल्ग्या रङइ रोबै क्वें नेरो छेनाले ख्रिंबै सुति क्वेंला बुट्टा पिंल् ह्रब्मैंइ बनेबै करूबमैं पर्दार मुँल। 9च पर्दामैं ताँन् नाप घ्रिर्बैन् ङ्‍ह्‍युस्युसे प्रे क्रु ह्रिंब नेरो प्लिउरु प्ल्हाब मुँल। 10पर्दामैं ङ्‍हउलो-ङ्‍हउलो जोड्दिसि थे-थेबै पर्दामैं ङ्हिं बनेइ। 11च थे-थेबै पर्दाए बैरुउँबै ङाँर चमैंइ मु रङर्बै क्वेंए सुर्कानि झोंबै क्ल्ह्‍यो बनेइ। 12पर्दा ङ्हिंर्न चमैंइ ङ्‍हच्यु-ङ्‍हच्यु सुर्कानि बनेइ। च सुर्कानिमैं तिरैना ह्‍वेंब् मुँल। 13चमैंइ माराए अङ्‍कुसिमैं बनेसि च पर्दामैं जोड्दिइ। छले पबित्र तम्बु क्ल्ह्‍यो घ्रिर्न तइ।

14पबित्र तम्बु हुबै ल्हागिर चमैंइ रए मुइ रोबै क्वेंला च्युसे घ्रि पर्दामैं बनेइ। 15च पर्दामैं नाप घ्रिर्बैन् सोंच्यु क्रु ह्रिब नेरो प्लिउरु प्ल्हाब मुँल। 16चमैंइ पर्दा ङ्‍हउलो जोड्दिसि थेबै पर्दा घ्रि बनेइ। छलेन पर्दा टुउलो जोड्दिसि अर्को पर्दा बनेइ। 17थेबै पर्दामैं जोड्दिबै ङाँ-ङाँर चमैंइ ङ्‍हच्यु-ङ्‍हच्यु सुर्कानि बनेइ। 18च पर्दामैं जोड्दिबै ल्हागिर चमैंइ काँसाए ङ्‍हच्यु अङ्‍कुसिमैं बनेसि प्ह्‍याइ। 19तम्बु हुबै ल्हागिर चमैंइ ओल्ग्‍या रङर्बै क्यु साँडए ट्हुबिए पर्दा नेरो सिल ताँगए ट्हुबिए पर्दामैं बनेइ।

20चमैंइ पबित्र तम्बुए ल्हागिर बबुल सिंए फ्ल्याकमैं बनेइ। 21फालेमैं ताँन् च्युउरु ह्रिंब नेरो तिउरुसे आधा प्ल्हाब मुँल। 22ताँन् फालेर जोड्दिबै चोसामैं ङ्हिं उँइ-उँइँ ह्‍वेंसि थेंल। चु धोंलेन् पबित्र तम्बु बनेबै फ्ल्याकमैं बनेइ। 23चमैंइ छ्यो ल्हुए (दक्षिण) ल्हागिर ङ्‍ह्‍युस्यु फ्ल्याकमैं बनेइ। 24झाइले ङ्‍ह्‍युस्यु फालेमैंए न्होंर प्लिच्यु चाँदिए क्योबै क्ल्ह्‍योमैं बनेइ। फ्ल्याक घ्रिए न्होंर क्योबै क्ल्ह्‍यो ङ्हिं चोसामैं न्होंर क्योबै क्ल्ह्‍यो घ्रि बनेइ। 25पबित्र तम्बुए ताइ हार (उत्तर) चमैंइ ङ्‍ह्‍युस्यु फ्ल्याकमैं बनेइ। 26झाइले ताँन् फ्ल्याकए न्होंर ङ्हिं-ङ्हिं लसि चाँदिए प्लिच्यु क्योबै क्ल्ह्‍योमैं बनेइ। 27पबित्र तम्बुए छ्यो न्हुँ हारए ल्हागिर (पश्‍चिम हार) चमैंइ फालेमैं टुउलो बनेइ। 28पबित्र तम्बुए कुना-कुनाए ल्हागिर फ्ल्याकमैं ङ्हिं बनेइ। 29च कुनार्बै फ्ल्याकमैं ताइले माइ समा ङ्हिपो ङ्हिपो झोंसि रिंङ घ्रिर्न जोड्दिल। कुना ङ्हिंर्बै फ्ल्याकमैं या चमैंइ छलेन् बनेइ। 30च फ्ल्याकमैं प्रेउलोए ल्हागिर चाँदिए च्युसे टुउलो क्योबै क्ल्ह्‍यो बनेसि फालेमैंए न्होंर थेंमिंइ।

31पबित्र तम्बुर्बै तिरैबै फालेमैं थोबै ल्हागिर बबुल सिंए बारमैं बनेइ। 32छलेन अर्को फालेमैं थोबै ल्हागिर ङ्‍हउलो बारमैं बनेइ, धै छ्यो न्हुँर्बै (पश्‍चिम) कुनार मुँबै फ्ल्याकमैं थोबर ङ्‍हउलो बार बनेइ। 33फालेमैंए म्हाँजोर्बै बार बिस्याँ छेउ घ्रिउँइँले अर्को छेउ समा फेनेल्‍ले बनेइ। 34चमैंइ फ्ल्याकमैं माराइ म्होरइ, धै बारमैं क्हाबै ल्हागिर माराए न्हमैं बनेइ। बारमैं या माराइना म्होरइ।

35चमैंइ मु रङ, कलेजी रङ, नेरो ओल्गया रुइ रोबै क्वें नेरो छेनाले ख्रिंबै सुतिए क्वेंला पर्दा घ्रि बनेइ, चर बुट्टा झोंल् ह्रब्मैंइ करूबए बुट्टामैं झोंइ। 36पर्दा च्योबै ल्हागिर बबुल सिंए त्हो प्लिउलो बनेसि माराइ म्होरइ। अङ्‍कुसिमैं या माराल बनेइ। त्होमैं धाँदिबर चाँदिए क्योबै क्ल्ह्‍यो प्लिउलो बनेइ। 37तम्बुए म्राए ल्हागिर चमैंइ मु रङ, कलेजी रङ नेरो ओल्ग्या रङर्बै रुइ रोबै क्वें नेरो छेनाले ख्रिंबै सुतिए क्वेंर बुट्टा झोंबै पर्दा बनेइ। 38च पर्दा च्योबै ल्हागिर चमैंइ त्हो ङ्‍हउलो बनेसि त्होए च्हो नेरो छो माराइ म्होरइ, झाइले त्हो धाँदिबै ल्हागिर काँसाए ङ्‍हउलो क्योबै क्ल्ह्‍योमैं बनेइ।

Currently Selected:

प्रस्थान 36: GCMB

Highlight

Copy