एस्तर 2
2
एस्तर म्रुँस्यो तब
1लिउइ म्रुँ अहासूरसए ह्रिस म्हमा म्रुँस्यो बश्ती नेरो चइ लबै केए बिरोधर चइ प्ह्रिबै प्ह्रिछया मैंइ। 2छतमा म्रुँए सेवा लब्मैंइ बिइ, “क्हिए ल्हागिर छ्याँ-छ्याँबै छमिंमैं म्हैद्। 3ह्रोंसए ग्याल्सर्बै ताँन् ह्युलउँइँले क्हिइ छ्याँ-छ्याँबै छमिंमैं क्हि टिबै क्ल्ह्यो शूशनर्बै दरबरर पखो बिसि क्हिए के लबै म्हिमैं खटिदिद्। धै क्हिए के लबै म्हि हिचडा हेगेए जिम्मार चमैंलाइ थेंन्। धै चमैंलाइ पैरेबै सैमैं पिंन्। 4झाइले खाब् छमिंलाइ क्हिइ खोमुँ चलाइन बश्तीए क्ल्ह्योर म्रुँस्यो तरिगे।” चु ताँ म्रुँइ बेल्ले छ्याँब ङ्हाँइ, धै छान् लइ।
5राजधनि शूशनर बिन्यामिन खलकर्बै मोर्दकै मिं मुँबै यहूदी घ्रि मुँल। च याईरए च्ह मुँल, याईरए आबा शिमि मुँल, शिमिए आबा किश मुँल। 6बेबिलोनर्बै म्रुँ नबुकदनेसरइ यरूशलेमउँइँले यहूदार्बै म्रुँ यहोयाकीन च्युबर बोमा चु किश बिबै म्हि या चमैंने बालु बोल।#२ म्रुँ २४:१०-१६; २ इति ३६:१० 7चइ ह्रोंसए प्हाज्योंए च्हमि हदस्सा बिबै एस्तर धर्म च्हमि बनेल, तलेबिस्याँ चल आबा-आमा खाबै आरेल। च बेल्ले छ्याँब मुँल। चए आबा आमा सिबै लिउँइँ मोर्दकैइ च ह्रोंसए च्हमि धोंले न्हल।
8च्हम म्रुँइ प्ह्रिबै प्ह्रिछ्यार्बै ताँ खन्तोदोंन् थेनेइ। छतसि ल्हें म्हिमैंइ ह्रों-ह्रोंसए छमिंमैं शूशनर्बै म्रुँए दरबरर हेगेए जिम्मार पिंखइ। एस्तरलाज्यैया च छमिंमैंए जिम्मा किंबै म्हि हेगेए जिम्मा दरबरर पखइ। 9एस्तर म्रोंमा हेगे बेल्ले सैं तोंसि चइ पैरेबै ल्हागिर एस्तरलाइ छ्या-छ्याँबै सैमैं पिंइ। झाइले म्रुँए दरबारउँइँले चए सेवा लबै ल्हागिर हेगेइ छमिंमैं ङि खटेइ। च छमिंमैं टिबै धिंर अरूलाइ भन्दा चमैंलाइ छेन् लइ।
10एस्तरइ ह्रोंसए परवा नेरो ह्रेंए बारेर खाबलाज्यै या तोइ आबिल, तलेबिस्या मोर्दकैइ एस्तरने चु ताँ खाब्नेइ आबिद् बिल। 11एस्तर खै तरिइमुँ बिसि क्होबर च छमिंमैं टिबै धिंर्बै ह्यु घ्याँ मोर्दकैइ त्हिंइ ह्रोंसे प्ररिमल।
12च त्हेर छमिंमैं म्रुँ ङाँर बोब् भन्दा ओंसों म्हैंन टुल् समा मुर्रए छ्युगु, म्हैना टुल अत्तर फोसि छ्याँ-छ्याँबै सैमैंइ पैरेमिंमल। धै तिदिं योबै लिउँइँ छमिंमैं पलो-पलोले म्रुँ ङाँर बोमल। 13छमिं खाब् मुँलै खेंमैं टिबै धिंउँइँले म्रुँए दरबरर ह्यामा ह्रोंस चैदिबै सैमैं तो मुँलेया चइ बोसि ह्याल् योंमल। 14छमिं ङेसर म्रुँए ङाँर बोमल, धै प्हन्हाँधों न्हाँगर म्रुँइ न्हबै च्हमिरिमैंए जिम्मा किंबै म्हि हिचड शाश्गजए जिम्मार अर्को धिंर च बोमल, धै म्रुँ सैं तोंसि चए मिं तेसि आहुइन् समा च म्रुँ ङाँर ह्याल् आयोंमल।
15च त्हेर्न मोर्दकैए प्हाज्यों अबीहेलए च्हमि एस्तर म्रुँ ङाँर ह्याबै पलो खइ। (मोर्दकैइ एस्तरलाइ ह्रोंसए च्हमि धोंलेन् न्हल।) झाइले च छमिंमैं रुँबर थेंबै हिचड हेगेइ तो-तो बोद् बिल च मत्त्रे एस्तरइ बोइ, अरू तोइ आबो। एस्तरलाइ म्रोंब्मैं ताँनइ चलाइ छ्याँब ङ्हाँइ। 16म्रुँ अहासूरसइ ग्याल्स लसि टुदिंसे म्हैंन च्युल् तमा, तेबेत (पौष) बिबै म्हैनर, एस्तरलाइ दरबारर म्रुँ ङाँर बोइ।
17ताँन् अरू च्हमिरिमैं भन्दा म्रुँइ एस्तरलाइ बेल्ले खोइ, धै चए सैं ताँन् अरू छमिंमैं भन्दा एस्तर ङाँइ ह्याइ, छतसि म्रुँइ एस्तरए क्रर म्रुँस्योइ कुबै मुकुट कुमिंसि चलाइ बश्तीए क्ल्ह्योर म्रुँस्यो तल् पिंइ। 18च लिउँइँ म्रुँइ ह्रोंसए ग्याल्सर्बै ताँन् ह्युलर छुट्टि लसि ह्रोंसए ग्याल्सर्बै चिबनाँब्मैं नेरो ह्रोंसए सेवा लब्मैं हुइसि एस्तरए मिंर थेबै भत्तेर पिंइ। धै ताँनलाइ सै ल्हें फेबै सैमैं पिंइ।
म्रुँए बिरोधर जाल रोबै ताँ मोर्दकैइ सेइ
19ताँन् छमिंमैं धबै खागु लमा मोर्दकै म्रुँए दरबारए मुल म्रार टिरिल। 20मोर्दकैइ बिब् धोंलेन् एस्तरइ च त्हे समा च खाब म्हिमैं ग बिसि नेरो ह्रोंसए परवाए बारेर खाब्नेया तोइ आबिल। तलेबिस्याँ कोलो ओंनोंन् चइ मोर्दकैइ बिबै ताँ ङिंमल।
21तिगैं मोर्दकै म्रुँए दरबारए मुल म्रार टिरिमा दरबारए म्रार राबै हिचड ङ्हिं बिग्थाना नेरो तेरेश म्रुँने ह्रिस खसि म्रुँलाइ सैबै ताँ लरिल। 22चु ताँ थेसि मोर्दकैइ म्रुँस्यो एस्तरने बिइ, धै एस्तरइ मोर्दकैइ बिबै ताँ म्रुँने बिइ। 23चु ताँ क्ह्रोंसेंन ङिंन उ आङिन बिसि ङ्योलु-च्युलु लमा चु ताँ क्ह्रोंसेन मुँन बिब् सेसि चमैं ङ्हिंलाइ सिं धुँर च्योवाइ। धै ओंसों तबै ताँमैं प्ह्रिथेंबै कितबर म्रुँए उँइँर चु ताँ या प्ह्रिथेंइ।
Currently Selected:
एस्तर 2: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
