चेला चिब्मैंए केमैं 5
5
हननिया नेरो सफिराइ स्योर तेब
1तिगें हननिया मिं मुँबै म्हि नेरो चए प्ह्रेंस्यो सफिराइ च्युगुदे क्ल्ह्यो चुँइ, 2झाइले प्ह्रेंस्योने मत लब् धोंले योंबै मुइ ह्रोंसने च्युगुदे थेंइ। धै च्हौदे मुइ बोसि कुल्मिंबै चेला चिब्मैंए उँइँर थेंमिंइ। 3दिलेया पत्रुसइ चने बिइ, “ओ हननिया, क्ल्ह्यो चुँसि योंबै मुइ च्युगुदे ह्रोंसने थेंसि पबित्र प्ल्हने स्योर तेब दुष्टइ क्हिए सैंर खैले झोंमिंइ? 4च क्ल्ह्यो आचुँन् समा क्हिल्नाँ आङिंल् रो वा? धै च क्ल्ह्यो चुँसि योंबै मुइ या क्हिल्नाँ आङिं वा? छाबै के लबै सैं क्हिए खोंर खैले खइ? क्हिइ म्हिमैंने आङिं परमेश्वरने स्योर तेइमुँ।” 5चु ताँ थेबै तोंदोंन् हननिया सर क्हुरिह्याइ धै सो पिवाइ। चु ताँ थेब्मैं ताँन् बेल्ले ङ्हिंयाँइ। 6झाइले फ्रेंसिमैं खसि चए सिनु क्वेंइ म्होरसि बैरु बोसि पावाइ।
7झाइले घण्टा सोंदे लिउँइँ चए प्ह्रेंस्यो सफिरै या न्होंर खइ। चइ चए प्युँ सियाइ बिसि था आसेल। 8पत्रुसइ चने “ङने बिद्, क्हेमैंइ क्ल्ह्यो च्हगर्न चुँल् वा?” बिसि ङ्योएइ।
चइ “ओं, च्हगर्न ग,” बिइ।
9छबिमा पत्रुसइ चने बिइ, “प्रभुए प्ल्हए जाँच लबर क्हेमैं ङ्हिंना-ङ्हिंन् क्ह्रिसि खैले मत लल? ङ्ह्योद्! क्हिए प्युँ पाब्मैं म्रार्न मुँ। चमैंइ क्हि या बैरु बोयाब्मुँ।” 10छ बिबै तोंदोंन् सफिरा पत्रुसए प्हले ङाँर क्हुरिह्यासि सो पिवाइ। धै फ्रेंसिमैं न्होंर खमा च सियाल् खाँब् म्रोंसि बैरु बोसि चए प्युँ ङाँर्न पावाइ। 11छतमा ताँन् चर्च नेरो चु ताँ थेबै ताँन् म्हिमैं बेल्ले ङ्हिंयाँइ।
औदिबै चिनुमैं नेरो प्लेटोयाबै केमैं तब
12छले कुल्मिंबै चेला चिब्मैंए योउँइँले ल्हें औदिबै केमैं लसि प्लेटोयाबै चिनुमैं म्हिमैंए म्हाँजोर तबर होंइ। छतमा येशूए फिर बिश्वास लब्मैं ताँन् सोलोमन बिबै ठाँटिर खागु तल। 13दिलेया अरू खाबै या चमैंने बालु क्ह्रिबै आँट लल् आखाँ। छान् तलेया म्हिमैंइ चमैंलाइ मान लमल। 14छतमा प्रभुए फिर बिश्वास लबै मुँयुँमैं नेरो च्हमिरिमैं झन् ल्हें तबर होंइ। 15छतसि पत्रुस खमा चए छरि मत्त्रे मुँलेया चमैंए न्होंर्बै को-कोए फिर फेरिगे बिसि म्हिमैंइ घ्याँ-घ्याँर्न नब्मैं क्ल्ह्यो नेरो खाटर रोथेंमल। 16यरूशलेमजरेबै ह्युलउँइँले या ल्हें म्हिइ नब्मैं, नेरो दुष्टइ ह्रुगुदिब्मैं पइ खमल, धै चमैं ताँन् सयामल।
यहूदी चिब्मैइ कुल्मिंबै चेला चिब्मैंलाइ ह्रुगुदिब
17छतमा ख्रो पिंबै खेगि क्रथे नेरो चने बालु मुँबै सदुकीमैं ताँनइ कुल्मिंबै चेला चिब्मैंए फिर ह्रिस लसि चमैंए बिरोध लबर होंइ। 18धै चमैं क्हासि झेलर च्युवाइ। 19दिलेया म्हुँइँसर प्रभुए स्वर्गदूत घ्रिइ झेलए म्रामैं थोंमिंइ, धै खीजी चमैंलाइ बैरु तेवासि बिइ, 20“मन्दिरर ह्यासि खोंयोंन् बिलै आखाँबै छ्ह योंबै ताँमैं ताँन् म्हिमैंने बिद्।” 21चु ताँ थेसि चमैं न्हाँकार्न मन्दिर न्होंर होंसि म्हिमैंलाइ लोमिंबर होंइ।
छतमा ख्रो पिंबै खेगि क्रथे नेरो चने बालु मुँब्मैंइ थेबै म्हि च्हों खागु लबर इस्रालिमैंए ताँन् चिबनाँब्मैं हुइइ। धै चमैंइ “चमैं पखो” बिसि झेलउँइँ म्हिमैं कुलइ। 22दिलेया चमैंइ झेलर च्युथेंबै कुल्मिंबै चेला चिब्मैं आम्रोंमा एखसि चु ताँ बिइ, 23“ङिइ झेलर छेनाले साँजु झोंथेंब नेरो झेल रुँबै म्हिमैं या म्राजरेन् रारिबा म्रोंइ, दिलेया ङिइ म्रा थोंसि ङ्ह्योमा न्होंर खाबै या आम्रों!” 24चु ताँ थेसि मन्दिर रुँबै सिपाइमैंए कप्तान नेरो ख्रो पिंबै खेगि चिब्मैंइ, “तारे कुल्मिंबै चेला चिब्मैं खै तब् ङ्हे” ङ्हाँसि खैला तोला तइ। 25च त्हेर्न म्हि घ्रि खसि चमैंने बिइ, “थेत्ति, क्हेमैंइ झेलर च्युथेंबै म्हिमैं मन्दिरर रासि म्हिमैंलाइ लोमिंसिन् मुँ!” 26चु ताँ थेसि कप्तान नेरो चए सिपाइमैं ह्यासि चमैंलाइ क्हासि खैच्हिजी आलल्ले छेनाले पखइ, तलेबिस्याँ म्हिमैंइ खेंमैं युँमाइ प्रिंम् उ ङ्हाँसि चमैं ङ्हिंयाँइ।
27झाइले थेबै म्हि च्होंए उँइँर राल् पिंइ, धै ख्रो पिंबै खेगि क्रथेइ चमैंने ताँमैं ङ्योएइ। ५:२७ 28“ङिइ क्हेमैंने खाबलाज्यै येशूए मिंर तोइ आलोमिंन् बिसि बिल, दिलेया क्हेमैंइ यरूशलेम तिगोंन् लोमिंल् खाँना। च म्हि सैवाबै छ्याब् क्हेमैइ ङिए फिर ल्हैदिदा ङ्हाँइमुँ वा?”#मत्ती २७:२५
29दिलेया पत्रुस नेरो कुल्मिंबै चेला चिब्मैंइ बिइ, “ङिइ म्हिमैंए ताँ आङिं, परमेश्वरजी बिब ङिंलन् त्हुम्। 30क्हेमैंइ यशूलाइ सिए क्रूसर च्योवासि#व्य २१:२२-२३; चिब्मैं १०:३९; १३:२९; गला ३:१३; १ पत्र २:२४ सैवाइ। दिलेया ङ्योए खेंमैंए परमेश्वरजी येशू सिबउँइँले धबै सोगों लमिंइ। 31इस्राएलीमैंइ परमेश्वरउँइँ सैं एसि पाप क्षमा योंरिगे बिसि परमेश्वरजी येशूलाइ म्रुँ नेरो जोगेमिंबै म्हि लमिंसि ह्रोंसए क्योलोउँइँ धाँसे नुल्ले थेंमिंइ। 32चु ताँन् ताँए साँक्षिमैं ङि मुँ, धै परमेश्वरजी बिब् ङिंब्मैंलाइ पिंबै पबित्र प्ल्ह या साँक्षि मुँ।”
33चु ताँ थेसि चमैं बेल्ले ह्रिस खसि चमैंलाइ सैल् म्हैइ। 34दिलेया गमलियल मिं मुँबै फरिसी थेबै म्हि च्होंए उँइँर राइ। च छ्वेर्बै ताँ ह्रब् सेब, ताँनइ म्हाँदिब, नेरो परमेश्वरए ठिम लोमिंबै म्हि मुँल। चइ सिपाइमैंने “चमैं तिस्याँदे बैरु कुलद्,” बिइ। 35धै चइ थेबै म्हि च्होंर्बै म्हिमैंने बिइ, “ओ इस्राएलीमैं, चु म्हिमैंलाइ क्हेमैंइ तो लल् म्हैमुँ, चु ताँर न्ह क्रों मि क्रों तद्। 36तलेबिस्याँ चु त्हे भन्दा ओंसों थुदासइ ङम् ङन् ग बिसि थेब् प्हैंल, धै चए लिलि योदा-अयोदा प्लिब्रादे म्हिमैं प्रल। छान् तलेया च सैवाइ, धै चए लिलि प्रब्मैं या ताँन् प्हुँयाँइ। छतमा चइ लबै के फाक्कर्न तयाइ। 37चु म्हिए लिउँइँ ह्युलर ताँन् म्हिमैं च्योबै त्हेर (जनगणना लबै त्हेर) गालीलर्बै यहूदा बिब रेइ, धै ल्हें म्हि च ङाँइ चैंइ। चै या नास तयाइ, धै चए लिलि प्रब्मैं या प्हुँयाँइ। 38छतसि तोगोबै चु ताँए बारेर ङ क्हेमैंने बिमुँ, चु म्हिमैंउँइँले स्योले टिद्, धै चु म्हिमैंलाइ पिवाद्। तलेबिस्याँ चुमैंए ताँ नेरो केए चाँजो म्हिमैंउँइँले मुँस्याँ चमैंए मिं क्रन् म्हयाब्मुँ। 39दिलेया चु के परमेश्वरउँइँले तब् ग बिस्याँ क्हेमैंइ चु म्हिमैंने ‘चु के आलद्’ बिल् आखाँ। आस्याँ क्हेमैं या परमेश्वरए बिरोधर राब्मैं तब्मुँ।”
40छले चमैंइ गमलियलइ बिबै ताँ ङिंइ, दिलेया चमैंइ कुल्मिंबै चेला चिब्मैंलाइ न्होंर हुइसि धोंइ, धै चमैंने बिइ, “येशूए मिंर खोंयोंन् बिलै तोइ आपोंन्!” छ बिसि चमैं पिवाइ। 41झाइले चमैंए सैंर, म्हिमैंइ म्हि आच्जिल् ललेया येशूए मिंरि सैदिल् खाँब्मैं ङ्यो तइ ङ्हाँसि सैं तोंदै चमैं थेबै म्हि च्होंउँइँले त्होंह्याइ। 42दिलेया चमैंइ त्हिंइ ह्रोंसे मन्दिर नेरो धिं-धिंर ह्यासि “येशून् परमेश्वरजी कुल्मिंबै म्रुँ ख्रीष्ट ग” बिसि बिप्रब आपि।
Currently Selected:
चेला चिब्मैंए केमैं 5: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
