လံာ်စကၤရယၤ 5
5
တၢ်ထံၣ်လၢညါခီဘၣ်ထွဲဒီးလံာ်ထူတထူ လၢအယူၤဝဲ
1ယကွၢ်ကဒီးတၢ်ဒီးတဘျီအံၤယထံၣ်လံာ် ထူတထူယူၤဝဲဒၣ်လၢကလံၤကျါန့ၣ်လီၤ. 2ကလူးသံကွၢ်ယၤတၢ်လၢယထံၣ်ဘၣ်အီၤအဂ့ၢ်န့ၣ်လီၤ. ယစံးဆၢအီၤ, “ယထံၣ်ဘၣ်လံာ်ထူတထူလၢအယူၤဝဲလၢကလံၤကျါန့ၣ်လီၤ. လံာ်ထူအံၤအထီအိၣ်ဝဲဒၣ်အပျၢ်ခံဆံ, ဒီးအဒီၣ်ဃီၤအိၣ်ဝဲအပျၢ်တဆံလီၤ.”
3အန့ၣ်ဒီးကလူးန့ၣ်စံးဘၣ်ယၤ, “လၢလံာ်ထူလိၤန့ၣ်, တၢ်ဆိၣ်အၢလၢကလီၤဘၣ်ထံကီၢ်ဒီတဘ့ၣ်န့ၣ်အိၣ် ကွဲးလီၤအသးလီၤ. လၢလံာ်ထူတကပၤန့ၣ်, တၢ်ကွဲးအသးစံးဝဲလၢကယဲၢ်တၢ်ဘျၣ်တဂၤလၢ် လၢ်န့ၣ်, ကဘၣ်တၢ်မၤဟးဂီၤကွံာ်အီၤလၢထံကီၢ်အပူၤ, ဒီးလၢအဂၤတကပၤန့ၣ်, တၢ်ကွဲးအသးစံးဝဲလၢပှၤလၢအကတိၤကဘျံး ကဘျၣ်တၢ်လၢတၢ်ဆိၣ်လီၤသးအပူၤတဂၤလၢ်လၢ်န့ၣ်, တၢ်ကမၤဟးဂီၤကွံာ်အီၤစ့ၢ်ကီးလီၤ. 4သ့တၢ်လၢာ်ယွၤစံးဝဲလၢအဝဲကဆှၢလီၤတၢ်ဆိၣ် အၢအံၤဒီးတၢ်ဆိၣ်အၢအံၤကလီၤဘၣ်ကယဲၢ်တၢ်ဘျၣ်ကိး ဂၤဒဲးအဟံၣ်ဒီးကယဲၢ်ပှၤလၢအကတိၤကဘျံးကဘျၣ် တၢ်လၢတၢ်ဆိၣ်လီၤသးအပူၤအဟံၣ်န့ၣ်လီၤ. တၢ်ဆိၣ်အၢန့ၣ်, ကအိၣ်ဆိးလၢအဝဲသ့ၣ်အဟံၣ်တဖၣ်အပူၤဒီးပာ်လီၤတဲာ်အဝဲ သ့ၣ်လၢတၢ်ဟးဂီၤအပူၤန့ၣ်လီၤ.”
တၢ်ထံၣ်လၢညါခီဘၣ်ထွဲဒီးပိာ်မုၣ်တဂၤ လၢအအိၣ်လၢဃၤအပူၤ
5ကလူးအိၣ်ဖျါထီၣ်ကဒီး, ဒီးစံးဝဲ, “ကွၢ်, တၢ်အဂၤတမံၤဟဲကဒီးလံ.”
6ယသံကွၢ်, “တၢ်န့ၣ်မ့ၢ်တၢ်မနုၤလဲၣ်.”
အဝဲစံးဆၢယၤ, “တၢ်န့ၣ်မ့ၢ်ဃၤတဖျၢၣ်လၢအပာ်ဖျါထီၣ်ကီၢ်ဒီဘ့ၣ်ညါ အတၢ်ဒဲးဘးအခီပညီန့ၣ်လီၤ.”
7ဃၤန့ၣ်အိၣ်ဒီးအခိၣ်ကၢၢ်တခါလၢအဘၣ်တၢ်မၤအီၤလၢစၢၢ်လီၤ. ဖဲယကွၢ်တၢ်အခါန့ၣ်, တၢ်အခိၣ်ကၢၢ်ဘၣ်တၢ်အိးထီၣ်အီၤဒီးလၢဃၤ အပူၤန့ၣ်, ပိာ်မုၣ်တဂၤဆ့ၣ်နီၤဝဲလီၤ.
8ကလူးစံးဝဲဒၣ်, “ပိာ်မုၣ်အံၤ, မ့ၢ်တၢ်အၢတၢ်သီလီၤ.” အန့ၣ်ဝံၤဒီးအဝဲဆီၣ်နုာ်လီၤပိာ်မုၣ်န့ၣ်ဆူဃၤအပူၤ ဒီးပာ်လီၤကဒါက့ၤဃၤအခိၣ်ကၢၢ်န့ၣ်လီၤ. 9ယကွၢ်ထီၣ်တၢ်ဒီးထံၣ်ဘၣ်ပိာ်မုၣ်ခံဂၤဟဲယူၤဝဲဒၣ် ဆူယအိၣ်လၢအအိၣ်ဒီးဒံးဆ့တဖၣ်လၢအဂံၢ်ဆူၣ်ဘါ ဆူၣ်ဝဲဒ်ထိၣ်ဖးဒိၣ်တဘ့ၣ်အဒံးဆ့တဖၣ်အသိးလီၤ. အဝဲသ့ၣ်စိာ်ထီၣ်ဃၤန့ၣ်ဒီးယူၤကွံာ်ဃုာ်ဒီးအီၤလီၤ.
10ယသံကွၢ်ကလူးန့ၣ်, “အဝဲသ့ၣ်ကစိာ်ကွံာ်ဃၤန့ၣ်ဆူလဲၣ်.”
11အဝဲစံးဆၢယၤ, “ဆူကီၢ်ဘၤဘူၤလိၣ်, ဖဲအကဘှီထီၣ်တၢ်လုၢ်ဟံၣ် တဖျၢၣ်လၢအဂီၢ်လီၤ. ဖဲတၢ်လုၢ်ဟံၣ်ဝံၤဝဲဒီးဃၤန့ၣ်ကဘၣ်တၢ်ပာ်အီၤဖဲန့ၣ်လၢတၢ်က ဘူၣ်ထီၣ်ဘါထီၣ်အီၤအဂီၢ်လီၤ.”
Currently Selected:
လံာ်စကၤရယၤ 5: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
