လံာ်စကၤရယၤ 1
1
ယွၤကိးအပှၤဂီၢ်မုၢ်လၢကဟဲက့ၤကဒါက့ၤ ဆူအအိၣ်
1ဖဲကီၢ်ပၤရၣ်အစီၤပၤဖးဒိၣ်, စီၤဒၤရယါဝ့ၣ်ပၢတၢ်ခံနံၣ်တနံၣ်လါဃိးလါတလါအဆၢကတီၢ် န့ၣ်, ယွၤဟ့ၣ်လီၤတၢ်ကစီၣ်အံၤဆူဝံစကၤရယၤလၢအမ့ၢ် စီၤဘရ့ကယၤအဖိခွါ, ဒီးစီၤဧံးဒိၤအလံၤခွါအအိၣ်န့ၣ်လီၤ. 2ယွၤသ့တၢ်လၢာ်စံးဘၣ်ဝံစကၤရယၤလၢကတဲဘၣ်ပှၤဂီၢ်မုၢ်ဒ်အံၤ, “ယၤ, ယွၤအံၤ, ယသးဒိၣ်ထီၣ်ဘၣ်သုမိၢ်ပၢ်ဖံဖုလၢပျၢၤတဖၣ်ဒိၣ်မး, 3ဘၣ်ဆၣ်ဒီးခဲအံၤယစံးဘၣ်သု, ဟဲက့ၤကဒါက့ၤဆူယအိၣ်တက့ၢ်. ဒီးယကဟဲက့ၤကဒါက့ၤဆူသုအိၣ်လီၤ. 4လီၤဂာ်ဒီးသုမိၢ်ပၢ်ဖံဖုလၢပျၢၤတဖၣ်တဂ့ၤ, ယံာ်တ့ၢ်လံန့ၣ်ဝံ တဖၣ်ဟ့ၣ်လီၤတ့ၢ်အဝဲသ့ၣ်လၢယတၢ်ကစီၣ်, တဲဘၣ်အဝဲသ့ၣ်လၢအသုတအိၣ်မူတၢ်အၢတၢ်သီဒီးတၢ်ဒဲးဘးအတၢ် အိၣ်မူလၢၤတဂ့ၤန့ၣ်လီၤ. ဘၣ်ဆၣ်ဒီးအဝဲသ့ၣ်တဒိကနၣ်ယၤမ့ၢ်ဂ့ၤတစူၢ်ယၤမ့ၢ်ဂ့ၤန့ၣ်ဘၣ်. 5သုမိၢ်ပၢ်ဖံဖုလၢပျၢၤတဖၣ်န့ၣ်တအိၣ်မူလၢၤဘၣ်. 6ယဟ့ၣ်လီၤတ့ၢ်သုမိၢ်ပၢ်ဖံဖုတဖၣ်လၢယတၢ်မၤလိာ် တဖၣ်ဒီးတၢ်ဟ့ၣ်ပလီၢ်တဖၣ်ခီဖျိယခ့ယပှၤဝံသ့ၣ်တဖၣ် ဘၣ်ဆၣ်ဒီးအဝဲသ့ၣ်တကနၣ်ဃုာ်ဝဲတၢ်သ့ၣ်တဖၣ်န့ၣ်အဃိတူၢ်ဘၣ် က့ၤတၢ်လၢတၢ်သ့ၣ်တဖၣ်န့ၣ်အဂီၢ်လီၤ. အဝဲသ့ၣ်ပီၢ်ယၢ်လီၤက့ၤအသးဒီးအၢၣ်လီၤအီလီၤဝဲဒီးသ့ၣ်ညါ ဝဲလၢယၤ, သ့တၢ်လၢာ်ယွၤစံၣ်ညီၣ်တ့ၢ်အဝဲသ့ၣ်ဒ်အဝဲသ့ၣ်ကြၢးတူၢ်ဘၣ်တၢ် အသိးဒီးဒ်ယပာ်လီၤတ့ၢ်ယသးလၢယကမၤတၢ်အသိးန့ၣ်လီၤ.”
ဝံအတၢ်ထံၣ်လၢညါခီဘၣ်ထွဲဒီးကသ့ၣ်တဖၣ်
7ဖဲစီၤပၤဖးဒိၣ်ဒၤရယါဝ့ၣ်ပၢတၢ်ခံနံၣ်တနံၣ်, လါတဆံ တလါလၢအမ့ၢ်လါၡဘး, လါထီၣ်ခံဆံလွံၢ်နံၤတနံၤန့ၣ်, ယွၤဟ့ၣ်လီၤယၤတၢ်ကစီၣ်တမံၤလၢတၢ်ထံၣ်လၢညါခီ တမံၤအပူၤလၢမုၢ်နၤန့ၣ်လီၤ. 8ယထံၣ်ယွၤအကလူးတဂၤဒိးကသ့ၣ်အဂီၤတဒုလီၤ. အဝဲအိၣ်ကတီၢ်ဝဲလၢသမ့ၤဟဒးအထူၣ်တနီၤ အကျါလၢအအိၣ်လၢတၢ်တြီၤပူၤ, ဒီးလၢအလီၢ်ခံန့ၣ်ကသ့ၣ် ဂီၤ, ကသ့ၣ်ဂီၤဃ့, ဒီးကသ့ၣ်ဝါအဂၤတဖၣ်အိၣ်ဝဲဒၣ်လီၤ. 9ယသံကွၢ်အီၤ, “တၢ်ဒိၣ်ဧၢ, ကသ့ၣ်တဖၣ်အံၤအခီပညီ မ့ၢ်တၢ်မနုၤလဲၣ်.” အဝဲစံးဆၢဝဲ, “ယကဒုးနဲၣ်နၤအဝဲသ့ၣ်အခီပညီမ့ၢ်တၢ်မနုၤလဲၣ်န့ၣ်လီၤ. 10ယွၤမၢလီၤအဝဲသ့ၣ်လၢကလဲၤဒီးကွၢ်ဟုၣ်ကွၢ်စုးတၢ်လၢဟီၣ်ခိၣ် ချၢလီၤ.”
11အဝဲသ့ၣ်ဒုးသ့ၣ်ညါက့ၤကလူးဒီးစံးဝဲ, “ပလဲၤဝ့ၤဝီၤလံလၢဟီၣ်ခိၣ်ချၢလံ, ဒီးပထံၣ်လၢဟီၣ်ခိၣ်ဒီဘ့ၣ်ညါအိၣ်ဃူအိၣ်ဖိးဒီးအိၣ်မုာ်အိၣ်ခုၣ်ဝဲလီၤ.”
12တုၤနုၤတဘျီ, ယွၤအကလူးစံးဝဲဒၣ်, “သ့တၢ်လၢာ်ယွၤဧၢ, နသးထီၣ်တ့ၢ်ဝ့ၢ်ယရူၤရှလ့ၣ်ဒီးကီၢ်ယူဒၤအဝ့ၢ်တဖၣ်, ခဲအံၤအိၣ်လံအနံၣ်နွံဆံလံ. တချုးလၢနကဒုးနဲၣ်နတၢ်သးကညီၤအဝဲသ့ၣ်န့ၣ်ကယံာ်ဒံးဆံး ယံာ်လဲၣ်.”
13ယွၤစံးဆၢကလူးန့ၣ်လၢတၢ်ကတိၤအမုာ်တဖၣ်,
14ဒီးကလူးန့ၣ်တဲဘၣ်ယၤလၢယကတဲဖျါထီၣ် တၢ်လၢသ့တၢ်လၢာ်ယွၤစံးတ့ၢ်ဒ်အံၤ, “ယအိၣ်ဒီးတၢ်အဲၣ်ဒီးတၢ်သးအိၣ်လၢအဒိၣ်ဝဲယိာ်ဝဲတမံၤလၢ ဝ့ၢ်ယရူၤရှလ့ၣ်, ယဝ့ၢ်စီဆှံအဂီၢ်, 15ဒီးယသးထီၣ်ဘၣ်ပှၤကလုာ်တဖၣ်လၢအမုာ်လၤသးခု ဘၣ်လၢတၢ်အိၣ်ဘှ့ၣ်အိၣ်ဘှီၣ်ဒီးတၢ်ဃူတၢ်ဖိးအပူၤဒိၣ်မး လီၤ. အဂ့ၢ်ဒ်အံၤ, ဖဲယဟံးဃာ်ဒံးယတၢ်သးဒိၣ်ထီၣ်ထီဒါယပှၤဂီၢ်မုၢ် အခါ, ပှၤကလုာ်တဖၣ်ဒုးတူၢ်ဘၣ်ခီၣ်ဘၣ်အၢထီၣ်ယပှၤဂီၢ်မုၢ်အတၢ်လီၤ. 16လၢတၢ်န့ၣ်အဃိ, ယဟဲက့ၤကဒါက့ၤဆူဝ့ၢ်ယရူၤရှလ့ၣ်လၢယကဒုး နဲၣ်တၢ်သးကညီၤဘၣ်ဝ့ၢ်အံၤန့ၣ်လီၤ. ယတၢ်လုၢ်ဟံၣ်ကဘၣ်တၢ်ပာ်ကဒါက့ၤအီၤ, ဖဲအအိၣ်တ့ၢ်ဝဲ အလီၢ်ဒီးဝ့ၢ်ကဘၣ်တၢ်ဘှီထီၣ်ကဒါက့ၤအီၤလီၤ.”
17ကလူးန့ၣ်တဲဘၣ်စ့ၢ်ကီးယၤလၢယကတဲဖျါထီၣ်တၢ်ဒ်အံၤ, “သ့တၢ်လၢာ်ယွၤစံးဝဲလၢ, အဝ့ၢ်တဖၣ်ကဘီၣ်ထီၣ်ညီထီၣ်ကဒီးတဘျီ, ဒီးအဝဲကမၤစၢၤကဒီးဝ့ၢ်ယရူၤရှလ့ၣ်တဘျီဒီးတဲဖျါလၢဝ့ၢ်ယရူၤရှလ့ၣ် မ့ၢ်အဝ့ၢ်န့ၣ်လီၤ.”
တၢ်ထံၣ်လၢညါခီဘၣ်ထွဲဒီးတၢ်အနၢၤတဖၣ်
18လၢတၢ်ထံၣ်လၢညါခီအဂၤတမံၤအပူၤန့ၣ်, ယထံၣ်ကျီၢ်ဖါအနၢၤလွံၢ်ဘိလီၤ. 19ယသံကွၢ်ကလူးတဂၤလၢအကတိၤတ့ၢ်လံတၢ်ဒီးယၤ, “တၢ်အနၢၤတဖၣ်အံၤအခီပညီမ့ၢ်ဒ်လဲၣ်.” အဝဲဒၣ်စံးဆၢယၤ, “အဝဲသ့ၣ်တဖၣ်အံၤပာ်ဖျါထီၣ်ဟီၣ်ခိၣ်တၢ်စိတၢ်ကမီၤတဖၣ်လၢ အမၤလီၤပြံလီၤပြါတ့ၢ်ကီၢ်ယူဒၤ, ကီၢ်အံၣ်စရ့လးဒီးဝ့ၢ်ယရူၤရှလ့ၣ်အပှၤဂီၢ်မုၢ်န့ၣ်လီၤ.”
20အန့ၣ်ဝံၤဒီးယွၤဒုးနဲၣ်ယၤလၢပှၤမၤတၢ်ဖိ လွံၢ်ဂၤလၢအအိၣ်ဒီးခံၣ်ခူၣ်တဖၣ်လီၤ. 21ယသံကွၢ်အီၤ, “ပှၤတဖၣ်အံၤဟဲမၤတၢ်မနုၤလဲၣ်.” အဝဲစံးဆၢယၤ, “အဝဲသ့ၣ်ဟဲဒ်သိးကမၤပျံၤမၤဖုးဒီးမၤလီၤဃံၤကွံာ်ပှၤ ကလုာ်ဂၤတဖၣ်လၢအဆီၣ်လီၤသဘှံးကွံာ်ကီၢ်ယူဒၤ ဒီးမၤလီၤပြံလီၤပြါအပှၤဂီၢ်မုၢ်လၢာ်လၢာ်ဆ့ဆ့န့ၣ်လီၤ.”
Currently Selected:
လံာ်စကၤရယၤ 1: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
