စံးထီၣ်ပတြၢၤ 83
83
တၢ်ထုကဖၣ်လၢတၢ်မၤနၢၤအံၣ်စရ့လး အဒုၣ်အဒါတဖၣ်အဂီၢ်
1ကစၢ်ယွၤဧၢ, အိၣ်ဘှ့ၣ်အိၣ်ဘှီၣ်တဂ့ၤ.
အိၣ်ဂၢၢ်တပၢၢ်တဂ့ၤ
အိၣ်ဃိကလာ်တဂ့ၤ
2ကွၢ်ကွၢ်, နဒုၣ်နဒါတဖၣ်အိၣ်လၢ
တၢ်တၢထီၣ်တၢလီၤအပူၤ,
ဒီးပှၤလၢအသးဟ့နၤတဖၣ်ပူထီၣ်လီထီၣ်တၢ်လီၤ.
3အဝဲသ့ၣ်ကူၣ်ထီၣ်တၢ်ကူၣ်ခူသူၣ်ထီဒါနပှၤဂီၢ်မုၢ်
ဒီးကူၣ်တၢ်အၢထီဒါပှၤလၢနကဟုဘံၣ်ကယာ်ဘၢ
အီၤတဖၣ်န့ၣ်လီၤ.
4အဝဲသ့ၣ်စံးဝဲ, “ဟဲ, မ်ပမၤဟးဂီၤအပှၤကလုာ်,
ဒ်သိးအံၣ်စရ့လးကဘၣ်တၢ်သးပ့ၤနီၣ်ကွံာ်အီၤ
လီၤစိၤန့ၣ်တက့ၢ်.”
5အဝဲသ့ၣ်ကူၣ်လိာ်သကိးအသးလၢ
အသးတဖျၢၣ်ဃီဒီး,
မၤတၢ်အၢၣ်လီၤထီဒါနၤ,
6ပှၤဂီၢ်မုၢ်တဖၣ်လၢအဘၣ်ဃးဒီးကီၢ်အဒိၣ်ဒီး ပှၤယံးၡမၤဧ့လးဖိ,
ပှၤမိၤအးဖိဒီးပှၤဟၤကၢ်ဖိ,
7ကံးဘလး, ဧၣ်မိၣ်, ဒီးဧမၤလ့းအပှၤဂီၢ်မုၢ်,
ပှၤဖလ့ၡသးဖိဒီးပှၤစိၢ်ဖိ,
8ပှၤအၤၡူၢ်ဖိပာ်ဖှိၣ်စ့ၢ်ကီးအသးဒီးအဝဲသ့ၣ် ဒ်ပှၤဒီသိၣ်ဒီမှံၤလၢအဂံၢ်ဆူၣ်ဘါဆူၣ်လၢအမ့ၢ်
စီၤလိၣ်အစၢၤအသွဲၣ်တဖၣ်န့ၣ်လီၤ. စ့လၤ
9မၤအဝဲသ့ၣ်ဒ်နမၤပှၤမံးဒယၣ်ဖိအသိး,
ဒီးဒ်စီၤစံစရၤ, ဒီးစီၤယၤဘံၣ်လၢထံကျိကံၡိၣ် အသိးန့ၣ်တက့ၢ်.
10နမၤနၢၤကွံာ်အဝဲသ့ၣ်လၢဧံၤဒိၣ်
ဒီးအခိၣ်တဖၣ်အုၣ်ကွံာ်လၢ
ဟီၣ်ခိၣ်လိၤလီၤ.
11မၤအပှၤခိၣ်ပှၤနၢ်သ့ၣ်တဖၣ်ဒ်နမၤတ့ၢ်
စီၤဧိၤရ့ာ်ဒီးစီၤစအ့ာ်အသိး,
မၤနၢၤကွံာ်အပဒိၣ်ခဲလၢာ်ဒ်နမၤနၢၤတ့ၢ်
စီၤစ့ဘၤဒီးစီၤစးလမူနၤအသိး,
12ပှၤလၢအစံးဝဲ, “ထံဧိၤကီၢ်ဧိၤလၢ
အဘၣ်ဃးဒီးကစၢ်ယွၤန့ၣ်ပကဟံးန့ၢ်လၢပဂီၢ်လီၤ.”
13အိ, ယကစၢ်ယွၤဧၢ, မၤလီၤပြံလီၤပြါအဝဲသ့ၣ်ဒ်ဖ့အသိး
ဒီးဒ်လီၢ်အကမူၣ်လၢ
ကလံၤအမဲာ်ညါအသိးန့ၣ်တက့ၢ်.
14ဒ်မ့ၣ်အူအီၣ်သ့ၣ်ပှၢ်အသိးဒီးဒ်မ့ၣ်အူလၣ်
ကဲၤကပျီၤထီၣ်ကစၢၢ်ကလိအသိးန့ၣ်,
15လူၤထွဲအဝဲသ့ၣ်လၢနကလံၤမုၢ်တွၤ,
ဒီးမၤပျံၤအဝဲသ့ၣ်လၢနကလံၤ
မုၢ်လၢအအူတပျုာ်တပျီၤတၢ် တက့ၢ်.
16ယွၤဧၢ, မၤပှဲၤအမဲာ်ဒီးတၢ်မဲာ်ဆှး
ဒ်သိးအကဃုသ့ၣ်ညါနမံၤတက့ၢ်.
17မ်အဘၣ်တၢ်မဲာ်ဆှးဒီးပျံၤတၢ်ဖုးတၢ်လီၤထူလီၤယိာ်,
ဒီးမ်အဟးဂီၤကွံာ်လၢာ်လၢာ်ဆ့ဆ့ လၢတၢ်ဘၣ်ဆိၣ်အၢအပူၤတက့ၢ်.
18မ်အဝဲသ့ၣ်, သ့ၣ်ညါလၢထဲနၤတဂၤဧိၤန့ၣ်နမ့ၢ်ယွၤ,
ပှၤပၢတၢ်အဒိၣ်ကတၢၢ်လၢဟီၣ်ခိၣ်ချၢန့ၣ်တက့ၢ်.
Currently Selected:
စံးထီၣ်ပတြၢၤ 83: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
