စံးထီၣ်ပတြၢၤ 132
132
တၢ်စံးထီၣ်ပတြၢၤထီၣ်တၢ်လုၢ်ဟံၣ်
1ယွၤဧၢ, သးပ့ၤနီၣ်စီၤဒၤဝံးဒီးအတၢ်ကီတၢ်ခဲခဲလၢာ်လၢ
အတူၢ်ဘၣ်ဝဲန့ၣ်တဂ့ၤ.
2ယွၤဧၢ, သ့ၣ်နီၣ်ထီၣ်က့ၤတၢ်လၢအဝဲအၢၣ်လီၤတ့ၢ်ဝဲ,
တၢ်ဆိၣ်လၢအမၤတ့ၢ်ဝဲဒီးနၤ,
စီၤယၤကိာ်အကစၢ်ယွၤလၢအဂံၢ်ဆူၣ်ဘါဆူၣ်,
3လၢအစံးဝဲ, “ယတက့ၤဆူဟံၣ်မ့ၢ်ဂ့ၤ
ဆူလီၢ်မံခိၣ်မ့ၢ်ဂ့ၤ,
4ယတအိၣ်ဘှံးအိၣ်သါမ့ၢ်ဂ့ၤ
မံမ့ၢ်ဂ့ၤ,
5တချုးဒံးဘၣ်လၢ ယမၤန့ၢ်ပာ်စၢၤ
တၢ်လီၢ်တတီၤလၢ ယွၤအဂီၢ်, ဟံၣ်တဖျၢၣ်လၢ
စီၤယၤကိာ်အကစၢ်ယွၤလၢ အဂံၢ်ဆူၣ်ဘါဆူၣ်အဂီၢ်န့ၣ်ဘၣ်.”
6လၢဝ့ၢ်ဘ့ၤသလ့ဃ့ၣ်အပူၤန့ၣ် ပနၢ်ဟူဘၣ် တၢ်အၢၣ်လီၤအီလီၤ အတလါစီဆှံအဂ့ၢ်,
ဒီးထံၣ်ဘၣ်အီၤလၢယၤရံၣ်အပျီတဖၣ်အပူၤန့ၣ်လီၤ.
7ပစံးပဝဲ, “မ်ပလဲၤသကိးဆူ ယွၤအဟံၣ်,
မ်ပဘူၣ်ထီၣ်ဘါထီၣ်တၢ်လၢ
အလီၢ်ပစိာ်အမဲာ်ညါတက့ၢ်.”
8ယွၤဧၢ, ဟဲဆူနတၢ်လုၢ်ဟံၣ်အိၣ်ဒီး
တလါစီဆှံလၢ အမ့ၢ်နတၢ်စိတၢ်ကမီၤအပနီၣ်,
ဒီးအိၣ်ဖဲအံၤလီၤစိၤလီၤဃၣ်တက့ၢ်.
9မ်နပှၤလုၢ်တၢ်အခိၣ်တဖၣ်
မၤတၢ်အဘၣ်ထီဘိတထံၣ်ဃီတက့ၢ်.
မ်နပှၤဂီၢ်မုၢ်ကိးထီၣ်လၢ
တၢ်သးခုအပူၤတက့ၢ်.
10နမၤတ့ၢ်တၢ်အၢၣ်လီၤအီလီၤတမံၤဒီး နခ့နပှၤစီၤဒၤဝံးလီၤ.
ယွၤဧၢ, ညိကွံာ်စီၤပၤလၢနဃုထၢအီၤန့ၣ်တက့ၢ်.
11နမၤတ့ၢ်တၢ်အၢၣ်လီၤအီလီၤ
သမှံၤသပှၢ်တမံၤဒီး စီၤဒၤဝံး တၢ်အၢၣ်လီၤတမံၤလၢ နတထုးကွံာ်အီၤဘၣ်န့ၣ်လီၤ.
“ယကဒုးကဲထီၣ်နဖိခွါတဖၣ်အကျါ တဂၤလၢ စီၤပၤ,
ဒီးအဝဲကပၢတၢ်လၢ နလီၢ်န့ၣ်လီၤ.
12နဖိခွါတဖၣ်မ့ၢ်တီဒီးယတၢ်အၢၣ်လီၤအီၤလီၤ,
ဒီးတၢ်မၤလိာ်တဖၣ်လၢ
ယဟ့ၣ်လီၤအဝဲသ့ၣ်ဒီး,
အဖိခွါတဖၣ်စ့ၢ်ကီး ကကဲထီၣ်စီၤပၤလၢ
နလီၢ်တစိၤဘၣ်တစိၤန့ၣ်လီၤ.
13ယွၤဃုထၢတ့ၢ်လံစံယိၣ်, ဒီးအဝဲ
အဲၣ်ဒိးဒုးကဲထီၣ်အီၤလၢ
အဟံၣ်န့ၣ်လီၤ.
14“တၢ်အံၤမ့ၢ်ယတၢ်အိၣ်တၢ်ဆိးအလီၢ်လီၤစိၤလီၤထီလီၤ.
တၢ်အံၤမ့ၢ်တၢ်လီၢ်ဖဲ
ယအဲၣ်ဒိးပၢတၢ်န့ၣ်လီၤ.
15ယကဆိၣ်ဂ့ၤစံယိၣ်ထူးထူးတီၤတီၤလၢ အတၢ်လိၣ်ခဲလၢာ်တဖၣ်,
ဒီးယကဒုးမံသူၣ်မံသးအပှၤဖှီၣ်ဖိယာ်ဖိ
ဒီးတၢ်အီၣ်န့ၣ်လီၤ.
16ယကဆိၣ်ဂ့ၤအပှၤလုၢ်တၢ်အခိၣ်တဖၣ်
လၢအတၢ်မၤခဲလၢာ်အပူၤ,
ဒီးအပှၤဂီၢ်မုၢ်ကသးဝံၣ်တၢ်ဒီး
ကိးထီၣ်လၢတၢ်သးခုအပူၤလီၤ.
17ယကဒုးကဲထီၣ်စီၤဒၤဝံးအစၢၤအသွဲၣ်တဖၣ်
အကျါတဂၤလၢ စီၤပၤဖးဒိၣ်ဖဲအံၤ,
ဒီးယကကတီၤဃာ် ယစီၤပၤလၢ ယဃုထၢအီၤ အတၢ်ပၢတၢ်ပြးန့ၣ်လီၤ.
18ယကလုၣ်ဘၢအဒုၣ်အဒါတဖၣ်ဒီး
တၢ်မဲာ်ဆှးလီၤ.
မ့မ့ၢ်ကဘီၣ်ထီၣ်ညီထီၣ်ဒီး
ဂုၤထီၣ်ပသီထီၣ်န့ၣ်လီၤ.
Currently Selected:
စံးထီၣ်ပတြၢၤ 132: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
