လံာ်တၢ်ကူၣ်သ့အတၢ်ကတိၤ 31
31
တၢ်ဟ့ၣ်ကူၣ်ဆူစီၤပၤတဂၤအအိၣ်
1အအံၤမ့ၢ်တၢ်ကတိၤသညူးသပှၢ်တဖၣ်လၢစီၤပၤလမူၤအ့လးအမိၢ်စံး ဘၣ်အီၤန့ၣ်လီၤ.
2ယဖိခွါဧၢ, ယဒၢလီၢ်အတၤသၣ်ဧၢ, ဖိခွါလၢအမ့ၢ်တၢ်ထု ကဖၣ်အတၢ်စံးဆၢဧၢ, 3မၤလၢာ်နဂံၢ်နဘါခဲလၢာ်လၢတၢ်မုာ်ဖံးမုာ်ညၣ်ဒီးနကျိၣ်နစ့ခဲ လၢာ်လၢပိာ်မုၣ်တဖၣ်အဃိတဂ့ၤ. အဝဲသ့ၣ်တဖၣ်မၤဟးဂီၤတ့ၢ် စီၤပၤတဖၣ်ဒၣ်လဲာ်လီၤ. 4ဒိကနၣ်ယၤတက့ၢ်စီၤလမူၤအ့လးဧၢ, စီၤပၤတဖၣ်တကြၢးအီ စပံးထံမ့ၢ်ဂ့ၤ, တကြၢးအိၣ်ဒီးသးလၢအဆၢအီသံးအီဂာ်မ့ၢ်ဂ့ၤ န့ၣ်ဘၣ်. 5ဖဲအဝဲသ့ၣ်အီတၢ်ဒီး, အဝဲသ့ၣ်သးပ့ၤနီၣ်ကွံာ်တၢ်သိၣ်တၢ်သီ တဖၣ်ဒီးကွၢ်ကပာ်ကွံာ်ပှၤလၢအလိၣ်ဘၣ်တၢ်မၤစၢၤတဖၣ်အခွဲး အယာ်န့ၣ်လီၤ. 6သံးဧိၤဂာ်ဧိၤမ့ၢ်ဒၣ်လၢပှၤအကသံတဖၣ်အဂီၢ်ဒီးပှၤလၢအသူၣ်ကိၢ် သးဂီၤတဖၣ်အဂီၢ်န့ၣ်လီၤ. 7ပျဲအဝဲသ့ၣ်အီဒၣ်ဝဲဒီးသးပ့ၤနီၣ်ကွံာ်အတၢ်ဖှီၣ်တၢ်ယာ်ဒီး အတၢ်သူၣ်တမုာ်သးတမုာ်န့ၣ်တက့ၢ်.
8ကတိၤထီၣ်တၢ်လၢပှၤလၢအကတိၤတၢ်လၢအဂီၢ်ဒၣ်ဝဲတသ့ တဖၣ်အဂီၢ်န့ၣ်တက့ၢ်. ပှၤလၢအမၤစၢၤလီၤအသးတသ့တဖၣ်န့ၣ်, ဒီဒၣ်အိၣ်ပှိၤအတၢ်အခွဲးအယာ်တဖၣ်တက့ၢ်. 9ကတိၤတၢ်လၢအဝဲသ့ၣ်အဂီၢ်ဒီးကဲထီၣ်စံၣ်ညီၣ်ကွီၢ်လၢအတီ တဂၤတက့ၢ်. ဒီဒၣ်အိၣ်ပှိၤပှၤဖှီၣ်ဖိဒီးပှၤလၢအတၢ်တအိၣ်တဖၣ်အတၢ်ခွဲး တၢ်ယာ်တဖၣ်တက့ၢ်.
မါလၢအထီၣ်ဘး
10မါလၢအထီၣ်ဘးတဂၤန့ၣ်ပဃုထံၣ်န့ၢ်အီၤကီမးလဲၣ်. အဝဲလုၢ်ဒိၣ်ပှ့ၤဒိၣ်န့ၢ်ဒံးတၢ်မျၢ်ပလဲတဖၣ်တက့ၢ်လီၤ.
11အဝၤပာ်အတၢ်နာ်နီၢ်နီၢ်လၢအပူၤအဃိဒီး, တဖှီၣ်လီၤယာ်လီၤဝဲ နီတစုဘၣ်.
12အတၢ်အိၣ်မူတစိၤဒၣ်အီၤန့ၣ်, မၤဂ့ၤအဝၤဒီးတမၤဘၣ်ဒိဘၣ်ထံး အီၤနီတစုဘၣ်.
13ဃုန့ၢ်ဝဲသိဆူၣ်ဒီးဘဲ, ဒီးမၤတၢ်လၢအစုတဖၣ်လီၤ.
14အဝဲဟဲက့ၤစိာ်တၢ်အီၣ်တၢ်အီလၢတၢ်လီၢ်တဖၣ် လၢတၢ်ဒ့ၣ်စၢၤဖးယံၤဆူဟံၣ်, ဒ်ပှၤကူၣ်တၢ်ကၤတၢ်အကဘီတဖၣ်မၤဝဲအသိးန့ၣ်လီၤ.
15ဆၢထၢၣ်လၢဂီၤထၢၣ်သၢဒ်သိးကကတဲာ်ကတီၤတၢ်အီၣ်တၢ်အီလၢအဒူၣ်ဖိ ထၢဖိအဂီၢ်ဒီးကတဲဘၣ်အခ့အပှၤပိာ်မုၣ်တဖၣ်လၢအကဘၣ်မၤတၢ်မနုၤ မနုၤအဂီၢ်န့ၣ်လီၤ.
16ဃုထံၣ်ဟီၣ်ခိၣ်ဒီးပှ့ၤဝဲ, ဒီးစ့လၢအမၤန့ၢ်ဝဲန့ၣ်အဝဲသူၣ်လီၤဖျးလီၤစပံးလီၢ်တလီၢ်န့ၣ်လီၤ.
17အဝဲမ့ၢ်ပှၤလၢအမၤတၢ်ဆူၣ်, အဂံၢ်အဘါဆူၣ်ဒီးမၤတၢ်ခုတဂၤန့ၣ် လီၤ.
18အဝဲသ့ၣ်ညါတၢ်လၢအမၤဝဲကိးမံၤဒဲးအလုၢ်အပှ့ၤဒီးမၤတၢ်တုၤ လၢမုၢ်နၤယိာ်ဒၣ်လဲာ်လီၤ.
19အဝဲလ့ၢ်အလုၣ်ဒၣ်ဝဲဒီးထါအကူအသိးဒၣ်ဝဲလီၤ.
20အဝဲဟ့ၣ်တၢ်ညီလၢပှၤဖှီၣ်ဖိယာ်ဖိဒီးပှၤလၢအတၢ်တအိၣ်တဖၣ်န့ၣ် လီၤ.
21ဖဲမူခိၣ်ဖီလီၤန့ၣ်အဝဲတကိၢ်တၢ်ဂီၤတၢ်ဘၣ်. အဂ့ၢ်ဒ်အံၤ, အဟံၣ်ဖိဃီဖိအိၣ်ဒီးတၢ်ကူတၢ်ကၤအလၢၤန့ၣ်လီၤ.
22အဝဲမၤလီၢ်မံဒါတဖၣ်ဒီးကူဝဲသိးဝဲတၢ်ကူတၢ်ကၤတဖၣ်လၢအဘၣ် တၢ်မၤအီၤလၢဘဲလုးတကုာ်အဂ့ၤကတၢၢ်န့ၣ်လီၤ.
23အဝၤဘၣ်တၢ်သ့ၣ်ညါအီၤဂ့ၤမးမ့ၢ်လၢအမ့ၢ်ပှၤခိၣ်ပှၤနၢ်လၢ ထံဖိကီၢ်ဖိအဖျိးစိအကျါတဂၤအဃိန့ၣ်လီၤ.
24အဝဲမၤတၢ်ကူတၢ်သိးဒီးယီၢ်တကိးတဖၣ်ဒီးဆါလီၤဝဲဆူ ပှၤကူၣ်တၢ်ကၤတၢ်တဖၣ်အအိၣ်န့ၣ်လီၤ.
25အဝဲအဂံၢ်ဆူၣ်အဘါဆူၣ်ဒီးဘၣ်တၢ်ပာ်ကဲအီၤဒီးတပျံၤတၢ်လၢ ကကွၢ်ဆၢၣ်မဲာ်ခါဆူညါအဂီၢ်ဘၣ်.
26အဝဲကတိၤတၢ်အိၣ်ဒီးတၢ်ကတိၤကပုာ်လုးဖိလၢတၢ်ကူၣ်သ့ တမံၤအပူၤန့ၣ်လီၤ.
27အဝဲအတၢ်မၤအါထီဘိဒီးကွၢ်ထွဲအဟံၣ်ဖိဃီဖိအတၢ်လိၣ်တဖၣ် န့ၣ်လီၤ.
28အဖိတဖၣ်ပာ်ဖျါအတၢ်စံးဘျုးစံးဖှိၣ်အီၤဒီးအဝၤန့ၣ်စံးထီၣ် ပတြၢၤအီၤလီၤ.
29အဝဲစံးဝဲ, “ပိာ်မုၣ်အါဂၤမ့ၢ်မါလၢအဂ့ၤလီၤ. ဘၣ်ဆၣ်နဲနမ့ၢ်ပှၤအဂ့ၤကတၢၢ်လၢအဝဲသ့ၣ်ခဲလၢာ်အကျါလီၤ.”
30တၢ်လီၤအဲၣ်လီၤကွံန့ၣ်လီန့ၢ်တၢ်သ့, ဒီးတၢ်ဃံတၢ်လၤန့ၣ် လီၤမၢ်ကွံာ်ဝဲလီၤ. မ့မ့ၢ်, ပိာ်မုၣ်တဂၤလၢအမၤလၤကပီၤယွၤန့ၣ်, ကြၢးဘၣ်တၢ်စံးထီၣ်ပတြၢၤအီၤလီၤ.
31ဟ့ၣ်အီၤတၢ်စံးထီၣ်ပတြၢၤလၢတၢ်လၢအမၤဝဲခဲလၢာ်အဃိ န့ၣ်တက့ၢ်. အဝဲကြၢးန့ၢ်ဘၣ်ပှၤခဲလၢာ်အတၢ်ပာ်ဒိၣ်ပာ်ကဲအီၤ န့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 31: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
