လံာ်တၢ်ကူၣ်သ့အတၢ်ကတိၤ 30
30
စီၤအၤကူၢ်အတၢ်ကတိၤတဖၣ်
1အဝဲအံၤမ့ၢ်စီၤယၤက့ၣ်အဖိခွါစီၤအၤကူၢ်အတၢ်ကတိၤသညူး သပှၢ်တဖၣ်န့ၣ်လီၤ.
“ယွၤတအိၣ်ဒီးယၤဘၣ်, ယွၤတအိၣ်ဒီးယၤဘၣ်,
ဒီးယမၤစၢၤလီၤက့ၤယသးတသ့ဘၣ်.
2ယလီၤဂာ်ဒီးဆၣ်ဖိကီၢ်ဖိအါန့ၢ်ဒံးပှၤကညီတဂၤ တက့ၢ်လီၤ.
ယတအိၣ်ဒီးတၢ်သးဆးလၢကြၢးအိၣ်ဒီးပှၤကညီတဂၤန့ၣ်ဘၣ်.
3ယတမၤလိတ့ၢ်တၢ်ကူၣ်သ့တမံၤမံၤနီတစုဘၣ်.
ဒီးကယဲၢ်တၢ်ဘၣ်ဃးဒီးယွၤန့ၣ်ယတသ့ၣ်ညါ နီတမံၤဘၣ်.
4မ့ၢ်မတၤလဲၤတုၤထီၣ်ဘးမူခိၣ်ဒီးဟဲက့ၤလီၤဝဲတဂၤလဲၣ်.
မ့ၢ်မတၤဖီၣ်န့ၢ်ကလံၤလၢအစုပူၤတဂၤလဲၣ်.
မ့ၢ်မတၤဘိၣ်ထီၣ်ထံလၢတၢ်ကံးယာ်တဘ့ၣ်အပူၤတဂၤလဲၣ်.
မ့ၢ်မတၤပာ်ဂၢၢ်ပာ်ကျၢၤဟီၣ်ခိၣ်အဆၢတဖၣ် တဂၤလဲၣ်.
မ့ၢ်နသ့ၣ်ညါအဝဲမ့ၢ်မတၤလဲၣ်. အဖိခွါမ့ၢ်မတၤလဲၣ်, န့ၣ်ဧါ
5ယွၤမၤလၢပှဲၤအတၢ်အၢၣ်လီၤကိးထံၣ်ဒဲးလီၤ. အဝဲလီၤဂာ်ဒ်ကတီၤတဘ့ၣ်အသိးလၢပှၤဃုန့ၢ်အတၢ်ဒီဒၣ်အိၣ်ပှိၤ ကိးဂၤဒဲးအဂီၢ်လီၤ. 6တၢ်တမံၤလၢအတစံးဝဲနီတဘျီဘၣ်န့ၣ်, နမ့ၢ်တဲလၢအစံးဝဲဒီး, အဝဲကသိၣ်ဃီၣ်နၤဒီးဒုးနဲၣ်ဝဲလၢနမ့ၢ်ပှၤလီတၢ်ဖိတဂၤန့ၣ် လီၤ.”
တၢ်ကူၣ်သ့အတၢ်ကတိၤအါထီၣ်
7ယဃ့နၤ, ကစၢ်ယွၤဧၢ, လၢနကဟ့ၣ်ယၤတၢ်ခံမံၤတချုး ယသံဒံးဘၣ်န့ၣ်လီၤ. 8တြီယၤလၢတၢ်လီတၢ်ဝ့ၤတက့ၢ်. ဒီးပျဲလၢယကထူးတီၤမ့ၢ်ဂ့ၤ, ယကဖှီၣ်ယာ်မ့ၢ်ဂ့ၤန့ၣ်တဂ့ၤ. အဃိဒီး, ဟ့ၣ်လီၤယၤတၢ်အီၣ်ထဲဒၣ်လၢယလိၣ်ဘၣ်အီၤအဂီၢ်န့ၣ်တက့ၢ်. 9ယတၢ်အီၣ်မ့ၢ်အါကဲၣ်ဆိးဒီး, ယကစံးဘၣ်ဖုးလၢယတလိၣ်ဘၣ်နၤ န့ၣ်လီၤ. ဘၣ်ဆၣ်ယမ့ၢ်ဖှီၣ်ဒီး, ယကဟုၣ်ဘၣ်ဖုးတၢ်ဒီးဒုးလီၤဘၣ် တၢ်မဲာ်ဆှးလၢယကစၢ်ယွၤန့ၣ်လီၤ.
10ကတိၤဒုၣ်ဒွဲၣ်တၢ်ခ့တၢ်ပှၤတဂၤလၢအကစၢ်အမဲာ်ညါနီတစုတဂ့ၤ. နကဘၣ်တၢ်ဆိၣ်အၢနၤဒီးနကဘၣ်တူၢ်တၢ်လၢတၢ်န့ၣ်အဂ့ၢ်လီၤ.
11ပှၤအိၣ်ဝဲတကလုာ်လၢအဆိၣ်အၢအပၢ်တဖၣ်ဒီးတပာ်ဖျါအတၢ်စံးဘျုး ဆူအမိၢ်တဖၣ်အအိၣ်ဘၣ်န့ၣ်လီၤ.
12ပှၤအိၣ်ဝဲတကလုာ်လၢအဆိကမိၣ်လီၤအသးလၢအဝဲသ့ၣ် ကဆှီဝဲဖဲအနီၢ်ကစၢ်ဒၣ်ဝဲဘၣ်အၢလၢာ်အခၢးန့ၣ်လီၤ.
13ပှၤအိၣ်ဝဲတကလုာ်လၢအဆိကမိၣ်လီၤအသးလၢအဂ့ၤဒိၣ်မးန့ၣ်လီၤ. အိ, မ့ၢ်အဆိကမိၣ်လီၤအသးလၢအဂ့ၤဆံးဒိၣ်ဆံးအါန့ၣ်လဲၣ်.
14ပှၤအိၣ်ဝဲတကလုာ်လၢအဟံးန့ၢ်တၢ်အခွဲးယာ်အၢသီလၢပှၤဖှီၣ်ဖိ ဒီးပှၤအတၢ်တအိၣ်တဖၣ်အဖီခိၣ်လီၤ. တၢ်န့ၣ်မ့ၢ်ကျဲလၢအဝဲသ့ၣ်မၤအီၣ်မၤအီတၢ်လၢအတၢ်အိၣ်မူ အိၣ်ဂဲၤအဂီၢ်လီၤ.
15တလံၤအိၣ်ဝဲဒီးအဖိမုၣ်ခံဘိလီၤ. ဒီးခံဘိလိာ်န့ၣ်ယုၢ်ဝဲ အမံၤလၢ, “ဟ့ၣ်ယၤ” န့ၣ်လီၤ.
တၢ်အိၣ်ဝဲဒၣ်လွံၢ်မံၤလၢသးမံတသ့နီတစုဘၣ်လၢအမ့ၢ်ဝဲ,
16တၢ်သံအကီၢ်, ပိာ်မုၣ်တဂၤလၢအတူာ်ဖိ, ဟီၣ်ခိၣ်ဃ့ထီလၢအလိၣ်ဘၣ်တၢ်စူၤထံ, ဒီးမ့ၣ်အူအီၣ်တၢ်တခါလၢ တၢ်ကၢၤအီၤဂၢၤအီၤတန့ၢ်ဘၣ်န့ၣ်လီၤ.
17ပှၤတဂၤလၢ်လၢ်လၢအမၤကလိာ်ကလာ်အပၢ်ဒီးသးဘၣ်အၢ အမိၢ်ဖဲအသးပှၢ်ထီၣ်အဆၢကတီၢ်န့ၣ်, ကြၢးလီတာ်တဖၣ်အီၣ်အီၤမ့ၢ်ဂ့ၤ, ကြၢးလၢအမဲာ်ချံတဖၣ်ဘၣ်တၢ် အူခွဲးထီၣ်အီၤလၢစိးဝၣ်ဃးအမံၤတဖၣ်မ့ၢ်ဂ့ၤန့ၣ်လီၤ.
18တၢ်အိၣ်ဝဲလွံၢ်မံၤလၢအလီၤသဒၢဒိၣ်ယိာ်မးလၢယကနၢ်ပၢၢ်အီၤ အဂီၢ်,
19ဒ်လံာ်ကြီကြာ်တဘ့ၣ်ယူၤဝဲလၢမူဖးဖီ,
ဂုၢ်သ့ၣ်တဘိစွါလၢလၢၢ်အလိၤ,
ကဘီတဘ့ၣ်လဲၤတၢ်လၢပီၣ်လဲၣ်ပူၤ, ဒီးပှၤပိာ်ခွါတဂၤဒီးပှၤပိာ်မုၣ်တဂၤအဲၣ်လိာ်ကွံလိာ်အသး, အသိးန့ၣ်လီၤ.
20တၢ်အံၤမ့ၢ်မါလၢအတတီတဂၤမၤဝဲန့ၣ်လီၤ. အဝဲအဲၣ်ဘၢအဝၤ, လုၣ်ထံလုၣ်နိဝံၤဒီးစံးဝဲ, “ယတမၤကမၣ်တၢ်နီတမံၤမးလဲၣ်.”
21တၢ်အိၣ်ဝဲလွံၢ်မံၤလၢဟီၣ်ခိၣ်အနီၢ်ကစၢ်ဒၣ်ဝဲတူၢ်လိာ်အီၤတသ့ ဘၣ်န့ၣ်လီၤ. 22ကုၢ်တဂၤလၢအကဲထီၣ်စီၤပၤ,
ပှၤအမၢးတဂၤလၢအအိၣ်ဒီးကယဲၢ်တၢ်လၢအအဲၣ်ဒိးအီၣ်ဝဲ,
23ပိာ်မုၣ်လၢအလီၤသးဟ့တဂၤန့ၢ်အဝၤ, ဒီးတၢ်ခ့တၢ်ပှၤမုၣ်တ ဂၤလၢအဟံးန့ၢ်အကစၢ်မုၣ်အလီၢ်န့ၣ်လီၤ.
24ဆၣ်ဖိကီၢ်ဖိအိၣ်ဝဲလွံၢ်ကလုာ်လၢအလီၤသဒၢဒိၣ်ယိာ်မးလၢယဂီၢ် ဒ်သိးယကနၢ်ပၢၢ်အီၤအဂီၢ်န့ၣ်လီၤ.
25တၢၢ်တဖၣ်, ဂံၢ်ဘါစၢ်နာ်က့ပာ်ဖှိၣ်ပာ်တံၤအတၢ်အီၣ် တၢ်အီလၢတၢ်ကိၢ်ခါအဆၢကတီၢ်န့ၣ်လီၤ.
26ယုၢ်ၡၤဖးတဖၣ်အဂံၢ်အဘါတဆူၣ်စ့ၢ်ကီးဘၣ်.
ဘၣ်ဆၣ်အဝဲသ့ၣ်မၤအဟံၣ်လၢလၢၢ်ကျါလ့ကျါန့ၣ်လီၤ.
27ဒွဲၣ်ဧိၤတြၤဧိၤတဖၣ်အစီၤပၤတအိၣ်ဘၣ်. ဘၣ်ဆၣ်သုးထီၣ်သုးလီၤအသးအိၣ်ဒီးအဂ့ၢ်အဝီန့ၣ်လီၤ.
28ဒီလ့ၢ်တဖၣ်, နဟံးထီၣ်အီၤတဘိလၢနစုလိၤသ့, ဘၣ်ဆၣ်နထံၣ်စ့ၢ်ကီးအဝဲသ့ၣ်လၢနီတဖၣ်အပူၤသ့ဝဲလီၤ.
29တၢ်အိၣ်ဝဲလွံၢ်မံၤဖဲနကွၢ်အဝဲသ့ၣ်ဟးထီၣ်က့ၤလီၤအခါထုး သူၣ်ထုးသးပှၤန့ၣ်လီၤ.
30ခ့ယုၢ်တဖၣ်, ဂံၢ်ဘါဆူၣ်ကတၢၢ်လၢဆၣ်ဖိကီၢ်ဖိခဲလၢာ်အကျါဒီး တပျံၤတၢ်နီတမံၤဘၣ်န့ၣ်လီၤ.
31မဲာ်တဲးလဲးဖါတံၢ်တဖၣ်, ဆီဖါကီၢ်တဖၣ်လၢအဟးလၢတၢ်ပာ် ထီၣ်ထီသးအပူၤ, ဒီးစီၤပၤတဖၣ်လၢအပှၤဂီၢ်မုၢ်အမဲာ်ညါန့ၣ်လီၤ.
32နသးမ့ၢ်တဆးတုၤဒၣ်လဲာ်လၢနကပာ်ထီၣ်ထီနသးဒီးကူၣ်အၢတၢ်န့ၣ်, အိၣ်ကတီၢ်ဒီးဆိကမိၣ်တၢ်တက့ၢ်. 33နမ့ၢ်ဆှဲးဆှု ဆဲးဖှိးတၢ်နုၢ်ထံဒီးနကမၤန့ၢ်တၢ်နုၢ်ထံကိၢ် လိၣ်လီၤ. နမ့ၢ်မၤဘၣ်ဒိပှၤအနါဒ့ဒီးကသွံၣ်ထီၣ်ဝဲလီၤ. နမ့ၢ်ထိၣ်ဂဲၤထီၣ်တၢ်သူၣ်ဒိၣ်သးဖျိးဒီး, နကဘၣ်တၢ်ကီတၢ်ခဲန့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 30: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
