လံာ်တၢ်ကူၣ်သ့အတၢ်ကတိၤ 28
28
1ပှၤတတီတလိၤဃ့ၢ်ဝဲဖဲပှၤတလူၤအဝဲသ့ၣ်နီတဂၤဘၣ်အခါန့ၣ်လီၤ. မ့မ့ၢ်ပှၤတီပှၤလိၤတဂၤန့ၣ်ဒူဝဲဒ်ခ့ယုၢ်တဒုအသိးန့ၣ်လီၤ.
2တုၤထံကီၢ်တကီၢ်အိၣ်ဒီးတၢ်ပူထီၣ်လီထီၣ်န့ၣ်, ပှၤပၢတၢ်ကအိၣ်တဖုဝံၤတဖုလီၤ. မ့မ့ၢ်, ဖဲအအိၣ်ဒီးခိၣ်နၢ် တဖၣ်လၢအသးဆးဒီးကူၣ်သ့ကူၣ်ဘၣ်န့ၣ်, ထံကီၢ်ဝဲအံၤအဂံၢ်အဘါကဆူၣ်ဒီးကအိၣ်ဂၢၢ်ကျၢၤဝဲလီၤ.
3ပှၤပၢတၢ်တဂၤလၢအမၤနးမၤဖှီၣ်ပှၤဖှီၣ်ဖိယာ်ဖိန့ၣ်, မၤအသးဒ်တၢ်ဟဲစူၤလီၤဆူၣ်ဆူၣ်လၢအမၤဟးဂီၤကွံာ် တၢ်မုၢ်တၢ်ဘိတၤသူတၤသၣ်တဖၣ်န့ၣ်လီၤ.
4နမ့ၢ်တပာ်ကဲတၢ်သိၣ်တၢ်သီဘၣ်ဒီး, နအိၣ်တကပၤဃီဒီးပှၤတတီ တလိၤတဖၣ်လီၤ. ဘၣ်ဆၣ်နမ့ၢ်ဒိကနၣ်တၢ်သိၣ်တၢ်သီဒီး, နမ့ၢ်ပှၤထီဒါအဝဲသ့ၣ်န့ၣ်လီၤ.
5ပှၤအၢပှၤသီတဖၣ်တသ့ၣ်ညါတၢ်စံၣ်ညီၣ်တီဘၣ်. မ့မ့ၢ်ပှၤလၢအဘူၣ်ထီၣ်ဘါထီၣ်ယွၤန့ၣ်, သ့ၣ်ညါဝဲဂ့ၤဂ့ၤလီၤ.
6တၢ်ဖှီၣ်တၢ်ယာ်အိၣ်ဒီးတၢ်တီတၢ်လိၤန့ၣ်ဂ့ၤဒိၣ်န့ၢ်ဒံးတၢ် ထူးတၢ်တီၤအိၣ်ဒီးတၢ်တတီတလိၤတက့ၢ်လီၤ.
7ပှၤသးစၢ်တဂၤလၢအဒိကနၣ်တၢ်သိၣ်တၢ်သီန့ၣ်မ့ၢ်ပှၤအိၣ်ဒီးတၢ် သူၣ်ဆးသးဆးလီၤ. မ့မ့ၢ်ပှၤတဂၤလၢအဒီတံၤဒီသကိးဒီးပှၤတဂိာ်တသီၣ်ဘၣ်တဖၣ်န့ၣ် မ့ၢ်တၢ်မဲာ်ဆှးလၢအပၢ်အဂီၢ်လီၤ.
8နမ့ၢ်ထူးထီၣ်တီၤထီၣ်ခီဖျိတၢ်ဃ့အါထီၣ်စ့အအ့ၣ်ဒီးဟံးန့ၢ် တၢ်အခွဲးအယာ်လၢပှၤဂၤအဖီခိၣ်န့ၣ်, နတၢ်ထူးတၢ်တီၤကတုၤဆူ ပှၤအဂၤတဂၤအအိၣ်လၢအသးကညီၤပှၤဖှီၣ်ဖိယာ်ဖိန့ၣ်လီၤ.
9နမ့ၢ်တဒိကနၣ်တၢ်သိၣ်တၢ်သီဘၣ်ဒီး, ကစၢ်ယွၤကထံၣ်ဝဲလၢနတၢ် ထုကဖၣ်တဖၣ်န့ၣ်လီၤသးဘၣ်အၢနးမးလၢတၢ်ကဒိကနၣ်အီၤအဂီၢ်လီၤ.
10နမ့ၢ်ကူၣ်လီန့ၢ်ပှၤတီပှၤလိၤတဂၤလၢကမၤတၢ်အၢဒီး, နကလီၤတဲာ်နုာ်ဆူနပျံၤသကွီၤဒၣ်နဲအပူၤလီၤ. ပှၤလၢအတသ့ၣ်ညါဘၣ်တၢ်အၢတၢ်သီန့ၢ်ဘၣ်တၢ်ဟ့ၣ်ဘျုး အဂ့ၤတမံၤလီၤ.
11ပှၤထူးပှၤတီၤတဖၣ်ဆိကမိၣ်ဝဲထီဘိလၢအကူၣ်တၢ်သ့န့ၣ်လီၤ. မ့မ့ၢ် ပှၤအဖှီၣ်ဖိတဂၤလၢအအိၣ်ဒီးသးအတၢ်ထံၣ်ဖျိဆူသကဲးပဝာ် န့ၣ်, သ့ၣ်ညါတၢ်ဂ့ၤဒိၣ်တက့ၢ်လီၤ.
12ဖဲပှၤအဂ့ၤတဖၣ်မၤန့ၢ်တၢ်စိတၢ်ကမီၤန့ၣ်, ပှၤခဲလၢာ်မၤမူးသးခု န့ၣ်လီၤ. ဘၣ်ဆၣ်ဖဲပှၤအအၢအသီတဖၣ်ပၢတၢ်န့ၣ်, ပှၤအိၣ်ခူသူၣ်ဝဲလီၤ.
13နမ့ၢ်ကျဲးစၢးပာ်ခူသူၣ်နတၢ်ဒဲးဘးတဖၣ်ဒီး, နတမၤန့ၢ်မၤနၢၤတၢ်လၢတၢ်အိၣ်မူအပူၤနီတစုဘၣ်. အၢၣ်လီၤဒီးညိကွံာ်အီၤတက့ၢ်. အန့ၣ်ဒီး, ကစၢ်ယွၤကဒုးနဲၣ်အတၢ်သးကညီၤလၢနၤလီၤ.
14စူၢ်ယွၤထီဘိတက့ၢ်. ဒီးနကသူၣ်ဖှံသးညီလီၤ. နခိၣ်မ့ၢ်ကိၤဒီး, နကဘၣ်တၢ်မၤဟးဂီၤနၤလီၤ.
15လၢပှၤတတီတလိၤအတၢ်ပၢအဖီလာ်န့ၣ်, ပှၤဖှီၣ်ဖိယာ်ဖိတဖၣ်မၤစၢၤလီၤက့ၤအသးတသ့နီတမံၤဘၣ်. အဝဲလီၤပျံၤလီၤဖုးဒ်ခ့ယုၢ်တဒုလၢအကညီၤထီၣ်ရုၢ်ရုၢ်အသိး ဒီးဒ်တၤသူတဒုလၢအဟးဝ့ၤဝီၤစီၤတၢ်အသိးလီၤ.
16ပှၤပၢတၢ်တဂၤလၢအတအိၣ်ဘၣ်ဒီးတၢ်ကူၣ်တၢ်ဆးအဂ့ၤန့ၣ်, ကမ့ၢ်ပှၤသူၣ်အၢသးသီတဂၤလၢအပၢတၢ်ဖဲအသးဒၣ်ဝဲလီၤ. ပှၤတဂၤလၢအသးဟ့တၢ်တတီတလိၤန့ၣ်, ကပၢတၢ်ဖးယံာ်န့ၣ်လီၤ.
17ပှၤတဂၤလၢအမၤသံတၢ်န့ၣ်ခူၣ်အတၢ်သံအပူၤဒၣ်ဝဲအချ့ကတၢၢ်လီၤ. ကျဲးစၢးတြီအီၤတဂ့ၤ.
18အိၣ်မူတီတီလိၤလိၤတက့ၢ်ဒီးနကပူၤဖျဲးလီၤ. နမ့ၢ်တတီတလိၤဘၣ်ဒီး, နကလီၤဃံၤတကီၢ်ခါလီၤ.
19ပှၤထူစံာ်ဖိလၢအမၤတၢ်ဆူၣ်တဂၤန့ၣ်, အိၣ်ဒီးတၢ်အါအါကလဲာ်လၢတၢ်အီၣ်အဂီၢ်လီၤ. မ့မ့ၢ်, ပှၤလၢအမၤလၢာ်ကလီတၢ်ဆၢကတီၢ်တဖၣ်န့ၣ်, ကဖှီၣ်ဝဲယာ်ဝဲထီဘိလီၤ.
20ပှၤတီပှၤလိၤတဖၣ်ကအိၣ်မူလၢလၢပှဲၤပှဲၤအိၣ်ဒီးတၢ်သူၣ်ဖှံ သးညီန့ၣ်လီၤ. ဘၣ်ဆၣ်, နမ့ၢ်မၤချ့ချ့လၢနကထူးထီၣ်တီၤထီၣ် အဂီၢ်ဒီး, နကဘၣ်တၢ်စံၣ်ညီၣ်လီၤ.
21တၢ်ကွၢ်မဲာ်တၢ်န့ၣ်မ့ၢ်တၢ်လၢအကမၣ်လီၤ. ဘၣ်ဆၣ်စံၣ်ညီၣ်ကွီၢ်တနီၤနီၤကမၤကမၣ်တၢ်, ဒ်သိးကမၤန့ၢ်ခိၣ်ဖးလာ်ဆှိးအဆံးကတၢၢ်ဒၣ်လဲာ်န့ၣ်လီၤ.
22ပှၤလၢအအဲၣ်လီၤအသးတဖၣ်န့ၣ်မၤဝဲချ့ချ့ဒ်န့ၣ်သိး လၢအကထူးထီၣ်တီၤထီၣ်အဂီၢ်ဒီးတၢ်ဖှီၣ်တၢ်ယာ်ကလီၤဘၣ် အဝဲသ့ၣ်အခါဖဲလဲၣ်တသ့ၣ်ညါဝဲဘၣ်.
23သိၣ်ဃီၣ်ပှၤတဂၤဂၤတက့ၢ်. ဒီးလၢခံက့ၤန့ၣ်အဝဲဒၣ်ကဘၣ်သူၣ်ဘၣ်သးအီၤ အါန့ၢ်ဒံးတၢ်ကတိၤပတြၢၤမုာ်နၢ်တက့ၢ်န့ၣ်လီၤ.
24ပှၤတဂၤလၢ်လၢ်လၢအဆိကမိၣ်ဝဲလၢတၢ်ဟုၣ်အမိၢ်အပၢ်အတၢ်တမ့ၢ်ဘၣ် တၢ်ကမၣ်န့ၣ်, မ့ၢ်ပှၤဒီတံၤဒီသကိးဒီးတၢ်ဘျၣ်လၢအဟုၣ်ညီနုၢ်တၢ်န့ၣ်လီၤ.
25တၢ်အဲၣ်လီၤသးန့ၣ်ဒုးအိၣ်ထီၣ်ဒၣ်ထဲတၢ်ကိၢ်တၢ်ဂီၤဧိၤလီၤ. တၢ်သန့ၤအသးလၢယွၤန့ၣ်ဒုးဘီၣ်ထီၣ်ညီထီၣ်နၤဒိၣ်တက့ၢ်လီၤ.
26တၢ်ပိာ်ထွဲနသးအတၢ်ဆိကမိၣ်ဒၣ်နဲန့ၣ်မ့ၢ်တၢ်မၢးလီၤ. ပိာ်ထွဲပှၤကူၣ်တၢ်သ့တဖၣ်အတၢ်သိၣ်လိတက့ၢ်. အန့ၣ်ဒီး, နကပူၤဖျဲးလီၤ.
27ဟ့ၣ်တၢ်လၢပှၤဖှီၣ်ဖိယာ်ဖိတက့ၢ်. တၢ်လိၣ်ဒီးနၤတအိၣ်လၢၤနီ တစုဘၣ်. နမ့ၢ်ဃၣ်ကွံာ်နမဲာ်လၢပှၤဖှီၣ်ဖိယာ်ဖိဒီး, ပှၤအါဂၤကဆိၣ်အၢနၤလီၤ.
28တုၤပှၤအအၢအသီတဖၣ်န့ၢ်စိန့ၢ်ကမီၤဒီး, ပှၤအိၣ်ခူသူၣ်ဝဲလီၤ. ဘၣ်ဆၣ်တုၤအဝဲသ့ၣ်လီၤတဲာ်ကွံာ်လၢတၢ်စိတၢ်ကမီၤအလီၢ်ဒီး, ပှၤအတီအလိၤတဖၣ်ကပၢကဒီးတၢ်န့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 28: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
