ဖံလံးပံၤ 4

တၢ်သဆၣ်ထီၣ်ခံဒီးတၢ်သိၣ်လိနဲၣ်ကျဲ

1မ်ဒ်န့ၣ်ဒီး, ယဒီပုၢ်ဝဲၢ်သ့ၣ်ဧၢ, ယအဲၣ်ဘၣ်သုဒီးသးသယုၢ်ဘၣ်သုဒိၣ်မးလီၤ. သုဒုးသးခုယၤဒိၣ်မး, ဒီးယပာ်ကဖၢလၢယသးလၢ သုဃိဒိၣ်မးလီၤ. ဒီပုၢ်ဝဲၢ်သးဘိသ့ၣ်ဧၢ, အဝဲအံၤ မ့ၢ်ကျဲလၢသုကဆၢထၢၣ်ဂၢၢ်ကျၢၤလၢသုတၢ်အိၣ်မူလၢ ကစၢ်အပူၤန့ၣ်လီၤ.

2နီၢ်အူၤအိဒံၤဒီးနီၢ်စူၣ်တူဃ့ၤသ့ၣ်ဧၢ, ယဃ့ကညးသုလၢသုကဝံသးစူၤအိၣ်ဃူအိၣ်ဖိးလိာ်သုသးဒ်ဒီ ပုၢ်ဝဲၢ်မုၣ်တဖၣ်အသိးလၢကစၢ်အပူၤန့ၣ်လီၤ. 3ဒီးနဲဒၣ်စ့ၢ်ကီး, ပှၤမၤသကိးတၢ်ဒီးယၤလၢအသးတီ တဂၤဧၢ, ယအဲၣ်ဒိးလၢနကမၤစၢၤပိာ်မုၣ်တဖၣ်အံၤန့ၣ်လီၤ. အဂ့ၢ်ဒ်အံၤ, အဝဲသ့ၣ်မၤသကိးတၢ်ဒီးယၤဆူၣ်ဆူၣ်လၢတၢ်ရၤလီၤတၢ်သးခုကစီၣ် အပူၤ, ဃုာ်ဒီးစီၤကျ့မ့ၤဒီးယပှၤမၤသကိးတၢ်အဂၤတဖၣ်, လၢအမံၤအိၣ်ကွဲးလီၤအသးလၢကစၢ်ယွၤအလံာ်မူအပူၤန့ၣ်လီၤ.

4မ်သုသးခုလၢကစၢ်အပူၤထီဘိတက့ၢ်. ယစံးကဒီးသးခုတက့ၢ်.

5ပာ်ဖျါတၢ်ပာ်သူၣ်ပာ်သးခုၣ်ခုၣ်မုာ်မုာ်လၢပှၤကိးဂၤဒဲး အဖီခိၣ်တက့ၢ်. ကစၢ်ကဟဲဘူးထီၣ်လံ. 6တဘၣ်သူၣ်ကိၢ်သးဂီၤလၢတၢ်နီတမံၤအဂ့ၢ်တဂ့ၤ. မ့မ့ၢ်, လၢသုတၢ်ထုကဖၣ်ခဲလၢာ်အပူၤန့ၣ်ဃ့ကစၢ်ယွၤတၢ်လၢသု လိၣ်ဘၣ်အီၤ, ဒီးဃ့အီၤလၢတၢ်စံးဘျုးစံးဖှိၣ်အသးအပူၤန့ၣ် တက့ၢ်. 7ဒီးကစၢ်ယွၤအတၢ်ဃူတၢ်ဖိး, လၢပှၤဟီၣ်ခိၣ်ဖိနၢ်ပၢၢ်လၢအဂ့ၢ်တသ့ဘၣ်အံၤန့ၣ်, ကပၢၤဃာ်သုသူၣ်သုသးဒီးသုတၢ်ဆိကမိၣ်တဖၣ်လၢယ့ၣ်ၡူးခရံာ် အပူၤန့ၣ်လီၤ.

8တၢ်ကတိၤလၢခံကတၢၢ်န့ၣ်, ယဒီပုၢ်ဒီဝဲၢ်သ့ၣ်ဧၢ, မၤပှဲၤသုတၢ်ဆိကမိၣ်ဒီးတၢ်သ့ၣ်တဖၣ်လၢအဂ့ၤ, ဒီးကြၢးဒီးတၢ်စံးထီၣ်ပတြၢၤ, ဒ်ပစံးတၢ်အသိး, တၢ်လၢ အမ့ၢ်အတီ, တၢ်လၢအအိၣ်ဒီးအလၤအကပီၤ, တၢ်လၢအဘၣ်, တၢ်လၢအစီဆှံ, တၢ်လၢအလီၤအဲၣ်လီၤကွံ, တၢ်ဟူထီၣ်သါလီၤလၢအဂ့ၤတဖၣ်န့ၣ်တက့ၢ်. 9အိၣ်မူမၤထွဲတၢ်လၢသုမၤလိဒီးဒိးန့ၢ်ဘၣ်အီၤလၢယအိၣ်တၢ် လၢယကတိၤတဖၣ်မ့ၢ်ဂ့ၤ, တၢ်လၢယမၤတဖၣ်မ့ၢ်ဂ့ၤန့ၣ်တက့ၢ်. ဒီးကစၢ်ယွၤလၢအဟ့ၣ်ပှၤတၢ်ဃူတၢ်ဖိးတဂၤန့ၣ်ကအိၣ်ဒီးသု လီၤ.

တၢ်စံးဘျုးစံးဖှိၣ်လၢတၢ်ဟ့ၣ်အဃိ

10ယသူၣ်ခုသးခုလၢကစၢ်အပူၤဒိၣ်မးလီၤ. အဂ့ၢ်ဒ်လဲၣ်န့ၣ်, လၢဆၢကတီၢ်ဖးယံာ်ဝံၤအလီၢ်ခံသုဒိးန့ၢ်ဘၣ်ကဒီးတၢ် အခွဲးအယာ်လၢသုကပာ်ဖျါသုတၢ်သူၣ်အိၣ်သးအိၣ်ယၤ န့ၣ်လီၤ. တမ့ၢ်ယစံးလၢသုတသူၣ်အိၣ်သးအိၣ်ယၤလၢၤ န့ၣ်ဘၣ်. မ့ၢ်ဒၣ်လၢအခွဲးအယာ်တအိၣ်လၢသုကပာ်ဖျါ ထီၣ်အီၤအဂီၢ်အဃိန့ၣ်လီၤ. 11ဒီးယစံးတၢ်ဒ်အံၤန့ၣ်, တမ့ၢ်လၢယကလၢၢ်ဘၣ်ပှၤအတၢ်တကနၣ်ဃုာ်ယၤအဃိ ဘၣ်. မ့မ့ၢ်ယမၤလိလံတၢ်ဒ်သိးယကသူၣ်မံသးမံလၢတၢ်လၢ အအိၣ်ဒီးယၤန့ၣ်လီၤ. 12တၢ်လိၣ်ဘၣ်စံးတၢ်န့ၣ်မ့ၢ်တၢ်မနုၤဒီးတၢ်ဒိးန့ၢ်တၢ်အါ န့ၢ်တၢ်လိၣ်ဘၣ်မ့ၢ်တၢ်မနုၤလဲၣ်န့ၣ်ယသ့ၣ်ညါယဲလီၤ. ယမၤလိလံတၢ်ခူသူၣ်အံၤဒ်သိးဖဲလဲၣ်ပူၤလဲၣ်ဒီးဖဲဆၢ ကတီၢ်တကတီၢ်ဂ့ၤတကတီၢ်ဂ့ၤန့ၣ်, ယအီၣ်ဘၣ်လၢအီၣ်လၢ အီမ့ၢ်ဂ့ၤ, ယသၣ်ဝံၤလီၤဒိမ့ၢ်ဂ့ၤ, ယတၢ်အိၣ်အါကဲၣ်ဆိးမ့ၢ်ဂ့ၤ, စှၤကဲၣ်ဆိးမ့ၢ်ဂ့ၤ, ယသူၣ်မံသးမံယဲန့ၣ်လီၤ. 13ယအိၣ်ဒီးတၢ်ဂံၢ်တၢ်ဘါလၢယကကွၢ်ဆၢၣ်မဲာ်တၢ်မၤ အသးခဲလၢာ်လၢတၢ်စိကမီၤလၢခရံာ်ဟ့ၣ်လီၤယၤန့ၣ်လီၤ.

14ဘၣ်ဆၣ်ဒီး, သုမၤစၢၤယၤလၢယတၢ်ကီတၢ်ခဲတဖၣ်အပူၤ အဃိသုမၤတၢ်ဂ့ၤဒိၣ်မးန့ၣ်လီၤ. 15သုဝဲပှၤဖံလံးပံၤဖိတဖၣ်သုသ့ၣ်ညါသုဝဲဂ့ၤဂ့ၤလၢဖဲ ယဟးထီၣ်လၢကီၢ်မၤက့းဒနံလၢယစံၣ်တဲၤတဲလီၤသီခရံာ် အတၢ်သးခုကစီၣ်ဝံၤအလီၢ်ခံန့ၣ်, သုမ့ၢ်တၢ်အိၣ်ဖှိၣ်ထဲတဖုဧိၤလၢအမၤစၢၤယၤလီၤ. သုမ့ၢ်ပှၤထဲတဖုဧိၤလၢအဟ့ၣ်တၢ်ဒီးဒိးန့ၢ်ဃုာ်တၢ်ဒီး ယၤန့ၣ်လီၤ. 16ဖဲယလိၣ်ဘၣ်တၢ်မၤစၢၤလၢဝ့ၢ်သ့းစၤလနံအပူၤန့ၣ်, သုဆှၢလီၤအီၤဆူယအိၣ်အါန့ၢ်တဘျီန့ၣ်လီၤ. 17တၢ်အံၤတမ့ၢ်ယသးအိၣ်ထဲလၢယကဒိးန့ၢ်တၢ်ဟ့ၣ်တဖၣ်န့ၣ်ဘၣ်. မ့မ့ၢ်တခီ, ယသးအိၣ်ထံၣ်ဘၣ်အါထီၣ်သုတၢ်မၤဂ့ၤတဖၣ်အဃိလီၤ. 18မ်ဒ်န့ၣ်ဒီး, အအံၤမ့ၢ်ယလံာ်ဒိးန့ၢ်ဘၣ်လၢသု တၢ်ဟ့ၣ်တ့ၢ်ယၤခဲလၢာ်အဂီၢ်, ဒီးမ့ၢ်တၢ်လၢအအါန့ၢ်ဒံးတၢ် လၢယလိၣ်ဘၣ်အီၤတက့ၢ်လီၤ. အခဲအံၤ, မ့ၢ်လၢစီၤအ့းပၤဖရီးဒံတူးဟဲစိာ်န့ၢ်ယၤသုတၢ်ဟ့ၣ်တဖၣ်ခဲ လၢာ်လံအဃိ, ယအိၣ်ဒီးတၢ်လၢယလိၣ်ဘၣ်အီၤခဲလၢာ်လီၤ. တၢ်သ့ၣ်တဖၣ်အံၤမၤအသးဒ်တၢ်လုၢ်နၢမူဆူကစၢ်ယွၤအအိၣ်, တၢ်လုၢ်လၢအဘၣ်အသးမၤမုာ်အသးန့ၣ်လီၤ. 19လၢအတၢ်ထူးတၢ်တီၤအါအါကလဲာ်ခီဖျိယ့ၣ်ၡူးခရံာ်န့ၣ်, ယကစၢ်ယွၤကဟ့ၣ်သုတၢ်အလိၣ်ခဲလၢာ်လီၤ. 20မ်တၢ်လၤကပီၤအိၣ်ဒီးပပၢ်ယွၤအစိၤစိၤအဃၣ်ဃၣ်တက့ၢ်. အၤမ့ၣ်.

တၢ်ဆၢဂ့ၤဆၢဝါလၢခံကတၢၢ်

21ယဆၢဂ့ၤဆၢဝါကစၢ်ယွၤအပှၤဂီၢ်မုၢ်တဂၤဘၣ်တဂၤလၢအဘၣ်ဃးဒီး ယ့ၣ်ၡူးခရံာ်န့ၣ်လီၤ. ဒီပုၢ်ဝဲၢ်အိၣ်ဒီးယၤဖဲအံၤတဖၣ်ဆှၢလီၤအတၢ်ဆၢဂ့ၤဆၢဝါဆူ သုအိၣ်လီၤ. 22ကစၢ်ယွၤအပှၤဂီၢ်မုၢ်ဖဲအံၤခဲလၢာ်ဆှၢလီၤအတၢ်ဆၢဂ့ၤဆၢဝါ တဖၣ်လီၤဆီဒၣ်တၢ်ဆူပှၤလၢအဘၣ်ဃးဒီးစီၤပၤအနီတဖၣ် အအိၣ်န့ၣ်လီၤ. 23မ်ကစၢ်ယ့ၣ်ၡူးခရံာ်အဘျုးအဖှိၣ်အိၣ်ဒီးသုခဲလၢာ်တက့ၢ်.

Currently Selected:

ဖံလံးပံၤ 4: KSWC

Highlight

Copy