ဖံလံးပံၤ 2

ခရံာ်အတၢ်ဆီၣ်လီၤအသးဒီးအတၢ်ဒိၣ်တၢ်မုၢ်

1သုတၢ်အိၣ်မူလၢခရံာ်အပူၤမ့ၢ်တၢ်လၢအဟ့ၣ်ဂံၢ်ဟ့ၣ်ဘါသု, ဒီးအတၢ်အဲၣ်တၢ်ကွံမၤမုာ်ထီၣ်က့ၤသုလီၤ. သုအိၣ်ဒီးတၢ်ရ့လိာ်မုာ်လိာ်လၢယွၤအသး, ဒီးသုအိၣ်ဒီးတၢ်သး ကညီၤဒီးတၢ်သးအိၣ်မၤစၢၤတၢ်လၢတဂၤဒီးတဂၤအဂီၢ်န့ၣ်လီၤ. 2လၢတၢ်န့ၣ်အဃိ, ယသဆၣ်ထီၣ်သုခံလၢသုကဒုးသူၣ်ခုသးခုယၤလၢာ်လၢာ် ဆ့ဆ့ခီဖျိသုအိၣ်ဒီးတၢ်ဆိကမိၣ်တမံၤဃီ, တၢ်အဲၣ်တၢ်ကွံ တမံၤဃီ, အိၣ်ဒီးသုသးတဖျၢၣ်ဃီဒီးဆိကမိၣ်တၢ်တမံၤဃီန့ၣ်လီၤ. 3သုသုတမၤတၢ်နီတမံၤလၢသုသးဆူၣ်မၤန့ၢ်တၢ်လၢသုဘျုး အဂီၢ်ဒၣ်ဝဲမ့ၢ်ဂ့ၤ, သုကပာ်ကဖၢလၢသုသးအဂီၢ်မ့ၢ်ဂ့ၤန့ၣ်တဂ့ၤ. မ့မ့ၢ်ဆီၣ်လီၤသုသးလၢတဂၤဒီးတဂၤအဖီလာ်, ဒီးထီဘိန့ၣ်အိၣ်ဒီးတၢ်ဆိကမိၣ်လၢပှၤဂၤတဖၣ်ဂ့ၤန့ၢ်သု န့ၣ်တက့ၢ်. 4မ်သုဝဲတဂၤဒီးတဂၤကွၢ်တၢ်လၢပှၤဂၤအဂီၢ်တက့ၢ်. သုသုတကွၢ်တၢ်ထဲသုဂီၢ်ဒၣ်သုဝဲတဂ့ၤ. 5တၢ်ပာ်သူၣ်ပာ်သးလၢအကြၢးအိၣ်ဒီးသုန့ၣ်, မ့ၢ်ဝဲတၢ်တမံၤဃီလၢအအိၣ်တ့ၢ်ဒီးယ့ၣ်ၡူးခရံာ်န့ၣ်လီၤ.

6အဝဲဒၣ်အိၣ်ဒီးကစၢ်ယွၤအက့ၢ်အဂီၤထီဘိ,

ဘၣ်ဆၣ်ဒီးတဆိကမိၣ်ဝဲလၢအကြၢးဂုာ်ကျဲးစၢး

ဟံးဃာ်တၢ်မ့ၢ်တၢ်ထဲသိးဒီးကစၢ်ယွၤန့ၣ်ဘၣ်.

7မ့မ့ၢ်, လၢအဝဲအတၢ်သးဆူၣ်ဒၣ်ဝဲအပူၤ,

ညိကွံာ်တၢ်လၢအအိၣ်ဒီးအီၤခဲလၢာ်

ဒီးဟံးထီၣ်ကုၢ်တဂၤအက့ၢ်အဂီၤလီၤ.

အဝဲဒၣ်ကဲထီၣ်ပှၤကညီတဂၤ

ဒီးလီၣ်ဖျါထီၣ်အသးဒ်ပှၤကညီတဂၤအသိးလီၤ.

8အဝဲဒၣ်ဆီၣ်လီၤအသး, ဒီးပိာ်ထွဲတၢ်ဒိကနၣ်

ယွၤအကျဲတုၤတၢ်သံ,

အတၢ်သံလၢထူၣ်စုညါအလိၤတစုန့ၣ်လီၤ.

9လၢတၢ်န့ၣ်အဃိ, ကစၢ်ယွၤပာ်ထီၣ်ထီအီၤဆူ

တၢ်လီၢ်အထီကတၢၢ်လၢထး,

ဒီးဟ့ၣ်အီၤမံၤတဖျၢၣ်လၢအဒိၣ်န့ၢ်

ကယဲၢ်တၢ်အမံၤအဂၤခဲလၢာ်,

10ဒ်သိး လၢတၢ်မၤလၤကပီၤယ့ၣ်ၡူးအမံၤအပူၤ,

ကယဲၢ်တၢ်အိၣ်လၢမူခိၣ်, လၢဟီၣ်ခိၣ်ဒီး

လၢဟီၣ်ခိၣ်လာ်တဖၣ်ကချံးလီၤအခီၣ်,

11ဒီးပှၤခဲလၢာ်ကစံးဘၣ်တဲဘၣ်ပှၤကိးဂၤလၢ

ယ့ၣ်ၡူးခရံာ်မ့ၢ်ကစၢ်,

လၢပၢ်ကစၢ်ယွၤအလၤကပီၤအဂီၢ်လီၤ.

ကပီၤထီၣ်ဒ်တၢ်ကပီၤတဖၣ်လၢဟီၣ်ခိၣ်ချၢ

12လၢတၢ်န့ၣ်အဃိ, တံၤသကိးသးဘိသ့ၣ်ဧၢ, ဖဲယအိၣ်ဒီးသုအဆၢကတီၢ်သုဒိကနၣ်ယၤထီဘိအသိးန့ၣ်, ခဲကနံၣ်အံၤဖဲယအိၣ်ယံၤဒီးသုအဆၢကတီၢ်န့ၣ်, အကါဒိၣ်တက့ၢ်လၢသုဒိကနၣ်ယၤန့ၣ်လီၤ. ဂုာ်ကျဲးစၢးမၤတၢ်လၢတၢ်ပျံၤတၢ်ဖုးဒီးတၢ်ကနိးကစုာ်အပူၤ လၢတၢ်မၤလၢထီၣ်ပှဲၤထီၣ်သုတၢ်အုၣ်က့ၤခီၣ်က့ၤအဂီၢ်န့ၣ်တက့ၢ်. 13အဂ့ၢ်ဒ်အံၤ, ကစၢ်ယွၤမၤတၢ်လၢသုပူၤထီဘိဒ်သိးသုကသးအိၣ် ဒီးဒိကနၣ်မၤထွဲအတၢ်တိာ်ပာ်ကသ့အဂီၢ်န့ၣ်လီၤ.

14ဖဲသုဖံးတၢ်မၤတၢ်တမံၤလၢ်လၢ်န့ၣ်တဘၣ်အိၣ်ဒီးတၢ်ကဒူး ကဒ့ၣ်ဒီးတၢ်ဂ့ၢ်လိာ်ဘှီလိာ်တဂ့ၤ. 15တုၤနုၤတစု, သုကကဲထီၣ်ပှၤလၢအတၢ်ကမၣ်တအိၣ်ဒီး စီဆှံဝဲဒ်ကစၢ်ယွၤအဖိလၢအလၢပှဲၤတဖၣ်, လၢအအိၣ်မူလၢပှၤတတီတလိၤဒီးပှၤလၢအပှဲၤဒီးတၢ်ဒဲးဘး တဖၣ်အဟီၣ်ခိၣ်ပူၤန့ၣ်လီၤ. သုကဘၣ်ကပီၤထီၣ်လၢအဝဲသ့ၣ်အကျါဒ်ဆၣ်တဖၣ်ဒုးကပီၤထီၣ်မူခိၣ် အသိး, 16ဖဲသုဟ့ၣ်အဝဲသ့ၣ်တၢ်ကစီၣ်ဘၣ်ဃးတၢ်မူအဂ့ၢ်န့ၣ်လီၤ. သုမ့ၢ်မၤဒ်န့ၣ်ဒီးဖဲခရံာ်အမုၢ်နံၤန့ၣ်ယကအိၣ်ဒီးတၢ်အဂ့ၢ်အခၢးလၢ ယကပာ်ကဖၢလၢယသးလၢသုဃိ, မ့ၢ်လၢတၢ်လၢသုမၤန့ၣ်ကဒုးနဲၣ်အဝဲဒၣ်လၢယတၢ်ကျဲးစၢးဒီး တၢ်မၤတကဲထီၣ်တၢ်ကလီကလီဘၣ်အဃိန့ၣ်လီၤ.

17ဘၣ်တဘၣ်, ယသးသမူအသွံၣ်ကဘၣ်တၢ်လူလီၤအီၤဒ် တၢ်လုၢ်တၢ်ပာ်လၢသုတၢ်စူၢ်တၢ်နာ်ဒၣ်ဝဲလုၢ်ထီၣ်တၢ်မၤဘူၣ် တမံၤအသိးဆူကစၢ်ယွၤအအိၣ်အဖီခိၣ်န့ၣ်လီၤ. တၢ်မ့ၢ်မၤအသးဒ်န့ၣ်ဒီးယသးခုယဲဒီးဟ့ၣ်နီၤလီၤယတၢ်သးခု ဒီးသုဝဲကိးဒံကိးဂၤဒဲးန့ၣ်လီၤ. 18ဒ်န့ၣ်အသိး, သုဝဲစ့ၢ်ကီးသုကဘၣ်သူၣ်ခုသးခုဒီးဒုးသးခု ဃုာ်ယၤလၢသုသကိးန့ၣ်လီၤ.

စီၤတံၤမသ့းဒီးစီၤအ့းပၤဖရီးဒံတူး

19မ့ၢ်ဘၣ်ကစၢ်အသးကစီဒီန့ၣ်, ယမုၢ်လၢ်လၢယကဆှၢလီၤဘၣ်စီၤတံၤမသ့းဆူသုအိၣ်လၢအဆိအချ့, ဒ်သိးတၢ်ကစီၣ်ဘၣ်ဃးဒီးသုကဒုးဆူၣ်ထီၣ်ယသးအဂီၢ်န့ၣ်လီၤ. 20အဝဲဒၣ်မ့ၢ်ပှၤထဲတဂၤဧိၤလၢအတၢ်ဆိကမိၣ်လီၤပလိာ်ဒီးယၤဒီး သူၣ်အိၣ်သးအိၣ်သုနီၢ်နီၢ်န့ၣ်လီၤ. 21ပှၤအဂၤကိးဂၤဒဲးကွၢ်တၢ်ထဲလၢအနီၢ်ကစၢ်ဒၣ်ဝဲအတၢ်ဂ့ၢ်တဖၣ် အဂီၢ်ဒီးတမ့ၢ်လၢယ့ၣ်ၡူးခရံာ်အဂ့ၢ်န့ၣ်ဘၣ်. 22ဒီးသုနီၢ်ကစၢ်ဒၣ်သုဝဲသုသ့ၣ်ညါလၢအဝဲမ့ၢ်ပှၤလုၢ်ဒိၣ် ပှ့ၤဒိၣ်ဒ်လဲၣ်တဂၤဒီးအဝဲဒီးယၤဒ်ဖိဒီးပၢ်အသိး, ပမၤသကိးတၢ်တပူၤဃီလၢတၢ်သးခုကစီၣ်အတၢ်ဒိၣ်ထီၣ်လဲၢ်ထီၣ် အဂီၢ်ဒ်လဲၣ်အဂ့ၢ်န့ၣ်လီၤ. 23လၢတၢ်န့ၣ်အဃိ, ယမုၢ်လၢ်လၢယကဆှၢလီၤအီၤဆူသုအိၣ်တဘျီဃီဖဲယသ့ၣ်ညါ လၢတၢ်ကမၤအသးဒီးယၤဒ်လဲၣ်န့ၣ်လီၤ. 24ဒီးလၢကစၢ်အပူၤန့ၣ်, ယနာ်လၢတယံာ်ဘၣ်ဒီးယနီၢ်ကစၢ်ဒၣ်ယဲယလဲၤဆူသုအိၣ် ကသ့ဝဲန့ၣ်လီၤ.

25ယဆိကမိၣ်တ့ၢ်လၢအလီၢ်အိၣ်ဝဲဒၣ်လၢယကဆှၢလီၤပဒီပုၢ်ဝဲၢ် စီၤအ့းပၤဖရီးဒံတူးဆူသုအိၣ်, ပှၤလၢအမၤတ့ၢ်တၢ်ဒီးဒုးတ့ၢ်တၢ်ဒီးယၤဒီးမ့ၢ်တ့ၢ်သုခၢၣ် စးလၢအဟဲမၤစၢၤယၤန့ၣ်လီၤ. 26အဝဲဒၣ်ဆၢထံၣ်ဘၣ်သုကိးဒံကိးဂၤဒဲး, ဒီးအသးဘၣ်တံာ်တာ်ဒိၣ်မးလၢသုနၢ်ဟူတ့ၢ်လၢအဝဲအိၣ် တဆူၣ်အဃိန့ၣ်လီၤ. 27အဝဲအိၣ်တဆူၣ်နီၢ်နီၢ်ဒီးဘူးတ့ၢ်မးလၢအကသံလီၤ. ဘၣ်ဆၣ်ဒီးကစၢ်ယွၤသးကညီၤဒံးအီၤ, ဒီးတမ့ၢ်ထဲအဝဲဘၣ်, မ့မ့ၢ်တခီသးကညီၤစ့ၢ်ကီးယၤ, ဒီးဒုးပူၤဖျဲးယၤလၢတၢ်သးအုးလၢအဒိၣ်ဒံးတက့ၢ်န့ၣ်လီၤ. 28လၢတၢ်န့ၣ်အဃိ, ယသးဆူၣ်ဒိၣ်န့ၢ်အလီၢ်လၢယကဆှၢလီၤ အီၤဆူသုအိၣ်, ဒ်သိးသုကသူၣ်ခုသးခုကဒီးဖဲသုထံၣ်ဘၣ်အီၤ, ဒီးယတၢ်သူၣ်အုးသးအုးဒၣ်ယဲကလီၤမၢ်ကွံာ်အဂီၢ်န့ၣ်လီၤ. 29မ်ဒ်န့ၣ်ဒီး, တူၢ်လိာ်အီၤလၢတၢ်သးခုအပူၤ, ဒ်ဒီပုၢ်ဝဲၢ်လၢကစၢ်အပူၤတဂၤအသိးတက့ၢ်. ဒုးနဲၣ်သုတၢ်ယူးယီၣ်ပာ်ကဲပှၤကိးဂၤဒဲးလၢအဒ်သိးဒီးအီၤ န့ၣ်တက့ၢ်. 30အဂ့ၢ်ဒ်အံၤ, ဒ်သိးအကဟ့ၣ်ယၤတၢ်မၤစၢၤလၢသုနီၢ်ကစၢ်ဒၣ်ဝဲသုဟ့ၣ်ယၤ တသ့န့ၣ်, အဝဲဒၣ်ကွၢ်ဆၢၣ်မဲာ်တၢ်သံခ့သံပှၤဒီးဘူးတ့ၢ်မးလၢ အကသံဝဲလၢခရံာ်အတၢ်ဖံးတၢ်မၤအဂီၢ်န့ၣ်လီၤ.

Currently Selected:

ဖံလံးပံၤ 2: KSWC

Highlight

Copy