လံာ်မးသဲ 9
9
ယ့ၣ်ၡူးမၤဘျါက့ၤပှၤသံတခီပၤတဂၤ
(မၢ်. ၂:၁-၁၂; လူၤ. ၅:၁၇-၂၆)
1ယ့ၣ်ၡူးလဲၤနုာ်ဝဲဆူချံပူၤဝံၤ ခီဂာ်က့ၤဝဲဆူထံဝၢ်ဘး ခီဆူအဝ့ၢ်ဒၣ်ဝဲန့ၣ်လီၤ. 2ပှၤဟဲစိာ်ပှၤသံတခီပၤလၢအအိၣ်မံလီၤလၢအလီၢ်မံခိၣ်တဂၤ ဆူအအိၣ်ဒီးဖဲယ့ၣ်ၡူးထံၣ်အဝဲသ့ၣ်အတၢ်နာ်အိၣ်ထဲလဲၣ်န့ၣ်, အဝဲတဲဘၣ်ပှၤသံတခီပၤန့ၣ်, “ဖိဧၢ, သးဟးဂီၤတဂ့ၤ. နတၢ်ဒဲးဘးတဖၣ်ဘၣ်တၢ်ပျၢ်လံအီၤလံ.”
3ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤစံးလိာ်အသး, “ပှၤအံၤကတိၤကမၣ်ယွၤလီၤ.”
4ယ့ၣ်ၡူးသ့ၣ်ညါအဝဲသ့ၣ်အတၢ်ဆိကမိၣ်ဒီးစံး, “ဘၣ်မနုၤလၢသုအိၣ်ဒီးတၢ်ဆိကမိၣ်အအၢ အသီလၢသုသးကံၢ်ပူၤလဲၣ်. 5မ့ၢ်ကညီဒိၣ်လၢယကစံး, ‘နတၢ်ဒဲးဘးတဖၣ်ဘၣ်တၢ်ပျၢ်အီၤလံ’ မ့တမ့ၢ်ဘၣ်ဒီး, ‘ဂဲၤဆၢထၢၣ်ဒီးဟးတက့ၢ်’ န့ၣ်လဲၣ်. 6ယကဒုးနဲၣ်သုဒ်သိးသုကသ့ၣ်ညါလၢပှၤကညီအဖိခွါအံၤ အိၣ်ဒီးအစိအကမီၤလၢဟီၣ်ခိၣ်ချၢလၢကပျၢ်တၢ်ဒဲးဘး အဂီၢ်လီၤ.” အန့ၣ်ဒီးအဝဲဒၣ်စံးဘၣ်ပှၤသံတခီပၤန့ၣ်, “ဂဲၤဆၢထၢၣ်, ဟံးထီၣ်နလီၢ်မံဒီးက့ၤဆူနဟံၣ်တက့ၢ်.”
7-8ဒီးပှၤတဂၤန့ၣ်ဂဲၤဆၢထၢၣ်ဒီး က့ၤဝဲဆူဟံၣ်လီၤ. တုၤပှၤတဖၣ်ထံၣ်တၢ်အံၤဒီး, အဝဲသ့ၣ်ကမၢကမၣ်ဝဲဒိၣ်မးဒီး စံးထီၣ်ပတြၢၤကစၢ်ယွၤလၢအဟ့ၣ်တ့ၢ်ပှၤကညီတၢ်စိတၢ်ကမီၤဒ်သိးအံၤ အဃိလီၤ.
ယ့ၣ်ၡူးကိးန့ၢ်စီၤမးသဲ
(မၢ်. ၂:၁၃-၁၇; လူၤ. ၅:၂၇-၃၂)
9တုၤယ့ၣ်ၡူးဟးထီၣ်လၢတၢ်လီၢ်န့ၣ်ဒီး လဲၤဝဲဆူညါန့ၣ်, အဝဲထံၣ်န့ၢ်ပှၤဃ့သွဲတဂၤ လၢအမံၤမ့ၢ်ဝဲစီၤမးသဲဆ့ၣ်နီၤလၢအတၢ်မၤအလီၢ်လီၤ. ယ့ၣ်ၡူးစံးဘၣ်အီၤ, “ဟဲဒီးကဲဘၣ်ယပျဲၢ်ယဘီၣ်တက့ၢ်.”
ဒီးစီၤမးသဲဂဲၤဆၢထၢၣ်ဒီးပိာ်ထီၣ်အခံလီၤ.
10ဖဲယ့ၣ်ၡူးအီၣ်တၢ်လၢစီၤမးသဲအဟံၣ်ပူၤအဖၢမုၢ်န့ၣ်, ပှၤဃ့သွဲအါဂၤဒီးပှၤတၢ်ဒဲးဘးဖိလၢအဘၣ်တၢ်ဟီထီၣ်ကွံာ် အီၤတဖၣ်, ဟဲဒီးအီၣ်သကိးတၢ်ဒီးယ့ၣ်ၡူးဒီးအပျဲၢ်အဘီၣ်တဖၣ်လီၤ. 11ပှၤဖၤရံၤၡဲတနီၤထံၣ်တၢ်အံၤဒီးသံကွၢ်အပျဲၢ်အဘီၣ်တဖၣ်ဒီး စံး, “ဘၣ်မနုၤလၢသုသရၣ်န့ၣ်အီၣ်သကိးတၢ်ဒီးပှၤဒ်န့ၣ်အသိးတဖၣ် န့ၣ်လဲၣ်.”
12ယ့ၣ်ၡူးနၢ်ဟူအဝဲသ့ၣ်အတၢ်ကတိၤအံၤဒီးစံးဆၢအီၤ, “ပှၤအိၣ်ဆူၣ်အိၣ်ချ့န့ၣ်တလိၣ်ဘၣ်ကသံၣ်သရၣ်ဘၣ်. မ့ၢ်ထဲပှၤလၢအဆိးက့တဖၣ်န့ၣ်လီၤ. 13လဲၤဒီးဃုနၢ်ပၢၢ်တၢ်ကွဲးအသးလၢအစံး, ‘ယအဲၣ်ဒိးတၢ်သူၣ် ကညီၤသးကညီၤဒီးတမ့ၢ်ဘၣ်တၢ်လုၢ်တၢ်ပာ်ဘၣ်’ အခီပညီတက့ၢ်. အဂ့ၢ်ဒ်အံၤ, ယဟဲလၢယကကိးန့ၢ် ပှၤတၢ်ဒဲးဘးဖိဒီးတမ့ၢ်ဘၣ်ပှၤတီပှၤလိၤတဖၣ်ဘၣ်.”
တၢ်သံကွၢ်ဘၣ်ဃးဒီးတၢ်ဒုၣ်တၢ်အီၣ်
(မၢ်. ၂:၁၈-၂၂; လူၤ. ၅:၃၃-၃၉)
14ပှၤဘျၢတၢ်စီၤယိၤဟၣ်အပျဲၢ်အဘီၣ်တဖၣ်ဟဲဆူယ့ၣ်ၡူး အအိၣ်ဒီးသံကွၢ်အီၤ, “ဘၣ်မနုၤအဃိလၢပဝဲဒၣ်ဒီးပှၤဖၤရံၤၡဲတဖၣ်ဒုၣ်တၢ်အီၣ် တလီၢ်လီၢ်, မ့မ့ၢ်နပျဲၢ်နဘီၣ်တဖၣ်တဒုၣ်တၢ်အီၣ်နီတဘျီဘၣ်န့ၣ်လဲၣ်.”
15ယ့ၣ်ၡူးစံးဆၢဝဲ, “ဖဲတလးမူးပိာ်ခွါအိၣ်ဒံးဒီးအဝဲသ့ၣ် အဖၢမုၢ်ဒီးမ့ၢ်ပှၤသမှံၤလၢအဟဲဆူတၢ်တ့တၢ်ဖျီတဖၣ် သူၣ်အုးသးအုးကသ့ဧါ. ဘၣ်ဆၣ်ဒီးမုၢ်နံၤတဖၣ်ကဟဲဝဲဖဲတလးမူးပိာ်ခွါကဘၣ်တၢ်ထုးဖးကွံာ်အီၤ လၢအဝဲသ့ၣ်အအိၣ်လီၤ. တုၤနုၤတစုအဝဲသ့ၣ်ကဒုၣ်တၢ်အီၣ်လီၤ.
16ပှၤတဆးကျးဘၣ်ဆ့ကၤလီၢ်လံၤလၢတၢ်ကံးယာ်အသီတက့နီတဂၤဘၣ်. အဂ့ၢ်ဒ်အံၤ, တၢ်ကံးယာ်အသီတက့န့ၣ်ကသံးအသးဒီးမၤလဲၢ်ထီၣ်တၢ် ယာ်ပြဲးအလီၢ်န့ၣ်လီၤ. 17ပှၤတဒၢနုာ်စ့ၢ်ကီးစပံးထံအသီလၢထံဒၢတၢ်ဖံးအလီၢ်လံၤအပူၤနီ တဂၤဘၣ်. အဂ့ၢ်ဒ်အံၤ, စပံးထံဒၢကပိၢ်ဖးဒီးစပံးထံကလီၤဂၢ်ကွံာ်ဒီး ထံဒၢတၢ်ဖံးစ့ၢ်ကီးကဟးဂီၤကွံာ်ဝဲလီၤ. မ့မ့ၢ်စပံးထံအသီန့ၣ်ပှၤဒၢနုာ်အီၤ လၢထံဒၢတၢ်ဖံးအသီအပူၤသတးဒီး, စပံးထံဒီးထံဒၢတၢ်ဖံးန့ၣ်တဟးဂီၤကွံာ်နီတခါဘၣ်န့ၣ်လီၤ.”
ပှၤယူဒၤဖိအခိၣ်တဂၤအဖိမုၣ် ဒီးပိာ်မုၣ်လၢအထိးဘၣ်ယ့ၣ်ၡူး အဆ့ကၤတဂၤ
(မၢ်. ၅:၂၁-၄၃; လူၤ. ၈:၄၀-၅၆)
18ဖဲယ့ၣ်ၡူးကတိၤတၢ်ဒ်အံၤအဖၢမုၢ်န့ၣ်, ပှၤယူဒၤဖိအခိၣ်အနၢ် တဂၤဟဲဝဲချံးခီၣ်တီၤလီၤဝဲလၢယ့ၣ်ၡူးအမဲာ်ညါဒီးစံး, “ယဖိမုၣ်တဂၤသံသီသီဒံးလီၤ. ဟဲပိာ်ယခံဒီးပာ်နစုလၢ အလိၤတက့ၢ်. ဒီးအဝဲဒၣ်ကမူထီၣ်က့ၤလီၤ.”
19လၢတၢ်န့ၣ်အဃိယ့ၣ်ၡူးဂဲၤဆၢထၢၣ်ဒီးလဲၤပိာ်အခံလီၤ. ဒီးအပျဲၢ်အဘီၣ်တဖၣ်လဲၤသကိးဒီးအီၤလီၤ.
20ပိာ်မုၣ်လၢအတူၢ်ဘၣ်တ့ၢ်လံတၢ်သွံၣ်လီၤအတၢ်ဆါတဆံခံနံၣ်တဂၤ ဟဲဝဲလၢယ့ၣ်ၡူးအလီၢ်ခံဒီးထိးဘၣ်ယ့ၣ်ၡူးအဆ့ကၤဖးဒိၣ်အနွံန့ၣ်လီၤ. 21အဝဲစံးလၢအသးကံၢ်ပူၤ, “ယမ့ၢ်ထိးဘၣ်ထဲအဆ့ကၤဒီးယကဘျါ က့ၤယဲလီၤ.”
22ယ့ၣ်ၡူးဃၣ်တရံးအသးဒီးထံၣ်အီၤဒီးစံး, “ဖိမုၣ်ဧၢ, သးဟးဂီၤတဂ့ၤ. နနာ်တၢ်အဃိနဘျါက့ၤလံ.” တကတီၢ်ဃီဖဲန့ၣ်ပိာ်မုၣ်န့ၣ်အိၣ်ဆူၣ်အိၣ်ချ့ဝဲဒၣ်လီၤ. 23ယ့ၣ်ၡူးလဲၤနုာ်လီၤဆူပှၤယူဒၤဖိအခိၣ်န့ၣ်အဟံၣ်ပူၤလီၤ. တုၤအဝဲထံၣ်ဘၣ်ပှၤအူပံလၢတၢ်သံအဂီၢ်တဖၣ် ဒီးပှၤအါဒံအါဂၤသီၣ်သီၣ်သဲသဲဒီး, 24အဝဲစံးဘၣ်ပှၤတဖၣ်န့ၣ်, “ဟးထီၣ်ကိးဂၤဒဲးတက့ၢ်. ပိာ်မုၣ်ဖိအံၤတသံဘၣ်. မ့ၢ်ဒၣ်အမံဘၣ်အသးလီၤ.” အန့ၣ်ဒီးအဝဲသ့ၣ်နံၤဘၣ်ဖၣ်လဲအီၤလီၤ. 25တုၤပှၤတဖၣ်ဘၣ်တၢ်ဒုးဟးထီၣ်ကွံာ်အီၤဝံၤဒီးယ့ၣ်ၡူးလဲၤ နုာ်ဆူပိာ်မုၣ်ဖိန့ၣ်အဒၢးပူၤ, ဟံးဃာ်အစု, ဝံၢ်ထီၣ်အီၤဒီးပိာ်မုၣ်ဖိန့ၣ်ဂဲၤဆၢထၢၣ်က့ၤဝဲလီၤ. 26တၢ်ကစီၣ်အံၤဟူထီၣ်သါလီၤလၢကီၢ်ဒီဘ့ၣ်ညါအပူၤလီၤ.
ယ့ၣ်ၡူးမၤဘျါက့ၤပှၤမဲာ်ဘျီၣ်ခံဂၤ
27တုၤယ့ၣ်ၡူးဟးထီၣ်ဖဲတၢ်လီၢ်န့ၣ်ဒီးလဲၤဝဲဆူညါအခါန့ၣ်, ပှၤမဲာ်ဘျီၣ်ခံဂၤပိာ်ထီၣ်အခံဒီးကိးထီၣ်ဝဲလၢအကလုၢ်ဖးဒိၣ်, “စီၤဒၤဝံးအဖိခွါဧၢ, သူၣ်ကညီၤသးကညီၤပှၤတက့ၢ်.”
28ဖဲယ့ၣ်ၡူးလဲၤနုာ်ဆူဟံၣ်ပူၤန့ၣ်, ပှၤမဲာ်ဘျီၣ်ခံဂၤဟဲဆူအအိၣ်ဒီးအဝဲဒၣ်သံကွၢ်အဝဲသ့ၣ်, “သုနာ်လၢယမၤဘျါက့ၤသုသ့ဧါ.”
အဝဲသ့ၣ်စံးဆၢ, “မ့ၢ်ကစၢ်ဧၢ, ပနာ်လီၤ.”
29တုၤနုၤတစုယ့ၣ်ၡူးထိးဘၣ်အဝဲသ့ၣ်အမဲာ်ချံတဖၣ်ဒီးစံး, “မ်သုထံၣ်ထီၣ်က့ၤတၢ်ဒ်သုနာ်တၢ်အသိးန့ၣ်တက့ၢ်.” 30ဒီးအဝဲသ့ၣ်ထံၣ်ထီၣ်က့ၤတၢ်လီၤ. ယ့ၣ်ၡူးတြီအဝဲသ့ၣ်ဆူၣ်ဆူၣ် ကလဲာ်ဒီးစံး, “တဘၣ်စံးဘၣ်တဲဘၣ်ပှၤလၢတၢ်ဂ့ၢ်အဝဲအံၤနီတဂၤတဂ့ၤ.”
31ဘၣ်ဆၣ်ဒီးအဝဲသ့ၣ်ဒုးဟူထီၣ်သါလီၤယ့ၣ်ၡူးအဂ့ၢ်လၢကီၢ်ဒီဘ့ၣ်ညါ အပူၤလီၤ.
ယ့ၣ်ၡူးမၤဘျါက့ၤပှၤအုးအးကတာ်ပျ့ၤတဂၤ
32ဖဲပှၤခံဂၤအံၤဟးထီၣ်ကွံာ်ဝဲအဖၢမုၢ်န့ၣ်, ပှၤတနီၤဟဲကိးန့ၢ်ပှၤလၢတၢ်နါဒိးအီၤဒီးအုးအးကတာ်ပျ့ၤ တဂၤဆူယ့ၣ်ၡူးအအိၣ်လီၤ. 33တုၤယ့ၣ်ၡူးဟီထီၣ်ကွံာ်တၢ်နါဝံၤတကတီၢ်ဃီဖဲန့ၣ်, ပှၤအုးအးန့ၣ်ကတိၤထီၣ်က့ၤတၢ်ဒီးပှၤကမၢကမၣ်ကိးဂၤဒဲးဒီးစံးဝဲ, “ပတထံၣ်တၢ်မၤအသးဒ်အံၤအသိးလၢကီၢ်အံၣ်စရ့လး အပူၤနီတစုနီတခီၣ်ဒံးဘၣ်.”
34ဘၣ်ဆၣ်ပှၤဖၤရံၤၡဲတဖၣ်စံးဝဲ, “အဝဲဟီထီၣ်ကွံာ်တၢ်နါခီ ဖျိလၢတၢ်နါအခိၣ်တဂၤဟ့ၣ်စိဟ့ၣ်ကမီၤအီၤအဃိလီၤ.”
ယ့ၣ်ၡူးသးကညီၤပှၤဂီၢ်မုၢ်
35ယ့ၣ်ၡူးလဲၤဝ့ၤဝီၤတၢ်လၢဝ့ၢ်တဖၣ်ဒီးသဝီတဖၣ်လီၤ. အဝဲသိၣ်လီၤသီလီၤတၢ်လၢဘူၣ်ဘျီၣ်လၢအမ့ၢ်တၢ်ဘါလီၢ်တဖၣ်အပူၤ, စံၣ်တဲၤတဲလီၤတၢ်သးခုကစီၣ်ဘၣ်ဃးဘီမုၢ်, ဒီးမၤဘျါက့ၤပှၤတဖၣ်လၢအအိၣ်ဒီးတၢ်ဆူးတၢ်ဆါတၢ်က့တၢ် ကွဲၣ်ကိးအကလုာ်ဒဲးလီၤ. 36တုၤအဝဲထံၣ်ပှၤဂီၢ်မုၢ်တဖၣ်ဒီးအသးပှဲၤဒီးတၢ်သးကညီၤဘၣ် အဝဲသ့ၣ်လီၤ. အဂ့ၢ်ဒ်အံၤ, အဝဲသ့ၣ်အသူၣ်ကိၢ်သးဂီၤဒီးပှၤမၤစၢၤအီၤတအိၣ်ဘၣ်ဒီး လီၤဂာ်ဒ်သိလၢအပှၤကွၢ်သိတအိၣ်ဘၣ်တဖၣ်အသိးလီၤ. 37လၢတၢ်န့ၣ်အဃိအဝဲစံးဘၣ်အပျဲၢ်အဘီၣ်တဖၣ်, “ကူးဘုအလီၢ်အိၣ်အါမးလီၤ. ဘၣ်ဆၣ်ပှၤမၤတၢ်ဖိလၢအကထၢဖှိၣ်က့ၤတၢ်အိၣ်စှၤဂၤလီၤ. 38ဘါထုကဖၣ်ဆူစံာ်အကစၢ်ဒ်သိးအကဆှၢလီၤပှၤမၤတၢ်ဖိတဖၣ် လၢကထၢဖှိၣ်က့ၤအဘုအဂီၢ်တက့ၢ်.”
Currently Selected:
လံာ်မးသဲ 9: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
