လံာ်မးသဲ 7

တၢ်စံၣ်ညီၣ်ပှၤဂၤ

(လူၤ. ၆:၃၇-၃၈,၄၁-၄၂)

1ဒ်သိးသုသုတဘၣ်တၢ်စံၣ်ညီၣ်လၢကစၢ်ယွၤတဂ့ၤဒီးစံၣ်ညီၣ်ပှၤဂၤတဂ့ၤ. 2အဂ့ၢ်ဒ်အံၤ, ကစၢ်ယွၤကစံၣ်ညီၣ်သုလၢတၢ်စံၣ်ညီၣ်တမံၤဃီလၢသုစံၣ်ညီၣ် ပှၤဂၤဒီး အဝဲကဃီၣ်ဟ့ၣ်သုတၢ်လၢနီၣ်ဃီၣ်တခါဃီလၢသုဃီၣ်ဟ့ၣ်တၢ်န့ၣ် လီၤ. 3မ့မ့ၢ်ဒ်န့ၣ်ဒီးဘၣ်မနုၤလၢနကွၢ်ဒၣ်တၢ်ကမှံၤလၢအအိၣ်လၢနဒီ ပုၢ်ဝဲၢ်ပှၤစူၢ်က့ၤနာ်က့ၤတၢ်တဂၤအမဲာ်ချံပူၤဒီးတထံၣ်ဘၣ် သ့ၣ်အကျီၣ်လၢအအိၣ်လၢနမဲာ်ချံပူၤန့ၣ်လဲၣ်. 4ဖဲသ့ၣ်အကျီၣ်အိၣ်လၢနမဲာ်ချံဒၣ်နဲအပူၤန့ၣ်, နစံးဘၣ်နဒီပုၢ်ဝဲၢ်လၢ, ‘ပျဲယခွဲးထီၣ်န့ၢ်တၢ်ကမှံၤဖိအိၣ်လၢနမဲာ်ချံပူၤ’ န့ၣ်, ကသ့ဒ်လဲၣ်. 5ပှၤပာ်မၤအသးနၤဧၢ, ထုးထီၣ်ဆိကွံာ်သ့ၣ်အကျီၣ်လၢအအိၣ်လၢနမဲာ်ချံဒၣ်နဲအပူၤဒ် သိးနကထံၣ်တၢ်ထံထံလၢနကထုးထီၣ်တၢ်ကမှံၤလၢအအိၣ်လၢ နဒီပုၢ်ဝဲၢ်အမဲာ်ချံအပူၤန့ၣ်တက့ၢ်.

6တဘၣ်ဟ့ၣ်လီၤတၢ်စီဆှံလၢထွံၣ်တဖၣ်တဂ့ၤ. အဝဲသ့ၣ်ကဃၣ်တရံးအသးဒီးအ့ၣ်နၤလီၤ. တဘၣ်ကွံာ်လီၤသုတၢ်မျၢ်ပလဲတဖၣ်လၢထိးတဖၣ်အမဲာ်ညါတဂ့ၤ. အဝဲသ့ၣ်ကယီၢ်တံၢ်ဒၣ်အီၤလၢအခီၣ်လီၤ.

ဃ့, ဃုဒီးဒိတကျိာ်

(လူၤ. ၁၁:၉-၁၃)

7ဃ့တၢ်လၢယွၤတက့ၢ်ဒီးသုကဒိးန့ၢ်ဘၣ်လီၤ. ဃုတၢ်တက့ၢ်ဒီးသုကထံၣ်န့ၢ်တၢ်လီၤ. ဒိတကျိာ်တၢ်တက့ၢ် ဒီးယွၤကအိးထီၣ်န့ၢ်တၢ်လၢသုဂီၢ်လီၤ. 8အဂ့ၢ်ဒ်အံၤပှၤကိးဂၤဒဲးလၢအဃ့တၢ်လၢယွၤန့ၣ်ကဒိးန့ၢ်ဝဲ, ဒီးပှၤတဂၤဂ့ၤတဂၤဂ့ၤလၢအဃုတၢ်န့ၣ်ကထံၣ်န့ၢ်ဝဲ, ဒီးယွၤကအိးထီၣ်န့ၢ်တြဲၤလၢပှၤတဂၤလၢ်လၢ်လၢအဒိတကျိာ် တၢ်အဂီၢ်လီၤ. 9သုလၢအမ့ၢ်ပၢ်တဖၣ်န့ၣ်, သုဖိခွါမ့ၢ်ဃ့သုလၢကိၣ်ဒီးသုကဟ့ၣ်အီၤလၢလၢၢ်တဖျၢၣ်ဧါ. 10ဒီးမ့ၢ်ဃ့သုလၢညၣ်တဘ့ၣ်ဒီးသုကဟ့ၣ်အီၤလၢဂုၢ်တဘိဧါ. 11သုအၢသုသီဘၣ်ဆၣ်ဒီး, သုသ့ၣ်ညါဟ့ၣ်သုဖိတဖၣ်တၢ်လၢ အဂ့ၤတဖၣ်လီၤ. မ့မ့ၢ်ဒ်န့ၣ်ဒီး, သုပၢ်အိၣ်လၢမူခိၣ်တဂၤကဟ့ၣ်ပှၤတဖၣ်လၢအဃ့တၢ်လၢအီၤ တၢ်အဂ့ၤတဖၣ်အါန့ၢ်အန့ၣ်တက့ၢ်ဆံးဒိၣ်လဲၣ်.

12ဒ်နဆၢလၢပှၤဂၤကမၤနၤအသိးန့ၣ်, မၤအီၤဒ်န့ၣ်အသိးတက့ၢ်. အအံၤမ့ၢ်စီၤမိၤၡ့အတၢ်သိၣ်တၢ်သီ ဒီးဝံတဖၣ်အတၢ်သိၣ်လီၤသီလီၤတဖၣ်အခီပညီန့ၣ်လီၤ.

ကျဲစၢၤလၢအအံၣ်

(လူၤ. ၁၃:၂၄)

13လဲၤနုာ်သုဝဲခီဖျိကျဲစၢၤလၢအအံၣ်တက့ၢ်. အဂ့ၢ်ဒ်အံၤ, ကျဲစၢၤလၢအအိးထီၣ်အသးဆူ တၢ်ဟးဂူာ်ဟးဂီၤန့ၣ်လဲၢ်ဝဲ, ဒီးကျဲလၢအဆှၢပှၤဆူတၢ်ဟးဂူာ်ဟးဂီၤန့ၣ်မ့ၢ်ကျဲလၢအညီ ဒီးပှၤလၢအပိာ်အီၤအိၣ်ဝဲအါဒံအါဂၤန့ၣ်လီၤ. 14ဘၣ်ဆၣ်ဒီး, ကျဲစၢၤလၢအအိးထီၣ်အသးဆူတၢ်မူန့ၣ်အံၣ်ဝဲ, ဒီးကျဲလၢအဆှၢပှၤဆူတၢ်မူန့ၣ်ကီခဲမးဒီးပှၤလၢအထံၣ်န့ၢ်အီၤ အိၣ်ဝဲစှၤဂၤလီၤ.

သ့ၣ်ဒီးအတၤသၣ်

(လူၤ. ၆:၄၃-၄၄)

15ပလီၢ်သုသးလၢဝံအဘျၣ်တဖၣ်တက့ၢ်. အဝဲသ့ၣ်ဟဲဆူသုအိၣ်ဖျါမၤအသးဒ်သိတဖၣ်အသိး, ဘၣ်ဆၣ်နီၢ်နီၢ်တခီလၢအကံၢ်အလဲန့ၣ်အဝဲသ့ၣ်လီၤဂာ် ဒီးထွံၣ်မံၤအအၢအသီတဖၣ်လီၤ. 16သုသ့ၣ်ညါအဝဲသ့ၣ်သ့ခီဖျိတၢ်လၢအဝဲသ့ၣ်မၤဝဲန့ၣ်လီၤ. တၤဆှုၣ်တၤမဲအမုၢ်တဖၣ်တသၣ်ထီၣ်စပံးသၣ်ဘၣ်. တၤဆှုၣ် တပှီာ်တဖၣ်တသၣ်ထီၣ်ချၢၣ်ဒၢသၣ်ဘၣ်. 17သ့ၣ်လၢအဂ့ၤန့ၣ်သၣ်ထီၣ်တၤသၣ်လၢအဂ့ၤလီၤ. မ့မ့ၢ်သ့ၣ်လၢအတဂ့ၤန့ၣ်သၣ်ထီၣ်တၤသၣ်လၢအတဂ့ၤလီၤ. 18သ့ၣ်လၢအဂ့ၤတထူၣ်န့ၣ်သၣ်ထီၣ်တၤသၣ်လၢအတဂ့ၤတသ့ဘၣ်. ဒီးသ့ၣ်လၢအတဂ့ၤတထူၣ်န့ၣ်သၣ်ထီၣ်တၤသၣ်လၢအဂ့ၤတသ့ဘၣ်. 19သ့ၣ်တထူၣ်လၢ်လၢ်လၢအတသၣ်ထီၣ်တၤသၣ်လၢအဂ့ၤန့ၣ်, ကဘၣ်တၢ်ကူာ်လီၤကွံာ်အီၤဒီး တ့ၢ်လီၤကွံာ်အီၤဆူမ့ၣ်အူအပူၤလီၤ. 20မၤသးဒ်န့ၣ်ဒီး, သုကသ့ၣ်ညါဝံအဘျၣ်တဖၣ်ခီဖျိတၢ်လၢအဝဲသ့ၣ် မၤဝဲန့ၣ်လီၤ.

ယတသ့ၣ်ညါသုနီတစုဘၣ်

(လူၤ. ၁၃:၂၅-၂၇)

21ပှၤလၢအကိးယၤ ‘ကစၢ်ဧၢ, ကစၢ်ဧၢ,’ န့ၣ်တလဲၤနုာ်ဘၣ်ဆူမူခိၣ် အဘီအမုၢ်အပူၤကိးဂၤဒဲးဘၣ်. ကလဲၤနုာ်ဘၣ်ထဲပှၤတဖၣ်လၢအမၤတၢ်လၢယပၢ်လၢမူခိၣ်အဲၣ်ဒိး အကမၤဝဲန့ၣ်လီၤ. 22ဖဲယွၤစံၣ်ညီၣ်တၢ်အမုၢ်တနံၤတုၤဝဲန့ၣ်ပှၤအါဂၤကစံးဘၣ်ယၤ, ‘ကစၢ်ဧၢ, ကစၢ်ဧၢ, လၢနမံၤန့ၣ်ပစံၣ်တဲၤတဲလီၤကစၢ်ယွၤအတၢ်ကစီၣ်, လၢနမံၤန့ၣ်ပဟီထီၣ်ကွံာ်တၢ်နါအါဒုဒီးမၤတၢ်လီၤလးအါမံၤလီၤ.’ 23ဒီးယကစံးဘၣ်အဝဲသ့ၣ်, ‘ယတသ့ၣ်ညါသုနီတစုဘၣ်. ပှၤမၤတၢ်အၢတၢ်သီသ့ၣ်ဧၢ, ဟးဖးဒီးယၤတက့ၢ်.’

ပှၤဘှီထီၣ်ဟံၣ်ခံဂၤ

(လူၤ. ၆:၄၇-၄၉)

24လၢတၢ်န့ၣ်အဃိ, ပှၤတဂၤလၢ်လၢ်လၢအနၢ်ဟူ ယတၢ်ကတိၤတဖၣ်အံၤဒီးစူၢ်ဝဲန့ၣ်, လီၤဂာ်ဒ်ပှၤကူၣ်ဘၣ်ကူၣ်သ့လၢ အဘှီထီၣ်အဟံၣ်လၢလၢၢ်အလိၤအသိးန့ၣ်လီၤ. 25တၢ်စူၤလီၤဖးဒိၣ်, ထံကျိတဖၣ်အထံလုၣ်ဘၢတၢ်, ဒီးကလံၤအူဘၣ်ဟံၣ်န့ၣ်ဆူၣ်ဆူၣ်ကလဲာ်, ဘၣ်ဆၣ်တလီၤပှီၢ်ဝဲဘၣ်. အဂ့ၢ်ဒ်အံၤ, ဘၣ်တၢ်သူၣ်ထီၣ်အီၤလၢလၢၢ်အဖီခိၣ်အဃိလီၤ.

26ဘၣ်ဆၣ်ဒီး, ပှၤတဂၤလၢ်လၢ်လၢအနၢ်ဟူယတၢ်ကတိၤတဖၣ်အံၤဒီးတစူၢ်ဘၣ်ဝဲန့ၣ်, လီၤဂာ်ဒ်ပှၤအသးတဆးတဂၤလၢအဘှီထီၣ်အဟံၣ်လၢမဲးအဖီခိၣ် အသိးန့ၣ်လီၤ. 27တၢ်စူၤလီၤဖးဒိၣ်, ထံကျိတဖၣ်အထံလုၣ်ဘၢတၢ်, ကလံၤအူဘၣ်ဟံၣ်န့ၣ်ဆူၣ်ဆူၣ်ကလဲာ်, ဒီးလီၤပှီၢ်ဝဲလီၤ. ဒီးအတၢ်လီၤပှီၢ်န့ၣ်ဒိၣ်ဝဲလီၤ.”

ယ့ၣ်ၡူးသိၣ်လီၤသီလီၤတၢ်အိၣ်ဒီး အစိအကမီၤ

28တုၤယ့ၣ်ၡူးစံးတၢ်တဖၣ်အံၤဝံၤဒီး, ပှၤဂီၢ်မုၢ်တဖၣ်ကမၢကမၣ်ဝဲလၢ အတၢ်သိၣ်လီၤသီလီၤအဃိန့ၣ်လီၤ. 29အဝဲတလီၤဂာ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဘၣ်. မ့မ့ၢ်အဝဲသိၣ်လီၤသီလီၤတၢ်အိၣ်ဒီးအစိအကမီၤလီၤ.

Currently Selected:

လံာ်မးသဲ 7: KSWC

Highlight

Copy