လံာ်မးသဲ 2

ပှၤကူၣ်ဘၣ်ကူၣ်သ့လၢမုၢ်ထီၣ်တခီ

1ယ့ၣ်ၡူးအိၣ်ဖျဲၣ်ထီၣ်လၢဝ့ၢ်ဘ့ၤသလ့ဃ့ၣ် ဘၣ်ဃးဒီးကီၢ်ယူဒၤ, ဖဲစီၤပၤဟ့ၤရိာ်ပၢတၢ်အကတီၢ်န့ၣ်လီၤ. ပှၤကူၣ်ဘၣ်ကူၣ်သ့လၢကီၢ်မုၢ်ထီၣ်တဖၣ်ဟဲဆူဝ့ၢ်ယရူၤၡလ့ၣ် ဒီးသံကွၢ်တၢ်ဒီးစံး, 2“ဖိသၣ်လၢအအိၣ်ဖျဲၣ်ထီၣ်ဒီးလၢအကကဲထီၣ်ပှၤယူဒၤဖိတဖၣ် အစီၤပၤတဂၤန့ၣ်မ့ၢ်အအိၣ်ဖဲလဲၣ်. ပထံၣ်ဘၣ်တ့ၢ်လံအဆၣ်လၢမုၢ်ထီၣ်တခီဒီးပဟဲသကိးလၢပကဘူၣ်ထီၣ် ဘါထီၣ်အီၤအဂီၢ်လီၤ.”

3တုၤစီၤပၤဟ့ၤရိာ်နၢ်ဟူတၢ်အံၤဒီးအသးကိၢ်ထီၣ်ဂီၤထီၣ်ဒိၣ် မးလီၤ. ပှၤခဲလၢာ်လၢအအိၣ်လၢဝ့ၢ်ယရူၤၡလ့ၣ်အပူၤစ့ၢ်ကီး အသးကိၢ်ဃုာ်ဒီးအီၤလီၤ. 4စီၤပၤဟ့ၤရိာ်ကိးဖှိၣ်ပှၤလုၢ်တၢ်အခိၣ်အဒိၣ်တဖၣ်ခဲလၢာ်ဝံၤ ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးသံကွၢ်သံဒိးအဝဲသ့ၣ်ဘၣ်ဃးခရံာ်အတၢ်ကဟဲအိၣ်ဖျဲၣ်ထီၣ် အလီၢ်အကျဲန့ၣ်လီၤ.

5အဝဲသ့ၣ်စံးဆၢအီၤ, “လၢဝ့ၢ်ဘ့ၤသလ့ဃ့ၣ်ဘၣ်ဃးဒီးကီၢ်ယူဒၤလီၤ. အဂ့ၢ်ဒ်အံၤဝံတဂၤကွဲးတ့ၢ်တၢ်ဒီးစံး,

6‘ယွၤစံးဝဲ, ဘ့ၤသလ့ဃ့ၣ်လၢအဘၣ်ဃးဒီး

ကီၢ်ယူဒၤဧၢ,

နတမ့ၢ်တီနံဝ့ၢ်အဆံးကတၢၢ်လၢ

ကီၢ်ယူဒၤအပူၤဘၣ်.

အဂ့ၢ်ဒ်အံၤခိၣ်နၢ်တဂၤ

လၢကပၢကဆှၢယပှၤဂီၢ်မုၢ်အံၣ်စရ့လးန့ၣ်

ကဟဲထီၣ်လၢနပူၤလီၤ’ ” (မံ. ၅:၂).

7အန့ၣ်တစု စီၤပၤဟ့ၤရိာ်ကိးဃီၤပှၤကူၣ်ဘၣ်ကူၣ်သ့လၢကီၢ်မုၢ်ထီၣ် တဖၣ်ဆူတၢ်လီၢ်သဒၢဖဲပှၤတအိၣ်ဘၣ်နီတဂၤအလီၢ်, ဒီးသံကွၢ်အဝဲသ့ၣ်ဘၣ်ဃးဒီးဆၣ်န့ၣ်ဟဲအိၣ်ဖျါထီၣ်အမုၢ်နံၤ မုၢ်သီအဆၢကတီၢ်လီၤတံၢ်လီၤဆဲးလီၤ. 8အဝဲမၢလီၤပှၤကူၣ်ဘၣ်ကူၣ်သ့တဖၣ်အံၤဆူဝ့ၢ်ဘ့ၤသလ့ ဃ့ၣ်ဒီးစံးဘၣ်အဝဲသ့ၣ်, “လဲၤဒီးကွၢ်ဃုဖိသၣ်န့ၣ်လီၤ တံၢ်လီၤဆဲးဒီးတုၤသုထံၣ်န့ၢ်အီၤဒီးဟဲက့ၤတဲဘၣ်ယၤဒ်သိး ယဲစ့ၢ်ကီးယကလဲၤဘူၣ်ထီၣ်ဘါထီၣ်ဘၣ်အီၤအဂီၢ်တက့ၢ်.”

9တုၤအဝဲသ့ၣ်နၢ်ဟူစီၤပၤအတၢ်စံးတၢ်ကတိၤဝံၤဒီး ဟးထီၣ်ဝဲဒီးဖဲအလဲၤတၢ်လၢကျဲအခါ, ဆၣ်လၢအထံၣ်တ့ၢ်ဝဲလၢမုၢ်ထီၣ်တဖျၢၣ်န့ၣ်ဟဲဖျါထီၣ်ကဒီးလီၤ. 10တုၤအဝဲသ့ၣ်ထံၣ်ဘၣ်ဆၣ်တဖျၢၣ်န့ၣ်ဒီးအသူၣ်ခုအသးခုဒိၣ်ဒိၣ် ကလဲာ်လီၤ. ဆၣ်အံၤလဲၤတၢ်လၢအဝဲသ့ၣ်အမဲာ်ညါတုၤ အအိၣ်ကတီၢ်ဖဲအလီၢ်လၢဖိသၣ်အိၣ်ဝဲအဖီခိၣ်န့ၣ်လီၤ. 11အဝဲသ့ၣ်လဲၤနုာ်ဆူဟံၣ်ပူၤဒီးတုၤအထံၣ်ဖိသၣ်ဒီးအမိၢ်နီၢ်မၤရံန့ၣ်, ချံးခီၣ်တီၤလီၤဒီးဘူၣ်ထီၣ်ဘါထီၣ်အီၤလီၤ. ဝံၤအိးထီၣ်အတၢ်လုၢ်ဒိၣ်ပှ့ၤဒိၣ်တဖၣ်ဒီးဟ့ၣ်အီၤလၢထူ, ဒီးတၢ်နၢမူလုၢ်ဒိၣ်ပှ့ၤဒိၣ်လၢအမ့ၢ်လီၢ်ဘၣ်, ဒီးမူရၣ်တဖၣ်လီၤ.

12ဒီးဒ်ကစၢ်ယွၤဒုးပလီၢ်အဝဲသ့ၣ်အသးခီဖျိတၢ်မံမီၢ်လၢ အသုတက့ၤကဒါက့ၤဆူစီၤပၤဟ့ၤရိာ်အအိၣ်တဂ့ၤအသိးန့ၣ်, အဝဲသ့ၣ်က့ၤက့ၤဆူအထံအကီၢ်ဒၣ်ဝဲလၢကျဲအဂၤတဘိလီၤ.

တၢ်ဃ့ၢ်ပူၤဖျဲးကွံာ်ဆူ ကီၢ်အဲၤကူပတူး

13တုၤပှၤကူၣ်ဘၣ်ကူၣ်သ့လၢကီၢ်မုၢ်ထီၣ်တဖၣ်က့ၤဝံၤအလီၢ်ခံဒီး ယွၤအကလူးတဂၤလီၣ်ဖျါထီၣ်အသးလၢစီၤယိၤသးလၢတၢ်မံမီၢ် အပူၤဒီးစံးဝဲ, “ဂဲၤဆၢထၢၣ်, ကိးထီၣ်ဖိသၣ်ဒီးအမိၢ်န့ၣ်ဝံၤဃ့ၢ်ပူၤဖျဲးကွံာ်သုသးဆူ ကီၢ်အဲၤကူပတူးဒီးအိၣ်ဖဲန့ၣ်တုၤယမၢနဟးထီၣ်တစုန့ၣ်တက့ၢ်. အဂ့ၢ်ဒ်အံၤ စီၤပၤဟ့ၤရိာ်ကမၢလီၤပှၤလၢကဃုဖိသၣ်အံၤဒ်သိး အကမၤသံအီၤအဂီၢ်လီၤ.”

14စီၤယိၤသးဂဲၤဆၢထၢၣ်, ကိးထီၣ်ဖိသၣ်ဒီးအမိၢ်ဒီးဟးထီၣ်တနၤဃီ ဒီးလဲၤဝဲဆူကီၢ်အဲၤကူပတူးလီၤ. 15အဝဲသ့ၣ်အိၣ်ဝဲဖဲန့ၣ်တုၤစီၤပၤဟ့ၤရိာ်သံတစုလီၤ. အဝဲသ့ၣ်ဘၣ်လဲၤဆူကီၢ်အဲၤကူပတူးမ့ၢ်ဒ်သိးယွၤ အတၢ်ကတိၤခီဖျိဝံတဂၤလၢအစံးဝဲ, “ယကိးန့ၢ်ယဖိခွါလၢကီၢ်အဲၤကူပတူး” ကလၢထီၣ်ပှဲၤထီၣ်ဝဲအဂီၢ်လီၤ(ဟိၤ. ၁၁:၁).

တၢ်မၤသံဖိသၣ်ပိာ်ခွါတဖၣ်

16တုၤစီၤပၤဟ့ၤရိာ်သ့ၣ်ညါလၢပှၤ ကူၣ်ဘၣ်ကူၣ်သ့လၢကီၢ်မုၢ်ထီၣ်တဖၣ်လီန့ၢ်အီၤလံဒီး, အသးဒိၣ်ထီၣ်ဒိၣ်ဒိၣ်ကလဲာ်ဒီးမၢလီၤပှၤဒ်သိးအကလဲၤမၤသံဖိ သၣ်ပိာ်ခွါလၢအသးအိၣ်ခံနံၣ်ဒီးခံနံၣ်အဖီလာ်ခဲလၢာ်လၢ အအိၣ်လၢဝ့ၢ်ဘ့ၤသလ့ဃ့ၣ်ဒီးအခိၣ်အဃၢၤတဖၣ်လီၤ. အဝဲမၤတၢ်အံၤဒ်ပှၤကူၣ်ဘၣ်ကူၣ်သ့တဖၣ်အတၢ်ဒုးသ့ၣ်ညါအီၤဘၣ် ဃးဆၣ်အတၢ်ဟဲအိၣ်ဖျါထီၣ်အဆၢကတီၢ်အသိးန့ၣ်လီၤ.

17လၢကျဲဒ်အံၤ, တၢ်လၢယွၤစံးတ့ၢ်ဝဲခီဖျိဝံယံးရမံယၤန့ၣ်, လၢထီၣ်ပှဲၤထီၣ်ဝဲလီၤ.

18“တၢ်ကလုၢ်သီၣ်ထီၣ်လၢရၤမါ,

တၢ်ကအုကစွါဒီးတၢ်ဟီၣ်တၢ်ယၢၤဖးဒိၣ်အသီၣ်,

နီၢ်ရၤဃ့လးဟီၣ်တၢ်ယၢၤတၢ်လၢအဖိတဖၣ်အဃိ,

ဒီးတပျဲတၢ်မၤမုာ်ထီၣ်အီၤဘၣ်. အဂ့ၢ်ဒ်အံၤ အဖိတဖၣ်သံဝဲလံ” (ယံး. ၃၁:၁၅).

တၢ်ဟဲက့ၤလၢကီၢ်အဲၤကူပတူး

19တုၤစီၤပၤဟ့ၤရိာ်သံဝံၤအလီၢ်ခံဒီးယွၤအကလူးတဂၤလီၣ်ဖျါ ထီၣ်အသးလၢစီၤယိၤသးလၢကီၢ်အဲၤကူပတူးအပူၤခီဖျိတၢ်မံမီၢ်ဒီးစံး, 20“ဂဲၤဆၢထၢၣ်, ကိးထီၣ်ဖိသၣ်ဒီးအမိၢ်ဒီးက့ၤက့ၤဆူအံၣ်စရ့လး အထံအကီၢ်တက့ၢ်. အဂ့ၢ်ဒ်အံၤ ပှၤတဖၣ်လၢအဃုမၤသံဖိသၣ်န့ၣ်သံဝဲလံ.” 21စီၤယိၤသးကိးထီၣ်ဖိသၣ်ဒီးအမိၢ်ဝံၤ, က့ၤက့ၤဝဲဆူအံၣ်စရ့လးအကီၢ်ပူၤလီၤ.

22ဘၣ်ဆၣ်ဒီးတုၤစီၤယိၤသးနၢ်ဟူလၢစီၤအၢ်ဃ့လးပၢတၢ်လၢအပၢ် စီၤဟ့ၤရိာ်အလီၢ်လၢကီၢ်ယူဒၤဒီးအဝဲအသူၣ်ပျံၤသးဖုးလၢ ကလဲၤဝဲဖဲန့ၣ်သတးဒီး, ဒ်အဘၣ်တၢ်ဒုးပလီၢ်အသးအါထီၣ် ခီဖျိတၢ်မံမီၢ်န့ၣ်, လဲၤဝဲဆူကီၢ်ကၤလံၤလါအပူၤ 23ဒီးအိၣ်ဆိးဝဲလၢဝ့ၢ်နစၤရ့းလီၤ. လၢကျဲဒ်အံၤ ဝံတဖၣ်အတၢ်ကတိၤလၢ အစံး, “ခရံာ်ကဘၣ်တၢ်ကိးအီၤလၢပှၤနစၤရ့းဖိ” န့ၣ်လၢထီၣ်ပှဲၤထီၣ်ဝဲလီၤ.

Currently Selected:

လံာ်မးသဲ 2: KSWC

Highlight

Copy