လံာ်မၤလကံ 3
3
1ယွၤသ့တၢ်လၢာ်စံးဆၢဝဲ, “ယကဆှၢလီၤယပှၤစိာ်တၢ်ကစီၣ်ဒ်သိးကကတဲာ်ကတီၤကျဲလၢယဂီၢ် လီၤ. တုၤနုၤတစု, ယွၤလၢသုဃုအီၤန့ၣ်ကဟဲသတူၢ်ကလာ်ဆူအတၢ်လုၢ် ဟံၣ်လီၤ. ပှၤစိာ်တၢ်ကစီၣ်လၢသုဆၢထံၣ်ဘၣ်အီၤန့ၣ်ကဟဲဒီးစံးဘၣ်တဲ ဘၣ်ယတၢ်အၢၣ်လီၤအီလီၤန့ၣ်လီၤ.”
2ဘၣ်ဆၣ်ဒီး, မုၢ်တနံၤလၢအဝဲဟဲန့ၣ်မ့ၢ်မတၤတူၢ်ကကဲန့ၣ်လဲၣ်. ဒီးတုၤအဝဲအိၣ်ဖျါထီၣ်န့ၣ်မ့ၢ်မတၤကပူၤဖျဲးန့ၣ်လဲၣ်. အဝဲကလီၤဂာ်ဒ်ပှၤဆှုၣ်တၢ်အချါသိမ့ၢ်ဂ့ၤ, ဒ်မ့ၣ်အူလၢအမၤကဆှီ, တိၢ်ဒီးထးတဖၣ်မ့ၢ်ဂ့ၤန့ၣ်လီၤ. 3ဒီးကဟဲဝဲဒ်သိးကစံၣ်ညီၣ်တၢ်လီၤဂာ်ဒီးပှၤတဂၤလၢအမၤ စီဒီးမၤကဆှီထီၣ်စ့န့ၣ်လီၤ. ဒ်ပှၤသိတၢ်ဖိတဂၤမၤကဆှီထီၣ်စ့ ဒီးထူအသိးန့ၣ်, ယွၤအပှၤစိာ်တၢ်ကစီၣ်ကမၤကဆှီထီၣ်ပှၤလုၢ်တၢ် အခိၣ်တဖၣ်, ဒ်သိးအဝဲသ့ၣ်ကဟဲစိာ်တၢ်လုၢ်လၢအဘၣ် ဆူယွၤအအိၣ်န့ၣ်လီၤ. 4တုၤနုၤတစု, တၢ်လုၢ်တဖၣ်လၢပှၤလၢကီၢ်ယူဒၤဒီးဝ့ၢ်ယရူၤၡလ့ၣ် ဟဲစိာ်ဆူယွၤအအိၣ်န့ၣ်, ကမ့ၢ်တၢ်လၢအဘၣ်အသးဒ်လၢညါ အသိးန့ၣ်လီၤ.
5ယွၤသ့တၢ်လၢာ်စံးဝဲ, “ယကလီၣ်ဖျါထီၣ်ယသးလၢသုကျါလၢယကစံၣ်ညီၣ်တၢ်, ဒီးယကအုၣ်ယသးတကီၢ်ခါထီဒါပှၤလၢအမၤကဒါပှၤမဲာ်, ထီဒါပှၤအဲၣ်ဘၢမါအဲၣ်ဘၢဝၤ, ထီဒါပှၤအုၣ်အသးကဘျံးကဘျၣ်, ပှၤလၢအလီန့ၢ်ပှၤမၤတၢ်ဖိလၢအဘူးအလဲတဖၣ်အပူၤ, ဒီးပှၤလၢအဟံးန့ၢ်တၢ်ခွဲးတၢ်ယာ်လၢပှၤမုၣ်ကမဲ, ပှၤဖိၣ်ဃဲတဖၣ်ဒီးပှၤတခီဘီမုၢ်ဖိတဖၣ် အဖီခိၣ်ဒီးထီဒါကယဲၢ်ပှၤလၢအတယူးယီၣ်ပာ်ကဲဘၣ်ယၤတဖၣ် န့ၣ်လီၤ.
တၢ်ဟ့ၣ်တၢ်ဆံဆဲၣ်ပူတပူ
6ဒီးယဲဒၣ်အံၤယမ့ၢ်ယွၤ, ဒီးယတကဒံကဒါဘၣ်. မၤသးဒ်န့ၣ်ဒီးသုဝဲ, ပှၤလၢအဟဲလီၤစၢၤလီၤသွဲၣ်လၢစီၤယၤကိာ်သ့ၣ်ဧၢ, သုတတုၤဘၣ်လၢတၢ်ဟးဂူာ်ဟးဂီၤဘၣ်. 7ဒ်သုမိၢ်ပၢ်ဖံဖုလၢပျၢၤလၢသုမဲာ်ညါသ့ၣ်တဖၣ်အသိး, သုဃၣ်ကွံာ်သုသးလၢယတၢ်သိၣ်တၢ်သီဒီးတတိၢ်န့ၢ်ဘၣ်အီၤဘၣ်. ဟဲက့ၤဆူယအိၣ်တက့ၢ်. ဒီးယကဟဲက့ၤဆူသုအိၣ်န့ၣ်လီၤ. ဘၣ်ဆၣ်သုသံကွၢ်, ‘ပကဟဲက့ၤကဒါက့ၤဒ်လဲၣ်.’ 8ဒီးယသံကွၢ်သု, ပှၤတဂၤကလီကစၢ်ယွၤန့ၣ်, မ့ၢ်အဘၣ်ကစီဒီဧါ. တဘၣ်ဘၣ်. ဒီးအန့ၣ်ဒၣ်လဲာ်သုလီယၤလီၤ. ဒီးသုသံကွၢ်, ‘ပလီနၤဒ်လဲၣ်.’ လၢတၢ်ဆံဆဲၣ်ပူတပူဒီးတၢ်မၤဘူၣ်မၤတီၢ်တဖၣ်န့ၣ်လီၤ. 9တၢ်ဆိၣ်အၢအိၣ်လၢသုဝဲခဲလၢာ်အဖီခိၣ်မ့ၢ်လၢပှၤဒီကလုာ်လီ န့ၢ်ယၤအဃိလီၤ. 10ဟဲစိာ်သုတၢ်ဆံဆဲၣ်ပူတပူပှဲၤထီၣ်ပှဲၤထီဆူတၢ်လုၢ်ဟံၣ်, ဒ်သိးတၢ်အီၣ်တၢ်အီကအိၣ်အါအါဂီၢ်ဂီၢ်ဖဲန့ၣ်တက့ၢ်. မၤကွၢ်ယၤဒီးသုကထံၣ်ဘၣ်လၢယကအိးထီၣ်မူခိၣ်အပဲတြီ တဖၣ်ဒီးလူလီၤကယဲၢ်တၢ်ဂ့ၤခဲလၢာ်လၢသုဖီခိၣ်တုၤအပှဲၤ လုၣ်ကွံာ်ဒၣ်လဲာ်န့ၣ်လီၤ. 11ယတပျဲတၢ်ဖိဃၢ်တဖၣ်မၤဟးဂီၤသုတၢ်မုၢ်တၢ်ဘိဘၣ်, ဒီးသုစပံးမုၢ်တဖၣ်အသၣ်တလီၤဆှုဘၣ်ဝဲဘၣ်. 12တုၤနုၤတစု, ကယဲၢ်ပှၤကလုာ်ခဲလၢာ်ကကိးသုလၢပှၤဘၣ်ဆိၣ်ဂ့ၤ, မ့ၢ်လၢသုထံသုကီၢ်ကမ့ၢ်တၢ်လီၢ် အမုာ်လၢတၢ်အိၣ်တၢ်ဆိးအဂီၢ်အဃိန့ၣ်လီၤ.”
ကစၢ်ယွၤအတၢ်အၢၣ်လီၤလၢအဘၣ်ထွဲဒီးတၢ်သးကညီၤ
13ယွၤစံးဝဲဒၣ်, “သုစံးတ့ၢ်လံတၢ်တဂ့ၤထီဒါယၤလီၤ.” ဘၣ်ဆၣ်ဒီးသုစံး “ပကတိၤတၢ်ထီဒါနၤလၢမနုၤလဲၣ်.” 14သုစံးတ့ၢ်သုဝဲ, “ပမၤယွၤအတၢ်န့ၣ်အဘျုးတအိၣ်ဘၣ်. တၢ်မၤထွဲတၢ်လၢအဝဲစံးမ့ၢ်ဂ့ၤ, ကျဲးစၢးပာ်ဖျါဆူယွၤသ့တၢ်လၢာ်လၢပသးအုးလၢတၢ်လၢပမၤဘၣ် တ့ၢ်အီၤအဃိန့ၣ်အဘျုးမနုၤကအိၣ်န့ၣ်လဲၣ်. 15ဒ်ပထံၣ်တ့ၢ်လံအသိးန့ၣ်, ပှၤလၢအပာ်ထီၣ်ထီအသးတဖၣ်န့ၣ်မ့ၢ်ပှၤ လၢအဘၣ်ဆိၣ်ဂ့ၤန့ၣ်လီၤ. ပှၤတတီတလိၤတဖၣ်တမ့ၢ်ထဲအဘီၣ် ထီၣ်ညီထီၣ်ဘၣ်. မ့မ့ၢ်, အဝဲသ့ၣ်မၤကွၢ်ကစၢ်ယွၤအတၢ်သးစူၤလၢအတၢ်မၤအအၢ အသီတဖၣ်ဒီးလူၤပိာ်ထွဲဝဲအခံန့ၣ်လီၤ.”
16တုၤနုၤတစု, ပှၤလၢအပျံၤယွၤန့ၣ်စံးလိာ်အသးတဂၤဒီးတဂၤ, ဒီးယွၤဒိကနၣ်, ဒီးနၢ်ဟူတၢ်လၢအဝဲသ့ၣ်စံးဝဲဒၣ်န့ၣ်လီၤ. လၢအဝဲအမဲာ်ညါန့ၣ်, တၢ်ကွဲးနီၣ်အိၣ်ကွဲးလီၤအသးလၢလံာ်တဘ့ၣ် အပူၤဘၣ်ထွဲဒီးပှၤလၢအပျံၤယွၤဒီးယူးယီၣ်ပာ်ကဲအီၤန့ၣ်လီၤ. 17ယွၤသ့တၢ်လၢာ်စံးဝဲ, “အဝဲသ့ၣ်ကမ့ၢ်ယပှၤဂီၢ်မုၢ်” န့ၣ်လီၤ. ဒီးမုၢ်တနံၤလၢယပာ်ဖှိၣ်ယတၢ်လုၢ်ဒိၣ်ပှ့ၤဒိၣ်န့ၣ်အဝဲသ့ၣ်ကကဲ ထီၣ်တၢ်လုၢ်ဒိၣ်ပှ့ၤဒိၣ်လၢယဂီၢ်လီၤ. ယကအိၣ်ဒီးတၢ်သးကညီၤအဝဲသ့ၣ်, ဒ်ပၢ်သးကညီၤအဖိခွါလၢအမၤအတၢ်အသိးန့ၣ်လီၤ. 18တုၤနုၤတစု, ယပှၤဂီၢ်မုၢ်ကထံၣ်ဘၣ်တၢ်လီၤဆီလၢအမၤအ သးလၢပှၤတီပှၤလိၤဒီးပှၤတတီတလိၤ, ပှၤလၢအမၤယတၢ်ဒီးပှၤလၢ အတမၤယတၢ်အဘၢၣ်စၢၤန့ၣ်လီၤ.”
Currently Selected:
လံာ်မၤလကံ 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
