လံာ်မၤလကံ 1
1
1အအံၤမ့ၢ်တၢ်ကစီၣ်လၢယွၤဟ့ၣ်လီၤဝံမၤလကံဒ်သိးကတဲ ဘၣ်ပှၤအံၣ်စရ့လးဖိန့ၣ်လီၤ.
ယွၤအတၢ်အဲၣ်ပှၤအံၣ်စရ့လးဖိ
2ဒီးယွၤစံးဘၣ်အပှၤဂီၢ်မုၢ်, “ယအဲၣ်သုထီဘိလီၤ.” ဘၣ်ဆၣ်ဒီးအဝဲသ့ၣ်စံးဆၢဝဲ, “နဒုးနဲၣ်နတၢ်အဲၣ်ပှၤဒ်လဲၣ်.” ယွၤစံးဆၢဝဲ, “စီၤဧ့ၡီၤဒီးစီၤယၤကိာ်မ့ၢ်ပှၤဒီပုၢ်ဝဲၢ်, ဘၣ်ဆၣ်ယအဲၣ်စီၤယၤကိာ်ဒီးအစၢၤအသွဲၣ်တဖၣ်လီၤ. 3ဒီးယသးဟ့စီၤဧ့ၡီၤဒီးအစၢၤအသွဲၣ်တဖၣ်လီၤ. ယဒုးအိၣ်သယုၢ်အကစၢၢ်ကလိဒီးဒုးကဲထီၣ် အတၢ်အိၣ်တၢ်ဆိးအလီၢ်လၢပှၢ်မုၢ်ကနၢလီၤ.”
4စီၤဧ့ၡီၤအစၢၤအသွဲၣ်လၢအမ့ၢ်ပှၤအဒိၣ်ဖိမ့ၢ်စံးဝဲ, “ပခူပဝ့ၢ်တဖၣ်ဘၣ်တၢ်မၤဟးဂီၤအီၤဘၣ်ဆၣ် ပကဘှီထီၣ်ကဒါက့ၤအီၤလီၤ.” ဒီး, ယွၤကစံးဆၢဝဲ, “မ်အဝဲသ့ၣ်ဘှီထီၣ်ကဒါက့ၤတက့ၢ်. ဒီးယကမၤလီၤပှီၢ်ကွံာ်ကဒီးတဘျီလီၤ. ဒီးပှၤကကိးအဝဲသ့ၣ်လၢ, ထံကီၢ်လၢအအၢအသီဒီးပှၤဂီၢ်မုၢ်လၢယွၤသးထီၣ်ဘၣ်အီၤလီၤ စိၤလီၤထီလီၤ.”
5အံၣ်စရ့လးအပှၤဂီၢ်မုၢ်ကထံၣ်ဘၣ်တၢ်အံၤလၢအမဲာ်ချံဒၣ်ဝဲတဖၣ်, ဒီးအဝဲသ့ၣ်ကစံးဝဲ, “ယွၤန့ၣ်ဒိၣ်ဝဲလၢအံၣ်စရ့လးအကီၢ်အချၢဒၣ် လဲာ်လီၤ.”
ယွၤအတၢ်သိၣ်က့ၤသီက့ၤ ပှၤလုၢ်တၢ်အခိၣ်တဖၣ်
6တၢ်သုးမုၢ်ဂီၢ်မုၢ်အယွၤစံးဘၣ်ပှၤလုၢ်တၢ်အခိၣ်တဖၣ်ဒ်အံၤ, “ဖိခွါမၤလၤကပီၤအပၢ်, ဒီးတၢ်ခ့တၢ်ပှၤမၤလၤကပီၤအကစၢ်လီၤ. ယဲဒၣ်အံၤယမ့ၢ်သုပၢ်လီၤ, ဘၣ်မနုၤအဃိသုတမၤလၤကပီၤယၤလဲၣ်. ယဲဒၣ်အံၤယမ့ၢ်သုကစၢ်, ဘၣ်မနုၤအဃိသုတပာ်ကဲယၤလဲၣ်. သုမၤတရီတပါယၤဒီးသုသံကွၢ်, ပမၤတရီတပါနၤဒ်လဲၣ်.” 7ဒီးသုမၤတရီတပါယၤ, ခီဖျိသုလုၢ်ထီၣ်တၢ်အီၣ်လၢတကြၢးတဘၣ်လၢယတၢ်လုၢ်လီၢ်အဖီခိၣ် လီၤ. ဒီးသုသံကွၢ်, “ပတပာ်ကဲနၤဒ်လဲၣ်.” ဒီးယကတဲဘၣ်သု, သုတပာ်ကဲယၤခီဖျိသုဒုးနဲၣ်ဖျါတၢ်သးဘၣ်အၢလၢယတၢ်လုၢ်လီၢ် အဖီခိၣ်န့ၣ်လီၤ. 8တုၤသုဟဲစိာ်ဆၣ်ဖိကီၢ်ဖိလၢအမဲာ်ဘျီၣ်မ့ၢ်ဂ့ၤ, တဆူၣ်တချ့မ့ၢ်ဂ့ၤ, အစုအခီၣ်ဟးဂီၤမ့ၢ်ဂ့ၤ, ဒ်သိးသုကလုၢ်ထီၣ်ဆူယၤဒီး, မ့ၢ်သုဆိကမိၣ်လၢတၢ်န့ၣ်တမ့ၢ်တၢ်လီၤသးဘၣ်အၢဘၣ်န့ၣ်ဧါ. ဟ့ၣ်ဆၣ်ဖိကီၢ်ဖိဒ်န့ၣ်သိးဆူပဒိၣ်ဖးဒိၣ်အအိၣ်တက့ၢ်. မ့ၢ်အဝဲကဘၣ်အသးလၢနၤစ့ၢ်ကီးဧါ. ဒီးကကွၢ်မဲာ်နၤတမံၤမံၤစ့ၢ်ကီးဧါ.
9ခဲကနံၣ်အံၤပှၤလုၢ်တၢ်အခိၣ်သ့ၣ်ဧၢ, ဃ့ကညးယွၤဒ်သိးအကသးကညီၤသုတက့ၢ်. အဝဲတစံးဆၢဘၣ်သုတၢ်ထုကဖၣ်ဘၣ်, ဒီးတၢ်န့ၣ်ကမ့ၢ်သုတၢ်ကမၣ်လီၤ. 10တၢ်သုးမုၢ်ဂီၢ်မုၢ်အယွၤစံးဝဲ, “ယအဲၣ်ဒိးပှၤလၢသုကျါတဂၤကကးတံာ်ဃာ်တၢ်လုၢ်ဟံၣ် အတြဲၤတဖၣ်ဒ်သိးကတြီဃာ်သုလၢတၢ်မၤကဲၤထီၣ်မ့ၣ်အူလၢ အဘျုးတအိၣ်ဘၣ်လၢယတၢ်လုၢ်လီၢ်အဖီခိၣ်န့ၣ်လီၤ. ယတဘၣ်သူၣ်ဘၣ်သးသုဘၣ်. ဒီးယတတူၢ်လိာ်တၢ်လုၢ်တၢ်ပာ်လၢသုဟဲစိာ်န့ၢ်ယၤန့ၣ်ဘၣ်. 11ပှၤဂီၢ်မုၢ်လၢမုၢ်ထီၣ်တခီပၢၢ်တုၤလၢမုၢ်နုာ်တခီမၤလၤကပီၤယၤလီၤ. ဒီးအဝဲသ့ၣ်ကဆိၣ်ကဲၤတၢ်နၢမူလၢယဂီၢ်လၢတၢ်လီၢ်ကိးပူၤဒဲးဒီး ကလုၢ်တၢ်လုၢ်ကဆှီလၢယဂီၢ်လီၤ. အဝဲသ့ၣ်ခဲလၢာ်မၤလၤကပီၤယၤလီၤ. 12ဘၣ်ဆၣ်ဒီးသုမၤတရီတပါယၤခီဖျိ သုစံးလၢယတၢ်လုၢ်လီၢ်အဘျုးတအိၣ်ဘၣ်, ဒီးခီဖျိသုလုၢ်ထီၣ် တၢ်အီၣ်လၢယသးဘၣ်အၢတဖၣ်အဃိန့ၣ်လီၤ. 13သုစံး, ‘တၢ်ဘှံးပသးလၢတၢ်တဖၣ်အံၤအဃိဒိၣ်မးလဲၣ်,’ ဒီးသုတပာ်ကဲဘၣ်ယၤဘၣ်. သုဟဲစိာ်ဆၣ်ဖိကီၢ်ဖိလၢသုဟုၣ် န့ၢ်အီၤမ့ၢ်ဂ့ၤ, ဘၣ်ဆူးဘၣ်ဆါမ့ၢ်ဂ့ၤ, အစုအခီၣ်ဟးဂီၤမ့ၢ်ဂ့ၤ ဆူယအိၣ်လီၤ. မ့ၢ်သုဆိကမိၣ်လၢယကတူၢ်လိာ်တၢ်ဒ်န့ၣ် အသိးလၢသုအိၣ်ဧါ. 14ဒီးပှၤလၢအအၢၣ်လီၤအသးလၢကလုၢ်ထီၣ်ဆၣ်ဖိကီၢ်ဖိလၢ အဂ့ၤဘၣ်ဆၣ်လုၢ်ထီၣ်ဆၣ်ဖိကီၢ်ဖိလၢတဂိာ်တသီၣ်န့ၣ်မ့ၢ် ပှၤလီတၢ်ဒီးဘၣ်ဆိၣ်အၢဝဲလီၤ. အဂ့ၢ်ဒ်အံၤ, မ့ၢ်စီၤပၤဖးဒိၣ်ဒီး ပှၤကလုာ်ခဲလၢာ်ပျံၤယၤလီၤ.”
Currently Selected:
လံာ်မၤလကံ 1: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
