လံာ်စီၤယိၤဘး တၢ်ကတိၤဆှၢနုာ်
တၢ်ကတိၤဆှၢနုာ်
လံာ်စီၤယိၤဘးန့ၣ်မ့ၢ်တၢ်ဃဲၤပူလၢအဘၣ်ဃးဒီးပှၤအဂ့ၤအဝါ လၢအတူၢ်ဘၣ်တၢ်ကီတၢ်ခဲလၢာ်လၢာ်ဆ့တဂၤအဂ့ၢ်န့ၣ်လီၤ. အဝဲအဖိခဲလၢာ်ဒီးအစုလီၢ်ခီၣ်ခိၣ်သ့ၣ်တဖၣ်လီၤမၢ်ကွံာ်ဝဲ, ဒီးဘၣ်တၢ်ဆူးတၢ်ဆါလၢအလီၤသးဘၣ်အၢန့ၣ်လီၤ. လၢတၢ်ကတိၤသကိးလိာ်သးလၢထါအကျိာ်သၢဘျီလၢအပိာ်လိာ်အခံ အပူၤန့ၣ်ပှၤကွဲးလံာ်ပာ်ဖျါထီၣ်စီၤယိၤဘးအတံၤသကိးတဖၣ်, ဒီးစီၤယိၤဘးအကစၢ်ဒၣ်ဝဲကွၢ်ဆၢၣ်မဲာ်တၢ်နးတၢ်ဖှီၣ်သ့ၣ်တဖၣ် အံၤဒ်လဲၣ်န့ၣ်လီၤ. လၢခံကတၢၢ်ကစၢ်ယွၤအကစၢ်ဒၣ်ဝဲလၢအမၤဘၣ် ထွဲအသးဒီးပှၤဟီၣ်ခိၣ်ဖိ, လၢအမၤန့ၢ်တ့ၢ်တၢ်လီၢ်အကါဒိၣ်လၢတၢ်ကတိၤသကိးအပူၤန့ၣ်, လီၣ်ဖျါထီၣ်အသးဆူစီၤယိၤဘးန့ၣ်လီၤ.
စီၤယိၤဘးအတံၤသကိးသ့ၣ်တဖၣ်တဲဖျါအတၢ်နးတၢ်ဖှီၣ်လၢ တၢ်ဘူၣ်တၢ်ဘါအကျိာ်ဒ်ပှၤစံၣ်ဃဲၤတဲဃဲၤညီနုၢ်အသိးန့ၣ်လီၤ. ဒ်ကစၢ်ယွၤထီဘိဆိၣ်ဂ့ၤပှၤဂ့ၤဒီးသိၣ်ဃီၣ်ပှၤအၢပှၤသီအသိး န့ၣ် အဝဲသ့ၣ်နာ်ဝဲလၢစီၤယိၤဘးအတၢ်နးတၢ်ဖှီၣ်န့ၣ်ကမ့ၢ်ဒၣ်လၢ အမၤတၢ်ဒဲးဘးအဃိန့ၣ်လီၤ. မ့မ့ၢ်လၢစီၤယိၤဘးအဂီၢ်တခီ တၢ်မၤအသးအံၤမ့ၢ်တၢ်ဘၣ်အီၤတတီလၢအဂီၢ်န့ၣ်လီၤ. အဂ့ၢ်ဒ်အံၤအဝဲမ့ၢ်တ့ၢ်ပှၤတဂၤလၢအဂ့ၤအဝါလီၤဆီ, ဒီးပှၤအတီအလိၤန့ၣ်လီၤ. ပှၤဒ်သိးဒီးအီၤတဂၤအံၤကစၢ်ယွၤ ကပျဲတၢ်အၢတၢ်သီဒိၣ်ဒိၣ်ကလဲာ်လီၤဘၣ်အီၤန့ၣ်အဝဲနၢ်ပၢၢ်ဝဲ တသ့ဘၣ်. ဒီးအဝဲတၤကစၢ်ယွၤဒူဒူလီၤ. စီၤယိၤဘးအတၢ် နာ်တလီၤမၢ်ကွံာ်ဝဲဒၣ်ဘၣ်. မ့မ့ၢ်အဝဲဆၢမုၢ်လၢ်ဝဲလၢကဘၣ် တၢ်ပာ်တီပာ်လိၤအီၤလၢကစၢ်ယွၤအမဲာ်ညါဒီးကဒိးန့ၢ်ဘၣ် က့ၤအလၤကပီၤဒ်ပှၤအဂ့ၤအဝါတဂၤအသိးန့ၣ်လီၤ.
ကစၢ်ယွၤတဟ့ၣ်တၢ်စံးဆၢလၢစီၤယိၤဘးအတၢ်သံကွၢ်တဖၣ် အဂီၢ်န့ၣ်ဘၣ်. မ့မ့ၢ်အဝဲစံးဆၢက့ၤစီၤယိၤဘးအတၢ်နာ်ခီဖျိတၢ် လုၣ်ဘၢအီၤလၢအစိအကမီၤဒီးအတၢ်ကူၣ်သ့လၢထါအကျိၤ အကွာ်န့ၣ်လီၤ. အန့ၣ်ဒီးလၢတၢ်ဆီၣ်လီၤသးအပူၤစီၤယိၤဘး အၢၣ်လီၤဝဲလၢကစၢ်ယွၤအံၤမ့ၢ်ပှၤလၢအကူၣ်သ့ဒီးပှၤအဒိၣ်အမုၢ် တဂၤန့ၣ်လီၤ. ဒီးအဝဲပီၢ်ယၢ်လီၤက့ၤအသးလၢအတၢ်ကတိၤ အအၢအသီဒီးအတၢ်ကတိၤလၢသူၣ်ဒိၣ်သးဖျိး, လၢအစံး တ့ၢ်ဝဲတဖၣ်အဃိန့ၣ်လီၤ.
ထါအကတၢၢ်ကွဲးနီၣ်ကွဲးဃါစီၤယိၤဘးဒိးန့ၢ်ဘၣ်က့ၤတၢ် အိၣ်ဒီးအီၤဒ်လၢညါအသိးဒ်လဲၣ်. ဒီးအတၢ်ဘီၣ်တၢ်ညီ ဒိၣ်န့ၢ်အါန့ၢ်ဒံးလၢညါဒၣ်လဲာ်အဂ့ၢ်န့ၣ်လီၤ. ကစၢ်ယွၤပာ်ဒ့ၣ်ပာ်ကမၣ်ဒီးဒူစီၤယိၤဘးအတံၤသကိးသ့ၣ် တဖၣ်လၢအဝဲသ့ၣ်တနၢ်ပၢၢ်စီၤယိၤဘးအတၢ်နးတၢ်ဖှီၣ်ဘၣ် အဃိန့ၣ်လီၤ. ထဲစီၤယိၤဘးတဂၤဧိၤသ့ၣ်ညါလၢကစၢ်ယွၤ န့ၣ်ဒိၣ်န့ၢ်ဒံးတၢ်ဘူၣ်တၢ်ဘါအတၢ်စံၣ်ဃဲၤတဲဃဲၤပာ်ဖျါတ့ၢ် အီၤတက့ၢ်န့ၣ်လီၤ.
လံာ်အတကွီၣ်
တၢ်ကတိၤလၢညါ ၁:၁-၂:၁၃
စီၤယိၤဘးဒီးအတံၤသကိးသ့ၣ်တဖၣ် ၃:၁-၃၁:၄၀
က. စီၤယိၤဘးအတၢ်ကဒူးကဒ့ၣ် ၃:၁-၂၆
ခ. တၢ်ကတိၤသကိးလိာ်သးအခီၣ်ထံးတဘျီ ၄:၁-၁၄:၂၂
ဂ. တၢ်ကတိၤသကိးလိာ်သးခံဘျီတဘျီ ၁၅:၁-၂၁:၃၄
ဃ. တၢ်ကတိၤသကိးလိာ်သးသၢဘျီတဘျီ ၂၂:၁-၂၇:၂၃
င. တၢ်စံးထီၣ်ပတြၢၤတၢ်ကူၣ်သ့ ၂၈:၁-၈
စ. စီၤယိၤဘးအတၢ်တဲဖျါလၢခံကတၢၢ် ၂၉:၁-၃၁:၄၀
ယွၤစံးဆၢစီၤယိၤဘး ၃၈:၁-၄၂:၆
တၢ်ကတိၤကဒါက့ၤတၢ်ဂ့ၢ်စှၤဘီ ၄၂:၇-၁၇
Currently Selected:
လံာ်စီၤယိၤဘး တၢ်ကတိၤဆှၢနုာ်: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.