လံာ်စီၤယိၤဘး 9
9
1-2ဒီးစီၤယိၤဘးစံးဆၢဝဲဒၣ်, မ့ၢ်လံယသ့ၣ်ညါလၢတၢ်အံၤ မ့ၢ်ဝဲတီဝဲလီၤ. ဘၣ်ဆၣ်ဒီးပှၤကညီကတီဝဲလိၤဝဲလၢ ကစၢ်ယွၤအမဲာ်ညါဒ်လဲၣ်.
3မ့ၢ်မတၤကတိၤဂ့ၢ်လိာ်တၢ်ဒီးအီၤကသ့တဂၤန့ၣ်လဲၣ်. အဝဲသံကွၢ်တၢ်သံကွၢ်လၢအကထိလၢပှၤစံးဆၢကသ့တအိၣ် နီတဂၤဘၣ်န့ၣ်လီၤ.
4ကစၢ်ယွၤန့ၣ်ကူၣ်ဘၣ်ကူၣ်သ့ဒီးအစိအကမီၤဒိၣ်နီၢ်မးန့ၣ်လီၤ. ပှၤထီဒါအီၤတန့ၢ်နီတဂၤဘၣ်.
5လၢတၢ်တတဲပလီၢ်ပာ်စၢၤအပူၤအဝဲသုးကွံာ်ကစၢၢ်ကလိ တဖၣ်ဒီးလၢတၢ်သးထီၣ်အပူၤမၤဟးဂီၤကွံာ်အဝဲသ့ၣ်န့ၣ်လီၤ.
6ကစၢ်ယွၤမၤဟူးဝးဟီၣ်ခိၣ်ဒီးဟီၣ်ခိၣ်ဟူးဝးဝဲဒီးမၤဝးတၢ် အထူၣ်တဖၣ်လၢအယိးဃာ်ဟီၣ်ခိၣ်န့ၣ်လီၤ.
7အဝဲတြီဃာ်မုၢ်ဒ်သိး အသုတဟဲထီၣ်တဂ့ၤဒီး ဆၣ်တဖၣ်ဒ်သိး သုတကပီၤထီၣ်လၢ မုၢ်နၤခီတဂ့ၤ န့ၣ်သ့ဝဲလီၤ.
8အဝဲမ့ၢ်ပှၤထဲတဂၤဧိၤလၢသလၣ်ထီၣ်မူကပိာ်လိၤဒီးမၤနၢၤပီၣ် လဲၣ်အလပီသ့ၣ်တဖၣ်န့ၣ်လီၤ.
9အဝဲမ့ၢ်ပှၤလၢအတ့ဆၣ်ကဆီ, ဆၣ်ယိးမါ, ဆၣ်ဒၢမုၢ်ဒီး ဆၣ်အဒၢးလၢကလံၤထံးတခီန့ၣ်လီၤ.
10အဝဲမၤတၢ်ဒိၣ်တၢ်ထီလၢပှၤကနၢ်ပၢၢ်အီၤတသ့ဒီးတၢ်လီၤ လးတဖၣ်လၢပှၤကဂံၢ်အီၤတသ့ဘၣ်ဒၣ်လဲာ်န့ၣ်လီၤ.
11ဖဲအဝဲလဲၤခီပတာ်ယၤန့ၣ်ဘၣ်ဆၣ်ယထံၣ်န့ၢ်အီၤတသ့ဘၣ်.
12အဝဲဟံးထီၣ်ကွံာ်တၢ်လၢအသးလီဝဲဒီးပှၤတြီအီၤတသ့ နီတဂၤဘၣ်န့ၣ်လီၤ. ပှၤသံကွၢ်အီၤလၢ, “နမၤတၢ်မနုၤလဲၣ်” န့ၣ်တဘူၣ်နီတဂၤဘၣ်န့ၣ်လီၤ.
13ကစၢ်ယွၤအတၢ်သးထီၣ်န့ၣ်မ့ၢ်တၢ်တထံၣ်ဃီလီၤ. အဝဲမၤသဘှံးကွံာ်အဒုၣ်အဒါတဖၣ်, ပှၤလၢအမၤစၢၤပီၣ်လဲၣ်ပယိၤရၤဃးထီဒါအီၤန့ၣ်လီၤ.
14မၤသးဒ်န့ၣ်ဒီးမ့ၢ်ယကစံးဆၢက့ၤကစၢ်ယွၤလၢတၢ်ကတိၤဒ် လဲၣ်တဖၣ်လဲၣ်.
15ယမ့ၢ်တီမ့ၢ်လိၤဘၣ်ဆၣ်ဒီးတၢ်လၢယမၤသ့ခဲလၢာ်န့ၣ်မ့ၢ်ဒၣ် ယတၢ်ဃ့တၢ်သူၣ်ကညီၤသးကညီၤလၢကစၢ်ယွၤ, ယပှၤစံၣ်ညီၣ်ကွီၢ်န့ၣ်လီၤ.
16အဝဲမ့ၢ်ပျဲယစံးကတိၤတၢ်ဒၣ်လဲာ်အဝဲကဒိကနၣ်ယၤန့ၣ် ယနာ်တသ့ဘၣ်န့ၣ်လီၤ.
17လၢတၢ်ဂ့ၢ်တၢ်ကျိၤတအိၣ်ဘၣ်နီတမံၤအပူၤအဝဲဆှၢလီၤကလံၤ မုၢ်တဖၣ်လၢကတီၢ်ယၤဒီးမၤသဘှံးယၤလီၤ.
18အဝဲတပျဲယချူးန့ၢ်ယတၢ်သါဒီးမၤပှဲၤတ့ၢ်လံယတၢ်အိၣ်မူ လၢတၢ်နးတၢ်ဖှီၣ်နးနးကလဲာ်လံန့ၣ်လီၤ.
19မ့ၢ်ယကြၢးသူ တၢ်စုဆူၣ်ခီၣ်တကးဧါ. တၢ်စုဆူၣ်ခီၣ်တကးလၢ ကစၢ်ယွၤအဖိခိၣ်န့ၣ်ဧါ. မ့ၢ်ယကြၢးလိာ်ဘၢလိာ်ကွီၢ်အီၤန့ၣ်ဧါ. မတၤမၢအဝဲလဲၤကသ့တဂၤလဲၣ်.
20ယမ့ၢ်တီမ့ၢ်လိၤဒၣ်လဲာ်ယထးခိၣ်ကစံၣ်ညီၣ်က့ၤယၤ, ယမ့ၢ်ပှၤလၢတၢ်ပာ်တၢ်ကမၣ်အလီၢ်တအိၣ်ဘၣ်ဆၣ်အဝဲကပာ် ဖျါဝဲဒၣ်လၢယမ့ၢ်ပှၤလၢအလူၤယသးဒၣ်ယဲန့ၣ်လီၤ.
21ယတၢ်ကမၣ်မ့ၢ်တအိၣ် ဒၣ်လဲာ်န့ၣ်, ယတကိၢ်တၢ်လၢ ယဂီၢ်ဒၣ်ယဲဘၣ်. ယသးဘၣ်အၢလီၤက့ၤယတၢ်အိၣ်မူဒၣ်ယဲလီၤ.
22လၢတၢ်န့ၣ်အဃိ, ယစံးလၢမ့ၢ်ဒၣ်တၢ်ဒ်သိးသိးခဲလၢာ်လီၤ. အဝဲမၤဟးဂီၤကွံာ်ပှၤလၢ တၢ်ပာ်တၢ်ကမၣ်အလီၢ်တအိၣ်ဒီး ပှၤတတီတလိၤန့ၣ်လီၤ.
23ဖဲနီၣ်ဖျ့ဟဲစိာ်တၢ်သံသတူာ်ကလာ်န့ၣ်အဝဲ ဒုၣ်ဒွဲၣ်ပှၤလၢအတၢ်ကမၣ်တအိၣ်အတၢ်သးဟးဂီၤန့ၣ်လီၤ.
24ကစၢ်ယွၤဟ့ၣ်လီၤဟီၣ်ခိၣ်ဆူပှၤတတီတလိၤအစုပူၤန့ၣ်လီၤ. မၤဘျီၣ်ကွံာ်ပှၤစံၣ်ညီၣ်ကွီၢ်သ့ၣ်တဖၣ်အမဲာ်လီၤ. ကစၢ်ယွၤမ့ၢ် တမၤတၢ်အံၤဘၣ်ဒီးမ့ၢ်မတၤမၤလဲၣ်.
25ယမုၢ်နံၤမုၢ်သီတဖၣ်လဲၤပူၤကွံာ်ဝဲချ့သဒံးန့ၣ်လီၤ. ယူၤထီၣ်ကွံာ်ဝဲဒီးတထံၣ်တၢ်ဂ့ၤနီတမံၤဘၣ်.
26ယတၢ်အိၣ်မူလဲၤပူၤကွံာ်ဝဲ ဒ်ကဘီတဘ့ၣ်လၢ အလဲၤတၢ်ချ့သဒံး, ချ့ဝဲထဲသိးလံာ်ကြီကြာ်တဘ့ၣ် စှီၤန့ၢ်ပဒဲ တဒုအသိးန့ၣ်လီၤ.
27ယမ့ၢ်စံး, ယကသးပ့ၤနီၣ်ကွံာ်ယတၢ်ကအုကစွါ, ယကလဲလိာ်ယတၢ်ပာ်မဲာ်ပာ်နါဒီး နံၤကမှံထီၣ်ဒီး 28ယပျံၤဒံးဒၣ်ယတၢ်နးတၢ်ဖှီၣ်တဖၣ်, မ့ၢ်လၢယသ့ၣ်ညါ လၢနတပျၢ်ယတၢ်ကမၣ်ဒံးဘၣ်အဃိန့ၣ်လီၤ.
29မ့ၢ်လၢယတၢ်ကမၣ် ဘၣ်တၢ်စၢဃာ်အီၤ အဃိဒီး ဘၣ်မနုၤယဘၣ်မၤတံာ်တာ်ယသးန့ၣ်လဲၣ်.
30ချါသိသ့စီကွံာ်ယတၢ်ဒဲးဘးတဖၣ်တန့ၢ်ဘၣ်.
31ကစၢ်ယွၤတ့ၢ်လီၤယၤဆူ တၢ်ဘၣ်အၢဘၣ်သီအပူၤ, ဒီးယကူယသိးတဖၣ်ဒၣ်လဲာ်မဲာ်ဆှံးယၤန့ၣ်လီၤ.
32ကစၢ်ယွၤမ့မ့ၢ်ပှၤကညီသၢပျၢၤယစံးဆၢအီၤကသ့ဒီးပလဲၤဆူ ကွီၢ်ဘျီၣ်ဒီးဆိကမိၣ်ပတၢ်အ့ၣ်လိာ်ကသ့ဝဲဒၣ်န့ၣ်လီၤ.
33ဘၣ်ဆၣ်ပှၤကဆၢထၢၣ်လၢပဘၢၣ်စၢၤတအိၣ်နီတဂၤ, ပှၤလၢကစံၣ်ညီၣ်ကစၢ်ယွၤဒီးယၤ တအိၣ်နီတဂၤဘၣ်.
34ကစၢ်ယွၤဧၢ, ဆိကတီၢ်ကွံာ်နတၢ်သိၣ်ဃီၣ်ယၤန့ၣ်တက့ၢ်. ပာ်နတၢ်မၤပျံၤမၤဖုးတဖၣ်လၢအယံၤန့ၣ်တက့ၢ်.
35ယတပျံၤတၢ်ဘၣ်. မ့ၢ်လၢယသ့ၣ်ညါယသးဒၣ်ယဲအဃိ ယကစံးကတိၤတၢ်လီၤ.
Currently Selected:
လံာ်စီၤယိၤဘး 9: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
