လံာ်စီၤယိၤဘး 32
32
စီၤအလံဟူၤအတၢ်ကတိၤတဖၣ်
(၃၂:၁-၃၇:၂၄)
1မ့ၢ်လၢစီၤယိၤဘးဆိကမိၣ်ဝဲလၢအတီဝဲလိၤဝဲလၢအမဲာ်ညါ ဒၣ်ဝဲဒ်အံၤသတးဒီး, ပှၤသၢဂၤန့ၣ်ဆိကတီၢ်အတၢ်ကျဲးစၢးကတိၤဆၢ စီၤယိၤဘးန့ၣ်လီၤ.
2ဘၣ်ဆၣ်ဒီးပှၤဘူစးဖိဘၣ်ဃးဒီးစီၤရၣ်အဒူၣ်ဖိထၢဖိစီၤဘၤ ရက့လးအဖိခွါစီၤအလံဟူၤလၢအဆၢထၢၣ်ဖဲ တၢ်ကပၤန့ၣ် ပၢၤဃာ်အသးတန့ၢ်လၢၤဘၣ်. အဝဲအသးထီၣ်စီၤယိၤဘးမ့ၢ်လၢစီၤယိၤဘးပာ်တီပာ်လိၤအသး ဒိၣ်န့ၢ်ကစၢ်ယွၤအဃိန့ၣ်လီၤ.
3အဝဲအသးထီၣ်စ့ၢ်ကီးစီၤယိၤဘးအတံၤသကိးသၢဂၤန့ၣ်လီၤ. အဝဲသ့ၣ်တထံၣ်န့ၢ်ကျဲ နီတဘိလၢ ကစံးဆၢစီၤယိၤဘးအဂီၢ်ဘၣ် ဒီး တၢ်အံၤဖျါမၤအသးဒ်သိး ကစၢ်ယွၤမၤကမၣ်တၢ်န့ၣ်လီၤ.
4မ့ၢ်လၢစီၤအလံဟူၤမ့ၢ်ပှၤသးစၢ်ကတၢၢ်အဃိအဝဲအိၣ်ခိးတ့ၢ် ဝဲတုၤပှၤကိးဂၤဒဲးစံးကတိၤတၢ်ဝံၤဝဲန့ၣ်လီၤ.
5ဒီးတုၤအထံၣ်ဝဲလၢပှၤသၢဂၤကတိၤဆၢက့ၤစီၤယိၤဘးတသ့ ဘၣ်န့ၣ်ဒီးအဝဲအသးဒိၣ်ထီၣ်ဝဲ,
6ဒီးစးထီၣ်ကတိၤတၢ်န့ၣ်လီၤ. ယသးစၢ်ဒံးဒီးသုဝဲသ့ၣ်သုသး ပှၢ်တ့ၢ်လံ. လၢတၢ်န့ၣ်အဃိယအိၣ်ဒီးတၢ်ဘၣ်ယိာ်လၢယကတဲ သုယတၢ်ဆိကမိၣ်န့ၣ်လီၤ.
7ယဆိကမိၣ်လၢသုကြၢးစံးကတိၤတၢ်, ဒီးသုဝဲပှၤသးပှၢ် တဖၣ်ကြၢးနီၤလီၤသုတၢ်ကူၣ်သ့န့ၣ်လီၤ.
8ဘၣ်ဆၣ်တၢ်အံၤမ့ၢ်ယွၤသ့တၢ်လၢာ်ကစၢ်အသးလၢအဟဲ ဆူပှၤကညီတဖၣ်အအိၣ်ဒီးဟ့ၣ်အီၤလၢတၢ်ကူၣ်သ့န့ၣ်လီၤ.
9တမ့ၢ်ထဲပှၤသးပှၢ်တဖၣ်မ့ၢ်ပှၤအကူၣ်တၢ်သ့ဒီးပှၤအနံၣ်အါ လါအါတဖၣ်ဧိၤနၢ်ပၢၢ်တၢ်အဘၣ်န့ၣ်ဘၣ်.
10မၤသးဒ်န့ၣ်ဒီးခဲကနံၣ်အံၤယစံး, ဒိကနၣ်ယၤဒီးပျဲယတဲ သုလၢယတၢ်ဆိကမိၣ်စ့ၢ်ကီးတက့ၢ်.
11ဖဲသုကတိၤတၢ်န့ၣ်ယဒိကနၣ်လၢတၢ်သူၣ်စူၤသးစူၤအပူၤဒီး ဖဲသုဃုတၢ်ကူၣ်သ့အတၢ်ကတိၤအကတီၢ်န့ၣ်ယအိၣ်ခိးယဲလီၤ.
12ယဒိကနၣ်သုတၢ်ကတိၤလီၤတံၢ်လီၤဆဲးန့ၣ်လီၤ. ဘၣ်ဆၣ်ဒီး, ပှၤလၢသုကျါလၢအဒုးနဲၣ်ဖျါထီၣ်စီၤယိၤဘး အတၢ်ကမၣ်မ့ၢ်ဂ့ၤ, ပှၤလၢအကတိၤဆၢက့ၤစီၤယိၤဘး အတၢ်ကတိၤမ့ၢ်ဂ့ၤတအိၣ်ဘၣ်နီတဂၤဘၣ်.
13သုစံးလီၤသုသးလၢ သုထံၣ်န့ၢ်တၢ်ကူၣ်သ့, ကသ့ဒ်လဲၣ်. ကစၢ်ယွၤကဘၣ်စံးဆၢ စီၤယိၤဘး, မ့ၢ်လၢသုမၤတသ့ဘၣ်အဃိန့ၣ်လီၤ.
14စီၤယိၤဘးတပညိၣ်ဃီၤအတၢ်ကတိၤထီဒါတဖၣ်ဆူယအိၣ်ဘၣ်. မ့ၢ်ဆူသုအိၣ်န့ၣ်လီၤ. ဒီးယတကတိၤဆၢဘၣ်အီၤဒ်သုတၢ်ကတိၤတဖၣ်အသိးန့ၣ်ဘၣ်.
15စီၤယိၤဘးဧၢ, အဝဲသ့ၣ်တဖၣ်အသးလီၤကတုၤဒီးကတိၤ ဆၢနၤတဘၣ်လၢၤဘၣ်. အဝဲသ့ၣ်အတၢ်ကတိၤတအိၣ်လၢၤဘၣ် လၢကကတိၤတၢ်အဂီၢ်ဘၣ်.
16မ့ၢ်ယကဘၣ်အိၣ်ခိးဒံးယဲဖဲအဝဲသ့ၣ်အိၣ်ဘှီၣ်အခါန့ၣ်ဧါ. အဝဲသ့ၣ်ဂဲၤဆၢထၢၣ်ဖဲန့ၣ်ဒီးတကတိၤလၢၤတၢ်နီတမံၤဘၣ်.
17ယကဟ့ၣ်စ့ၢ်ကီးယတၢ်ကတိၤခဲအံၤဒီးယကတဲနၤယတၢ် ဆိကမိၣ်န့ၣ်လီၤ.
18အဂ့ၢ်ဒ်အံၤ, တၢ်ကတိၤတဖၣ်အိၣ်ပှဲၤလၢယပူၤ, ဒီးသးလၢယပူၤ မၤဆူၣ်ယၤလီၤ.
19ယမ့ၢ်တန့ၢ်ဘၣ်တၢ်ခွဲးတၢ်ယာ်လၢယကကတိၤဘၣ်တၢ်န့ၣ်ဒီး ယကပိၢ်ဖးကွံာ်ဝဲဒ်ထၢၣ်တၢ်ဖံးတဖျၢၣ်လၢအပှဲၤဝဲဒီးစပံးထံအ သီအသိးန့ၣ်လီၤ.
20ယကဘၣ်ကတိၤတၢ်ဒ်သိးယကထံၣ်န့ၢ်တၢ်မၤမုာ်ယၤ, ယကဘၣ်အိးထီၣ်ယနိးဖံးဒီးကတိၤဆၢတၢ်န့ၣ်လီၤ.
21ယတပာ်ဖျါထီၣ်တၢ်ကွၢ်မဲာ်ဆူပှၤတဂၤဂၤမ့ၢ်ဂ့ၤ, စံးထီၣ်ပတြၢၤထးခိၣ်ဖံးလာ်ပှၤတဂၤဂၤမ့ၢ်ဂ့ၤန့ၣ်ဘၣ်.
22အဂ့ၢ်ဒ်အံၤ, ယမ့ၢ်အိၣ်ဒီး တၢ်သ့တၢ်ဘၣ်လၢ တၢ်စံးထီၣ်ပတြၢၤထးခိၣ်ဖံးလာ်ပှၤအဂၤန့ၣ်, ပှၤတ့လီၤယၤကစိာ်ထီၣ်ကွံာ်ယၤချ့သဒံးန့ၣ်လီၤ.
Currently Selected:
လံာ်စီၤယိၤဘး 32: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
