လံာ်စီၤယိၤဘး 21
21
1-2ဒီးစီၤယိၤဘးစံးဆၢဝဲဒၣ်, ဒိကနၣ်ယတၢ်ကတိၤတဖၣ်လီၤ တံၢ်လီၤဆဲးတက့ၢ်. အဝဲန့ၣ်ကမ့ၢ်တၢ်မၤမုာ်ထီၣ်က့ၤလၢသု ဟ့ၣ်ယၤန့ၣ်လီၤ.
3ပျဲယကကတိၤတၢ်တက့ၢ်. မ့ၢ်ဝံၤန့ၣ်သုသးမ့ၢ်အိၣ်ဒီးကတိၤ ဒုၣ်ဒွဲၣ်တၢ်တက့ၢ်.
4ယဲဒၣ်အံၤယဂ့ၢ်လိာ်ဘှီလိာ်ဒီးပှၤကညီစ့ၢ်ကီးဧါ. ယအိၣ်ဒီးတၢ်အဂ့ၢ်အခၢးလၢ အဂ့ၤလၢ ယသု တသးစူၤတဂ့ၤလီၤ.
5ကွၢ်ယၤ, ဒီးကမၢကမၣ်တက့ၢ်. ကးတံာ်သုထးခိၣ် ဒီးသုစုန့ၣ်တက့ၢ်.
6တုၤယဆိကမိၣ်ထီၣ်ယဲတၢ်မၤတ့ၢ်လံအသးဒီးယၤန့ၣ်ယသး လီၤကတုၤ, ဒီးယကနိးကစုာ်ဒီးဟူးဝးယဲဒၣ်န့ၣ်လီၤ.
7ကစၢ်ယွၤပျဲပှၤတၢ်ဒဲးဘးဖိတဖၣ်မူဝဲ, သးပှၢ်ထီၣ်ဝဲဒီးဘီၣ် ထီၣ်ညီထီၣ်န့ၣ်ဘၣ်မနုၤလဲၣ်.
8အဝဲသ့ၣ်အိၣ်ဒီးအဖိတဖၣ်ဒီးအလံၤတဖၣ်ဒီး အိၣ်မူလၢကထံၣ်ဘၣ်အဝဲသ့ၣ်အတၢ်ဒိၣ်ထီၣ်န့ၣ်လီၤ.
9ကစၢ်ယွၤတဟဲစိာ်တၢ်ဟးဂူာ်ဟးဂီၤဆူအဟံၣ်တဖၣ်န့ၣ်ဘၣ်. အဝဲသ့ၣ်တအိၣ်မူဘၣ်လၢတၢ်ပျံၤတၢ်ဖုးအပူၤနီတဘျီဘၣ်.
10အဂီၤဖံးဖါတဖၣ်အချံအသၣ်ဂ့ၤဝဲဒီးအဂီၤဖံးမိၢ်တဖၣ်ဖှံလီၤ ဒီးအဟုးတဟးဂီၤဘၣ်.
11အဖိအလံၤတဖၣ်ဃ့ၢ်ဒီးလိာ်ကွဲဝဲဒ်သိဖိတဖၣ်အသိး,
12ဒီးဂဲၤကလံၣ်လၢတၢ်သးဝံၣ်အိၣ်ဃုာ်ဒီးတနၢ်ဒီးပံအသီၣ် န့ၣ်လီၤ.
13မၤလၢာ်အမုၢ်နံၤတဖၣ်လၢတၢ်ဘီၣ်တၢ်ညီအပူၤဒီးလဲၤလီၤ ဆူပျူၤပူၤမုာ်မုာ်ခုၣ်ခုၣ်လီၤ.
14ပှၤတတီတလိၤစံးဘၣ်ကစၢ်ယွၤ, ဟးထီၣ်ကွံာ်လၢပအိၣ်တက့ၢ်. တၢ်သ့ၣ်ညါနကျဲဧိၤကပူၤဧိၤန့ၣ်တဘၣ်ဘၣ်ပသးဘၣ်.
15အဝဲသ့ၣ်ဆိကမိၣ်ဝဲလၢအလီၢ်တအိၣ်လၢကမၤကစၢ်ယွၤအတၢ် မၤမ့ၢ်ဂ့ၤ, အဘျူးတအိၣ်လၢကဘါထုကဖၣ်တၢ်ဆူယွၤအအိၣ် မ့ၢ်ဂ့ၤန့ၣ်ဘၣ်.
16အဝဲသ့ၣ်စံးဝဲလၢအမၤနၢၤတၢ်န့ၣ်မ့ၢ်လၢအဂံၢ်အဘါဒၣ်ဝဲ, ဘၣ်ဆၣ်ဒီးအဝဲသ့ၣ်အတၢ်ဆိကမိၣ်အကျဲန့ၣ်ယတူၢ်လိာ် တသ့ဘၣ်.
17ပှၤတတီတလိၤအမ့ၣ်အူဒၢန့ၣ်ဘၣ်တၢ်မၤလီၤပံာ်အီၤတစုစုဧါ. မ့ၢ်အဝဲသ့ၣ်ဘၣ်ကွၢ်ဆၢၣ်မဲာ်ဒီးတၢ်နးတၢ်ဖှီၣ်တဂၤဂၤဧါ. မ့ၢ်ကစၢ်ယွၤစံၣ်ညီၣ်ပှၤတတီတလိၤလၢတၢ်သးဒိၣ်အပူၤ,
18ဒီးအူဖျိးကွံာ်အဝဲသ့ၣ်လီၤဂာ်ဒ်လီၢ်ဧိၤဒံးဧိၤလၢကလံၤအ ကျါမ့ၢ်ဂ့ၤ, ဒ်ဖ့လၢကလံၤမုၢ်စိာ်ကွံာ်အီၤအသိးမ့ၢ်ဂ့ၤတဘျီဘျီ ဧါ.
19သုစံးသုဝဲလၢကစၢ်ယွၤစံၣ်ညီၣ်ဖိတဂၤလၢအပၢ်အတၢ်ဒဲးဘး တဖၣ်အဃိန့ၣ်လီၤ. တမ့ၢ်ဘၣ်. မ်ကစၢ်ယွၤစံၣ်ညီၣ်ပှၤတၢ်ဒဲး ဘးဖိတဖၣ်ဒၣ်ဝဲ, ဒီးပာ်ဖျါထီၣ်လၢအမၤတၢ်အံၤမ့ၢ်လၢအဝဲ သ့ၣ်အတၢ်ဒဲးဘးတဖၣ်အဃိန့ၣ်တက့ၢ်.
20မ်အမဲာ်ကထံၣ်ဘၣ်အတၢ်ဟးဂီၤဒၣ်ဝဲဒီးမ်အအီဘၣ်သ့တၢ် လၢာ်ကစၢ်ယွၤအတၢ်သးထီၣ်န့ၣ်တက့ၢ်.
21တုၤပှၤတဂၤအတၢ်အိၣ်မူကတၢၢ်ကွံာ်ဝဲဒၣ်န့ၣ်ဒီးမ့ၢ်အဘၣ်ယိာ် တၢ်လၢအဟံၣ်ဖိဃီဖိလၢအအိၣ်လီၤတဲာ်တဖၣ်အဂီၢ်ကသ့ဒံးဧါ.
22ကစၢ်ယွၤလၢအစံၣ်ညီၣ်ဒၣ်လဲာ်ပှၤအိၣ်လၢတၢ်လီၢ်ထီၣ်ထီတဖၣ် န့ၣ်ပှၤတဂၤဂၤသိၣ်လိအီၤလၢတၢ်သ့ၣ်ညါဘၣ်ကသ့ဧါ.
23ပှၤတနီၤအိၣ်ဆူၣ်အိၣ်ချ့လၢလၢပှဲၤပှဲၤတုၤမုၢ်တနံၤလၢအသံ ဝဲန့ၣ်လီၤ.
24အဝဲသ့ၣ်သံဝဲမုာ်မုာ်ခုၣ်ခုၣ်ဒီးမံသူၣ်မံသးလီၤ.
25ပှၤအဂၤတနီၤတၢ်သးဖှံတအိၣ်ဒီးအီၤနီတစုဘၣ်. အိၣ်မူဒီးသံဝဲဃုာ်ဒီးတၢ်သးဆါန့ၣ်လီၤ.
26ဘၣ်ဆၣ်ပှၤခဲလၢာ်သံဒီးဘၣ်တၢ်ခူၣ်လီၤကွံာ်အီၤဒ်သိးသိး, ဒီးလၢၢ်ဧိၤဆှးဧိၤမၤဘၢအဝဲသ့ၣ်လီၤ.
27ကွၢ်ကွၢ်, ယသ့ၣ်ညါသုတၢ်ဆိကမိၣ်, ဒီးတၢ်လၢသုကူၣ်ထီၣ် တၢ်တတီတလိၤထီဒါယၤလီၤ.
28အဂ့ၢ်ဒ်အံၤသုစံး, ပဒိၣ်ဖးဒိၣ်တဖၣ်အဟံၣ်န့ၣ်မ့ၢ်အအိၣ်ဖဲလဲၣ်. ဒီးပှၤတတီတလိၤတဖၣ်အအိၣ်တၢ်အလီၢ်န့ၣ်မ့ၢ်အအိၣ်ဖဲလဲၣ်.
29မ့ၢ်သုတကတိၤတၢ်ဒီးပှၤလဲၤတၢ်ဖိတဖၣ်န့ၣ်ဘၣ်ဧါ. မ့ၢ်သုတသ့ၣ်ညါတၢ်ဂ့ၢ်လၢအဝဲသ့ၣ်ဟဲက့ၤစိာ်ဝဲဘၣ်ဧါ.
30လၢမုၢ်တနံၤလၢကစၢ်ယွၤအသးဒိၣ်ထီၣ်ဒီးစံၣ်ညီၣ်တၢ်န့ၣ်ပှၤ တတီတလိၤတပူၤဖျဲးဝဲထီဘိန့ၣ်ဘၣ်ဧါ.
31ပှၤလၢအကဆှိးအီၤမ့တမ့ၢ်ကဟ့ၣ်ဆၢတၢ်လၢ အဝဲမၤတ့ၢ်ဝဲန့ၣ်, တအိၣ်နီတဂၤဘၣ်.
32တုၤအဝဲဘၣ်တၢ်စိာ်လီၤအီၤဆူအတၢ်သွၣ်ခိၣ်, အတၢ်သွၣ် ခိၣ်လၢအဘၣ်တၢ်ခိးကွၢ်အီၤဂ့ၤဂ့ၤန့ၣ်.
33ပှၤအကထိတဖၣ်လဲၤပိာ်ထွဲဝဲတၢ်လဲၤစိာ်လီၤအီၤ, ဆူတၢ်သွၣ်ခိၣ်ဒီးဟီၣ်ခိၣ်ဘၣ်တၢ်ဖှံလီၤအီၤ ကယီလီလၢ အစိၣ်အဖီခိၣ်လီၤ.
34ဒီးသုဝဲသ့ၣ်, သုကျဲးစၢးမၤမုာ်ယၤ လၢတၢ်ကတိၤကလီကလီလီၤ. တၢ်စံးဆၢကိးထံၣ်လၢ သုဟ့ၣ် ထီၣ်မ့ၢ်တၢ်လီတၢ်ဝ့ၤလီၤ.
Currently Selected:
လံာ်စီၤယိၤဘး 21: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
