လံာ်စီၤယိၤဘး 13
13
1-2တၢ်ခဲလၢာ်လၢသုစံးန့ၣ်ယနၢ်ဟူတ့ၢ်လၢညါန့ၣ်လံ, ယနၢ်ပၢၢ်တၢ်တဖၣ်န့ၣ်ခဲလၢာ်လီၤ. ယသ့ၣ်ညါတၢ်ထဲသိးသိးဒီးသုသ့ၣ်ညါန့ၣ်လီၤ. ယတလီၤတိၢ်ဘၣ်န့ၢ်သုဘၣ်.
3ဘၣ်ဆၣ်ယသးအိၣ်ကတိၤတၢ်ဒီးသ့တၢ်လၢာ်ကစၢ်ယွၤလီၤ. ဒီးယသးအိၣ်ကတိၤဂ့ၢ်လိာ်တၢ်ဒီးအီၤဘၣ်ဃးယတၢ်ဂ့ၢ်တၢ် ကျိၤန့ၣ်လီၤ.
4သုတၢ်တနူၤပၢၢ်နၢ်ဘှါန့ၣ်သုမၤဘံၣ်မၤဘၢအီၤလၢတၢ်ကဘျံး ကဘျၣ်လီၤ. သုလီၤဂာ်ဒီးကသံၣ်သရၣ်တဖၣ်လၢအတဂိာ်တသီၣ် ဘၣ်တၢ်န့ၣ်လီၤ.
5အိၣ်ဘှီၣ်ကလာ်တက့ၢ်. ဒီးပှၤကဆိကမိၣ်လၢသုမ့ၢ်ပှၤကူၣ်သ့ ကူၣ်ဘၣ်န့ၣ်လီၤ.
6ဒိကနၣ်တၢ်ဖဲယပာ်ဖျါထီၣ်ယတၢ်ဂ့ၢ်တၢ်ကျိၤန့ၣ်တက့ၢ်.
7ဘၣ်မနုၤလၢသုကတိၤကဘျံးကဘျၣ်တၢ်န့ၣ်လဲၣ်. မ့ၢ်သုဆိကမိၣ် လၢသုတၢ်လီတၢ်ဝ့ၤတဖၣ်န့ၣ်ကမၤဘျူးမၤဖှိၣ်ကစၢ်ယွၤစ့ၢ်ကီးဧါ.
8မ့ၢ်သုဂုာ်ကျဲးစၢးလၢသုကဒီဒၣ်အိၣ်ပှိၤအီၤဧါ. မ့ၢ်သုကလိာ်ကွီၢ်လၢအဂီၢ်န့ၣ်ဧါ.
9တုၤမ့ၢ်ကစၢ်ယွၤကွၢ်ထံသုဒီးမ့ၢ်ကထံၣ်န့ၢ်တၢ်ဂ့ၤတမံၤမံၤဧါ. မ့ၢ်သုဆိကမိၣ်လၢသုမၤပျူၢ်ကစၢ်ယွၤဒ်သုမၤပျူၢ်ပှၤကညီအဂၤ တဖၣ်အသိးကသ့န့ၣ်ဧါ.
10သုတၢ်ပာ်သူၣ်ပာ်သးတတီတလိၤန့ၣ်သုမ့ၢ်မၤဘံၣ်မၤဘၢအီၤဒၣ် လဲာ်အဝဲကသိၣ်ဃီၣ်သုသပှၢ်တၢၢ်လီၤ.
11ဒီးအတၢ်စိတၢ်ကမီၤကမၤပှဲၤသုလၢတၢ်ပျံၤတၢ်ဖုးန့ၣ်လီၤ.
12သုတၢ်ကတိၤဒိတဖၣ်န့ၣ်တဂိာ်တသီၣ်ဘၣ်တၢ်ဒ်ဖၣ်ဆါအသိးန့ၣ်လီၤ. နတၢ်ကတိၤလိာ်ကွီၢ်တဖၣ်န့ၣ်လီၤကလဲဝဲဒ်ဟီၣ်ခိၣ်ကပံာ်အသိး န့ၣ်လီၤ.
13အိၣ်ဘှီၣ်ကလာ်ဒီးပျဲယကတိၤတၢ်တက့ၢ်. ဒီးကွၢ်ဖဲတၢ်မိၣ်မၤ အသးန့ၣ်ကမၤဒၣ်ဝဲအသးတက့ၢ်.
14ယအိၣ်ကတဲာ်ကတီၤယသးလၢ တၢ်သံခ့သံပှၤအဂီၢ်လီၤ.
15ကယဲၢ်ယတၢ်မုၢ်လၢ်ခဲလၢာ်န့ၣ်လီၤမၢ်ကွံာ်, ကစၢ်ယွၤမ့ၢ် မၤသံယၤဒီးကဘၣ်တၢ်မနုၤလဲၣ်. ယကပာ်ဖျါထီၣ်ယတၢ်ဂ့ၢ် လၢအီၤလီၤ.
16ယတၢ်သူၣ်ဒူသးဒူကမ့ၢ်ဒၣ်လဲာ်တၢ်လၢအအုၣ်က့ၤ ခီၣ်က့ၤယၤ, မ့ၢ်လၢဖဲလၢပှၤတတီတလိၤကွၢ်ဆၢၣ်မဲာ် ကစၢ်ယွၤလၢတၢ်သူၣ်ဒူသးဒူတဘူၣ်ဘၣ်နီတဂၤအဃိန့ၣ်လီၤ.
17ဒိကနၣ်လၢ်ယတၢ်ကတိၤလီၤတံၢ်လီၤဆဲးဒီးနၢ်ဟူယတၢ် ကတိၤဖျါထီၣ်တၢ်န့ၣ်တက့ၢ်.
18ယအိၣ်ကတဲာ်ကတီၤယသးလၢယကပာ်ဖျါထီၣ်ယတၢ်ဂ့ၢ် တၢ်ကျိၤန့ၣ်လီၤ. အဂ့ၢ်ဒ်အံၤယသ့ၣ်ညါလၢယအိၣ်လၢ တၢ်အဘၣ်တခီန့ၣ်လီၤ.
19ကစၢ်ယွၤဧၢ, မ့ၢ်နဟဲလၢနကပာ်တၢ်ကမၣ်လၢယလိၤန့ၣ်ဧါ. မ့မ့ၢ်ဒ်န့ၣ်ဒီးယအိၣ်ကတဲာ်ကတီၤယသးလၢယကအိၣ်ဘှီၣ်ဒီး သံန့ၣ်လီၤ.
20ဒီးပျဲယဃ့နၤလၢတၢ်ခံမံၤဒီးအၢၣ်လီၤယၤတက့ၢ်. ဒီးယကပာ်ဖျါယသးလၢနၤလီၤ.
21ဆိကတီၢ်နတၢ်သိၣ်ဃီၣ်ယၤ, ဒီးမၤလီၤကလဲယၤလၢနတၢ် မၤပျံၤမၤဖုးတဂ့ၤ.
22ကစၢ်ယွၤဧၢ, ကတိၤဆိနဲလၢညါဒီးယကစံးဆၢနၤလီၤ. မ့တမ့ၢ်ဘၣ်ဒီးပျဲယကတိၤတၢ်ဒီးစံးဆၢလၢ်ယၤတက့ၢ်.
23ယတၢ်ဒဲးဘးတဖၣ်န့ၣ်မ့ၢ်မနုၤလဲၣ်. ယမၤကမၣ်တ့ၢ်တၢ်မနုၤ တဖၣ်လဲၣ်. တၢ်ပာ်ဒ့ၣ်ပာ်ကမၣ်ယၤလၢ ယလုၢ်သ့ၣ်ခါပတာ် တၢ်သိၣ်တၢ်သီမနုၤတဖၣ်န့ၣ်လဲၣ်.
24ဘၣ်မနုၤလၢနပာ်ခူသူၣ်နမဲာ်ဒီးပာ်ယၤဒ်နဒုၣ်နဒါတဂၤအသိးန့ၣ် လဲၣ်.
25နဂုာ်ကျဲးစၢးမၤပျံၤမၤဖုးယၤဧါ. ယတမ့ၢ်တၢ်နီတမံၤဘၣ်. ယမ့ၢ်ဒၣ်သ့ၣ်လၣ်အူဖိတဘ့ၣ်န့ၣ်လီၤ. နထီဒါလီၢ်ဃ့ဖိတဖၣ်န့ၣ် လီၤ.
26နဟ့ၣ်လီၤတၢ်စံၣ်ညီၣ်အကလုၢ်ထီဒါယၤန့ၣ် မ့ၢ်တၢ်လၢအနး ဒိၣ်မးတုၤဒၣ်လဲာ်လၢတၢ်လၢယမၤတ့ၢ်အီၤဖဲယသးစၢ်အခါ အဂီၢ်န့ၣ်လီၤ.
27နကျီၤဃာ်ယခီၣ်လၢသိးဧိၤကျိၤဧိၤအပူၤဒီးနကွၢ်ယခီၣ်ခါလၢ ယကါထီၣ်ကိးခါဒဲးဒီးနဃုသ့ၣ်ညါယခီၣ်လီၢ်တဖၣ်ဒၣ်လဲာ်န့ၣ် လီၤ.
28လၢခံကတၢၢ်န့ၣ်ဒီးယလီၤကလဲကွံာ်ဒ်သ့ၣ်လၢအကျၣ်ကွံာ်အသိး, ဒ်ဆ့ကၤလၢတၢ်အဃၣ်အီၣ်ကွံာ်အီၤအသိးန့ၣ်လီၤ.
Currently Selected:
လံာ်စီၤယိၤဘး 13: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
