လံာ်စီၤယိၤဘး 11
11
1-2ဒီးပှၤနၤမးဖိစီၤစိဖၢ်စံးဆၢဝဲဒၣ်, တၢ်ကတိၤတဂီာ်တသီၣ် ဘၣ်တၢ်ဘၣ်န့ၣ်မ့ၢ်ပှၤတစံးဆၢဘၣ်အီၤနီတဂၤန့ၣ်ဘၣ်ဧါ. မ့ၢ်တၢ်ကတိၤတၢ်အါဘီန့ၣ်ပာ်ပှၤကညီလၢတၢ်အဘၣ်ကစီ ဒီဧါ.
3စီၤယိၤဘးဧၢ, မ့ၢ်နဆိကမိၣ်လၢပစံးဆၢနၤတသ့ဘၣ် ဒီးနတၢ်ကတိၤဒုၣ်ဒွဲၣ်တၢ်န့ၣ်တဒုးစံးဒုးကတိၤလၢၤပှၤတၢ်ဘၣ် န့ၣ်ဧါ.
4နစံးနဲလၢတၢ်လၢနစံးကတိၤအီၤန့ၣ်မ့ၢ်တၢ်မ့ၢ်တၢ်တီ, ဒီးနစံးလၢနစီနဲဆှံနဲလၢကစၢ်ယွၤအမဲာ်ညါန့ၣ်လီၤ.
5ယဆၢယဲလၢကစၢ်ယွၤကစံးဆၢနၤန့ၣ်လီၤ.
6ဒီးအဝဲကတဲနၤလၢတၢ်ကူၣ်ဘၣ်ကူၣ်သ့အတၢ်ခူသူၣ်အိၣ်အါမံၤန့ၣ် လီၤ. အဂ့ၢ်ဒ်အံၤတၢ်အိၣ်ဝဲဒၣ်အါမံၤလၢ အယိာ်ကဲာ်ဆိးလၢ ပှၤကညီကနၢ်ပၢၢ်အီၤအဂီၢ်န့ၣ်လီၤ. ကစၢ်ယွၤစံၣ်ညီၣ်နၤအံၤမ့ၢ်တၢ်စှၤန့ၢ်ဒံးနကြၢးဘၣ်တၢ်စံၣ်ညီၣ် တက့ၢ်န့ၣ်လီၤ.
7မ့ၢ်နဃုထံၣ်သ့ၣ်ညါသ့တၢ်လၢာ်ကစၢ်ယွၤအတၢ်ဒိၣ်ဝဲထီဝဲ ဒီးအစိအကမီၤဘၣ်ကသ့ဧါ.
8တၢ်သ့ၣ်တဖၣ်န့ၣ် ထီန့ၢ်ဒံးမူခိၣ်အလီၢ်တဖၣ်လီၤ. နမၤမနုၤကသ့န့ၣ်လဲၣ် တၢ်သ့ၣ်တဖၣ်န့ၣ် ယိာ်န့ၢ်ဒံး ပျုၤပူၤအတၢ်ယိာ်တဖၣ်လီၤ. နသ့ၣ်ညါမနုၤကသ့လဲၣ်. နကသ့ၣ်ညါနဲဒ်လဲၣ်.
9အတၢ်ထိၣ်န့ၣ်ထီန့ၢ်ဒံးဟီၣ်ခိၣ်ဒီးလဲၢ်န့ၢ်ဒံးပီၣ်လဲၣ်တက့ၢ် န့ၣ်လီၤ.
10ကစၢ်ယွၤမ့ၢ်ဖီၣ်နၤဒီးဟဲစိာ်နၤဆူတၢ်သမံသမိးအလီၢ်န့ၣ်ဒီး မ့ၢ်မတၤအိၣ်ဝဲလၢကဆိကတီၢ်အီၤန့ၣ်လဲၣ်.
11ကစၢ်ယွၤအဝဲသ့ၣ်ညါပှၤလၢအတဧိာ်တသီၣ်တၢ်ဘၣ်တဖၣ်, ဒီးထံၣ်ဝဲအတၢ်ဖံးတၢ်မၤအအၢအသီတဖၣ်န့ၣ်လီၤ.
12ပှၤလၢအမ့ၢ်တၢ်ကလီကလီတဖၣ်ကအိၣ်ထီၣ်ဒီးတၢ်ကူၣ်ဘၣ် ကူၣ်သ့ဖဲကသ့ၣ်ယီၤမံၤအိၣ်ဖျဲၣ်ထီၣ်ကသ့ၣ်ယီၤဒၢန့ၣ်လီၤ.
13စီၤယိၤဘးဧၢ, ပာ်လိၤပာ်ဘၣ်က့ၤနသးတက့ၢ်. ယူာ်ဃီၤနသးဆူကစၢ်ယွၤအအိၣ်န့ၣ်တက့ၢ်.
14တၢ်အၢမ့ၢ်အိၣ်လၢနစုပူၤဒီးကွံာ်တ့ၢ်ကွံာ်ဆူအယံၤတက့ၢ်. ဒီးဒုးအိၣ်ဒုးဆိးတၢ်အၢတၢ်သီလၢနဒဲပူၤတဂ့ၤ.
15တုၤနုၤတစုနကမိာ်ထီၣ်နမဲာ်တအိၣ်ဘၣ်ဒီးတၢ်မဲာ်ဆှးဘၣ်န့ၣ် လီၤ. နကအိၣ်ဆၢထၢၣ်ဂၢၢ်ကျၢၤဒီးနတပျံၤဘၣ်တၢ်ဘၣ်န့ၣ်လီၤ.
16အန့ၣ်ဒီးနကသးပ့ၤနီၣ်နတၢ်ကိၢ်တၢ်ဂီၤခဲလၢာ်, ဒီးနတသ့ၣ်နီၣ်က့ၤလၢၤဘၣ်အီၤဒ်ထံလၢအယွၤလီၤကွံာ် အသိးန့ၣ်လီၤ.
17ဒီးနသးသမူကကပီၤန့ၢ်ဒံးမုၢ်ထူၣ်အတၢ်ကပီၤ ဒီးတၢ်အိၣ်မူအတၢ်ခံးတၢ်နၤအဆၢကတီၢ်တဖၣ်ကပီၤထီၣ် ဒ်မုၢ်ဂီၤထီၣ်အသိးန့ၣ်လီၤ.
18နကအိၣ်မူအိၣ်ဂဲၤလၢတၢ်ပူၤဖျဲးအပူၤဒီးပှဲၤဒီးတၢ်မုၢ်လၢ် န့ၣ်လီၤ. ကစၢ်ယွၤကကဟုဘံၣ်ကယာ်ဘၢနၤဒီးကဟ့ၣ်နၤတၢ် အိၣ်ဘှံးအိၣ်သါန့ၣ်လီၤ.
19နတပျံၤဘၣ်နဒုၣ်နဒါတဖၣ်လၢၤဘၣ်. ပှၤအါဂၤကဃ့နၤလၢတၢ်မၤ စၢၤန့ၣ်လီၤ.
20မ့မ့ၢ်ပှၤတတီတလိၤတဖၣ် ကကွၢ်တၢ်ဝးဝးလၢ တၢ်သးဟးဂီၤအပူၤဒီး ထံၣ်ဘၣ်ဝဲလၢတၢ်ထူၣ်ဖျဲး အဂီၢ်ကျဲတအိၣ်နီတဘိဘၣ်. အဝဲသ့ၣ်အတၢ်မုၢ် လၢ်ထဲတမံၤဧိၤမ့ၢ်ဒၣ်တၢ်သံကဟဲဝဲန့ၣ်လီၤ.
Currently Selected:
လံာ်စီၤယိၤဘး 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
