လံာ်ယိၤဟၣ် 9
9
ယ့ၣ်ၡူးမၤဘျါက့ၤပှၤအိၣ်ဖျဲၣ်မဲာ်ဘျီၣ်တဂၤ
1ဖဲယ့ၣ်ၡူးလဲၤတၢ်အဖၢမုၢ်ဒီး, အဝဲထံၣ်ပှၤတဂၤလၢအမဲာ်ဘျီၣ်လၢအအိၣ်ဖျဲၣ်ထီၣ်လံၤလံၤ န့ၣ်လီၤ. 2အပျဲၢ်အဘီၣ်တဖၣ်သံကွၢ်အီၤ, “သရၣ်ဧၢ, ပှၤတဂၤအံၤအိၣ်ဖျဲၣ်ထီၣ်အမဲာ်ဘျီၣ်န့ၣ်, ဟဲအသးလၢမတၤအတၢ်ဒဲးဘးအဃိလဲၣ်. မ့ၢ်အတၢ်ဒဲးဘးဒၣ်ဝဲဧါ. မ့တမ့ၢ်, မ့ၢ်အမိၢ်အပၢ်အတၢ်ဒဲးဘးအဃိဧါ.”
3ယ့ၣ်ၡူးစံးဆၢတၢ်ဒီးစံးဝဲ, “အဝဲအတၢ်မဲာ်ဘျီၣ်န့ၣ်တဘၣ်ဃးလၢအတၢ်ဒဲးဘးမ့ၢ်ဂ့ၤ, အမိၢ်အပၢ်အတၢ်ဒဲးဘးမ့ၢ်ဂ့ၤန့ၣ်ဘၣ်. မ့ၢ်ဒၣ်လၢကစၢ်ယွၤအစိကမီၤကမၤတၢ်လၢအပူၤ ဒီးကဘၣ်တၢ်ထံၣ်န့ၢ်အီၤအဂီၢ်တခီန့ၣ်လီၤ. 4ဖဲမုၢ်ဆါခီအကတီၢ်အံၤ, ပကဘၣ်မၤပှၤလၢအမၢလီၤယၤ တဂၤအတၢ်မၤလီၤ. မုၢ်နၤကဟဲဝဲဖဲပှၤမၤတၢ်တသ့လၢၤနီ တဂၤဘၣ်. 5ဖဲယအိၣ်ဒံးလၢဟီၣ်ခိၣ်အံၤအပူၤဒီး, ယမ့ၢ်တၢ်ကပီၤလၢဟီၣ်ခိၣ် အဂီၢ်လီၤ.”
6ယ့ၣ်ၡူးကတိၤတၢ်အံၤဝံၤဒီး, အဝဲထူးပှဲာ်လီၤတၢ်လၢဟီၣ်ခိၣ် အလိၤဒီးကၢကပံာ်လၢအထူးပျ့ၤထံဝံၤဒီးပဲလီၤကပံာ်အံၤလၢပှၤ တဂၤအံၤအမဲာ်ချံအလိၤ, 7ဒီးစံးဘၣ်အီၤ, “လဲၤဒီးပျၢ်နမဲာ်လၢနိၣ်ၡံလိၤန့ၣ်တက့ၢ်.” (မံၤဝဲအံၤအခီပညီမ့ၢ်တၢ်မၢလီၤ) အန့ၣ်ဒီးပှၤတဂၤအံၤလဲၤဝဲဒီးပျၢ် အမဲာ်, ဒီးထံၣ်ထီၣ်က့ၤတၢ်ဒီးဟဲက့ၤဝဲလီၤ.
8ထဲန့ၣ်ဒီး, ပှၤလၢအဃၢၤတဖၣ်ဒီးပှၤအဂၤလၢအထံၣ်တ့ၢ် အဝဲဃ့အီၣ်တၢ်လၢညါတဖၣ်သံကွၢ်တၢ်ဒီးစံးဝဲ, “အဝဲအံၤတမ့ၢ်ပှၤတဂၤဃီလၢအညီနုၢ်ဆ့ၣ်နီၤဒီးဃ့အီၣ်တၢ် န့ၣ်ဘၣ်ဧါ.”
9ပှၤတနီၤစံးဝဲ, “မ့ၢ်အဝဲလီၤ.” ဘၣ်ဆၣ်အဂၤတနီၤစံးဝဲ, “တမ့ၢ်အဝဲဘၣ်. မ့ၢ်ပှၤလၢအလီၤဂာ်ဒီးအီၤတခီလီၤ.” အန့ၣ်ဒီး အဝဲအကစၢ်ဒၣ်ဝဲစံး, “ယမ့ၢ်ပှၤအဝဲန့ၣ်လီၤ.”
10အဝဲသ့ၣ်သံကွၢ်အီၤ, “နထံၣ်ထီၣ်က့ၤတၢ်အခဲအံၤန့ၣ်, ဟဲအသးလၢကျဲဒ်လဲၣ်.”
11အဝဲဒၣ်စံးဆၢဝဲ, “ပှၤလၢပှၤကိးအီၤလၢယ့ၣ်ၡူးတဂၤကၢကပံာ်, ပဲလီၤဝဲလၢယမဲာ်ချံအလိၤ, ဒီးမၢယလဲၤပျၢ်ယမဲာ်လၢနိၣ်ၡံလိၤလီၤ. လၢတၢ်န့ၣ်အဃိယလဲၤယဲဒီးယပျၢ်ယမဲာ်ဝံၤတဘျီဃီ ယထံၣ်ထီၣ်က့ၤတၢ်န့ၣ်လီၤ.”
12အဝဲသ့ၣ်သံကွၢ်အီၤ, “အဝဲအိၣ်ဖဲလဲၣ်.”
ဒီးအဝဲဒၣ်စံးဆၢဝဲ, “ယတသ့ၣ်ညါဘၣ်.”
ပှၤဖၤရံၤၡဲတဖၣ်ဃုသ့ၣ်ညါ တၢ်မၤဘျါက့ၤအံၤအဂ့ၢ်
13ဒီးအဝဲသ့ၣ်လဲၤဆှၢပှၤမဲာ်ဘျီၣ်တ့ၢ်တဂၤအံၤဆူ ပှၤဖၤရံၤၡဲတဖၣ်အအိၣ်န့ၣ်လီၤ. 14မုၢ်နံၤလၢယ့ၣ်ၡူးကၢကပံာ်ဒီးမၤဘျါက့ၤအီၤလၢအတၢ် မဲာ်ဘျီၣ်န့ၣ်, မ့ၢ်ပှၤယူဒၤဖိအမုၢ်အိၣ်ဘှံးနံၤန့ၣ်လီၤ. 15တုၤနုၤတစု, ပှၤဖၤရံၤၡဲတဖၣ်သံကွၢ်ကဒီးပှၤတဂၤအံၤ လၢအထံၣ်ထီၣ်က့ၤတၢ်ဒ်လဲၣ်အဂ့ၢ်န့ၣ်လီၤ. အဝဲစံးဆၢဝဲ, “ယ့ၣ်ၡူးပဲလီၤကပံာ်လၢယမဲာ်ချံအလိၤဝံၤ ယပျၢ်ယမဲာ်ဒီးခဲအံၤယထံၣ်ထီၣ်က့ၤတၢ်န့ၣ်လီၤ.”
16ပှၤဖၤရံၤၡဲတနီၤစံးဝဲ, “ပှၤတဂၤလၢအမၤတၢ်တမံၤအံၤ တမ့ၢ်ပှၤဟဲလၢကစၢ်ယွၤအအိၣ်ဘၣ်. အဂ့ၢ်မ့ၢ်လၢ အဝဲတစူၢ်မုၢ်အိၣ်ဘှံးနံၤအတၢ်သိၣ်တၢ်သီအဃိလီၤ.”
မ့မ့ၢ်အဂၤတနီၤစံးဝဲ, “ပှၤတဂၤလၢအမ့ၢ်ပှၤတၢ်ဒဲးဘးဖိန့ၣ်, မၤတၢ်လီၤလးဒ်သိးအံၤတဖၣ်ကသ့ဝဲလၢကျဲဒ်လဲၣ်.” ဒီးတၢ်လီၤမုၢ်လီၤဖးအိၣ်ထီၣ်လၢအဝဲသ့ၣ်အသိးအကျါလီၤ.
17ပှၤဖၤရံၤၡဲတဖၣ်သံကွၢ်ကဒီးပှၤတဂၤအံၤ, “နစံးလၢအဝဲမၤဘျါက့ၤနၤလၢနတၢ်မဲာ်ဘျီၣ်လီၤ. ဂ့ၤလံ. နဲတခီနစံးလၢအဝဲအဂ့ၢ်ဒ်လဲၣ်.”
အဝဲစံးဆၢဝဲ, “အဝဲဒၣ်မ့ၢ်ဝံတဂၤလီၤ.”
18ပှၤယူဒၤဖိအခိၣ်အနၢ်တဖၣ်, တချုးလၢအကိးဒံးဘၣ်ပှၤတဂၤအံၤ အမိၢ်အပၢ်န့ၣ်, တနာ်ဝဲဒၣ်လၢပှၤတဂၤအံၤအမဲာ်ဘျီၣ်တ့ၢ်တဘျီ ဒီးခဲအံၤထံၣ်ထီၣ်က့ၤတၢ်န့ၣ်ဘၣ်. 19အဝဲသ့ၣ်သံကွၢ်ဝဲ, “အဝဲအံၤမ့ၢ်သုဖိခွါလၢသုစံးလၢ အအိၣ်ဖျဲၣ်မဲာ်ဘျီၣ်န့ၣ်ဧါ. မ့မ့ၢ်ဒ်န့ၣ်ဒီး, ခဲအံၤအဝဲထံၣ်ထီၣ်က့ၤတၢ်န့ၣ်သ့လၢကျဲဒ်လဲၣ်.”
20အမိၢ်အပၢ်တဖၣ်စံးဆၢတၢ်ဒီးစံးဝဲ, “ပသ့ၣ်ညါလၢ အဝဲမ့ၢ်ပဖိခွါ, ဒီးပသ့ၣ်ညါလၢအဝဲအိၣ်ဖျဲၣ်ထီၣ်မဲာ်ဘျီၣ်န့ၣ်လီၤ. 21ဘၣ်ဆၣ်ဒီးခဲအံၤအဝဲထံၣ်ထီၣ်က့ၤတၢ်လၢကျဲဒ်လဲၣ်န့ၣ် ပတသ့ၣ်ညါဘၣ်. ဒီးမတၤမၤဘျါက့ၤအီၤလဲၣ်န့ၣ်, ပတသ့ၣ်ညါစ့ၢ်ကီးဘၣ်. သံကွၢ်အီၤတက့ၢ်. အဝဲဒၣ်ဒိၣ်တုာ်ခိၣ်ပှဲၤလံ ဒီးစံးဆၢတၢ်လၢအဂီၢ်ဒၣ်ဝဲသ့ကစီဒီလီၤ.” 22အမိၢ်အပၢ်တဖၣ်စံးဆၢတၢ်ဒ်အံၤမ့ၢ်လၢအပျံၤပှၤယူဒၤဖိအခိၣ် အနၢ်တဖၣ်လၢအပာ်လီၤတ့ၢ်လံအသးလၢပှၤတဂၤလၢ်လၢ်လၢ အစံးလၢအနာ်ယ့ၣ်ၡူးမ့ၢ်ခရံာ်န့ၣ်, ကဘၣ်တၢ်ဟီထီၣ်ကွံာ်အီၤလၢဘူၣ်ဘျီၣ်ပူၤအဃိန့ၣ်လီၤ. 23လၢတၢ်န့ၣ်အဃိအမိၢ်အပၢ်စံးတ့ၢ်ဝဲ, “အဝဲဒၣ်ဒိၣ်တုာ်ခိၣ်ပှဲၤလံ. သံကွၢ်အီၤတက့ၢ်.”
24ပှၤယူဒၤဖိအခိၣ်အနၢ်တဖၣ်ကိးကဒါက့ၤပှၤလၢအမဲာ်ထံၣ်ထီၣ် က့ၤတၢ်တဂၤန့ၣ်ခံဘျီတဘျီဒီးစံးဘၣ်အီၤ, “အၢၣ်လီၤနသးလၢကစၢ်ယွၤအမဲာ်ညါလၢနကတဲတၢ်မ့ၢ် တၢ်တီန့ၣ်တက့ၢ်. ပသ့ၣ်ညါလၢပှၤလၢအမၤဘျါနၤအံၤ မ့ၢ်ပှၤတၢ်ဒဲးဘးဖိတဂၤန့ၣ်လီၤ.”
25ပှၤတဂၤအံၤစံးဆၢတၢ်ဒီးစံးဝဲ, “အဝဲမ့ၢ်ပှၤတၢ်ဒဲးဘးဖိဧါ, တမ့ၢ်ဘၣ်လဲၣ်န့ၣ်, ယတသ့ၣ်ညါဘၣ်. တၢ်လၢယသ့ၣ်ညါ တမံၤန့ၣ်, လၢညါယမဲာ်ဘျီၣ်, ဘၣ်ဆၣ်ခဲအံၤယထံၣ်ထီၣ်က့ၤတၢ်လံ.”
26အဝဲသ့ၣ်သံကွၢ်ကဒီးအီၤ, “အဝဲမၤနၤဒ်လဲၣ်. မၤဘျါက့ၤနၤလၢနတၢ်မဲာ်ဘျီၣ်န့ၣ်လၢကျဲဒ်လဲၣ်.”
27အဝဲစံးဆၢတၢ်ဒီးစံးဝဲ, “ယစံးဘၣ်တဲဘၣ်သုဝံၤတ့ၢ်လံ ဒီးသုတကနၣ်ယၤဘၣ်. ဘၣ်မနုၤအဃိလၢသုအဲၣ်ဒိးနၢ်ဟူကဒီး တၢ်ဂ့ၢ်အံၤန့ၣ်လဲၣ်. ဘၣ်သ့ၣ်သ့ၣ်သုဝဲစ့ၢ်ကီးကမ့ၢ် သုအဲၣ်ဒိးကဲထီၣ်ယ့ၣ်ၡူးအပျဲၢ်အဘီၣ်တဖၣ်သၢၣ်.”
28အဝဲသ့ၣ်ကတိၤဒုၣ်ဒွဲၣ်အီၤဒီးစံး, “နမ့ၢ်ပှၤအဝဲန့ၣ်အပျဲၢ်အဘီၣ်လီၤ. မ့မ့ၢ်ပဝဲပမ့ၢ်စီၤမိၤၡ့အပျဲၢ်အဘီၣ်တဖၣ်န့ၣ်လီၤ. 29ပသ့ၣ်ညါလၢကစၢ်ယွၤကတိၤတၢ်ဒီးစီၤမိၤၡ့လီၤ. မ့မ့ၢ်ပှၤအဝဲတဂၤန့ၣ်ဟဲလၢလဲၣ်ဒၣ်လဲာ်ပတသ့ၣ်ညါဘၣ်.”
30ပှၤအမဲာ်ထံၣ်ထီၣ်က့ၤတၢ်တဂၤန့ၣ်စံးဆၢတၢ်ဒီးစံးဝဲ, “တၢ်တမံၤအံၤမ့ၢ်တၢ်လီၤကမၢကမၣ်ဒိၣ်မးလီၤ. ပှၤတဂၤအံၤဟဲလၢလဲၣ်န့ၣ်သုတသ့ၣ်ညါဘၣ်. ဘၣ်ဆၣ်အဝဲမၤဘျါက့ၤယၤလၢယတၢ်မဲာ်ဘျီၣ်န့ၣ်လီၤ. 31ပသ့ၣ်ညါလၢကစၢ်ယွၤတဒိကနၣ်ပှၤတၢ်ဒဲးဘးဖိတဖၣ် န့ၣ်ဘၣ်. မ့မ့ၢ်အဝဲဒိကနၣ်ပှၤလၢအယူးယီၣ်အီၤ ဒီးမၤတၢ်လၢအဘၣ်အသးန့ၣ်လီၤ. 32လၢဟီၣ်ခိၣ်ကဲထီၣ်လံၤလံၤန့ၣ်, ပှၤတဂၤဂၤဒုးထံၣ်ထီၣ်က့ၤပှၤအိၣ်ဖျဲၣ်မဲာ်ဘျီၣ်တဂၤ န့ၣ်, ပှၤတနၢ်ဟူဘၣ်အီၤနီတခီၣ်ဘၣ်. 33မ့တမ့ၢ်ဘၣ်လၢပှၤတဂၤအံၤဟဲလၢကစၢ်ယွၤအအိၣ်ဘၣ်ဒီး, အဝဲမၤတၢ်တသ့နီတမံၤဘၣ်.”
34အဝဲသ့ၣ်စံးဆၢတၢ်ဒီးစံးဝဲ, “နအိၣ်ဖျဲၣ်ထီၣ်ဒီး တၢ်ကွၢ်ဒိၣ်ထီၣ်နၤလၢတၢ်ဒဲးဘးယိာ်အပူၤဒီးနဂုာ် ကျဲးစၢးသိၣ်လိသီလိပှၤန့ၣ်ဧါ.” အန့ၣ်ဒီး, အဝဲသ့ၣ်ဟီထီၣ်ကွံာ်အီၤလၢဘူၣ်ဘျီၣ်ပူၤန့ၣ်လီၤ.
တၢ်မဲာ်ဘျီၣ်လၢသူၣ်လၢသး
35ယ့ၣ်ၡူးနၢ်ဟူလၢပှၤဟီထီၣ်ကွံာ်အီၤဒီးဖဲအဝဲထံၣ်န့ၢ် ပှၤတဂၤအံၤန့ၣ်သံကွၢ်အီၤဒီးစံး, “နစူၢ်က့ၤနာ်က့ၤပှၤကညီဖိခွါဧါ.”
36ပှၤတဂၤအံၤစံးဆၢအီၤ, “ကစၢ်ဧၢ, ဒ်သိးယနာ်အီၤကသ့န့ၣ်, စံးဘၣ်တဲဘၣ်ယၤလၢအဝဲမ့ၢ်မတၤလဲၣ်န့ၣ်တက့ၢ်.”
37ယ့ၣ်ၡူးစံးဘၣ်အီၤ, “နထံၣ်တ့ၢ်လံအီၤလံ. အဝဲမ့ၢ်ပှၤလၢအကတိၤတၢ်ဒီးနၤခဲအံၤတဂၤန့ၣ်လီၤ.”
38အဝဲစံးဝဲဒၣ်, “ကစၢ်ဧၢ, ယနာ်လီၤ.” ဒီးချံးခီၣ်တီၤလီၤလၢယ့ၣ်ၡူး အမဲာ်ညါဒီးဘူၣ်ထီၣ်ဘါထီၣ်အီၤလီၤ.
39ယ့ၣ်ၡူးစံးဝဲဒၣ်, “ယဟဲဆူဟီၣ်ခိၣ်အံၤလၢယကစံၣ်ညီၣ်တၢ် အဂီၢ်, ဒ်သိးပှၤလၢအတထံၣ်တၢ်တဖၣ်ကထံၣ်ထီၣ်က့ၤတၢ်, ဒီးပှၤလၢအထံၣ်တၢ်တဖၣ်အမဲာ်ကဘျီၣ်အဂီၢ်န့ၣ်လီၤ.”
40ပှၤဖၤရံၤၡဲတနီၤလၢအအိၣ်ဒီးအီၤဖဲန့ၣ်, နၢ်ဟူအဝဲစံးတၢ်ဒ်အံၤဒီး သံကွၢ်အီၤ, “နအဲၣ်ဒိးစံးလၢပဝဲဒၣ်တဖၣ်အံၤပမဲာ်ဘျီၣ်စ့ၢ်ကီး န့ၣ်ဧါ.”
41ယ့ၣ်ၡူးစံးဆၢတၢ်ဒီးစံး, “သုမဲာ်မ့ၢ်ဘျီၣ်တ့ၢ်ဒီးသုတၢ်ကမၣ်တမ့ၢ် အကအိၣ်ဘၣ်. ဘၣ်ဆၣ်သုစံးလၢသုထံၣ်တၢ်အဃိ, သုတၢ်ကမၣ်အိၣ်ဒံးဒၣ်တၢ်န့ၣ်လီၤ.”
Currently Selected:
လံာ်ယိၤဟၣ် 9: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
