လံာ်ယိၤဟၣ် 7
7
ယ့ၣ်ၡူးဒီးအဒီပုၢ်ဝဲၢ်ခွါတဖၣ်
1တၢ်အံၤဝံၤအလီၢ်ခံဒီး, ယ့ၣ်ၡူးဟးဝ့ၤဝီၤဝဲလၢကီၢ်ကၤလံၤလါ အပူၤလီၤ. မ့ၢ်လၢပှၤယူဒၤဖိအခိၣ်အနၢ်တဖၣ်ဃုမၤသံအီၤ အဃိ, အဝဲတသးအိၣ်ဟးဝ့ၤဝီၤလၢကီၢ်ယူဒၤအပူၤန့ၣ်ဘၣ်. 2ပှၤယူဒၤဖိအဘူၣ်ဒဲကဘၣ်ဘူးထီၣ်လံအဃိ,
3ယ့ၣ်ၡူးအဒီပုၢ်ဝဲၢ်ခွါတဖၣ်စံးဘၣ်အီၤ, “ဟးထီၣ်လၢတၢ်လီၢ်အံၤဒီးလဲၤဆူကီၢ်ယူဒၤဒ်သိး နပျဲၢ်နဘီၣ်တဖၣ်ကထံၣ်ဘၣ်နတၢ်ဖံးတၢ်မၤတဖၣ်လၢ နမၤအီၤန့ၣ်တက့ၢ်. 4ပှၤတဂၤလၢအအဲၣ်ဒိးအမံၤဟူသၣ်ဖျါန့ၣ်, တပာ်ခူသူၣ်တၢ်လၢအဝဲမၤဝဲန့ၣ်ဘၣ်. မ့ၢ်လၢနမၤတ့ၢ်လံတၢ်တဖၣ်အံၤအဃိဒီး, ပျဲဟီၣ်ခိၣ်ဒီဘ့ၣ်သ့ၣ်ညါတၢ်ဘၣ်ဃးဒီးနၤတက့ၢ်.” 5(ယ့ၣ်ၡူးအဒီပုၢ်ဝဲၢ်ခွါတဖၣ်ဒၣ်လဲာ်တနာ်အီၤဘၣ်.)
6ယ့ၣ်ၡူးစံးဘၣ်အဝဲသ့ၣ်, “တၢ်ဆၢကတီၢ်လၢယဂီၢ်တဘၣ် ဒံးဘၣ်. မ့မ့ၢ် လၢသုဂီၢ်န့ၣ်တၢ်ဆၢကတီၢ်ဘၣ်ဒၣ်ထီဘိလီၤ. 7ဟီၣ်ခိၣ်သးဟ့သုတသ့ဘၣ်. ဘၣ်ဆၣ်သးဟ့ယၤလီၤ. မ့ၢ်လၢယစံးဘၣ်တဲဘၣ်အီၤတလီၢ်လီၢ်လၢ အကျဲတဖၣ်န့ၣ်အၢဝဲသီဝဲအဃိလီၤ. 8လဲၤထီၣ်သုဝဲဆူဘူၣ်ပူၤတက့ၢ်. မ့မ့ၢ်ယဲ ယတလဲၤဆူဘူၣ်အံၤဒံးဘၣ်. မ့ၢ်လၢတၢ်ဆၢကတီၢ်တဘၣ်ဒံးဘၣ်လၢယဂီၢ်အဃိလီၤ.” 9ယ့ၣ်ၡူးစံးတၢ်ဒ်အံၤဝံၤဒီးအိၣ်တ့ၢ်ဝဲဒၣ်လၢကီၢ်ကၤလံၤလါ အပူၤန့ၣ်လီၤ.
ယ့ၣ်ၡူးလဲၤဆူဘူၣ်ဒဲ
10ယ့ၣ်ၡူးအဒီပုၢ်ဝဲၢ်ခွါတဖၣ်လဲၤထီၣ်ဆူဘူၣ်ပူၤဝံၤအလီၢ်ခံ, အဝဲလဲၤစ့ၢ်ကီးဝဲလီၤ. ဘၣ်ဆၣ်တလဲၤဝဲဖျိဖျိဖျါဖျါဘၣ်. မ့မ့ၢ်လဲၤဝဲလၢတၢ်ခူသူၣ်အပူၤလီၤ. 11ပှၤယူဒၤဖိအခိၣ်အနၢ်တဖၣ်လူၤဃုအီၤဖဲဘူၣ်ပူၤဒီးသံကွၢ် တၢ်ဒီးစံးဝဲ, “အဝဲအိၣ်ဖဲလဲၣ်.”
12လၢပှၤဂီၢ်မုၢ်အကျါ, ပှၤကတိၤကသွံကသွါတၢ်လၢ ယ့ၣ်ၡူးအဂ့ၢ်အကျိၤအါမးလီၤ. လၢအကျါတနီၤစံးဝဲ, “အဝဲမ့ၢ်ပှၤအဂ့ၤတဂၤလီၤ.” အဂၤတနီၤတခီစံးဝဲ, “တမ့ၢ်ဘၣ်, အဝဲမ့ၢ်ပှၤလၢအဆှၢကမၣ်ပှၤဂီၢ်မုၢ်လီၤ.”
13ဘၣ်ဆၣ်ပှၤကတိၤတၢ်လၢယ့ၣ်ၡူးအဂ့ၢ်ဖျိဖျိဖျါဖျါ တဘူၣ်နီတဂၤဘၣ်. မ့ၢ်လၢအဝဲသ့ၣ်ပျံၤပှၤယူဒၤဖိ အခိၣ်အနၢ်တဖၣ်အဃိလီၤ.
14ဖဲဘူၣ်အကတီၢ်လီၤဖးဖီန့ၣ်, ယ့ၣ်ၡူးလဲၤထီၣ်ဆူတၢ်လုၢ်ဟံၣ်ဒီး စးထီၣ်သိၣ်လီၤသီလီၤတၢ်န့ၣ်လီၤ. 15ပှၤယူဒၤဖိအခိၣ်အနၢ်တဖၣ်ကမၢကမၣ်ဝဲဒိၣ်မးဒီးစံး, “ပှၤတဂၤအံၤတမၤလိဘၣ်တၢ်လၢပှၤယူဒၤဖိတၢ်သိၣ် တၢ်သီအသရၣ်ဒိၣ်တဖၣ်အစုပူၤသနာ်က့, သ့ၣ်ညါ တၢ်အါထဲအံၤညါန့ၣ်, ဟဲအသးဒ်လဲၣ်.”
16ယ့ၣ်ၡူးစံးဆၢတၢ်ဒီးစံးဝဲ, “တၢ်လၢယသိၣ်လိအံၤတမ့ၢ်ယတၢ်သိၣ်လိသီလိဒၣ်ယဲဘၣ်. မ့မ့ၢ် ဟဲလၢကစၢ်ယွၤလၢအမၢလီၤယၤတဂၤအအိၣ်န့ၣ်လီၤ. 17ပှၤတဂၤဂ့ၤတဂၤဂ့ၤအသးမ့ၢ်အိၣ်လၢကမၤဘၣ်ကစၢ်ယွၤ အတၢ်ဘၣ်အသးဒီး, အဝဲကသ့ၣ်ညါဝဲလၢယတၢ်သိၣ်လိသီလိအံၤဟဲလၢ ကစၢ်ယွၤအအိၣ်ဧါ, မ့တမ့ၢ်ဒီးလၢယကတိၤဒၣ်တၢ်လၢယစိကမီၤဒၣ်ယဲလဲၣ်န့ၣ်လီၤ. 18ပှၤတဂၤလၢအကတိၤတၢ်လၢအစိကမီၤဒၣ်ဝဲန့ၣ်, မ့ၢ်အဃုမၤန့ၢ်အလၤအကပီၤဒၣ်ဝဲလီၤ. မ့မ့ၢ်ပှၤလၢအဃုပှၤလၢအမၢလီၤအီၤတဂၤအလၤ ကပီၤန့ၣ်, မ့ၢ်ပှၤအတီတဂၤဒီးတၢ်လီတၢ်ဝ့ၤတအိၣ်လၢ အပူၤနီတမံၤဘၣ်. 19စီၤမိၤၡ့ဟ့ၣ်သုလၢတၢ်သိၣ်တၢ်သီ တမ့ၢ်ဘၣ်ဧါ. ဘၣ်ဆၣ်ဒီးသုတဒိကနၣ်တၢ်သိၣ်တၢ်သီန့ၣ်နီ တဂၤဘၣ်. ဘၣ်မနုၤအဃိလၢသုဃုမၤသံယၤန့ၣ်လဲၣ်.”
20ပှၤဂီၢ်မုၢ်စံးဆၢတၢ်ဒီးစံးဝဲ, “တၢ်နါအိၣ်လၢနပူၤလီၤ. မ့ၢ်မတၤဃုမၤသံနၤတဂၤန့ၣ်လဲၣ်.”
21ယ့ၣ်ၡူးစံးဆၢတၢ်ဒီးစံးဝဲ, “ယမၤတၢ်လီၤလးတမံၤ, ဒီးသုကမၢကမၣ်ဘၣ်သုသးကိးဂၤဒဲးလီၤ. 22စီၤမိၤၡ့မၢသုကူးတရံးသုဖိခွါတဖၣ်, အန့ၣ်ဒီးသုကူးတရံးဘၣ်ပိာ်ခွါဖိသၣ်လၢမုၢ်အိၣ်ဘှံးနံၤ န့ၣ်လီၤ. (ပှၤစးထီၣ်လုၢ်လၢ်အံၤမ့ၢ်သုပၢ်ဖးဒိၣ်လၢပျၢၤဒီး တမ့ၢ်စီၤမိၤၡ့ဘၣ်.) 23ပှၤတဂၤမ့ၢ်ဘၣ်တၢ်ကူးတရံးအီၤလၢမုၢ်အိၣ်ဘှံးနံၤဒ်သိး စီၤမိၤၡ့အတၢ်သိၣ်တၢ်သီဘၣ်ဃးတၢ်ကူးတရံးအံၤအသု တဘၣ်တၢ်လုၣ်သ့ၣ်ခါပတာ်အီၤတဂ့ၤဒီး, ဘၣ်မနုၤအဃိသုသးဒိၣ်ယၤလၢယမၤဘျါက့ၤပှၤတဂၤ ဂ့ၤဂ့ၤဘၣ်ဘၣ်လၢမုၢ်အိၣ်ဘှံးအနံၤန့ၣ်လဲၣ်. 24တဘၣ်စံၣ်ညီၣ်ပှၤဒ်တၢ်အိၣ်ဖျါအသိးလၢၤတဂ့ၤ. မ့မ့ၢ်စံၣ်ညီၣ်တၢ်ဒ်တၢ်မ့ၢ်တၢ်တီအိၣ်ဝဲအသိးန့ၣ် တက့ၢ်.”
အဝဲမ့ၢ်ခရံာ်ဧါ
25ပှၤဝ့ၢ်ယရူၤၡလ့ၣ်ဖိတနီၤစံးဝဲ, “ပှၤတဂၤအံၤတမ့ၢ်ပှၤလၢပှၤယူဒၤဖိအခိၣ်အနၢ် တဖၣ်ကျဲးစၢးဃုမၤသံကွံာ်အီၤန့ၣ်ဘၣ်ဧါ. 26ကွၢ်တက့ၢ်. အဝဲကတိၤတၢ်လၢကမျၢၢ်အမဲာ်ညါဒီး အဝဲသ့ၣ်တကတိၤထီဒါအီၤနီတမံၤဘၣ်. မ့ၢ်အဝဲသ့ၣ်, သ့ၣ်ညါနီၢ်နီၢ်လၢအဝဲမ့ၢ်ခရံာ်အဃိန့ၣ်ဧါ. 27ဘၣ်ဆၣ်တုၤခရံာ်ဟဲဝဲန့ၣ်, ပှၤတသ့ၣ်ညါအဝဲဟဲလၢလဲၣ်နီ တဂၤန့ၣ်ဘၣ်. ဒီးအဝဲတဂၤအံၤဟဲဝဲလၢလဲၣ်န့ၣ်ပဝဲခဲလၢာ် ပသ့ၣ်ညါလီၤ.”
28ယ့ၣ်ၡူးသိၣ်လိသီလိတၢ်လၢတၢ်လုၢ်ဟံၣ်ပူၤအဖၢမုၢ်ဒီး ကတိၤတၢ်လၢအကလုၢ်ဖးဒိၣ်ဒီးစံးဝဲ, “မ့ၢ်သုသ့ၣ်ညါယၤနီၢ်နီၢ်ဒီးသ့ၣ်ညါယဟဲလၢလဲၣ်န့ၣ်ဧါ. ယတဟဲလၢယတၢ်ဘၣ်ယသးဒၣ်ယဲန့ၣ်ဘၣ်. ပှၤလၢ အမၢလီၤယၤတဂၤန့ၣ် မ့ၢ်ပှၤလၢအမ့ၢ်အတီလီၤ. သုတသ့ၣ်ညါအီၤဘၣ်. 29ဘၣ်ဆၣ်ယသ့ၣ်ညါအီၤမ့ၢ်လၢယဟဲလၢအအိၣ်ဒီး အဝဲဒၣ်မၢလီၤယၤအဃိလီၤ.”
30ထဲန့ၣ်ဒီးအဝဲသ့ၣ်ဂုာ်ကျဲးစၢးဃုကျဲလၢကဖီၣ်ယ့ၣ်ၡူး ဘၣ်ဆၣ်ပှၤတထိးဘူးအီၤနီတဂၤဘၣ်. မ့ၢ်လၢတၢ်ဆၢကတီၢ်နၣ်ရံၣ်တဘၣ်ဒံးဘၣ်လၢအဂီၢ် အဃိလီၤ. 31ဘၣ်ဆၣ်ဒီးပှၤအါဂၤလၢပှၤဂီၢ်မုၢ်အကျါနာ်အီၤဒီးစံး, “တုၤခရံာ်ဟဲဝဲဒီးမ့ၢ်အဝဲကမၤတၢ်လီၤလးဒိၣ်န့ၢ်အါ န့ၢ်ဒံးအဝဲတဂၤအံၤမၤတ့ၢ်ဝဲန့ၣ်ဧါ.”
တၢ်မၢလီၤတၢ်လုၢ်ဟံၣ်အပှၤပၢၤတၢ်ဖိ လၢကဖီၣ်ယ့ၣ်ၡူး
32ပှၤဖၤရံၤၡဲတဖၣ်နၢ်ဟူပှၤဂီၢ်မုၢ်ကတိၤကသွံကသွါတၢ် ဘၣ်ဃးယ့ၣ်ၡူးအဂ့ၢ်အဃိ, အဝဲသ့ၣ်ဒီးပှၤလုၢ်တၢ်အခိၣ် အဒိၣ်တဖၣ်မၢလီၤတၢ်လုၢ်ဟံၣ်အပှၤပၢၤတၢ်ဖိတနီၤလၢ ကလဲၤဖီၣ်န့ၢ်ယ့ၣ်ၡူးအဂီၢ်လီၤ. 33ယ့ၣ်ၡူးစံးဝဲဒၣ်, “ယကအိၣ်ဒီးသုတစိၢ်တလီၢ်ဝံၤဒီး ယကက့ၤက့ၤဆူပှၤလၢအမၢလီၤယၤတဂၤအအိၣ်န့ၣ်လီၤ. 34သုကဃုယၤ, ဘၣ်ဆၣ်သုတထံၣ်န့ၢ်ယၤဘၣ်. အဂ့ၢ်မ့ၢ်လၢတၢ်လီၢ်လၢယကအိၣ်န့ၣ်, သုလဲၤတသ့ဘၣ်အဃိလီၤ.”
35ပှၤယူဒၤဖိအခိၣ်အနၢ်တဖၣ်စံးကတိၤလိာ်သးတဂၤဒီးတဂၤ, “ပထံၣ်အီၤတသ့ဘၣ်န့ၣ်, မ့ၢ်အဝဲကလဲၤဝဲဆူလဲၣ်. မ့ၢ်အဝဲကလဲၤဆူပှၤကြံးခ် ဖိအဝ့ၢ်တဖၣ်ဖဲပပှၤကလုာ်အိၣ်ဝဲဒီး သိၣ်လိသီလိပှၤကြံးခ်ဖိတဖၣ်န့ၣ်ဧါ. 36အဝဲစံးဝဲလၢပကဃုထံၣ်အီၤဘၣ်ဆၣ်ပတထံၣ်န့ၢ်အီၤဘၣ်. ဒီးတၢ်လီၢ်လၢအဝဲကအိၣ်န့ၣ်ပလဲၤတသ့ဘၣ်. အတၢ်ကတိၤအံၤအခီပညီမ့ၢ်တၢ်မနုၤလဲၣ်.”
ထံလၢအဟ့ၣ်တၢ်မူ
37ဒီးလၢဘူၣ်လၢခံကတၢၢ်တနံၤ ဒီးအကါဒိၣ်ကတၢၢ်တနံၤ န့ၣ်, ယ့ၣ်ၡူးဆၢထၢၣ်ဒီးကတိၤတၢ်လၢအကလုၢ်ဖးဒိၣ်ဒီးစံးဝဲ, “ပှၤတဂၤလၢ်လၢ်လၢတၢ်သူအသးလၢထံန့ၣ်မ် အဟဲဆူယအိၣ်ဒီးအီထံတက့ၢ်.” 38ဒ်တၢ်ကွဲးအသးစံးဝဲအသိး, “ပှၤတဂၤလၢ်လၢ်လၢအစူၢ်က့ၤနာ် က့ၤယၤန့ၣ်, ထံမူကျိတဖၣ်ကယွၤလီၤလၢအသးပူၤလီၤ.” 39ယ့ၣ်ၡူးစံးတၢ်အံၤဘၣ်ဃးဒီးယွၤအသးလၢ ပှၤလၢအစူၢ်က့ၤနာ်က့ၤအီၤတဖၣ်ကဒိးန့ၢ်ဘၣ်ဝဲန့ၣ်လီၤ. အကတီၢ်ဖဲန့ၣ်, ယွၤအသးတဘၣ်တၢ်ဟ့ၣ်လီၤအီၤဒံးဘၣ်န့ၣ်, မ့ၢ်လၢယ့ၣ်ၡူးတဘၣ်တၢ်ဒုးဂဲၤထၢၣ်အီၤဆူတၢ်လၤ ကပီၤဒံးဘၣ်အဃိလီၤ.
တၢ်လီၤမုၢ်လီၤဖးလၢပှၤဂီၢ်မုၢ်အကျါ
40ပှၤအိၣ်ဝဲတနီၤလၢပှၤဂီၢ်မုၢ်အကျါနၢ်ဟူယ့ၣ်ၡူးအတၢ် ကတိၤဒီးစံး, “ပှၤတဂၤအံၤမ့ၢ်နီၢ်နီၢ်ဝံတဂၤန့ၣ်လီၤ.”
41အဂၤတနီၤစံးဝဲ, “အဝဲဒၣ်မ့ၢ်ခရံာ်န့ၣ်လီၤ.”
ဘၣ်ဆၣ်ပှၤအဂၤတဖၣ်စံးဝဲ, “ခရံာ်တဟဲထီၣ်ဝဲဒၣ်လၢကီၢ် ကၤလံၤလါန့ၣ်ဘၣ်. 42တၢ်ကွဲးအသးစံးဝဲဒၣ်လၢခရံာ်ကမ့ၢ်ပှၤဟဲလီၤစၢၤလၢ စီၤပၤဒၤဝံးဒီးကအိၣ်ဖျဲၣ်ထီၣ်လၢဝ့ၢ်ဘ့ၤသလ့ဃ့ၣ်, ဝ့ၢ်လၢစီၤပၤဒၤဝံးအိၣ်ဝဲန့ၣ်လီၤ.” 43အန့ၣ်သတးဒီး, တၢ်လီၤမုၢ်လီၤဖးအိၣ်ထီၣ်ဝဲလၢပှၤဂီၢ်မုၢ် အကျါလၢယ့ၣ်ၡူးအဃိလီၤ. 44ပှၤတနီၤအဲၣ်ဒိးဖီၣ်အီၤဘၣ်ဆၣ်ဒီးပှၤတထိးဘူးအီၤနီတဂၤ ဘၣ်န့ၣ်လီၤ.
ပှၤယူဒၤအခိၣ်အနၢ်တဖၣ်အတၢ် တစူၢ်တနာ်တၢ်
45ဖဲတၢ်လုၢ်ဟံၣ်အပှၤပၢၤတၢ်ဖိတဖၣ်က့ၤကဒါက့ၤဝဲန့ၣ်, ပှၤလုၢ်တၢ်အခိၣ်အဒိၣ်တဖၣ် ဒီးပှၤဖၤရံၤၡဲတဖၣ်သံကွၢ် အဝဲသ့ၣ်, “ဘၣ်မနုၤအဃိသုတဟဲက့ၤဖီၣ်အီၤန့ၣ်လဲၣ်.”
46တၢ်လုၢ်ဟံၣ်အပှၤပၢၤတၢ်ဖိတဖၣ်စံးဆၢတၢ်ဒီးစံးဝဲ, “ပှၤကတိၤတၢ်ဒ်ပှၤတဂၤအံၤအသိးတအိၣ်နီတဂၤဒံးဘၣ်.”
47အန့ၣ်ဒီး ပှၤဖၤရံၤၡဲတဖၣ်သံကွၢ်အဝဲသ့ၣ်, “မ့ၢ်အဝဲဆှၢကမၣ် သုစ့ၢ်ကီးလံဧါ. 48ခိၣ်နၢ်အကျါတဂၤဂၤ, မ့တမ့ၢ်ပှၤဖၤရံၤၡဲအကျါတဂၤဂၤ စူၢ်က့ၤနာ်က့ၤအီၤန့ၣ်, မ့ၢ်သုနၢ်ဟူဘၣ်တဘျီဘျီလံဧါ. 49ပှၤဂီၢ်မုၢ်အံၤတသ့ၣ်ညါစီၤမိၤၡ့အတၢ်သိၣ်တၢ်သီဘၣ် အဃိဒီး, ဘၣ်တၢ်ဆိၣ်အၢလၢကစၢ်ယွၤလီၤ.”
50စီၤနံၤကဒ့မူးလၢအမ့ၢ်ပှၤဖၤရံၤၡဲအကျါတဂၤလၢ အမ့ၢ်ပှၤတဂၤဃီလၢအလဲၤဃုထံၣ်ယ့ၣ်ၡူးလၢအပူၤကွံာ်န့ၣ်, အိၣ်ဖဲန့ၣ်စ့ၢ်ကီးလီၤ. အဝဲစံးဘၣ်ပှၤဂၤတဖၣ်, 51“မ့မ့ၢ်ဒ်ပတၢ်သိၣ်တၢ်သီအသိးန့ၣ်, တချုးဒံးဘၣ်လၢပနၢ်ဟူဆိပှၤတဂၤန့ၣ်အတၢ်ကတိၤဒီး ဃုထံၣ်သ့ၣ်ညါဆိအဝဲမၤတ့ၢ်လံတၢ်မနုၤလဲၣ်န့ၣ်ဒီး, ပစံၣ်ညီၣ်ဃၣ်အီၤတသ့ဘၣ်.”
52အဝဲသ့ၣ်စံးဆၢတၢ်ဒီးစံးဝဲ, “မ့မ့ၢ်ဒ်န့ၣ်ဒီး, နမ့ၢ်ပှၤလၢအဟဲလၢကီၢ်ကၤလံၤလါစ့ၢ်ကီးဧါ. ဃုမၤလိက့ၤတၢ်ကွဲးအသးစီဆှံတဖၣ်ဒီးနကထံၣ် သ့ၣ်ညါလၢဝံတဟဲထီၣ်လၢကီၢ်ကၤလံၤလါအပူၤနီတဂၤနီ တဘျီဘၣ်န့ၣ်လီၤ.” 53ထဲန့ၣ်ဒီး, ပှၤကိးဂၤဒဲးက့ၤက့ၤဆူအဟံၣ်ဒၣ်ဝဲလီၤ. ဒီးယ့ၣ်ၡူးလဲၤဆူကစၢၢ်သ့ၣ်စၤယံးလီၤ.
Currently Selected:
လံာ်ယိၤဟၣ် 7: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
