လံာ်ယိၤဟၣ် 21
21
ယ့ၣ်ၡူးလီၣ်ဖျါထီၣ်အသးလၢအပျဲၢ်အဘီၣ်နွံဂၤ
1တၢ်အံၤဝံၤအလီၢ်ခံ, ယ့ၣ်ၡူးလီၣ်ဖျါထီၣ်ကဒီးအသးတဘျီလၢ အပျဲၢ်အဘီၣ်တဖၣ်ဖဲပီၣ်လဲၣ်တံၤဘ့ၤရံအနံၤန့ၣ်လီၤ. တၢ်မၤအသးမ့ၢ်ဒ်အံၤလီၤ. 2စီၤၡံမိၣ်ပ့းတရူး, စီၤသိၤမါ (လၢတၢ်ကိးအီၤလၢပှၤသဃံာ်), စီၤနၤသန့လး (ပှၤဝ့ၢ်ကၤနါဖိလၢကီၢ်ကၤလံၤလါ), စီၤစ့းဘ့းဒဲ အဖိခွါခံဂၤ, ဒီးယ့ၣ်ၡူးအပျဲၢ်အဘီၣ်အဂၤခံဂၤ, ဒီးအဝဲသ့ၣ်ခဲလၢာ်န့ၣ်အိၣ်ဝဲတပူၤဃီလီၤ. 3စီၤၡံမိၣ်ပ့းတရူးစံးဘၣ်ပှၤအဂၤတဖၣ်, “ယကလဲၤမၤအီၣ် ညၣ်လီၤ.” အဝဲသ့ၣ်စံးဘၣ်အီၤ,
“ပကလဲၤဒီးနၤလီၤ.” အန့ၣ်ဒီး, အဝဲသ့ၣ်ဟးထီၣ်ဒီးဒိးထီၣ်ချံ, ဘၣ်ဆၣ်ဒီနၤညါန့ၣ်မၤညၣ်တန့ၢ်နီတဘ့ၣ်ဘၣ်န့ၣ်လီၤ. 4ဖဲမုၢ်ဟဲထီၣ်န့ၣ်, ယ့ၣ်ၡူးဆၢထၢၣ်လၢထံနံၤ, ဘၣ်ဆၣ်အပျဲၢ်အဘီၣ်တဖၣ်တသ့ၣ်ညါလၢအမ့ၢ်အီၤဘၣ်. 5အန့ၣ်ဒီး, ယ့ၣ်ၡူးသံကွၢ်အဝဲသ့ၣ်, “ဖိသ့ၣ်လံၤသ့ၣ်ဧၢ, မ့ၢ်သုမၤအီၣ်ညၣ်တန့ၢ်ဘၣ်ဧါ.”
အဝဲသ့ၣ်စံးဆၢအီၤ, “တန့ၢ်နီတဘ့ၣ်ဘၣ်.”
6ယ့ၣ်ၡူးစံးဘၣ်အဝဲသ့ၣ်, “တ့ၢ်လီၤသုစၤလၢသုချံအစုထွဲ တကပၤန့ၣ်ဒီးသုကဖီၣ်န့ၢ်ညၣ်တနီၤလီၤ.” ထဲန့ၣ်ဒီးအဝဲသ့ၣ် တ့ၢ်လီၤအစၤဒီးမ့ၢ်လၢအဝဲသ့ၣ်ဖီၣ်န့ၢ်ညၣ်အါမးအဃိ ထုးထီၣ်က့ၤအစၤတန့ၢ်လၢၤဘၣ်န့ၣ်လီၤ.
7အပျဲၢ်အဘီၣ်လၢယ့ၣ်ၡူးအဲၣ်အီၤတဂၤစံးဘၣ် စီၤပ့းတရူး, “မ့ၢ်ကစၢ်န့ၣ်လီၤ.” ဖဲစီၤပ့းတရူးနၢ်ဟူလၢ အမ့ၢ်ကစၢ်လီၤန့ၣ်, မ့ၢ်လၢအဝဲအိၣ်ဘ့ၣ်ဆ့အဃိအဝဲ သိးထီၣ်က့ၤအဆ့ကၤအဖီခိၣ်ဒီးကံၢ်တူာ်ဃာ်ဝဲဒီးစံၣ်လီၤ ဆူထံကျါန့ၣ်လီၤ. 8အပျဲၢ်အဘီၣ်အဂၤတဖၣ်ဟဲက့ၤဆူထံကၢၢ်နံၤလၢချံ အပူၤ, ဒီးတွံၢ်ဃုာ်အစၤလၢအပှဲၤဒီးညၣ်တဖၣ်န့ၣ် လီၤ. အဝဲသ့ၣ်အိၣ်တယံၤကဲၣ်ဆိးဒီးခိဘၣ်. ကအိၣ်ဒၣ်အပျၢ်ခံကယၤဃၣ်ဃၣ်န့ၣ်လီၤ. 9ဖဲအဝဲသ့ၣ်ဟဲက့ၤထီၣ်ဆူထံကၢၢ်ခိၣ်န့ၣ်, ထံၣ်ဝဲသွဲၣ်လးမ့ၣ်အူ ကဖးတပူၣ်ဒီးညၣ်ကၣ်အိၣ်လၢအဖီခိၣ်ဒီးကိၣ်အိၣ်တနီၤ စ့ၢ်ကီးန့ၣ်လီၤ. 10အန့ၣ်ဒီး, ယ့ၣ်ၡူးစံးဘၣ်အဝဲသ့ၣ်, “ဟဲစိာ်ညၣ်လၢသုဖီၣ်န့ၢ်တ့ၢ်ခဲကနံၣ်အံၤတနီၤတက့ၢ်.”
11စီၤၡံမိၣ်ပ့းတရူးလဲၤထီၣ်ဆူချံအပူၤဝံၤဒီးဟဲက့ၤတွံၢ်ထီၣ်စၤလၢ အပှဲၤဒီးညၣ်ဖးဒိၣ်, ခဲလၢာ်အိၣ်ဝဲတကယၤယဲၢ်ဆံသၢဘ့ၣ် န့ၣ်လီၤ. ညၣ်အါထဲထဲအံၤသနာ်က့, စၤတယာ်ဝဲဒၣ်ဘၣ်. 12ယ့ၣ်ၡူးစံးဘၣ်အဝဲသ့ၣ်, “ဟဲဒီးအီၣ်ဂီၤအတၢ်အီၣ် တက့ၢ်.” အပျဲၢ်အဘီၣ်ကသံကွၢ်အီၤလၢအမ့ၢ်မတၤ လဲၣ်န့ၣ်, တဘူၣ်နီတဂၤဘၣ်. မ့ၢ်လၢအဝဲသ့ၣ်, သ့ၣ်ညါဝဲလၢအမ့ၢ်ကစၢ်အဃိန့ၣ်လီၤ. 13အန့ၣ်ဒီး ယ့ၣ်ၡူးလဲၤဃီၤဝဲ, ဟံးန့ၢ်ကိၣ်ဒီးဟ့ၣ်လီၤအဝဲသ့ၣ်, ဒီးညၣ်စ့ၢ်ကီးမၤဝဲဒ်န့ၣ်အသိးလီၤ.
14အအံၤမ့ၢ်ယ့ၣ်ၡူးဂဲၤဆၢထၢၣ်က့ၤလၢတၢ်သံဝံၤဒီးဒုးနဲၣ် အသးလၢအပျဲၢ်အဘီၣ်တဖၣ်ပှဲၤထီၣ်သၢဘျီတဘျီန့ၣ်လီၤ.
ယ့ၣ်ၡူးဒီးစီၤပ့းတရူး
15အဝဲသ့ၣ်အီၣ်ဂီၤတၢ်အီၣ်ဝံၤဒီး, ယ့ၣ်ၡူးစံးဘၣ်စီၤၡံမိၣ် ပ့းတရူး, “စီၤယိၤနါအဖိခွါစီၤၡံမိၣ်ဧၢ, မ့ၢ်နအဲၣ်ယၤအါန့ၢ်ဒံးအဝဲသ့ၣ်တဖၣ်အဲၣ်ယၤန့ၣ်ဧါ.”
အဝဲစံးဆၢဝဲ, “ကစၢ်ဧၢ, မ့ၢ်လီၤ, နသ့ၣ်ညါလၢယအဲၣ်နၤလီၤ.”
ယ့ၣ်ၡူးစံးဘၣ်အီၤ “လုၢ်အီၣ်လုၢ်အီယသိဖိတဖၣ်တက့ၢ်.” 16ယ့ၣ်ၡူးစံးဘၣ်အီၤခံဘျီတဘျီ, “စီၤယိၤနါအဖိခွါစီၤၡံမိၣ်ဧၢ, မ့ၢ်နအဲၣ်ယၤဧါ.”
အဝဲစံးဆၢဝဲ, “ကစၢ်ဧၢ, မ့ၢ်လီၤ, နသ့ၣ်ညါလၢယအဲၣ်နၤလီၤ.”
ယ့ၣ်ၡူးစံးဘၣ်အီၤ, “အံးက့ၤကွၢ်က့ၤယသိတက့ၢ်.” 17ယ့ၣ်ၡူးစံးဘၣ်အီၤပှဲၤထီၣ်သၢဘျီတဘျီ, “စီၤယိၤနါအဖိခွါ စီၤၡံမိၣ်ဧၢ, မ့ၢ်နအဲၣ်ယၤဧါ.” ယ့ၣ်ၡူးသံကွၢ်အီၤ, မ့ၢ်နအဲၣ် ယၤဧါ. ပှဲၤထီၣ်သၢဘျီတဘျီအဃိဒီး,
စီၤပ့းတရူးအသးတမုာ်ဝဲဘၣ်ဒီးစံးဘၣ်ယ့ၣ်ၡူး, “ကစၢ်ဧၢ, နသ့ၣ်ညါတၢ်ခဲလၢာ်လီၤ. နသ့ၣ်ညါလၢယအဲၣ်နၤလီၤ.”
ယ့ၣ်ၡူးစံးဘၣ်အီၤ, “လုၢ်အီၣ်လုၢ်အီယသိတက့ၢ်. 18ယစံးဘၣ်နၤတၢ်မ့ၢ်တၢ်တီ, ဖဲနသးစၢ်ဒံးအခါန့ၣ်, နကတဲာ်ကတီၤထီၣ်နသးဒီးလဲၤဖဲနအဲၣ်ဒိးလဲၤန့ၣ် လီၤ. ဘၣ်ဆၣ်တုၤနသးပှၢ်ထီၣ်ဒီး, နကယူာ်ထီၣ်နစု တဖၣ်ဒီးပှၤအဂၤတဂၤကစၢဃာ်နၤဒီးကဆှၢနၤဆူတၢ်လီၢ်လၢ နတအဲၣ်ဒိးလဲၤဘၣ်န့ၣ်လီၤ.” 19(ယ့ၣ်ၡူးစံးတၢ်အံၤမ့ၢ်ဒ်သိးကဒုးနဲၣ်ဖျါထီၣ်ကျဲလၢ စီၤပ့းတရူးကဘၣ်သံဝဲဒီးမၤလၤကပီၤယွၤဒ်လဲၣ်အဂ့ၢ် န့ၣ်လီၤ.) ဝံၤဒီးယ့ၣ်ၡူးစံးဘၣ်အီၤ, “ဟဲဒီး ကဲဘၣ်ယပျဲၢ်ယဘီၣ် တက့ၢ်.”
ယ့ၣ်ၡူးဒီးအပျဲၢ်အဘီၣ်အဂၤတဂၤ
20ဒီးစီၤပ့းတရူးဃၣ်ဃီၤအသးဒီးထံၣ်အပျဲၢ်အဘီၣ်အဂၤတဂၤလၢ ယ့ၣ်ၡူးအဲၣ်အီၤအိၣ်လၢအလီၢ်ခံန့ၣ်လီၤ. မ့ၢ်ပှၤတဂၤဃီလၢအသန့ၤလီၤအသးသဃဲၤဒီးယ့ၣ်ၡူး, ဖဲအဝဲသ့ၣ်အီၣ်ဟါတၢ်အီၣ်အခါဒီးသံကွၢ်ယ့ၣ်ၡူး, “ကစၢ်ဧၢ, မ့ၢ်မတၤကဟ့ၣ်လီၤကွံာ်နၤန့ၣ်လဲၣ်.” 21ဖဲစီၤပ့းတရူးထံၣ်အီၤန့ၣ်, အဝဲသံကွၢ်ယ့ၣ်ၡူး, “ကစၢ်ဧၢ, ပှၤတဂၤအံၤတၢ်ကမၤအသးဒီးအီၤဒ်လဲၣ်.”
22ယ့ၣ်ၡူးစံးဆၢအီၤ, “ယသးမ့ၢ်အိၣ်လၢအဝဲကအိၣ်မူတုၤ လီၤလၢယဟဲက့ၤအဆၢကတီၢ်န့ၣ်ဒီး, တၢ်အံၤဘၣ်ဃးဒီးနၤ မနုၤလဲၣ်. ဟဲဒီးကဲဘၣ်ယပျဲၢ်ယဘီၣ်တက့ၢ်.”
23အန့ၣ်သတးဒီး, တၢ်ကစီၣ်ဟူထီၣ်သါလီၤလၢယ့ၣ်ၡူးအပျဲၢ် တဖၣ်အကျါလၢအပျဲၢ်အဘီၣ်တဂၤအံၤတဘၣ်သံဝဲဘၣ်လီၤ. ဘၣ်ဆၣ်, ယ့ၣ်ၡူးတစံးလၢအဝဲတဘၣ်သံဝဲန့ၣ်ဘၣ်. မ့မ့ၢ် ယ့ၣ်ၡူးစံးဝဲ, “ယမ့ၢ်သးအိၣ်လၢအဝဲကအိၣ်မူတုၤလီၤ လၢယဟဲက့ၤအဆၢကတီၢ်န့ၣ်ဒီး, တၢ်အံၤဘၣ်ဃးဒီးနၤမနုၤလဲၣ်.” တခီန့ၣ်လီၤ.
24အဝဲမ့ၢ်အပျဲၢ်အဘီၣ်တဂၤလၢအကတိၤဖျါထီၣ်တၢ်ဂ့ၢ်တဖၣ် အံၤ, မ့ၢ်ပှၤတဂၤဃီလၢအကွဲးနီၣ်ကွဲးဃါတၢ်သ့ၣ်တဖၣ် အံၤ, ဒီးပသ့ၣ်ညါလၢတၢ်လၢအဝဲအုၣ်အသးတဖၣ်န့ၣ်, မ့ၢ်တၢ်မ့ၢ်တၢ်တီလီၤ.
တၢ်ကတိၤလၢခံ
25တၢ်အဂုၤအဂၤတဖၣ်လၢယ့ၣ်ၡူးမၤဝဲန့ၣ်, အိၣ်ဒံးအါမံၤန့ၣ်လီၤ. တၢ်မ့ၢ်ကွဲးလီၤအီၤတမံၤဘၣ်တမံၤခဲလၢာ်ဒီး, ယဆိကမိၣ်လၢလံာ်တဖၣ်လၢအကဘၣ်တၢ်ကွဲးအီၤန့ၣ်, ဟီၣ်ခိၣ်ဒီဘ့ၣ်တမ့ၢ်လၢအကတြီၢ်လၢၤဘၣ်န့ၣ်လီၤ.
Currently Selected:
လံာ်ယိၤဟၣ် 21: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
