လံာ်ဃးကဲ 2
2
တၢ်လုၢ်ဟံၣ်အသီအတၢ်လီၤဘီလီၤမုၢ်
1လၢနံၣ်တနံၣ်ဃီ, လါနွံလါတလါထီၣ်ခံဆံတသီအနံၤန့ၣ်, ယွၤကတိၤကဒီးတၢ်ခီဖျိဝံဃးကဲလီၤ. 2အဝဲစံးဘၣ်တ့ၢ်စီၤဃးကဲလၢကကတိၤတၢ်ဒီးကီၢ်ယူဒၤအပဒိၣ် ဖးဒိၣ်စီၤစရူၤဘၤဘ့လး, ပှၤလုၢ်တၢ်အခိၣ်အဒိၣ်ကတၢၢ်စီၤယိၤရူဒီးဆူပှၤဂီၢ်မုၢ်ဒီး ကဘၣ်စံးဘၣ်အဝဲသ့ၣ်, 3“မ့ၢ်ပှၤအိၣ်လၢသုကျါတဂၤဂၤလၢအသ့ၣ်နီၣ် ထီၣ်ဒံးတၢ်လုၢ်ဟံၣ်န့ၣ်အတၢ်ဃံဒိၣ်လၤဒိၣ်အိၣ်ဒ်လဲၣ်န့ၣ်ဧါ. ခဲအံၤသုကွၢ်အီၤမၤသးဒ်လဲၣ်. ကအိၣ်ဖျါဒ်တမ့ၢ်ဘၣ်တၢ်နီ တမံၤအသိးန့ၣ်လီၤ. 4ဘၣ်ဆၣ်ခဲအံၤသးဟးဂီၤနီတဂၤတဂ့ၤ. မၤတၢ်တက့ၢ်. အဂ့ၢ်ဒ်အံၤ, ယအိၣ်ဒီးသုလီၤ. 5ဖဲသုဟးထီၣ်ကွံာ်လၢကီၢ်အဲၤကူပတူးန့ၣ်, ယအၢၣ်လီၤအီလီၤတ့ၢ်လၢယကအိၣ်ဒီးသုထီဘိလီၤ. ယအိၣ်ဒံးဒီးသုအဃိဒီး, ပျံၤတၢ်တဂ့ၤ.
6တယံာ်ဘၣ်န့ၣ်, ယကမၤဟူးဝးမူခိၣ်ဒီးဟီၣ်ခိၣ်, ခိဒီးပီၣ်လဲၣ်လီၤ. 7ယကမၤနၢၤကွံာ်ပှၤကလုာ်ခဲလၢာ်, ဒီးအဝဲသ့ၣ်အတၢ်ထူးတၢ်တီၤတဖၣ်ကဘၣ်တၢ်ဟဲစိာ်အီၤဖဲအံၤ, ဒီးတၢ်လုၢ်ဟံၣ်န့ၣ်ကဘၣ်တၢ်မၤပှဲၤအီၤဒီးတၢ်ထူးတၢ်တီၤလီၤ. 8စ့ဒီးထူခဲလၢာ်လၢဟီၣ်ခိၣ်ဒီဘ့ၣ်ညါန့ၣ်, မ့ၢ်ယတၢ်လီၤ. 9တၢ်လုၢ်ဟံၣ်အသီန့ၣ်ကဃံဒိၣ်လၤဒိၣ်န့ၢ်ဒံးအလီၢ်လံၤတဖျၢၣ်, ဒီးဖဲန့ၣ်, ယကဟ့ၣ်ယပှၤဂီၢ်မုၢ်လၢတၢ်ဘီၣ်တၢ်ညီဒီးတၢ်ဃူ တၢ်ဖိးလီၤ.” ယွၤသ့တၢ်လၢာ်ကစၢ်ကတိၤတ့ၢ်တၢ်လံ.
ဝံကူၣ်ထီၣ်ဖးလီၤတၢ် ဒီးပှၤလုၢ်တၢ်အခိၣ်တဖၣ်
10ဖဲစီၤဒၤရယါဝ့ၣ်ကဲစီၤပၤဖးဒိၣ်ခံနံၣ်တနံၣ်, လါခွံလါတလါထီၣ်ခံဆံလွံၢ်သီအနံၤန့ၣ်, ယွၤသ့တၢ်လၢာ်ကစၢ်ကတိၤတ့ၢ်ကဒီးတၢ်ဆူဝံဃးကဲလီၤ. 11အဝဲစံးဝဲ, “သံကွၢ်ပှၤလုၢ်တၢ်အခိၣ်တဖၣ်လၢတၢ်သိၣ်တၢ်ဘျၢ တမံၤဘၣ်ထွဲဒီးတၢ်သံကွၢ်အံၤအဂ့ၢ်တက့ၢ်. 12ပစံးဒၣ်ကလိာ်, ပှၤတဂၤဂၤဟံးန့ၢ်တၢ်ညၣ်စီဆှံတလိၣ် လၢတၢ်လုၢ်တၢ်ပာ်တမံၤအကျါဒီးစိာ်ဝဲလၢအဆ့ကၤဒိၣ် အထၢၣ်တဖျၢၣ်အပူၤလီၤ. အဝဲမ့ၢ်ပျဲအဆ့ကၤဒိၣ်ထိးဘၣ်ကိၣ် တဖျၢၣ်ဖျၢၣ်, တၢ်အီၣ်လၢပှၤဖီဝံၤ, စပံးထံ, သ့ၣ်စၤယံးအသိ မ့တမ့ၢ်တၢ်အီၣ်ထီရီၤတမံၤမံၤဒီး, တၢ်န့ၣ်ကမၤစီဆှံထီၣ်ကွံာ်တၢ်အီၣ်န့ၣ်စ့ၢ်ကီးဧါ.”
ဖဲတၢ်သံကွၢ်န့ၣ်ဘၣ်တၢ်သံကွၢ်အီၤဒီး ပှၤလုၢ်တၢ်အခိၣ်တဖၣ်စံးဆၢဝဲ, “တမ့ၢ်ဘၣ်.”
13ဒီးစီၤဃးကဲသံကွၢ်ဝဲ, “ပစံးဒၣ်ကလိာ်, ပှၤတဂၤကဲထီၣ်ကွံာ်ပှၤတကဆှီဘၣ်မ့ၢ်လၢအထိး ဘၣ်ပှၤသံစိၣ်တဂၤအဃိလီၤ. အဝဲမ့ၢ်ထိးဘၣ်တၢ်အီၣ်တဖၣ်အံၤတမံၤမံၤန့ၣ်, တၢ်န့ၣ်ကဒုးကဲထီၣ်တၢ်အီၣ်တဖၣ်န့ၣ်လၢတၢ်တကဆှီဘၣ်စ့ၢ်ကီးဧါ.”
ပှၤလုၢ်တၢ်အခိၣ်တဖၣ်စံးဆၢဝဲ, “မ့ၢ်လီၤ.”
14အန့ၣ်ဒီးစီၤဃးကဲစံးဝဲ, “ယွၤစံးလၢတၢ်တမံၤဃီဒုးဘၣ်ဃးပှၤကလုာ်အံၤအပှၤဂီၢ်မုၢ် ဒီးတၢ်တမံၤလၢ်လၢ်လၢအဝဲသ့ၣ်ဟ့ၣ်ထီၣ်န့ၣ်လီၤ. သတးဒီးတၢ်တမံၤလၢ်လၢ်လၢအဝဲသ့ၣ်လုၢ်ထီၣ်အီၤလၢတၢ်လုၢ်လီၢ် အဖီခိၣ်န့ၣ်, မ့ၢ်တၢ်တကဆှီဘၣ်လီၤ.”
ယွၤအၢၣ်လီၤအီလီၤအတၢ်ဆိၣ်ဂ့ၤ
15ယွၤစံးဝဲ, “တၢ်မနုၤမၤတ့ၢ်အသးဒီးသုလဲၣ်န့ၣ်, သုထံၣ်တသ့ဘၣ်ဧါ. တချုးလၢသုစးထီၣ်ဘှီကဒါက့ၤတၢ်လုၢ်ဟံၣ်ဒံးဘၣ်န့ၣ်, 16သုကလဲၤတ့ၢ်ဆူဘုဧိၤဟုဧိၤပာ်ဖှိၣ်သးအလီၢ်တပူၤ ဒီးမုၢ်လၢ်ထံၣ်ဘၣ်တၢ်ဃီၣ်န့ၢ်, ခံဆံနာ်ဘၣ်ဆၣ်, ဖဲန့ၣ်ကအိၣ်ထဲတဆံ နာ်ဧိၤလီၤ. သုကလဲၤတ့ၢ်ဒ်သိးသုကဃီၣ်န့ၢ်စပံးထံလၢနီၣ်စံၢ်စပံးထံ အပူၤအခွးယဲၢ်ဆံဘၣ်ဆၣ်, ဖဲန့ၣ်ကအိၣ်ထဲခံဆံခွးဧိၤလီၤ. 17ယမၢလီၤတ့ၢ်ကလံၤကိၢ်တဖၣ်ဒီးသူၣ်, ဒ်သိးကမၤဟးဂီၤတၢ်တမံၤလၢ်လၢ်လၢသုကျဲးစၢးသူၣ်လီၤဖျး လီၤအီၤ, ဘၣ်ဆၣ်သုတပီၢ်ယၢ်လီၤက့ၤတ့ၢ်ဒံးသုသးဘၣ်. 18တနံၤအံၤမ့ၢ်လါခွံလါတလါထီၣ်ခံဆံလွံၢ်နံၤတနံၤ, မုၢ်တနံၤဖဲတၢ်လုၢ်ဟံၣ်အခီၣ်ထံးဘၣ်တၢ်ပာ်လီၤအီၤ ဝံၤဝဲန့ၣ်လီၤ. စးထီၣ်ခဲအံၤဒီးဆူညါတၢ်မနုၤကမၤအသးလဲၣ်န့ၣ်, ကွၢ်တက့ၢ်. 19ဘုဧိၤဟုဧိၤမ့ၢ်တအိၣ်တ့ၢ်လၢၤဘၣ်ဆၣ်, စပံးမုၢ်တဖၣ်, ချၢၣ်ဒၢအထူၣ်တဖၣ်, သ့ၣ်သလဲတဖၣ်ဒီးသ့ၣ်စၤယံးတဖၣ်မ့ၢ်တသၣ်ထီၣ်ဒံးဒၣ်လဲာ်, စးထီၣ်ခဲအံၤဒီးဆူညါန့ၣ်ယကဆိၣ်ဂ့ၤသုလီၤ.”
ယွၤအတၢ်အၢၣ်လီၤအီလီၤစီၤစရူၤဘၤဘ့လး
20လၢလါထီၣ်ခံဆံလွံၢ်သီအနံၤ, တနံၤဃီန့ၣ်, ယွၤဟ့ၣ်တ့ၢ်စီၤဃးကဲလၢတၢ်ကစီၣ်ခံမံၤတမံၤ, 21လၢကီၢ်ယူဒၤအပဒိၣ်ဖးဒိၣ်စီၤစရူၤဘၤဘ့လးအဂီၢ်လီၤ. “ယကမၤဟူးမၤဝးမူခိၣ်ဒီးဟီၣ်ခိၣ်, 22ဒီးမၤနၢၤကွံာ်ဘီမုၢ်တဖၣ်ဒီးမၤကတၢၢ်ကွံာ်အဝဲသ့ၣ်အစိအ ကမီၤလီၤ. ယကမၤလီၤတကျၢၢ်ကွံာ်လ့ၣ်ကဟၣ်သုးဒီးအပှၤနီၣ်တၢ်တဖၣ်, ကသ့ၣ်တဖၣ်ကသံဝဲ, ဒီးအပှၤဒိးအီၤတဖၣ်ကမၤသံလိာ်အသးတဂၤဒီး တဂၤလီၤ. 23လၢမုၢ်နံၤအဝဲန့ၣ်, ယကဟံးန့ၢ်နၤ, ယခ့ယပှၤစီၤစရူၤဘၤဘ့လးဧၢ, ယကဃုထၢပာ်လီၤနၤဒ်သိးနကပၢတၢ်လၢယမံၤအပူၤလီၤ. နမ့ၢ်ပှၤတဂၤလၢယဃုထၢတ့ၢ်အီၤလံ.” ယွၤသ့တၢ်လၢာ်ကစၢ်စံးတ့ၢ်ဝဲ.
Currently Selected:
လံာ်ဃးကဲ 2: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
