လံာ်တၢ်ကဲထီၣ်အခီၣ်ထံး 33
33
စီၤယၤကိာ်သဂၢၢ်လိာ်အသးဒီးစီၤဧ့ၡီၤ
1စီၤယၤကိာ်ထံၣ်ဃီၤစီၤဧ့ၡီၤဟဲဝဲဒီးအပှၤလွံၢ်ကယၤဂၤန့ၣ် လီၤ. လၢတၢ်န့ၣ်အဃိအဝဲနီၤဖးလီၤန့ၢ်နီၢ်လ့ၤအၤ, နီၢ်ရၤဃ့လးဒီးအသံၣ်မါခံဂၤလၢအဖိဒၣ်ဝဲတဖၣ်စုာ်စုာ်လီၤ. 2အဝဲပာ်လီၤအသံၣ်မါခံဂၤဒီးအဖိတဖၣ်လၢတၢ်မဲာ်ညါကတၢၢ်, ဝံၤနီၢ်လ့ၤအၤဒီးအဖိတဖၣ်, ဒီးလၢခံကတၢၢ်နီၢ်ရၤဃ့လးဒီး စီၤယိၤသးအိၣ်ဝဲလၢတၢ်လီၢ်ခံကတၢၢ်န့ၣ်လီၤ. 3စီၤယၤကိာ်လဲၤဆိတၢ်လၢအဝဲသ့ၣ်အမဲာ်ညါဒီးဖဲအဘူးထီၣ်ဒီး အဒီပုၢ်ဝဲၢ်ခွါန့ၣ်အဝဲထိၣ်လီၤပှီၤအသးတုၤလၢဟီၣ်ခိၣ်လိၤ နွံဘျီန့ၣ်လီၤ. 4မ့မ့ၢ်စီၤဧ့ၡီၤဃ့ၢ်သဂၢၢ်အီၤ, ဖိးဟုအီၤဒီးနၢမူအီၤန့ၣ် လီၤ. အဝဲသ့ၣ်ခံဂၤလိာ်ဟီၣ်ဝဲဒၣ်န့ၣ်လီၤ. 5တုၤစီၤဧ့ၡီၤကွၢ်တၢ်ဝးဝးဒီးထံၣ်ဝဲပှၤပိာ်မုၣ်တဖၣ်ဒီးဖိ သၣ်တဖၣ်န့ၣ်သံကွၢ်ဝဲ, “ပှၤအိၣ်ဒီးနၤတဖၣ်အံၤမ့ၢ်မတၤလဲၣ်.”
စီၤယၤကိာ်စံးဆၢဝဲ, “တၢ်ဒိၣ်ဧၢ, အဝဲသ့ၣ်တဖၣ်အံၤမ့ၢ်ဖိ သၣ်တဖၣ်လၢကစၢ်ယွၤဟ့ၣ်သးကညီၤယၤန့ၣ်လီၤ.” 6တုၤနုၤတစု, စီၤယၤကိာ်အသံၣ်မါခံဂၤဟဲဝဲဒီးအဖိတဖၣ်ဒီး ထိၣ်လီၤပှီၤအသးန့ၣ်လီၤ. 7ဒီးနီၢ်လ့ၤအၤဒီးအဖိတဖၣ်ဟဲဝဲဒီးလၢခံကတၢၢ်န့ၣ်နီၢ်ရၤ ဃ့လးဟဲဝဲဒီးထိၣ်လီၤပှီၤအသးန့ၣ်လီၤ.
8စီၤဧ့ၡီၤသံကွၢ်ဝဲ, “ဆၣ်ဖိကီၢ်ဖိလၢနဟဲနီၣ်ဃုာ်ဒီးနၤ တဖၣ်တခီ, အခီပညီဒ်လဲၣ်.”
စီၤယၤကိာ်စံးဆၢဝဲ, “တၢ်န့ၣ်မ့ၢ်လၢယက ဒိးန့ၢ်နတၢ်သးကညီၤကွၢ်မဲာ်ယၤအဂီၢ်လီၤ.”
9ဘၣ်ဆၣ်ဒီး, စီၤဧ့ၡီၤစံးဝဲ, “ယပုၢ်ဧၢ, ယတၢ်အိၣ်လၢလၢပှဲၤပှဲၤလီၤ. ပၢၤဃာ်နတၢ်အိၣ်ဒီးနၤတက့ၢ်.”
10စီၤယၤကိာ်စံးဝဲ, “တမ့ၢ်ဘၣ်. နမ့ၢ်သးကညီၤကွၢ်မဲာ်ယၤဒီး ဝံသးစူၤတူၢ်လိာ်ယတၢ်ဟ့ၣ်တက့ၢ်. တၢ်ထံၣ်ဘၣ်နမဲာ်ဒ်လၢအခဲအံၤဖျါပှဲၤဒီးတၢ်သးကညီၤကွၢ်မဲာ် န့ၣ်, လၢယဂီၢ်လီၤဂာ်ဒ်တၢ်ထံၣ်ဘၣ်ကစၢ်ယွၤအမဲာ်အသိးလီၤ. 11ဝံသးစူၤတူၢ်လိာ်တၢ်ဟ့ၣ်လၢယဟဲစိာ်လၢနဂီၢ်န့ၣ်တက့ၢ်. ကစၢ်ယွၤသူၣ်ကညီၤသးကညီၤတ့ၢ်ယၤဒီးဟ့ၣ်တ့ၢ်ယၤကယဲၢ်တၢ်လၢ ယလိၣ်ခဲလၢာ်န့ၣ်လီၤ.” စီၤယၤကိာ်ဃ့ကညးအီၤသပှၢ်ပှၢ်တုၤလၢစီၤဧ့ၡီၤတူၢ်လိာ်ဝဲ န့ၣ်လီၤ.
12စီၤဧ့ၡီၤစံးဝဲ, “မ်ပကတဲာ်ကတီၤပသးလၢပကဟးထီၣ်တက့ၢ်. ယကလဲၤဆိတၢ်လၢနမဲာ်ညါလီၤ.”
13စီၤယၤကိာ်စံးဆၢဝဲ, “နသ့ၣ်ညါလၢဖိသၣ်တဖၣ်အဂံၢ်စၢ်ဘါစၢ် ဝဲ, ဒီးယကဘၣ်ဆိကမိၣ်တၢ်လၢသိ, ဂီၤဘုၣ်ဂီၤဖံးဒီးအဖိတဖၣ်အဂီၢ် လီၤ. အဝဲသ့ၣ်မ့ၢ်ဘၣ်တၢ်မိၤဆူၣ်အီၤလၢတနံၤဃီအတီၢ်ပူၤန့ၣ်, ဆၣ်ဖိကီၢ်ဖိဒီတဖုကသံဝဲလီၤ. 14ဝံသးစူၤလဲၤဆိတၢ်လၢယမဲာ်ညါ, ဒီးယကပိာ်ထွဲထီၣ်ကယီ ကယီ, လဲၤတၢ်တချ့ဖဲအချ့ဒ်ယသ့ဃုာ်ဒီးယဂီၤဘုၣ်ဂီၤဖံးဒီး ဖိသၣ်တဖၣ်တုၤယချုးန့ၢ်နၤလၢကီၢ်အဒိၣ်အပူၤန့ၣ်တက့ၢ်.”
15စီၤဧ့ၡီၤစံးဝဲ, “ပမ့ၢ်မၤဒ်န့ၣ်ဒီးပျဲယပာ်တီၢ်ယပှၤတနီၤ ဒီးနၤတက့ၢ်.”
ဘၣ်ဆၣ်စီၤယၤကိာ်စံးဆၢဝဲ, “အဝဲန့ၣ်အလီၢ်တအိၣ်ဘၣ်. အဂ့ၢ်ဒ်အံၤ, ယအဲၣ်ဒိးထဲနတၢ်သးကညီၤကွၢ်မဲာ်ဧိၤလီၤ.” 16ဒီးလၢတနံၤဃီန့ၣ်စီၤဧ့ၡီၤစးထီၣ်က့ၤကဒါက့ၤဝဲဆူကီၢ် အဒိၣ်န့ၣ်လီၤ. 17မ့မ့ၢ်စီၤယၤကိာ်လဲၤဝဲဆူစူးကိၤသးဖဲအသူၣ်ထီၣ်ဟံၣ်တဖျၢၣ် လၢအဂီၢ်ဒၣ်ဝဲဒီးတၢ်အိၣ်ကဒုအလီၢ်လၢအဂီၤဘုၣ်ဂီၤဖံးတဖၣ်အ ဂီၢ်န့ၣ်လီၤ. လၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢစူး ကိၤသးန့ၣ်လီၤ.
18လၢအတၢ်ဟဲက့ၤကဒါက့ၤလၢကီၢ်မ့းစပတၤမံန့ၣ်စီၤယၤကိာ်ဟဲ တုၤဘၣ်ဝဲဂ့ၤဂ့ၤဘၣ်ဘၣ်ဆူဝ့ၢ်ၡက့ၣ်အိၣ်လၢကီၢ်ကနၤဧၣ်အပူၤ ဒီးပာ်လီၤအသူၣ်ဒဲအလီၢ်လၢပျီတဘ့ၣ်အပူၤဘူးဒီးဝ့ၢ်န့ၣ် လီၤ. 19အဝဲပှ့ၤန့ၢ်ဝဲပျီတတီၤန့ၣ်လၢစီၤၡက့ၣ်အပၢ်ပှၤဃမိၣ်ဖိအစၢၤ အသွဲၣ်တဖၣ်အအိၣ်လၢစ့ညၣ်အဘ့ၣ်တကယၤလီၤ. 20ဒီးဖဲန့ၣ်မၤထီၣ်ဝဲတၢ်လုၢ်လီၢ်တခါဒီးကိးဝဲအမံၤလၢ “အ့ၤလံ,” ဒ်ပစံးတၢ်အသိး, “အံၣ်စရ့လးအကစၢ်ယွၤ” န့ၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 33: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
