လံာ်တၢ်ကဲထီၣ်အခီၣ်ထံး 27
27
စီၤအံၤစဲးဆိၣ်ဂ့ၤဆိၣ်ဝါစီၤယၤကိာ်
1ခဲအံၤ, စီၤအံၤစဲးန့ၣ်အသးပှၢ်ဝဲဒီးအမဲာ်တထံၣ်လၢၤဘၣ်တၢ် ဘၣ်. အဝဲမၢပှၤကိးန့ၢ်အဖိဝဲၢ်ကိစီၤဧ့ၡီၤဒီးစံးဘၣ်အီၤ, “ယဖိခွါဧၢ,” ဒီးစီၤဧ့ၡီၤစံးဆၢအီၤ, “မ့ၢ်, ယၤလီၤ.”
2ဒီးစီၤအံၤစဲးစံးဝဲဒၣ်, “နထံၣ်လၢယသးပှၢ်လံဒီးဘူးယကသံ လံ. 3ဟံးထီၣ်နချံၣ်ဒီးနပျၢ်တဖၣ်ဒီးလဲၤဆူခိခိၣ်ပှၢ်လၢ်ကျါဒီး မၤသံန့ၢ်ယၤလၢဆၣ်ဖိကီၢ်ဖိတဒုန့ၣ်တက့ၢ်. 4ဒီးဖီန့ၢ်ယၤတၢ်အီၣ်အဝံၣ်အဘဲန့ၣ်လၢအဘၣ်ယသးဒီးဟဲစိာ်အီၤ ဆူယအိၣ်တက့ၢ်. ယအီၣ်တၢ်မ့ၢ်ဝံၤဒီးယကဟ့ၣ်နၤယတၢ်ဆိၣ်ဂ့ၤလၢခံကတၢၢ်တချုး ယသံဒံးဘၣ်န့ၣ်လီၤ.”
5ဒီးဖဲစီၤအံၤစဲးကတိၤတၢ်ဒီးစီၤဧ့ၡီၤန့ၣ်နီၢ်ရံးဘကၤဒိ ကနၣ်ဝဲဒၣ်န့ၣ်လီၤ. ဒီးဖဲစီၤဧ့ၡီၤဟးထီၣ်လၢကလူၤခးတၢ်န့ၣ်, 6ပိာ်မုၣ်န့ၣ်စံးဘၣ်စီၤယၤကိာ်, “ယနၢ်ဟူနပၢ်စံးဘၣ်စီၤဧ့ ၡီၤဖဲမကိာ်န့ၣ်, 7ဟဲစိာ်န့ၢ်ယၤဆၣ်ဖိကီၢ်ဖိတဒုဒီးဖီအီၤလၢယဂီၢ်တက့ၢ်. ယအီၣ်တၢ်ဝံၤဒီးယကဟ့ၣ်နၤယတၢ်ဆိၣ်ဂ့ၤလၢယွၤအမဲာ်ညါတချုးလၢ ယသံဒံးဘၣ်န့ၣ်လီၤ.” 8ဒီးနီၢ်ရံးဘကၤစံးဝဲဒၣ်, “ခဲကနံၣ်အံၤယဖိခွါဧၢ, ဒိကနၣ်ယၤဒီးမၤတၢ်လၢယစံးဘၣ်နၤန့ၣ်တက့ၢ်. 9လဲၤဆူမဲာ်တဲးလဲးတဖုအအိၣ်ဒီးဟံးန့ၢ်မဲာ်တဲးလဲးစၢ်ဖိ အဘီၣ်ခံဒုဒ်သိးယဖီအီၤကသ့ဒီးကတဲာ်ကတီၤတၢ်အီၣ်တနီၤလၢနပၢ် ဘၣ်သူၣ်ဘၣ်သးဒိၣ်မးကသ့န့ၣ်တက့ၢ်. 10နလဲၤစိာ်န့ၢ်အီၤလၢကအီၣ်ဝဲကသ့ဒီးအဝဲကဟ့ၣ်နၤလၢအတၢ်ဆိၣ်ဂ့ၤ တချုးအသံဒံးဘၣ်န့ၣ်လီၤ.”
11ဘၣ်ဆၣ်စီၤယၤကိာ်စံးဘၣ်အမိၢ်လၢ, “နသ့ၣ်ညါလၢစီၤဧ့ၡီၤ မ့ၢ်ပှၤလၢအအိၣ်ဒီးအဆူၣ်အါမးလီၤ. ဘၣ်ဆၣ်ဒီးယဲဒၣ်အံၤယအိၣ်ဒီးယဖံးအဘျ့လီၤ. 12ဘၣ်တဘၣ်ယပၢ်ကကလၢၢ်ယၤဒီးသ့ၣ်ညါဝဲလၢယလီန့ၢ်အီၤလီၤ. လၢကျဲဒ်အံၤန့ၣ်ယကဒုးလီၤဘၣ်တၢ်ဆိၣ်အၢတမံၤလၢယဂီၢ်ဒၣ်ယဲ, လၢတၢ်ဆိၣ်ဂ့ၤအလီၢ်န့ၣ်လီၤ.”
13အမိၢ်စံးဆၢအီၤ, “ယဖိခွါဧၢ, မ်တၢ်ဆိၣ်အၢထီဒါနၤတမံၤ ဂ့ၤတမံၤဂ့ၤန့ၣ်လီၤဘၣ်လၢယလိၤတက့ၢ်. မၤဒ်ယတဲနၤအသိး, လဲၤဒီးဟဲက့ၤစိာ်န့ၢ်ယၤလၢမဲာ်တဲးလဲးတဖၣ်န့ၣ်တက့ၢ်.” 14မၤသးဒ်န့ၣ်ဒီး, စီၤယၤကိာ်လဲၤဝဲဒ်သိးကမၤန့ၢ်မဲာ်တဲးလဲး တဖၣ်ဒီးဟဲက့ၤစိာ်အီၤဆူအအိၣ်ဒီးအဝဲဖီထီၣ်တၢ်အီၣ်တကလုာ် လၢအပၢ်ဘၣ်သူၣ်ဘၣ်သးဒိၣ်မးန့ၣ်လီၤ. 15ဒီးနီၢ်ရံးဘကၤဟံးန့ၢ်စီၤဧ့ၡီၤအကူအသိးအဂ့ၤကတၢၢ်လၢအပာ် ဃာ်ဝဲလၢဟံၣ်ပူၤဒီးဒုးသိးထီၣ်စီၤယၤကိာ်န့ၣ်လီၤ. 16ဒီးအဝဲပာ်ထီၣ်မဲာ်တဲးလဲးအဖံးလၢစီၤယၤကိာ်အစုဒုၣ်စုတီၤ အလိၤဒီးအကိာ်လၢအဆူၣ်တအိၣ်ဘၣ်အလိၤန့ၣ်လီၤ. 17ဒီးဟ့ၣ်လီၤအီၤတၢ်အီၣ်လၢအဝံၣ်အဘဲဃုာ်ဒီးကိၣ်တဖၣ်လၢအဝဲ ကုၢ်ဝဲဒၣ်န့ၣ်လီၤ.
18အန့ၣ်ဝံၤဒီးစီၤယၤကိာ်လဲၤဆူအပၢ်အအိၣ်ဒီးစံးဝဲ, “ပၢ်ဧၢ,”
ဒီးစီၤအံၤစဲးစံးဆၢဝဲ, “မ့ၢ်လီၤ, ယဖိခွါဧၢ, နမ့ၢ်ယဖိခွါလၢလဲၣ်တဂၤလဲၣ်.”
19ဒီးစီၤယၤကိာ်စံးဆၢအီၤ, “ယမ့ၢ်နဖိဝဲၢ်ကိစီၤဧ့ၤၡီၤ လီၤ. ယမၤလံတၢ်ဒ်နတဲတ့ၢ်ယၤအသိးန့ၣ်လီၤ. ဝံသးစူၤဆ့ၣ်နီၤဒီး အီၣ်တၢ်ညၣ်တနီၤလၢယဟဲစိာ်န့ၢ်နၤဒ်သိးနဟ့ၣ်ယၤနတၢ်ဆိၣ်ဂ့ၤ ကသ့အဂီၢ်န့ၣ်တက့ၢ်.”
20ဒီးစီၤအံၤစဲးစံးဝဲဒၣ်, “ယဖိခွါဧၢ, နထံၣ်န့ၢ်တၢ်ချ့ထဲအံၤလၢကျဲ ဒ်လဲၣ်.”
ဒီးစီၤယၤကိာ်စံးဆၢအီၤ, “ယွၤ, နကစၢ်ယွၤမၤစၢၤယၤဒ်သိး ယကထံၣ်န့ၢ်အီၤလီၤ.”
21ဒီးစီၤအံၤစဲးစံးဘၣ်စီၤယၤကိာ်, “ဝံသးစူၤသုးဘူးနသး ဆူယအိၣ်ဒ်သိးယကလၢၢ်ကွၢ်နၤကသ့အဂီၢ်တက့ၢ်. နမ့ၢ်စီၤဧ့ၡီၤသပှၢ်တၢၢ်ဧါ.” 22ဒီးစီၤယၤကိာ်သုးအသးဘူးထီၣ်ဆူအပၢ်အအိၣ်ဒီးအပၢ်ကလၢၢ်အီၤ ဒီးစံးဝဲဒၣ်, “နကလုၢ်လီၤဂာ်ဒ်စီၤယၤကိာ်အကလုၢ်လီၤ. မ့မ့ၢ်နစုလီၤဂာ်ဒ်စီၤဧ့ၡီၤအစုလီၤ.” 23ဒီးစီၤအံၤစဲးတိၢ်နီၣ်စီၤယၤကိာ်တဘၣ်ဘၣ်. အဂ့ၢ်ဒ်အံၤ, စီၤယၤကိာ်အစုဒုၣ်စုတီၤတဖၣ်အိၣ်ဒီးအဆူၣ်ဒ်စီၤ ဧ့ၡီၤအသိးန့ၣ်လီၤ. ဖဲလၢအသါကဟ့ၣ်ဝဲအတၢ်ဆိၣ်ဂ့ၤန့ၣ် 24သံကွၢ်ကဒီးဝဲ, “နမ့ၢ်စီၤဧ့ၡီၤသပှၢ်တၢၢ်ဧါ”
ဒီးစီၤယၤကိာ်စံးဆၢဝဲ, “ယၤလီၤ.”
25ဒီးစီၤအံၤစဲးစံးဝဲ, “ဟဲစိာ်န့ၢ်ယၤတၢ်ညၣ်တနီၤတက့ၢ်. ယအီၣ်မ့ၢ်ဝံၤဒီးယကဆိၣ်ဂ့ၤနၤလီၤ.” ဒီးစီၤယၤကိာ်ဟဲစိာ်န့ၢ်အီၤတၢ်န့ၣ်ဆူအအိၣ်လီၤ. ဒီးအဝဲဟဲစိာ်န့ၢ်အီၤစ့ၢ်ကီးစပံးထံလၢကအီဝဲအဂီၢ်န့ၣ် လီၤ. 26ဒီးအပၢ်စံးဘၣ်အီၤ, “ယဖိခွါဧၢ, သုးဘူးနသးဆူယအိၣ်ဒီးနၢ မူယၤတက့ၢ်.” 27ဒီးဖဲအဟဲလၢကနၢမူအီၤန့ၣ်စီၤအံၤစဲးနၢကွၢ်တ့ၢ်ဝဲအကူ အသိးအစိဒီးဆိၣ်ဂ့ၤအီၤန့ၣ်လီၤ. ဒီးစီၤအံၤစဲးစံးဝဲ, “ယဖိခွါ, အစိလၢအနၢဘၣ်ယၤမုာ်အံၤမၤသးဒ်စံာ်ပျီတပျီ လၢယွၤဆိၣ်ဂ့ၤအီၤအစိအသိးန့ၣ်လီၤ. 28မ်ကစၢ်ယွၤဟ့ၣ်လီၤနၤမူခိၣ်အပစီၤထံဒီးမၤပှဲၤနစံာ်ပျီ တဖၣ်လၢဟီၣ်ခိၣ်ညၣ်ထ့ၣ်တက့ၢ်. မ်ယွၤဟ့ၣ်နၤလၢဘုဧိၤဟုဧိၤဒီးစပံးထံအါအါကလဲာ်တက့ၢ်. 29မ်ပှၤကလုာ်တဖၣ်ကဲထီၣ်နခ့နပှၤတဖၣ်ဒီးပှၤဂီၢ်မုၢ်တဖၣ်တီၤလီၤ လၢနမဲာ်ညါတက့ၢ်. မ်နပၢဘၣ်နဘူးနတံၢ်ခဲလၢာ်ဒီးမ်နမိၢ်အစၢၤအသွဲၣ်တဖၣ်တီၤ လီၤလၢနမဲာ်ညါတက့ၢ်. မ်ပှၤလၢအဆိၣ်အၢနၤကဘၣ်တၢ်ဆိၣ်အၢဒီးပှၤလၢအဆိၣ်ဂ့ၤနၤကဘၣ် တၢ်ဆိၣ်ဂ့ၤတက့ၢ်.”
စီၤဧ့ၡီၤဃ့ကညးစ့ၢ်ကီးစီၤအံၤစဲးအတၢ်ဆိၣ်ဂ့ၤ
30စီၤအံၤစဲးဆိၣ်ဂ့ၤစီၤယၤကိာ်ဝံၤဒီးဖဲစီၤယၤကိာ်ဟးထီၣ် ဝဲတကီၢ်ခါန့ၣ်အဝဲၢ်စီၤဧ့ၡီၤဟဲက့ၤလၢအလဲၤလူၤခးတၢ်လီၤ. 31အဝဲစ့ၢ်ကီးဖီတၢ်အီၣ်လၢအဝံၣ်အဘဲဒီးဟဲစိာ်ဆူအပၢ်အအိၣ်န့ၣ် လီၤ. အဝဲစံး, “ပၢ်ဧၢ, ဝံသးစူၤဆ့ၣ်နီၤဒီးအီၣ်တၢ်ညၣ်တနီၤလၢ ယဟဲစိာ်န့ၢ်နၤဒ်သိးနဟ့ၣ်ယၤနတၢ်ဆိၣ်ဂ့ၤကသ့န့ၣ်တက့ၢ်.”
32စီၤအံၤစဲးသံကွၢ်ဝဲ, “နမ့ၢ်မတၤလဲၣ်.”
စီၤဧ့ၡီၤစံးဆၢဝဲ, “နဖိဝဲၢ်ကိစီၤဧ့ၡီၤလီၤ.”
33စီၤအံၤစဲးဖုးသံပျီၢ်ဂီၤဒီးကနိးကစုာ်ထီၣ်ဒီဂၤညါဒီး သံကွၢ်ဝဲ, “ပှၤလၢအမၤသံဆၣ်ဖိကီၢ်ဖိဒီးဟဲစိာ်ဆူယအိၣ်န့ၣ်မ့ၢ်မတၤ တဂၤလဲၣ်. ယအီၣ်တ့ၢ်လံတချုးနဟဲန့ၣ်လီၤ. ယဟ့ၣ်လံအီၤယတၢ်ဆိၣ်ဂ့ၤလၢခံကတၢၢ်ဒီးမ့ၢ်အတၢ်လီၤစိၤလီၤ ထီန့ၣ်လီၤ.”
34တုၤစီၤဧ့ၡီၤနၢ်ဟူတၢ်အံၤန့ၣ်ဟီၣ်ကိးပသူထီၣ်ဖးဒိၣ်ဒီး နးနးကလဲာ်ဒီးစံးဝဲ, “ပၢ်ဧၢ, ဟ့ၣ်ယၤစ့ၢ်ကီးနတၢ်ဆိၣ်ဂ့ၤတက့ၢ်.” 35စီၤအံၤစဲးစံးဝဲ, “နပုၢ်ဟဲဒီးလီန့ၢ်ယၤလံ. အဝဲဟံးန့ၢ်ကွံာ်နတၢ်ဆိၣ်ဂ့ၤလံ.”
36စီၤဧ့ၡီၤစံးဝဲ, “အဝဲအံၤမ့ၢ်အတၢ်လိာ်တရံးအသးလၢယဖီ ခိၣ်ခံဘျီတဘျီလီၤ. အမံၤမ့ၢ်စီၤယၤကိာ်န့ၣ်တလီၤကမၢကမၣ်ဘၣ်. အဝဲဟံးန့ၢ်ဖိဝဲၢ်ကိအတၢ်န့ၢ်သါလၢယၤဒီးခဲကနံၣ်အံၤဟံး န့ၢ်ကွံာ်ယတၢ်ဆိၣ်ဂ့ၤလံ. မ့ၢ်နတပာ်တီၣ်တ့ၢ်တၢ်ဆိၣ်ဂ့ၤတမံၤလၢယဂီၢ်လၢၤန့ၣ်ဘၣ်ဧါ.”
37စီၤအံၤစဲးစံးဆၢဝဲ, “ယဖိခွါဧၢ, ယဒုးကဲတ့ၢ်အီၤကစၢ်လၢ နဖီခိၣ်လံ. ဒီးယဒုးကဲအဘူးအတံၢ်ခဲလၢာ်လၢအကုၢ်အပှၤတဖၣ်လီၤ. ယဟ့ၣ်တ့ၢ်လံအီၤဘုဧိၤဟုဧိၤဒီးစပံးထံလံ. ခဲအံၤ, ယမၤတၢ်လၢနဂီၢ်တသ့နီတမံၤလၢၤဘၣ်.”
38စီၤဧ့ၡီၤဃ့ကညးအပၢ်, “ပၢ်ဧၢ, မ့ၢ်နအိၣ်ဒီးတၢ်ဆိၣ်ဂ့ၤထဲ တမံၤဧိၤလီၤဧါ. ဆိၣ်ဂ့ၤစ့ၢ်ကီးယၤတက့ၢ်.” ဒီးစီၤဧ့ၡီၤဟီၣ်ဝဲလီၤ.
39တုၤနုၤတစု, စီၤအံၤစဲးစံးဘၣ်အီၤ, “ပစီၤထံလၢမူခိၣ် တအိၣ်လၢနဂီၢ်ဘၣ်. ပျီတဖၣ်လၢဟီၣ်ခိၣ်ညၣ်ထ့ၣ်ဂ့ၤစ့ၢ်ကီးတအိၣ်လၢနဂီၢ်ဘၣ်.
40နကအိၣ်မူခီဖျိနနးလီၤ. ဘၣ်ဆၣ်ဒီးနကမ့ၢ်နပုၢ်အကုၢ်အပှၤလီၤ. ဒီးတုၤနပူထီၣ်အီၤဒီးနကပူၤဖျဲးလၢအတၢ်ပၢနၤလီၤ.” 41စီၤဧ့ၤၡီၤသးဟ့စီၤယၤကိာ်လီၤ. အဂ့ၢ်ဒ်အံၤ, အပၢ်ဟ့ၣ်လံစီၤယၤကိာ်လၢတၢ်ဆိၣ်ဂ့ၤအဃိန့ၣ်လီၤ. ဒီးဆိကမိၣ်ထီၣ်ဝဲ, “အကတီၢ်လၢတၢ်ဟီၣ်တၢ်ယၢၤလၢယပၢ်အတၢ်သံ အဂီၢ်အံၤဘူးထီၣ်လံ. တုၤနုၤတစု, ယကမၤသံစီၤယၤကိာ်လီၤ.”
42ဒီးတုၤနီၢ်ရံးဘကၤနၢ်ဟူစီၤဧ့ၡီၤအတၢ်ကူၣ်န့ၣ်မၢပှၤလဲၤ ကိးန့ၢ်စီၤယၤကိာ်ဒီးစံးဝဲ, “ကနၣ်, နဝဲၢ်စီၤဧ့ၡီၤကူၣ်ထီၣ်ဝဲဒၣ်လၢကဟ့ၣ်ကၣ်တၢ်လၢနၤ ဒီးမၤသံနၤတက့ၢ်. 43ခဲကနံၣ်အံၤ, ဖိခွါဧၢ, မၤဒ်ယစံးဘၣ်နၤအသိးန့ၣ်တက့ၢ်. လဲၤတဘျီဃီဆူယဒီပုၢ်ဝဲၢ်ခွါစီၤလၤဘၣ်အအိၣ်လၢဝ့ၢ်ဟၤရၣ် အပူၤန့ၣ်တက့ၢ်. 44ဒီးအိၣ်ဆိးဒီးအီၤတစိၢ်တလီၢ်တုၤနဝဲၢ်အတၢ်သးထီၣ်ခုၣ်လီၤတက့ၢ်. 45ဒီးကသးပ့ၤနီၣ်တၢ်လၢနမၤတ့ၢ်အီၤန့ၣ်လီၤ. ဒီးယကဆှၢလီၤပှၤတဂၤလၢကလဲၤက့ၤကိးနၤလီၤ. ဘၣ်မနုၤလၢယဖိခွါခံဂၤလိာ်ကလီၤမၢ်န့ၢ်ယၤလၢတနံၤဃီ အတီၢ်ပူၤန့ၣ်လဲၣ်.”
စီၤအံၤစဲးဆှၢလီၤစီၤယၤကိာ် ဆူစီၤလၤဘၣ်အအိၣ်
46ဒီးနီၢ်ရံးဘကၤစံးဘၣ်စီၤအံၤစဲး, “ယသးလီၤဘှံးလီၤဘှါ လၢစီၤဧ့ၡီၤအမါပှၤတခီဘီမုၢ်ဖိတဖၣ်အဃိလီၤ. ဒီးစီၤယၤကိာ်မ့ၢ်ဟံးန့ၢ်စ့ၢ်ကီးအမါလၢပှၤဃ့ၤသးမုၣ်ဖိ ဒီးယကသံစ့ၢ်ကီးလီၤ.”
Currently Selected:
လံာ်တၢ်ကဲထီၣ်အခီၣ်ထံး 27: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
