လံာ်တၢ်ကဲထီၣ်အခီၣ်ထံး 24
24
မါတဂၤလၢစီၤအံၤစဲးအဂီၢ်
1ခဲအံၤစီၤအၤဘြၤဟၣ်အသးပှၢ်ဒိၣ်မးလံ, ဒီးယွၤဆိၣ်ဂ့ၤတ့ၢ် အီၤလၢကယဲၢ်တၢ်လၢအမၤတ့ၢ်ဝဲခဲလၢာ်အပူၤန့ၣ်လီၤ. 2စီၤအၤဘြၤဟၣ်စံးဘၣ်အခ့အပှၤလၢအသးပှၢ်ကတၢၢ်, ပှၤလၢတၢ်ဟ့ၣ်စိဟ့ၣ်ကမီၤအီၤဒ်သိးကပၢဆှၢသုးကျဲၤကယဲၢ်တၢ် အိၣ်ဒီးစီၤအၤဘြၤဟၣ်န့ၣ်, “ပာ်နစုလၢယကံၣ်ဒုၣ်အကဆူးဒီးမၤတၢ်ဆိၣ်တမံၤတက့ၢ်. 3ယအဲၣ်ဒိးလၢနကမၤတၢ်ဆိၣ်တမံၤလၢယွၤ, မူခိၣ်ဒီးဟီၣ်ခိၣ်အကစၢ်ယွၤအမံၤအပူၤလၢနတဃုထၢန့ၢ်ဘၣ်ယဖိ ခွါအမါတဂၤလၢပှၤဂီၢ်မုၢ်ဖဲအံၤလၢကီၢ်ကနၤဧၣ်အပူၤဘၣ်န့ၣ် လီၤ. 4နဘၣ်က့ၤဆူကီၢ်လၢယအိၣ်ဖျဲၣ်ထီၣ်ဝဲဒီးမၤန့ၢ်မါတဂၤလၢယဖိ ခွါစီၤအံၤစဲးအဂီၢ်လၢယဘူးယတံၢ်တဖၣ်အကျါန့ၣ်လီၤ.”
5ဘၣ်ဆၣ်ဒီးတၢ်ခ့တၢ်ပှၤန့ၣ်သံကွၢ်အီၤ, “ဖိသၣ်ပိာ်မုၣ်န့ၣ် မ့ၢ်တပာ်တီၢ်အဟံၣ်အဃီလၢအကဟဲဒီးယၤဆူထံကီၢ်အံၤန့ၣ်ယကဘၣ် မၤဒ်လဲၣ်. မ့ၢ်ယကဘၣ်ဆှၢလီၤကဒါက့ၤနဖိ ခွါဆူကီၢ်လၢနဟဲထီၣ်လၢအပူၤန့ၣ်ဧါ.”
6စီၤအၤဘြၤဟၣ်စံးဆၢအီၤ, “မၤလီၤတံၢ်လၢနသုတဒုးက့ၤကဒါ က့ၤဘၣ်ယဖိခွါဖဲန့ၣ်တဂ့ၤ. 7ယွၤ, မူခိၣ်အကစၢ်ယွၤ, စိာ်ထီၣ်ယၤလၢယပၢ်အဟံၣ်ဒီးယဘူးယတံၢ် သ့ၣ်တဖၣ်အထံအကီၢ်ဒီးအၢၣ်လီၤယၤသညူးသပှၢ်လၢကဟ့ၣ်ဝဲကီၢ်တဘ့ၣ် အံၤလၢယစၢၤယသွဲၣ်တဖၣ်န့ၣ်လီၤ. အဝဲကဆှၢလီၤအကလူးလၢနမဲာ်ညါဒ်သိးနကမၤန့ၢ်မါတဂၤဖဲန့ၣ်လၢ ယဖိခွါအဂီၢ်န့ၣ်လီၤ. 8ပိာ်မုၣ်ဖိသၣ်အံၤအသးမ့ၢ်တအိၣ်လၢကဟဲဃုာ်ဒီးနၤဘၣ်ဒီးနက ပူၤဖျဲးဒီးတၢ်ဆိၣ်အံၤန့ၣ်လီၤ. ဘၣ်ဆၣ်ဒီးကွၢ်ဖဲတၢ်ကမၤအသးတမံၤဂ့ၤတမံၤဂ့ၤန့ၣ်နတဘၣ်ဒုး က့ၤကဒါက့ၤယဖိခွါဆူန့ၣ်ဘၣ်.” 9မၤသးဒ်န့ၣ်ဒီး, တၢ်ခ့တၢ်ပှၤန့ၣ်ပာ်အစုလၢအကစၢ်စီၤအၤဘြၤဟၣ် အကံၣ်ဒုၣ်အကဆူးဒီးမၤတၢ်ဆိၣ်တမံၤလၢစီၤအၤဘြၤဟၣ်ဃ့တ့ၢ် အီၤန့ၣ်လီၤ.
10တၢ်ခ့တၢ်ပှၤလၢတၢ်ဟ့ၣ်စိဟ့ၣ်ကမီၤအီၤဒ်သိးကပၢဆှၢသုးကျဲၤ ဒီးပၢၤစီၤအၤဘြၤဟၣ်အတၢ်စုလီၢ်ခီၣ်ခိၣ်တဂၤအံၤ, ဟံးန့ၢ်အကစၢ်စီၤအၤဘြၤဟၣ်အကီၤလၤအူးအဒုတဆံဒီးလဲၤဝဲဆူ ဝ့ၢ်လၢကီၢ်မ့းစပတၤမံအကလံၤစိးအပူၤဖဲစီၤနၤဃိၢ်အိၣ်ဆိး တ့ၢ်ဝဲန့ၣ်လီၤ. 11ဒီးဖဲအလဲၤတုၤဝဲအခါန့ၣ်, အဝဲဒုးကိာ်လီၤကီၤလၤအူးတဖၣ် ဖဲ ထံပူၤအိၣ်လၢဝ့ၢ်အချၢန့ၣ်လီၤ. တၢ်အကတီၢ်အံၤန့ၣ်မ့ၢ်ဝဲ ဘူးမုၢ်ကဟါလီၤအကတီၢ်ဖဲပှၤပိာ်မုၣ်သ့ၣ်တဖၣ်ဟဲထီၣ်ဒ်သိး ကဒၢၣ်ထံန့ၣ်လီၤ. 12အဝဲဘါထုကဖၣ်တၢ်, “ယွၤ, ယကစၢ်စီၤအၤဘြၤဟၣ်အကစၢ်ယွၤဧၢ, ဟ့ၣ်ယၤတၢ်မၤနၢၤလၢတနံၤအံၤဒီးဟံးဃာ်နတၢ်အၢၣ်လီၤဒီးယကစၢ် စီၤအၤဘြၤဟၣ်တက့ၢ်. 13ခဲအံၤယအိၣ်လၢထံပူၤဖဲပှၤပိာ်မုၣ်သးစၢ်သ့ၣ်တဖၣ်လၢဝ့ၢ်ပူၤ ကဟဲဒ်သိးအကဒၢၣ်ထံအဂီၢ်လီၤ. 14ယကစံးဘၣ်အဝဲသ့ၣ်အကျါတဂၤ, ‘ဝံသးစူၤပာ်လီၤနသပၢၤထံဒီး ပျဲယအီထံတက့ၢ်.’ အဝဲမ့ၢ်စံးဝဲလၢ ‘အီတက့ၢ်, ဒီးယကဟဲစိာ်စ့ၢ်ကီးထံလၢနကီၤလၤအူးအဂီၢ်’ န့ၣ်, မ်အဝဲဒၣ်ကမ့ၢ်ပှၤတဂၤလၢနဃုထၢတ့ၢ်အီၤလၢနခ့နပှၤစီၤအံၤ စဲးအဂီၢ်န့ၣ်တက့ၢ်. တၢ်အံၤမ့ၢ်မၤအသးဒီးယကသ့ၣ်ညါလၢနဟံးဃာ်နတၢ်အၢၣ်လီၤဒီး ယကစၢ်စီၤအၤဘြၤဟၣ်န့ၣ်လီၤ.”
15တချုးလၢအဘါထုကဖၣ်တၢ်ဝံၤဒံးဘၣ်န့ၣ်နီၢ်ရံးဘကၤဟဲ တုၤလၢထံပူၤဃုာ်ဒီးအသပၢၤထံလၢအဖံဘၣ်ခိၣ်လီၤ. နီၢ်ရံးဘကၤမ့ၢ်စီၤဘသူၤအ့လးအဖိမုၣ်န့ၣ်လီၤ. ဒီးစီၤဘသူၤအ့လးမ့ၢ်ဝဲစီၤအၤဘြၤဟၣ်အဒီပုၢ်ဝဲၢ်ခွါစီၤ နၤဃိၢ်ဒီးနီၢ်မံးလကၤအဖိခွါန့ၣ်လီၤ. 16ဒီးနီၢ်ရံးဘကၤန့ၣ်မ့ၢ်ပိာ်မုၣ်သးစၢ်လၢအဃံလၤဝဲဒိၣ်မး ဒီးမ့ၢ်ဒံးဝဲမုၣ်ကနီၤဖိတဂၤန့ၣ်လီၤ. အဝဲလဲၤလီၤဆူထံပူၤ, မၤပှဲၤအသပၢၤထံဝံၤဒီးဟဲက့ၤဝဲဒၣ် လီၤ. 17တၢ်ခ့တၢ်ပှၤအံၤလဲၤဃ့ၢ်သဂၢၢ်အီၤဒီးစံးဝဲ, “ဝံသးစူၤဒုးအီၤယၤထံလၢနသပၢၤထံအပူၤတက့ၢ်.”
18ဒီးနီၢ်ရံးဘကၤစံးဆၢအီၤ, “တၢ်ဒိၣ်ဧၢ, အီတက့ၢ်.” ဒီးပာ်လီၤဝဲအသပၢၤထံလၢအစုလိၤတဘျီဃီဒီးဒုးအီအီၤလီၤ. 19ဒီးတုၤအအီဝဲဝံၤဒီးပိာ်မုၣ်စံးဘၣ်အီၤ, “ယကဟဲစိာ်န့ၢ်စ့ၢ်ကီးထံလၢနကီၤလၤအူးတဖၣ်အဂီၢ်ဒီးဒုးအီ အီၤတုၤအအီဘျဲးအီတက့ၢ်.” 20ဒီးနီၢ်ရံးဘကၤလူလီၤထံလၢအထံသပၢၤပူၤဆူဆၣ်ဖိကီၢ်ဖိ တဖၣ်အထံကျိးပူၤဒီးလဲၤဃ့ၢ်ဆူထံပူၤချ့ချ့ဒ်သိးကမၤန့ၢ် အါထီၣ်ထံတုၤအဒုးအီကီၤလၤအူးခဲလၢာ်လၢထံန့ၣ်လီၤ. 21ပှၤတဂၤအံၤကွၢ်ဝဲအီၤကစုဒုဒ်သိးကသ့ၣ်ညါဝဲဒၣ်လၢမ့ၢ်ယွၤ ဟ့ၣ်အီၤတၢ်မၤနၢၤလံဧါန့ၣ်လီၤ.
22ဖဲပိာ်မုၣ်အံၤမၤတၢ်ဝံၤတစုန့ၣ်ပှၤတဂၤအံၤဟံးန့ၣ်ကွီၤထူ လုၢ်ဒိၣ်ပှ့ၤဒိၣ်တကွီၤဒီးဘျးလီၤစဲၤဝဲလၢနီၢ်ရံးဘကၤအနါ ဒ့ အပူၤဒီးဒုးသိးထီၣ်အီၤထံဖှံၣ်ထူဖးဒိၣ်ခံဘိလၢအစုဒုၣ် အလိၤန့ၣ်လီၤ. 23ဒီးစံးဝဲဒၣ်, “ဝံသးစူၤတဲဘၣ်ယၤလၢနပၢ်မ့ၢ်မတၤမတၤတ က့ၢ်. မ့ၢ်ဒၢးအိၣ်လၢအဟံၣ်ပူၤလၢယပှၤတဖၣ်ဒီးယၤကမံတနၤအံၤအဂီၢ် ကစီဒီဧါ.”
24ဒီးနီၢ်ရံးဘကၤစံးဆၢအီၤ, “ယပၢ်မ့ၢ်စီၤဘသူၤအ့လးလီၤ. အဝဲဒၣ်မ့ၢ်စီၤနၤဃိၢ်ဒီးနီၢ်မံးလကၤအဖိခွါန့ၣ်လီၤ.” 25ဒီးစံးဘၣ်စ့ၢ်ကီးအီၤ, “ဘုလီၢ်ဒီးဆၣ်ဖိကီၢ်ဖိအဆၣ်အိၣ် အါမးလၢပဟံၣ်ဒီးတၢ်လီၢ်အိၣ်တပူၤလၢသုကအိၣ်ကဆိးအဂီၢ်န့ၣ် လီၤ.”
26တုၤနုၤတစု, ပှၤတဂၤအံၤချံးခီၣ်တီၤလီၤဒီးဘူၣ်ထီၣ်ဘါထီၣ် ယွၤလီၤ. 27အဝဲစံး, “မ်ယွၤ, ယကစၢ်စီၤအၤဘြၤဟၣ်အကစၢ်ယွၤလၢအတီဒီး အတၢ်အၢၣ်လီၤဒီးယကစၢ်စီၤအၤဘြၤဟၣ်တဂၤအံၤဘၣ်တၢ်စံးထီၣ်ပ တြၢၤအီၤတက့ၢ်. ယွၤဆှၢတ့ၢ်ယၤလိၤလိၤဆူယကစၢ်စီၤအၤဘြၤဟၣ်အဒူၣ်ဖိထၢဖိ အအိၣ်လီၤ.”
28ဒီးပိာ်မုၣ်သးစၢ်န့ၣ်က့ၤဃ့ၢ်ဆူအမိၢ်အဟံၣ်ဒီးတဲဘၣ်တၢ်မၤ အသးခဲလၢာ်န့ၣ်လီၤ. 29နီၢ်ရံးဘကၤန့ၣ်အိၣ်ဒီးအဒီပုၢ်ဝဲၢ်ခွါတဂၤလၢအမံၤမ့ၢ်ဝဲ စီၤလၤဘၣ်န့ၣ်လီၤ. ဒီးစီၤလၤဘၣ်လဲၤဃ့ၢ်ထီၣ်ဆူတၢ်ချၢဒ်သိးအကလဲၤဆူထံပူၤဖဲ စီၤအၤဘြၤဟၣ်အခ့အပှၤအိၣ်ဝဲအလီၢ်န့ၣ်လီၤ. 30စီၤလၤဘၣ်ထံၣ်ဝဲနါဒ့ကွီၤထူဒီးထံဖှံၣ်တဖၣ်လၢအအိၣ်လၢအ ဒီ ပုၢ်ဝဲၢ်မုၣ်နီၢ်ရံးဘကၤအစုဒုၣ်လိၤဒီးနၢ်ဟူပိာ်မုၣ်စံးတၢ် လၢပှၤတဂၤန့ၣ်စံးဘၣ်တ့ၢ်အီၤန့ၣ်လီၤ. ဒီးလဲၤဝဲဆူစီၤအၤဘြၤဟၣ်အခ့ အပှၤအအိၣ်လၢအဆၢထၢၣ်လၢအကီၤလၤအူးတဖၣ်အကပၤဖဲ ထံပူၤအဃၢၤန့ၣ်လီၤ. 31ဒီးစံးဝဲ, “ဟဲဆူဟံၣ်ဒီးယၤတက့ၢ်. နမ့ၢ်ပှၤတဂၤလၢယွၤ ဆိၣ်ဂ့ၤတ့ၢ်အီၤန့ၣ်လီၤ. ဘၣ်မနုၤလၢနဆၢထၢၣ်ဖဲတၢ်ချၢအံၤန့ၣ်လဲၣ်. ယအိၣ်ဒီးဒၢးတဖျၢၣ်ကတဲာ်ကတီၤအသးလၢနဂီၢ်လၢယဟံၣ်ပူၤဒီးတၢ် လီၢ်တတီၤလၢနကီၤလၤအူးသ့ၣ်တဖၣ်အဂီၢ်စ့ၢ်ကီးလီၤ.”
32မၤသးဒ်န့ၣ်ဒီးပှၤတဂၤန့ၣ်လဲၤနုာ်ဆူဟံၣ်ပူၤဒီးစီၤလၤဘၣ် ပာ်လီၤတၢ်ဘိၣ်တၢ်စှၢၤလၢကီၤလၤအူးအလိၤဒီးဟ့ၣ်အီၣ်ဝဲလၢ ဘုလီၢ်ဒီးဆၣ်ဖိကီၢ်ဖိအဆၣ်န့ၣ်လီၤ. ဒီးဟဲစိာ်ဝဲထံလၢစီၤအၤဘြၤဟၣ်အခ့အပှၤဒီးအပှၤတဖၣ်ကသ့ အခီၣ်အဂီၢ်န့ၣ်လီၤ. 33ဒီးတုၤတၢ်အီၣ်တၢ်အီဘၣ်တၢ်ဟဲစိာ်အီၤန့ၣ်ပှၤတဂၤအံၤစံးဝဲ, “တချုးလၢယတဲဘၣ်တၢ်လၢယကဘၣ်တဲအီၤဒံးဘၣ်န့ၣ်ယတအီၣ်တၢ်အီၣ် ဒံးဘၣ်.” စီၤလၤဘၣ်စံးအီၤ, “စံးစၢ်ခီတဲစၢ်ခီတက့ၢ်,”
34ဒီးအဝဲစးထီၣ်ကတိၤတၢ်, “ယမ့ၢ်စီၤအၤဘြၤဟၣ်အခ့အပှၤလီၤ. 35ယွၤဆိၣ်ဂ့ၤယကစၢ်ဒိၣ်မးဒီးဒုးကဲထီၣ်အီၤလၢပှၤထူးပှၤတီၤ တဂၤန့ၣ်လီၤ. ယွၤဟ့ၣ်အီၤလၢသိ, မဲာ်တဲးလဲးဒီးဂီၤဘုၣ်ဂီၤဖံးအဖုအဂီၢ် တဖၣ်, စ့, ထူဒီးကုၢ်ပိာ်မုၣ်ကုၢ်ပိာ်ခွါတဖၣ်, ကီၤလၤအူးဒီးကသ့ၣ် ယီၤတဖၣ်န့ၣ်လီၤ. 36နီၢ်စၤရါလၢအမ့ၢ်ယကစၢ်စီၤအၤဘြၤဟၣ်အမါ, ဆံးစၢ်န့ၢ်အီၤလၢအဖိခွါတဂၤဖဲအသးပှၢ်အကတီၢ်ဒီးယကစၢ်ဟ့ၣ် အီၤကယဲၢ်တၢ်ခဲလၢာ်လၢအမ့ၢ်အတၢ်န့ၣ်လီၤ. 37ယကစၢ်မၢယအၢၣ်လီၤတၢ်ဃုာ်ဒီးတၢ်ဆိၣ်တမံၤလၢယကစူၢ်အကလုၢ်န့ၣ် လီၤ. အဝဲစံး, ‘ဃုထၢမါတဂၤလၢယဖိခွါအဂီၢ်လၢပိာ်မုၣ်တဖၣ်လၢကီၢ် ကနၤဧၣ်အပူၤအကျါတဂ့ၤ. 38အခိၣ်တလိာ်, လဲၤဆူယပၢ်အပှၤဂီၢ်မုၢ်အအိၣ်, ဆူယဘူးယတံၢ်တဖၣ်အအိၣ်ဒီးဃုထၢန့ၢ်မါတဂၤလၢအဂီၢ်တက့ၢ်.’ 39ဒီးယသံကွၢ်တ့ၢ်ယကစၢ်, ‘ပိာ်မုၣ်ဖိမ့ၢ်တဟဲဃုာ်ဒီးယၤဘၣ်ဒီး ယကဘၣ်မၤဒ်လဲၣ်.’ 40ဒီးအဝဲစံးဆၢဝဲ, ‘ယွၤလၢယစူၢ်တ့ၢ်လံအီၤထီဘိတဂၤအံၤ ကဆှၢလီၤအကလူးဃုာ်ဒီးနၤဒီးကဟ့ၣ်နၤတၢ်မၤနၢၤလီၤ. နကမၤန့ၢ်မါတဂၤလၢယဖိခွါအဂီၢ်လၢယပှၤဂီၢ်မုၢ်ဒၣ်ယဲ အကျါဒီးလၢယပၢ်အဒူၣ်ဖိထၢဖိဒၣ်ဝဲအကျါန့ၣ်လီၤ. 41ကျဲအိၣ်ဝဲဒၣ်ထဲတဘိဧိၤလၢနကပူၤဖျဲးဒီးနတၢ်ဆိၣ်န့ၣ်လီၤ. နမ့ၢ်လဲၤဆူယဘူးယတံၢ်သ့ၣ်တဖၣ်အအိၣ်ဒီးအဝဲသ့ၣ်မ့ၢ်ဂ့ၢ်လိာ် နၤန့ၣ်နကပူၤဖျဲးနဲန့ၣ်လီၤ.’
42ဒီးတနံၤအံၤဖဲယဟဲတုၤဆူထံပူၤန့ၣ်ယဘါထုကဖၣ်ယဲ, ‘ယွၤ, ယကစၢ်စီၤအၤဘြၤဟၣ်အကစၢ်ယွၤဧၢ, ဝံသးစူၤဟ့ၣ်ယၤတၢ်မၤ နၢၤလၢတၢ်လၢယမၤအပူၤန့ၣ်တက့ၢ်. 43အခဲအံၤယအိၣ်ဖဲထံပူၤအံၤလီၤ. ဒီးတုၤပိာ်မုၣ်သးစၢ်တဂၤဟဲ ထီၣ်ဒ်သိးအကဒၢၣ်ထံန့ၣ်ယကဃ့အီအီၤထံလၢထံသပၢၤအပူၤန့ၣ် လီၤ. 44အဝဲမ့ၢ်ဘၣ်သူၣ်ဘၣ်သးဒီးမၤဘျုးတၢ်ဒီးဟဲစိာ်စ့ၢ်ကီးထံလၢ ယကီၤလၤအူးတဖၣ်အဂီၢ်န့ၣ်မ်ပိာ်မုၣ်န့ၣ်ကမ့ၢ်ပှၤတဂၤလၢနဃု ထၢတ့ၢ်အီၤဒ်မါတဂၤလၢယကစၢ်အဖိခွါအဂီၢ်အသိးန့ၣ်တက့ၢ်.’ 45ဒီးတချုးလၢယမၤကတၢၢ်ဒံးဘၣ်ယတၢ်ထုကဖၣ်ကစုဒု န့ၣ်နီၢ်ရံးဘကၤဟဲဒီးအသပၢၤထံအိၣ်လၢအဖံဘၣ်ခိၣ်ဒီး လဲၤလီၤဆူထံပူၤလၢကဒၢၣ်ထံအဂီၢ်န့ၣ်လီၤ. ယစံးဘၣ်အီၤ, ‘ဝံသးစူၤဟ့ၣ်ဒုးအီယၤလၢထံတစဲးတက့ၢ်.’ 46အဝဲပာ်လီၤအသပၢၤထံလၢအဖံဘၣ်ခိၣ်တဘျီဃီဒီးစံးဝဲ, ‘အီတက့ၢ်. ဒီးယကဒုးအီစ့ၢ်ကီးနကီၤလၤအူးတဖၣ်လၢထံန့ၣ် လီၤ.’ မၤသးဒ်န့ၣ်ဒီး, ယအီတ့ၢ်ယဲဒီးအဝဲဒုးအီတ့ၢ်စ့ၢ်ကီးကီၤလၤ အူးတဖၣ်လၢထံန့ၣ်လီၤ. 47ယသံကွၢ်တ့ၢ်အီၤ, ‘နပၢ်မ့ၢ်မတၤလဲၣ်.’ ဒီးအဝဲစံးဆၢဝဲ, ‘ယပၢ်မ့ၢ်စီၤနၤဃိၢ်ဒီးနီၢ်မံးလကၤအဖိခွါ, စီၤဘသူၤအ့လးလီၤ.’ တုၤနုၤတစု, ယဘျးလီၤစဲၤနါဒ့ကွီၤတဘိလၢအနါဒ့အလိၤဒီး ထံဖှံၣ်တဖၣ်လၢအစုဒုၣ်လိၤန့ၣ်လီၤ. 48ဒီးယချံးခီၣ်တီၤလီၤဒီးဘူၣ်ထီၣ်ဘါထီၣ်ယွၤလီၤ. ယစံးထီၣ်ပတြၢၤယွၤ, ယကစၢ်စီၤအၤဘြၤဟၣ်အကစၢ်ယွၤလၢအဆှၢတ့ၢ် ယၤလိၤလိၤဆူယကစၢ်အဘူးအတံၢ်တဖၣ်အအိၣ်ဖဲယထံၣ်န့ၢ်အဖိမုၣ်လၢ ယကစၢ်အဖိခွါအဂီၢ်န့ၣ်လီၤ. 49ခဲကနံၣ်အံၤ, သုမ့ၢ်တိာ်သူၣ်ပာ်သးလၢသုကမၤလၢပှဲၤသုမူသု ဒါလၢယကစၢ်အဂီၢ်ဒီးမၤအီၤတီတီန့ၣ်ဝံသးစူၤတဲဘၣ်ယၤတ က့ၢ်. မ့တမ့ၢ်ဘၣ်ဒီးစံးဘၣ်ယၤတက့ၢ်. ဒီးယကဘၣ်မၤတၢ်မနုၤလဲၣ်န့ၣ် ယကစံၣ်ညီၣ်တဲာ်ဒၣ်ယဲလီၤ.”
50စီၤလၤဘၣ်ဒီးစီၤမသူၤအ့လးစံးဆၢဝဲ, “တၢ်အံၤဒ်အမ့ၢ်တၢ် ဂ့ၢ်လၢအဟဲလၢယွၤအအိၣ်အသိးန့ၣ်တမ့ၢ်တၢ်တမံၤလၢပဝဲပကဘၣ်စံၣ် ညီၣ်တဲာ်အီၤဘၣ်. 51အအံၤမ့ၢ်နီၢ်ရံးဘကၤလီၤ. ဟံးန့ၢ်အီၤဒီးက့ၤက့ၤတက့ၢ်. ဒီးမ်အကကဲထီၣ်နကစၢ်အဖိခွါအမါဒ်ယွၤအနီၢ်ကစၢ်ဒၣ်ဝဲ စံးတ့ၢ်အသိးန့ၣ်တက့ၢ်.” 52ဖဲစီၤအၤဘြၤဟၣ်အခ့အပှၤနၢ်ဟူတ့ၢ်တၢ်ကတိၤအံၤဒီးအဝဲတီၤ လီၤဒီးဘူၣ်ထီၣ်ဘါထီၣ်ယွၤန့ၣ်လီၤ. 53အန့ၣ်ဝံၤဒီး, အဝဲထုးထီၣ်တၢ်ကူတၢ်သိး, စ့ဒီးထူ, တၢ်ကယၢကယဲလုၢ်ဒိၣ်ပှ့ၤဒိၣ်ဒီးဟ့ၣ်ဝဲနီၢ်ရံးဘကၤန့ၣ်လီၤ. ဒီးဟ့ၣ်စ့ၢ်ကီးဝဲနီၢ်ရံးဘကၤအဒီပုၢ်ဝဲၢ်ခွါဒီးအမိၢ်လၢ တၢ်ဟ့ၣ်လုၢ်ဒိၣ်ပှ့ၤဒိၣ်သ့ၣ်တဖၣ်န့ၣ်လီၤ.
54အန့ၣ်ဝံၤဒီး, စီၤအၤဘြၤဟၣ်အခ့အပှၤဒီးပှၤလၢအိၣ်ဒီးအီၤ တဖၣ်အီၣ်တၢ်အီတၢ်ဒီးမံဝဲဖဲန့ၣ်လီၤ. ဒီးတုၤအပၢၢ်ထီၣ်လၢမုၢ်ဂီၤန့ၣ်အဝဲစံး, “ပျဲယက့ၤကဒါက့ၤ ဆူယကစၢ်အအိၣ်တက့ၢ်.”
55ဘၣ်ဆၣ်ဒီး, နီၢ်ရံးဘကၤအဒီပုၢ်ဝဲၢ်ခွါဒီးအမိၢ်စံးဝဲဒၣ်, “ပျဲဖိသၣ်မုၣ်အိၣ်ဒီးပှၤတနွံမ့ၢ်ဂ့ၤ, ဆံဆဲၣ်သီမ့ၢ်ဂ့ၤဝံၤဒီးမ်အလဲၤတက့ၢ်.”
56ဘၣ်ဆၣ်အဝဲစံးဝဲဒၣ်, “မၤယံာ်မၤနီၣ်ပှၤတဂ့ၤ. ယွၤမၤလၢထီၣ်ပှဲၤထီၣ်တ့ၢ်လံပကျဲဒီးပျဲယက့ၤကဒါက့ၤဆူ ယကစၢ်အအိၣ်န့ၣ်တက့ၢ်.” 57အဝဲသ့ၣ်စံးဆၢဝဲ, “မ်ပကကိးဖိသၣ်မုၣ်ဒီးဃုသ့ၣ်ညါတၢ်လၢ အကစံးဝဲန့ၣ်တက့ၢ်.” 58မၤသးဒ်န့ၣ်ဒီး, အဝဲသ့ၣ်ကိးနီၢ်ရံးဘကၤဒီးသံကွၢ်အီၤ, “မ့ၢ်နသးအိၣ်လဲၤဃုာ်တၢ်ဒီးပှၤအံၤဧါ.”
ဒီးစံးဆၢဝဲဒၣ်, “မ့ၢ်” န့ၣ်လီၤ.
59လၢတၢ်န့ၣ်အဃိအဝဲသ့ၣ်ပျဲနီၢ်ရံးဘကၤဒီးအပှၤဒုးအီၣ်နုၢ် လဲၤဃုာ်တၢ်ဒီးစီၤအၤဘြၤဟၣ်အခ့အပှၤဒီးအပှၤတဖၣ်န့ၣ်လီၤ. 60ဒီးအဝဲသ့ၣ်ဆိၣ်ဂ့ၤနီၢ်ရံးဘကၤ လၢတၢ်ကတိၤတဖၣ်အံၤလီၤ.
“နဲဒၣ်ပဒီပုၢ်ဝဲၢ်မုၣ်ဧၢ, မ်နကကဲထီၣ်ပှၤအကကွဲၢ်တဖၣ်အမိၢ်တက့ၢ်.
မ်နစၢၤနသွဲၣ်တဖၣ်မၤန့ၢ်မၤနၢၤအဒုၣ်အဒါတဖၣ်အဝ့ၢ်န့ၣ်တက့ၢ်.”
61အန့ၣ်ဝံၤဒီး, နီၢ်ရံးဘကၤဒီးအခ့အပှၤပိာ်မုၣ်သးစၢ်တဖၣ်ဒိးထီၣ်ကီၤလၤအူးတဖၣ်လၢကလဲၤဃုာ်တၢ်ဒီးစီၤအၤဘြၤဟၣ်အခ့အပှၤဒီးအဝဲသ့ၣ်ခဲလၢာ်ဟးထီၣ်ဝဲန့ၣ်လီၤ.
62စီၤအံၤစဲးဟဲဆူပှၢ်မုၢ်ကနၢလၢ “ပှၤမူလၢအထံၣ်ယၤတဂၤ အထံပူၤ” ဒီးအိၣ်ဝဲဖဲကီၢ်ကနၤဧၣ်အကလံၤထံးန့ၣ်လီၤ. 63ဒီးဖဲမုၢ်ဟါလီၤသီသီအကတီၢ်န့ၣ်အဝဲဟးထီၣ်ဒ်သိးကဟးကသုၣ် ကသီလၢစံာ်ပျီပူၤဒီးထံၣ်ဝဲကီၤလၤအူးတဖၣ်ဟဲဝဲန့ၣ်လီၤ. 64ဖဲနီၢ်ရံးဘကၤထံၣ်စိစီၤအံၤစဲးန့ၣ်စံၣ်လီၤဝဲလၢအကီၤလၤ အူးအလိၤ, 65ဒီးသံကွၢ်ဝဲစီၤအၤဘြၤဟၣ်အခ့အပှၤန့ၣ်, “ပှၤလၢအဟဲဆူ ပအိၣ်လၢစံာ်ပျီပူၤတဂၤန့ၣ်မ့ၢ်မတၤလဲၣ်.”
စီၤအၤဘြၤဟၣ်အကုၢ်န့ၣ်စံးဆၢအီၤ, “အဝဲမ့ၢ်ယကစၢ်လီၤ.” ဒီးနီၢ်ရံးဘကၤဟံးန့ၢ်နီၣ်ကျၢၢ်ဘၢမဲာ်ဒီးကးဘၢအမဲာ်လီၤ.
66ဒီးကုၢ်တဂၤအံၤစံးဘၣ်တဲဘၣ်စီၤအံၤစဲးလၢကယဲၢ်တၢ်လၢအမၤ တ့ၢ်ဝဲကိးမံၤဒဲးန့ၣ်လီၤ. 67တုၤနုၤတစု, စီၤအံၤစဲးကိးနုာ်နီၢ်ရံးဘကၤဆူအမိၢ်နီၢ်စၤ ရါအဒဲပူၤဒီးနီၢ်ရံးဘကၤကဲထီၣ်အမါန့ၣ်လီၤ. စီၤအံၤစဲးအဲၣ်နီၢ်ရံးဘကၤသတးဒီးအသးမုာ်ထီၣ်က့ၤဝဲလၢတၢ် ဘၣ်မိၣ်ဘၣ်မးလၢအမိၢ်တအိၣ်လၢၤဘၣ်အဂ့ၢ်အဃိလီၤ.
Currently Selected:
လံာ်တၢ်ကဲထီၣ်အခီၣ်ထံး 24: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
