လံာ်တၢ်ကဲထီၣ်အခီၣ်ထံး 17
17
တၢ်ကူးတရံး, တၢ်အၢၣ်လီၤအီလီၤအတၢ်ပနီၣ်
1ဖဲစီၤအၤဘြၣ်အသးအိၣ်ဝဲခွံဆံခွံနံၣ်န့ၣ်ယွၤလီၣ်ဖျါထီၣ် အသးလၢအီၤဒီးစံးဘၣ်အီၤ, “ယမ့ၢ်သ့တၢ်လၢာ်ကစၢ်ယွၤလီၤ. စူၢ်ယၤဒီးမၤတၢ်အဘၣ်တဘိယူၢ်ဃီတက့ၢ်. 2ယကမၤယတၢ်အၢၣ်လီၤအီလီၤဒီးနၤဒီးဟ့ၣ်လီၤနၤလၢနစၢၤနသွဲၣ် အါအါဂီၢ်ဂီၢ်န့ၣ်လီၤ.” 3စီၤအၤဘြၣ်တီၤလီၤကဒွံကျိာ်ဒီးကျးလီၤအမဲာ်လၢဟီၣ်ခိၣ်ဒီး ကစၢ်ယွၤစံးဘၣ်အီၤ, 4“ယမၤတၢ်အၢၣ်လီၤအီလီၤအံၤဒီးနၤလီၤ. ယအၢၣ်လီၤတၢ်လၢနကကဲထီၣ်ပှၤအါကလုာ်အတၢ်လီၤစၢၤလီၤသွဲၣ်အပၢ် ဖးဒိၣ်လၢပျၢၤန့ၣ်လီၤ. 5နမံၤတမ့ၢ်စီၤအၤဘြၣ်လၢၤဘၣ်. မ့မ့ၢ်နမံၤကမ့ၢ်စီၤအၤဘြၤဟၣ် န့ၣ်လီၤ. အဂ့ၢ်ဒ်အံၤ, ယဒုးကဲထီၣ်နၤလၢပှၤအါကလုာ်အတၢ်လီၤစၢၤလီၤ သွဲၣ်အပၢ်ဖးဒိၣ်လၢပျၢၤအဃိလီၤ. 6ယကဟ့ၣ်လီၤနၤလၢနစၢၤနသွဲၣ်အါအါဂီၢ်ဂီၢ်ဒီးလၢအကျါတနီၤ န့ၣ်ကကဲထီၣ်စီၤပၤတဖၣ်လီၤ. နကအိၣ်ဒီးနစၢၤနသွဲၣ်အါဂၤတုၤဒၣ်လဲာ်အဝဲသ့ၣ်တဖၣ်ကကဲထီၣ်ပှၤ ကလုာ်တဖၣ်န့ၣ်လီၤ.
7ယကဟံးဃာ်ယတၢ်အၢၣ်လီၤအီလီၤဒီးနၤ, ဒီးနစၢၤနသွဲၣ်လၢခါဆူညါအစိၤသ့ၣ်တဖၣ်ဒ်တၢ်အၢၣ်လီၤအီလီၤ အထူအယိာ်တမံၤအသိးန့ၣ်လီၤ. ယမ့ၢ်နကစၢ်ယွၤဒီးပှၤလီၤစၢၤလီၤသွဲၣ်လၢနၤတဖၣ်အကစၢ်ယွၤန့ၣ် လီၤ. 8ယကဟ့ၣ်လီၤနၤဒီးနစၢၤနသွဲၣ်သ့ၣ်တဖၣ်လၢထံကီၢ်အံၤလၢအခဲအံၤ နမ့ၢ်ပှၤတခီဘီမုၢ်ဖိလၢအပူၤန့ၣ်လီၤ. ကီၢ်ကနၤဧၣ်ဒီဘ့ၣ်ညါန့ၣ်ကဘၣ်ဃးဒီးနစၢၤနသွဲၣ်သ့ၣ်တဖၣ်လီၤ ထူလီၤယိာ်လီၤ. ဒီးယကမ့ၢ်အဝဲသ့ၣ်အကစၢ်ယွၤန့ၣ်လီၤ.”
9ကစၢ်ယွၤစံးဘၣ်စီၤအၤဘြၤဟၣ်, “နဲစ့ၢ်ကီးနကဘၣ်ဘၣ်သူၣ်ဘၣ် သးလၢနကဟံးဃာ်တၢ်အၢၣ်လီၤအီလီၤဒီးယၤ, ဃုာ်ဒီးနစၢၤနသွဲၣ်လၢခါဆူညါအစိၤသ့ၣ်တဖၣ်န့ၣ်လီၤ. 10နၤဒီးကယဲၢ်နစၢၤနသွဲၣ်ခဲလၢာ်ကဘၣ်ဘၣ်သူၣ်ဘၣ်သးလၢပိာ်ခွါလၢ သုကျါခဲလၢာ်ကဒိးတၢ်ကူးတရံးအဂီၢ်န့ၣ်လီၤ. 11-12စးထီၣ်ခဲအံၤဒီးဆူညါနကဘၣ်ကူးတရံးပှၤဖိသၣ်ပိာ်ခွါကိး ဂၤဒဲးဖဲအသးပှဲၤထီၣ်ဃိးသီဃုာ်ဒီးကုၢ်တဖၣ်လၢအအိၣ်ဖျဲၣ် ထီၣ်လၢနဟံၣ်ဒူၣ်ဃီထၢအပူၤမ့ၢ်ဂ့ၤ, ကုၢ်တဖၣ်လၢအဘၣ်တၢ်ပှ့ၤအီၤလၢပှၤတခီဘီမုၢ်ဖိအအိၣ်မ့ၢ်ဂ့ၤ န့ၣ်လီၤ. တၢ်အံၤကဒုးနဲၣ်ဖျါထီၣ်လၢတၢ်အၢၣ်လီၤအီလီၤအိၣ်ဝဲလၢနၤ ဒီးယၤအဘၢၣ်စၢၤန့ၣ်လီၤ. 13ပှၤကိးဂၤဒဲးကဘၣ်ဒိးတၢ်ကူးတရံးဒီးတၢ်အံၤမ့ၢ်နီၢ်ခိအတၢ် ပနီၣ်လၢအပာ်ဖျါထီၣ်ယတၢ်အၢၣ်လီၤအီလီၤဒီးသုမ့ၢ်တၢ်လီၤထူ လီၤယိာ်န့ၣ်လီၤ. 14ပှၤပိာ်ခွါတဂၤလၢ်လၢ်လၢအတဒိးဘၣ်တၢ်ကူးတရံးန့ၣ်တဘၣ်တၢ်ပာ် အီၤလၢအမ့ၢ်ပှၤတဂၤလၢယပှၤဂီၢ်မုၢ်အကျါလၢၤဘၣ်န့ၣ်လီၤ. အဂ့ၢ်ဒ်အံၤ, အဝဲတဟံးဃာ်တၢ်အၢၣ်လီၤအီလီၤဒီးယၤအဃိန့ၣ်လီၤ.”
15ကစၢ်ယွၤစံးဘၣ်စီၤအၤဘြၤဟၣ်, “နတဘၣ်ကိးလၢၤနမါလၢနီၢ်စၤ ရဲလၢၤဘၣ်. စးထီၣ်ခဲအံၤဒီးဆူညါန့ၣ်အမံၤကမ့ၢ်ဝဲနီၢ်စၤရါလီၤ. 16ယကဆိၣ်ဂ့ၤအီၤဒီးယကဟ့ၣ်လီၤနၤဖိခွါတဂၤခီဖျိအီၤစ့ၢ်ကီး လီၤ. ယကဆိၣ်ဂ့ၤအီၤဒီးအဝဲကကဲထီၣ်ပှၤကလုာ်တဖၣ်အမိၢ်ဒီးစီၤပၤ တဖၣ်ကအိၣ်ဝဲလၢအစၢၤအသွဲၣ်တဖၣ်အကျါန့ၣ်လီၤ.”
17စီၤအၤဘြၤဟၣ်တီၤလီၤကဒွံကျိာ်ဒီးကျးလီၤအမဲာ်လၢဟီၣ်ခိၣ် လိၤန့ၣ်လီၤ. ဘၣ်ဆၣ်နံၤထီၣ်ဝဲဒၣ်ဖဲအဆိကမိၣ်ထီၣ်ဝဲ, “ပှၤလၢအသးအိၣ်လံအနံၣ်တကယၤန့ၣ်အဖိအိၣ်ဘၣ်ကသ့ စ့ၢ်ကီးဧါ. မ့ၢ်နီၢ်စၤရါလၢအသးအိၣ်အနံၣ်ခွံဆံန့ၣ်အဖိ အိၣ်ဘၣ်ကသ့စ့ၢ်ကီးဧါ.” 18ဒီးစီၤအၤဘြၤဟၣ်သံကွၢ်ကစၢ်ယွၤ, “နတပျဲစီၤယံးၡမၤဧ့လး မ့ၢ်ယပှၤန့ၢ်သါတၢ်န့ၣ်ဘၣ်မနုၤအဃိလဲၣ်.”
19ဒီးကစၢ်ယွၤစံးဆၢအီၤ, “တသ့ဘၣ်. နမါနီၢ်စၤရါကဆံးစၢ်န့ၢ် ဖိခွါတဂၤလၢနဂီၢ်ဒီးနကယုၢ်န့ၢ်အမံၤလၢစီၤအံၤစဲးန့ၣ် လီၤ. ယကဟံးဃာ်ယတၢ်အၢၣ်လီၤအီလီၤဒီးအီၤ, ဒီးအစၢၤအသွဲၣ်တဖၣ်လီၤထူလီၤယိာ်န့ၣ်လီၤ. တၢ်အံၤမ့ၢ်တၢ်အၢၣ်လီၤအီလီၤအထူအယိာ်တမံၤန့ၣ်လီၤ. 20ယနၢ်ဟူတ့ၢ်လံလၢနဃ့တၢ်ဘၣ်ဃးဒီးစီၤယံးၡမၤဧ့လးအဂီၢ်န့ၣ် လီၤ. မၤသးဒ်န့ၣ်ဒီး, ယကဆိၣ်ဂ့ၤအီၤဒီးဟ့ၣ်အီၤလၢအဖိ တဖၣ်ဒီးအစၢၤအသွဲၣ်တဖၣ်အါအါဂီၢ်ဂီၢ်န့ၣ်လီၤ. အဝဲကမ့ၢ်ပဒိၣ်တဆံခံဂၤအပၢ်ဒီးယကဒုးကဲထီၣ်အစၢၤအသွဲၣ်တဖၣ် လၢပှၤကလုာ်ဖးဒိၣ်န့ၣ်လီၤ. 21ဘၣ်ဆၣ်ဒီး, ယကဟံးဃာ်ယတၢ်အၢၣ်လီၤအီလီၤဒီးနဖိခွါစီၤအံၤ စဲးလၢနီၢ်စၤရါကဆံးစၢ်န့ၢ်နၤလၢခဲကိာ်တနံၣ်ဖဲအကတီၢ်အံၤ န့ၣ်လီၤ. 22ဒီးတုၤကစၢ်ယွၤကတိၤတၢ်ဒီးစီၤအၤဘြၤဟၣ်ဝံၤဒီးဟးထီၣ် ကွံာ်ဝဲဒၣ်န့ၣ်လီၤ.
23ဒီးလၢမုၢ်တနံၤဃီအံၤန့ၣ်စီၤအၤဘြၤဟၣ်စူၢ်ကစၢ်ယွၤဒီးကူး တရံးအဖိခွါစီၤယံးၡမၤဧ့လးဒီးပှၤပိာ်ခွါအဂၤခဲလၢာ်လၢ အဟံၣ်ဒူၣ်ဃီထၢအပူၤဃုာ်ဒီးကုၢ်လၢအအိၣ်ဖျဲၣ်ထီၣ်လၢအဟံၣ်ဒူၣ် ဃီထၢအပူၤဒီးလၢအပှ့ၤတ့ၢ်ဝဲတဖၣ်န့ၣ်လီၤ. 24ဒီးဖဲစီၤအၤဘြၤဟၣ်ဒိးတၢ်ကူၣ်တရံးန့ၣ်အသးပှၢ်တ့ၢ်လံ ခွံဆံခွံနံၣ်န့ၣ်လီၤ. 25ဒီးအဖိခွါစီၤယံးၡမၤဧ့လးအသးအိၣ်ဝဲတဆံသၢနံၣ်လီၤ. 26ဒီးစီၤအၤဘြၤဟၣ်ဒီးအဖိခွါစီၤယံးၡမၤဧ့လးဒိးတၢ်ကူး တရံးလၢမုၢ်တနံၤဃီအတီၢ်ပူၤ, 27ဃုာ်ဒီးအကုၢ်ခဲလၢာ်န့ၣ်လီၤ.
Currently Selected:
လံာ်တၢ်ကဲထီၣ်အခီၣ်ထံး 17: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
