လံာ်တၢ်ကဲထီၣ်အခီၣ်ထံး 14

စီၤအၤဘြၣ်မၤပူၤမၤဖျဲးစီၤလိာ်

1ဒီးတၢ်မၤအသးလၢစီၤပၤလွံၢ်ဂၤလၢအမ့ၢ်ကီၢ်ဘၤဘူၤလိၣ်အစီၤ ပၤစီၤအးမရၤဖ့လး, ပှၤအ့းလးစၢ်အစီၤပၤစီၤအၤရယိာ်, ပှၤဧ့ၤလၣ်အစီၤပၤစီၤကဒၢ်လဧိမ့ၢ်ဒီးပှၤကလုာ်တဖၣ်အစီၤပၤ စီၤတံးဒၤလးသ့ၣ်တဖၣ်န့ၣ်, 2အိၣ်ဒီးအတၢ်ဒုးလိာ်ယၤလိာ်အသးဒီးစီၤပၤအဂၤယဲၢ်ဂၤလၢအမ့ၢ် ပှၤစဒိၣ်အစီၤပၤစီၤဘ့ရၤ, ပှၤဂမိရၤအစီၤပၤစီၤဘံးရၡၤ, ပှၤအၤဒမၤအစီၤပၤစီၤၡံးနာ်, ပှၤစဘိအံၣ်အစီၤပၤစီၤၡ့မ့ ဘ့ၢ်ဒီးပှၤဘ့လၤ (မ့တမ့ၢ်ပှၤစိၤဧၢ်) အစီၤပၤန့ၣ်လီၤ. 3စီၤပၤယဲၢ်ဂၤအံၤကရၢကရိထီၣ်အသးဒ်ပှၤဒီသိၣ်ဒီမှံၤအသိး ဒီးပာ်ဖှိၣ်ထီၣ်အသုးမုၢ်တဖၣ်လၢစံးဒံၣ်တၢ်တြီၤပူၤ, ဒ်ပစံးတၢ်အသိး, ခဲကနံၣ်အံၤမ့ၢ်ဝဲပီၣ်လဲၣ်သံန့ၣ်လီၤ. 4အဝဲသ့ၣ်ဘၣ်အိၣ်ဝဲဒၣ်လၢစီၤပၤစီၤကဒၢ်လဧိမ့ၢ်အတၢ်ပၢအဖီ လာ်တဆံခံနံၣ်န့ၣ်လီၤ. ဘၣ်ဆၣ်ဖဲတဆံသၢနံၣ်တနံၣ်န့ၣ်အဝဲသ့ၣ် ပူထီၣ်က့ၤအီၤန့ၣ်လီၤ. 5ဒီးလၢတဆံလွံၢ်နံၣ်တနံၣ်န့ၣ်စီၤပၤစီၤကဒၢ်လဧိမ့ၢ်ဒီးအသိၣ် အမှံၤစီၤပၤအဂၤသ့ၣ်တဖၣ်ဟဲလၢအသုးမုၢ်ဒၣ်ဝဲဒီးမၤနၢၤပှၤ ရၤဖၤဖိအိၣ်လၢဝ့ၢ်ဧၤၡတါရိၤကၢ်နါယံၣ်, ပှၤစူစၤဖိအိၣ်လၢကီၢ်ဟၣ်အပူၤ, ပှၤအ့ၣ်ဖိအိၣ်လၢၡၤဝ့ကးရ ယးသံၣ်အတၢ်ပျီပူၤ, 6ဒီးပှၤဃိၢ်ဖိအိၣ်လၢကီၢ်အဒိၣ်အကစၢၢ်ကလိတဖၣ်အကျါ, ဒီးလူၤထွဲအဝဲသ့ၣ်ယံၤတုၤဆူဝ့ၢ်အ့လးဖရၣ်အိၣ်လၢမဲးမုၢ် ခိၣ်အဃၢၤန့ၣ်လီၤ. 7ဒီးဟဲက့ၤကဒါက့ၤဝဲ, ဒီးဟဲက့ၤဆူဝ့ၢ်ကၤဒ့ၢ် (လၢအကတီၢ်ဖဲ န့ၣ်ဘၣ်တၢ်သ့ၣ်ညါအီၤဒ်ဝ့ၢ်ဧ့ၣ်မံးၡပး) န့ၣ်လီၤ. အဝဲသ့ၣ်မၤနၢၤပှၤဧမၤလ့းဖိအကီၢ်ဒီဘ့ၣ်ညါဒီးပှၤ အမိၢ်ဖိလၢအအိၣ်အဆိးလၢဝ့ၢ်ဃၤစစိၣ်တါမၢ်အပူၤန့ၣ်လီၤ.

8ဒီးစဒိၣ်အစီၤပၤ, ဂမိရၤအစီၤပၤ, အၤဒမၤအစီၤပၤ, စဘိအံၣ်အစီၤပၤဒီးဘ့လၤအစီၤပၤသ့ၣ်တဖၣ်ပာ်ဖှိၣ်ထီၣ်အသုး မုၢ်လၢတၢ်ဒုးအဂီၢ်ဖဲစံးဒံၣ်အတၢ်တြီၤပူၤဒီးဒုးတၢ်ထီဒါ, 9ပှၤဧ့ၤလၣ်အစီၤပၤစီၤကဒၢ်လဧိမ့ၢ်, ပှၤကလုာ်တဖၣ်အစီၤပၤစီၤ တံးဒၤလး, ပှၤၡံနၢ်အစီၤပၤစီၤအးမရၤဖ့လးဒီးပှၤအ့းလးစၢ်အစီၤပၤ စီၤအၤရယိာ်လီၤ. မ့ၢ်စီၤပၤယဲၢ်ဂၤအတၢ်ထီဒါစီၤပၤလွံၢ်ဂၤန့ၣ်လီၤ. 10ဒီးစံးဒံၣ်အတၢ်တြီၤပူၤန့ၣ်ပှဲၤဒီးကျဲတံးအပူၤတဖၣ်ဒီးဖဲ စဒိၣ်ဒီးဂမိၤရၤအစီၤပၤတဖၣ်ဃ့ၢ်ကွံာ်လၢတၢ်ဒုးဒီးလီၤတဲာ် လၢတၢ်ပူၤန့ၣ်လီၤ. ဘၣ်ဆၣ်ဒီးစီၤပၤအဂၤတဖၣ်ဃ့ၢ်ပူၤဖျဲးဝဲဆူကစၢၢ်ကလိန့ၣ် လီၤ. 11စီၤပၤလွံၢ်ဂၤဟံးထီၣ်ကွံာ်စဒိၣ်ဒီးဂမိရၤအတၢ်ဖိတၢ်လံၤခဲ လၢာ်ပၣ်ဃုာ်ဝဲဒီးတၢ်အီၣ်တၢ်အီဒီးဟးထီၣ်ကွံာ်ဝဲဒၣ်လီၤ. 12စီၤအၤဘြၣ်အဖိဒိၣ်စီၤလိာ်အိၣ်ဝဲဆိးဝဲလၢစဒိၣ်အပူၤဒီးလၢ တၢ်န့ၣ်အဃိအဝဲသ့ၣ်စိာ်ကွံာ်အီၤဒီးကယဲၢ်အတၢ်ဖိတၢ်လံၤခဲ လၢာ်န့ၣ်လီၤ.

13ဘၣ်ဆၣ်ပှၤလၢအထူၣ်ဖျဲးတဂၤတဲဘၣ်တၢ်မၤအသးခဲလၢာ်လၢပှၤဧ့ၤ ဘြံၤဖိစီၤအၤဘြၣ် လၢအအိၣ်ဝဲဆိးဝဲဘူးဒီးသ့ၣ်စီဆှံ တဖၣ်လၢအဘၣ်ဃးဒီးပှၤအမိၢ်ဖိစီၤမးမရ့န့ၣ်လီၤ. စီၤမးမရ့ဒီးအဒီပုၢ်ဝဲၢ်စီၤအ့ၡကိၤလး, စီၤဧၤန့ၢ်တဖၣ်န့ၣ်မ့ၢ်စီၤအၤဘြၣ်အဒီသိၣ်ဒီမှံၤန့ၣ်လီၤ. 14ဒီးတုၤစီၤအၤဘြၣ်နၢ်ဟူဝဲလၢအဖိဒိၣ်ဘၣ်တၢ်ဖီၣ်န့ၢ်အီၤ န့ၣ်, အဝဲကိးထီၣ်ဝဲကယဲၢ်ပှၤဒုးတၢ်ဖိခဲလၢာ်လၢအတၢ်အိၣ်တၢ်ဆိး အလီၢ်အပူၤပှၤသၢကယၤတဆံဃိးဂၤဒီးလူၤဝဲစီၤပၤလွံၢ်ဂၤလၢ ကျဲဆူဝ့ၢ်ဒၣ်န့ၣ်လီၤ. 15ဒီးဖဲန့ၣ်အဝဲနီၤဖးလီၤဝဲအပှၤဒုးသုးဖိသ့ၣ်တဖၣ်ဆူကရူၢ် ဖိတဖၣ်ဒီးဒုးအဒုၣ်အဒါသ့ၣ်တဖၣ်ဖဲမုၢ်နၤအကတီၢ်ဒီးမၤနၢၤ ကွံာ်ဝဲဒၣ်န့ၣ်လီၤ. အဝဲလူၤထွဲအဝဲသ့ၣ်တုၤဆူဝ့ၢ်ဃိဘၤလၢအအိၣ်လၢဝ့ၢ်ဒၤမ့း စ့းအကလံၤစိးတခီန့ၣ်လီၤ. 16ဒီးဒိးန့ၢ်ဘၣ်ကဒါက့ၤကယဲၢ်တၢ်ခဲလၢာ်လၢအဘၣ်တၢ်ဟံးန့ၢ်ဆူၣ် သ့ၣ်တဖၣ်လီၤ. ဒီးဟဲက့ၤကိးစ့ၢ်ကီးအဖိဒိၣ်စီၤလိာ်ဒီးအတၢ်ဖိတၢ်လံၤခဲ လၢာ်, ဒီးပိာ်မုၣ်ပိာ်မၢၤတဖၣ်ဒီးပှၤဘၣ်တၢ်ဖီၣ်န့ၢ်အီၤအဂၤတဖၣ်န့ၣ် လီၤ.

စီၤမးလကံစဒ့းဆိၣ်ဂ့ၤစီၤအၤဘြၣ်

17ဒီးဖဲစီၤအၤဘြၣ်ဟဲက့ၤကဒါက့ၤဃုာ်ဒီးစီၤပၤအဂၤတဖၣ်လၢ တၢ်မၤနၢၤစီၤပၤစီၤကဒၢ်လဧိမ့ၢ်ဒီးစီၤပၤအဂၤတဖၣ်န့ၣ်စဒိၣ် အစီၤပၤလဲၤသဂၢၢ်အီၤဖဲၡၤဝ့အတၢ်တြီၤပူၤ (လၢအဘၣ်တၢ်ကိးစ့ၢ် ကီးအီၤလၢစီၤပၤအတၢ်တြီၤပူၤ) န့ၣ်လီၤ. 18ဒီးစီၤမးလကံစဒ့းလၢအမ့ၢ်ဝ့ၢ်ၡၤလ့ၣ်စီၤပၤဒီးတၢ်ထီကတၢၢ် ကစၢ်ယွၤအပှၤလုၢ်တၢ်အခိၣ်ဟဲစိာ်န့ၢ်ကိၣ်ဒီးစပံးထံဆူ စီၤအၤဘြၣ်အအိၣ်, 19ဒီးဆိၣ်ဂ့ၤအီၤဝံၤဒီးစံးဝဲဒၣ်, “မ်တၢ်ထီကတၢၢ်ကစၢ်ယွၤ လၢအတ့လီၤမူခိၣ်ဒီးဟီၣ်ခိၣ်တဂၤအံၤဆိၣ်ဂ့ၤစီၤအၤဘြၣ်တ က့ၢ်. 20မ်တၢ်ထီကတၢၢ်ကစၢ်ယွၤတဂၤလၢအဟ့ၣ်နၤတၢ်မၤနၢၤလၢနဒုၣ်နဒါ အဖီခိၣ်န့ၣ်ဘၣ်တၢ်စံးထီၣ်ပတြၢၤအီၤတက့ၢ်.” ဒီးစီၤအၤဘြၣ်ဟ့ၣ်ဝဲစီၤမးလကံစဒ့းလၢကယဲၢ်တၢ်ဂုာ်န့ၢ်လၢ အဘၣ်တၢ်မၤန့ၢ်ကဒါက့ၤအီၤအကျါဆံဆဲၣ်ပူတပူန့ၣ်လီၤ.

21ဒီးစဒိၣ်အစီၤပၤစံးဘၣ်စီၤအၤဘြၣ်, “ဟံးဃာ်နဲတၢ်ဂုာ်န့ၢ် တဖၣ်တက့ၢ်. မ့မ့ၢ်ဟ့ၣ်က့ၤယၤယပှၤတဖၣ်တက့ၢ်.”

22စီၤအၤဘြၣ်စံးဆၢဝဲဒၣ်, “ယဆိၣ်လီၤယသးသညူးသပှၢ်လၢယွၤ, တၢ်ထီကတၢၢ်ကစၢ်ယွၤ, ယွၤလၢအတ့လီၤမူခိၣ်ဒီးဟီၣ်ခိၣ်အမဲာ်ညါ, 23လၢယတဟံးဃာ်တၢ်ဘၣ်ဃးဒီးနၤနီတမံၤထဲလုၣ်တဘိမ့ၢ်ဂ့ၤထဲ ခီၣ်ဖံးပျံၤတဘိမ့ၢ်ဂ့ၤန့ၣ်ဒၣ်လဲာ်ဘၣ်. ဒီးနစံးလၢ “ယမ့ၢ်ပှၤလၢအဒုးထူးထီၣ်တီၤထီၣ်စီၤအၤဘြၣ်” န့ၣ်တသ့နီတစုဘၣ်. 24ယတဟံးန့ၢ်တၢ်နီတမံၤလၢယဂီၢ်ဘၣ်. ယကတူၢ်လိာ်ဒၣ်ထဲတၢ်လၢယပှၤတဖၣ်သူတ့ၢ်ဝဲတဖၣ်န့ၣ်လီၤ. ဘၣ်ဆၣ်ဒီး, ပျဲယသိၣ်သမှံၤတဖၣ်ဒ်စီၤဧၤန့ၢ်, စီၤအ့ၡကိၤလးဒီးစီၤမးမၡ့တဖၣ်န့ၣ်ဟံးန့ၢ်တၢ်နီၤဖးလၢ အဝဲသ့ၣ်အဂီၢ်ဒၣ်ဝဲတက့ၢ်.”

Currently Selected:

လံာ်တၢ်ကဲထီၣ်အခီၣ်ထံး 14: KSWC

Highlight

Copy