လံာ်တၢ်ကဲထီၣ်အခီၣ်ထံး 11

ဘၤဘူၤလိၣ်အတၢးထီခၢၣ်သနၢၣ်

1လၢအခီၣ်ထံးန့ၣ်ပှၤဟီၣ်ခိၣ်ဖိခဲလၢာ်အိၣ်ဒီးအကျိာ်ထဲတခါ ဧိၤဒီးသူတၢ်ကတိၤတဖၣ်တမံၤဃီန့ၣ်လီၤ. 2ဒီးဖဲအဝဲသ့ၣ်ဟးဝ့ၤဝီၤလၢမုၢ်ထီၣ်အဖၢမုၢ်န့ၣ်လဲၤတုၤလၢ ပျီအိၣ်လၢကီၢ်ဘၤဘူၤလိၣ်ဒီးသူၣ်လီၤဆီလီၤအတၢ်အိၣ်တၢ်ဆိးအလီၢ် ဖဲန့ၣ်လီၤ. 3အဝဲသ့ၣ်စံးကတိၤလိာ်အသးတဂၤဒီးတဂၤ, “ဟဲမီၤ, ပကမၤသကိးဒၢးခီဒီးကုၢ်ကိၤထီၣ်အီၤန့ၣ်တက့ၢ်.” လၢတၢ်န့ၣ်အဃိအဝဲသ့ၣ်အိၣ်ဒီးဒၢးခီတဖၣ်လၢကသူၣ်ထီၣ်တၢ်အ ဂီၢ်, ဒီးကျဲတံးလၢကဒုးစဲဘူးတံၢ်ဃာ်ဒၢးခီတဖၣ်အ ဂီၢ်န့ၣ်လီၤ. 4ဒီးအဝဲသ့ၣ်စံးဝဲ, “ခဲကနံၣ်အံၤမ်ပကသူၣ်ထီၣ်သကိးဝ့ၢ် တဝ့ၢ်ဃုာ်ဒီးတၢးထီခၢၣ်သနၢၢ်တခါလၢအတုၤထီၣ်ဘးမူခိၣ်ဒ်သိး ပကမၤဒိၣ်မၤဖျါပမံၤဒီးပသုတလီၤပြံလီၤပြါလၢဟီၣ်ခိၣ်ဒီ ဘ့ၣ်ညါတဂ့ၤအဂီၢ်န့ၣ်တက့ၢ်.”

5တုၤနုၤတစုယွၤဟဲလီၤဒ်သိးအကကွၢ်ဝ့ၢ်ဒီးတၢးထီခၢၣ်သနၢၣ် န့ၣ်လၢပှၤတဖၣ်န့ၣ်ဘှီထီၣ်တ့ၢ်ဝဲ, 6ဒီးစံးဝဲဒၣ်, “ခဲကနံၣ်အံၤပှၤသ့ၣ်တဖၣ်အံၤမ့ၢ်ပှၤတဖုဃီ ဒီးစံးကတိၤကျိာ်တကျိာ်ဃီန့ၣ်လီၤ. တၢ်အံၤမ့ၢ်ဒံးထဲတၢ်အခီၣ်ထံးဖိလၢတၢ်လၢအဝဲသ့ၣ်သါကမၤဝဲ တယံာ်ဘၣ်ဒီးတၢ်တမံၤဂ့ၤတမံၤဂ့ၤလၢအသးအိၣ်မၤဝဲန့ၣ်အဝဲ သ့ၣ်မၤဝဲကသ့ကန့ၢ်လီၤ. 7မ်ပလဲၤလီၤသကိးဒီးမၤဃါဃုာ်ကွံာ်အကျိာ်ဒ်သိးတဖုဒီးတဖု အသုတနၢ်ပၢၢ်လိာ်အသးတဂ့ၤန့ၣ်တက့ၢ်.” 8မၤသးဒ်န့ၣ်ဒီးယွၤမၤလီၤပြံလီၤပြါကွံာ်အဝဲသ့ၣ်လၢဟီၣ် ခိၣ်ဒီဘ့ၣ်ညါဒီးအဝဲသ့ၣ်ဆိကတီၢ်ကွံာ်အတၢ်သူၣ်ထီၣ်ဝ့ၢ်န့ၣ်လီၤ. 9ဝ့ၢ်အံၤဘၣ်တၢ်ကိးအီၤလၢဝ့ၢ်ဘၤဘူၤလိၣ်လီၤ. အဂ့ၢ်ဒ်အံၤ, ဖဲန့ၣ်န့ၣ်, ယွၤမၤဃါဃုာ်ပှၤဟီၣ်ခိၣ်ဖိခဲလၢာ် အကျိာ်ဒီးစးထီၣ်ဖဲတၢ်လီၢ်န့ၣ်ယွၤမၤလီၤပြံလီၤပြါအဝဲ သ့ၣ်ဆူဟီၣ်ခိၣ်ဒီဘ့ၣ်ညါန့ၣ်လီၤ.

စီၤၡ့ၣ်အစၢၤအသွဲၣ်တဖၣ်

(၁ကွဲး. ၁:၂၄-၂၇)

10အအံၤတဖၣ်မ့ၢ်စီၤၡ့ၣ်အစၢၤအသွဲၣ်န့ၣ်လီၤ. ထံလုၣ်ဘၢတၢ်ဝံၤအလီၢ်ခံဖဲစီၤၡ့ၣ်အသးအိၣ်ဝဲအနံၣ်တကယၤ န့ၣ်, ထီၣ်ဖိန့ၢ်အဖိခွါတဂၤ, စီၤအၢ်ဖးၡးလီၤ. 11အန့ၣ်ဝံၤဒီး, အဝဲအိၣ်မူဆူညါအနံၣ်ယဲၢ်ကယၤဒီးထီၣ်ဖိန့ၢ် အဖိအဂုၤအဂၤတဖၣ်န့ၣ်လီၤ.

12ဖဲစီၤအၢ်ဖးၡးအသးအိၣ်ဝဲသၢဆံယဲၢ်နံၣ်န့ၣ်အဝဲထီၣ်ဖိန့ၢ် အဖိခွါတဂၤ, စီၤစ့ၤလါလီၤ. 13အန့ၣ်ဝံၤဒီး, အဝဲအိၣ်မူဆူညါလွံၢ်ကယၤသၢနံၣ်ဒီးထီၣ်ဖိ န့ၢ်အဖိအဂုၤအဂၤတဖၣ်န့ၣ်လီၤ.

14ဖဲစီၤစ့ၤလါအသးအိၣ်ဝဲအနံၣ်သၢဆံန့ၣ်အဝဲထီၣ်ဖိန့ၢ်အဖိ ခွါတဂၤ, စီၤဧ့ၤဘ့ၢ်လီၤ. 15အန့ၣ်ဝံၤဒီး, အဝဲအိၣ်မူဆူညါအနံၣ်လွံၢ်ကယၤသၢနံၣ်ဒီးထီၣ် ဖိန့ၢ်အဖိအဂုၤအဂၤတဖၣ်န့ၣ်လီၤ.

16ဖဲစီၤဧ့ၤဘ့ၢ်အသးအိၣ်ဝဲသၢဆံလွံၢ်နံၣ်န့ၣ်အဝဲထီၣ်ဖိန့ၢ် အဖိခွါတဂၤ, စီၤပ့ၤလ့းန့ၣ်လီၤ. 17အန့ၣ်ဝံၤဒီးအဝဲအိၣ်မူဆူညါအနံၣ်လွံၢ်ကယၤသၢဆံဒီးထီၣ်ဖိ န့ၢ်အဖိအဂုၤအဂၤတဖၣ်န့ၣ်လီၤ.

18ဖဲစီၤပ့ၤလ့းအသးအိၣ်ဝဲအနံၣ်သၢဆံန့ၣ်အဝဲထီၣ်ဖိန့ၢ်အဖိ ခွါတဂၤ, စီၤရူၤန့ၣ်လီၤ. 19အန့ၣ်ဝံၤဒီး, အဝဲအိၣ်မူဆူညါအနံၣ်ခံကယၤခွံနံၣ်ဒီးထီၣ် ဖိန့ၢ်အဖိအဂုၤအဂၤတဖၣ်န့ၣ်လီၤ.

20ဖဲစီၤရူၤအသးအိၣ်ဝဲသၢဆံခံနံၣ်န့ၣ်အဝဲထီၣ်ဖိန့ၢ်အဖိ ခွါတဂၤ, စီၤစရူာ်န့ၣ်လီၤ. 21အန့ၣ်ဝံၤဒီး, အဝဲအိၣ်မူဆူညါအနံၣ်ခံကယၤနွံနံၣ်ဒီးထီၣ်ဖိန့ၢ် အဖိအဂုၤအဂၤတဖၣ်န့ၣ်လီၤ.

22ဖဲစီၤစရူာ်အသးအိၣ်ဝဲအနံၣ်သၢဆံန့ၣ်ထီၣ်ဖိန့ၢ်အဖိခွါတ ဂၤ, စီၤနၤဃိၢ်န့ၣ်လီၤ. 23အန့ၣ်ဝံၤဒီး, အဝဲအိၣ်မူဆူညါအနံၣ်ခံကယၤဒီးထီၣ်ဖိန့ၢ်အ ဖိအဂုၤအဂၤတဖၣ်န့ၣ်လီၤ.

24ဖဲစီၤနၤဃိၢ်အသးအိၣ်ဝဲခံဆံခွံနံၣ်န့ၣ်အဝဲထီၣ်ဖိအဖိ ခွါတဂၤ, စီၤတ့ရၤန့ၣ်လီၤ. 25အန့ၣ်ဝံၤဒီး, အဝဲအိၣ်မူဆူညါတကယၤတဆံခွံနံၣ်ဒီးထီၣ်ဖိ န့ၢ်အဖိအဂုၤအဂၤတဖၣ်န့ၣ်လီၤ.

26စီၤတ့ရၤအသးအိၣ်ဝဲအနံၣ်နွံဆံဝံၤအလီၢ်ခံအဝဲကဲထီၣ်စီၤ အၤဘြၣ်, စီၤနၤဃိၢ်ဒီးစီၤဟၤရၣ်အပၢ်န့ၣ်လီၤ.

စီၤတ့ရၤအစၢၤအသွဲၣ်တဖၣ်

27ဒီးအအံၤတဖၣ်မ့ၢ်စီၤတ့ရၤလၢအမ့ၢ်စီၤအၤဘြၣ်, စီၤနၤဃိၢ်ဒီးစီၤဟၤရၣ်အပၢ်အစၢၤအသွဲၣ်တဖၣ်န့ၣ်လီၤ. စီၤဟၤရၣ်မ့ၢ်စီၤလိာ်အပၢ်န့ၣ်လီၤ. 28ဒီးစီၤဟၤရၣ်သံဝဲလၢအဝ့ၢ်ဒၣ်ဝဲလၢအမ့ၢ်ဝ့ၢ်အူၢ်လၢကီၢ်ဘၤ ဘူၤလိၣ်အပူၤဖဲအပၢ်အိၣ်မူဒံးဝဲန့ၣ်လီၤ. 29စီၤအၤဘြၣ်ထီၣ်ပှၢ်ဒီးနီၢ်စၤရဲ, ဒီးစီၤနၤဃိၢ်ထီၣ်ပှၢ်ဒီး နီၢ်မံးလကၤလၢအမ့ၢ်စီၤဟၤရၣ်အဖိမုၣ်, လၢအမ့ၢ်စ့ၢ်ကီးနီၢ်ယံၤစကၤအဒီပုၢ်ဝဲၢ်မုၣ်န့ၣ်လီၤ. 30ဒီးနီၢ်စၤရဲန့ၣ်အဖိအိၣ်ဝဲတသ့တန့ၢ်ဘၣ်.

31ဒီးစီၤတ့ရၤဟံးန့ၢ်အဖိခွါစီၤအၤဘြၣ်, ဒီးအလံၤစီၤလိာ်လၢအမ့ၢ်စီၤဟၤရၣ်အဖိခွါ, ဒီးအဒဲၣ်နီၢ်စၤရဲလၢအမ့ၢ်စီၤအၤဘြၣ်အမါ, ဒီးဟးထီၣ်ဃုာ်ဒီးအဝဲသ့ၣ်လၢဝ့ၢ်အူၢ်လၢအအိၣ်လၢကီၢ်ဘၤဘူၤ လိၣ်အပူၤ, ဒ်သိးအကလဲၤဝဲဆူကီၢ်ကနၤဧၣ်န့ၣ်လီၤ. ဒီးလဲၤဝဲပၢၢ်လၢဝ့ၢ်ဟၤရၣ်ဒီးသူၣ်လီၤဆီလီၤအတၢ်အိၣ်တၢ် ဆိးအလီၢ်ဖဲန့ၣ်လီၤ. 32စီၤတ့ရၤသံဝဲဖဲန့ၣ်ဖဲအသးအိၣ်အနံၣ်ခံကယၤယဲၢ်နံၣ်န့ၣ် လီၤ.

Currently Selected:

လံာ်တၢ်ကဲထီၣ်အခီၣ်ထံး 11: KSWC

Highlight

Copy