လံာ်ပှၤစံၣ်တဲၤတဲလီၤတၢ် 7
7
တၢ်ဆိကမိၣ်တဖၣ်လၢအဘၣ်ဃး ဒီးတၢ်အိၣ်မူ
1တၢ်မံၤဂ့ၤသၣ်ဂ့ၤန့ၣ်, ဂ့ၤဒိၣ်န့ၢ်ဒံးသိနၢမူလၢအပှ့ၤဒိၣ်တက့ၢ်န့ၣ်လီၤ. ဒီးမုၢ်တနံၤလၢနသံန့ၣ်ဂ့ၤဒိၣ်န့ၢ်ဒံးမုၢ်တနံၤလၢနအိၣ်ဖျဲၣ်ထီၣ် တက့ၢ်န့ၣ်လီၤ.
2တၢ်လဲၤဆူဟံၣ်တဖျၢၣ်ဖဲတၢ်သူၣ်အုးသးအုးအိၣ်ဝဲန့ၣ်, ဂ့ၤဒိၣ်န့ၢ်ဒံးတၢ်လဲၤဆူတၢ်အီၣ်သကိးအီသကိးတၢ်အဟံၣ်တက့ၢ် န့ၣ်လီၤ. အဂ့ၢ်ဒ်အံၤ, ပှၤအမူတဖၣ်ကြၢးမၤသ့ၣ်နီၣ်အသးထီဘိလၢတၢ်သံ အိၣ်ခိးပာ်ပဝဲခဲလၢာ်န့ၣ်လီၤ.
3တၢ်သူၣ်အုးသးအုးန့ၣ်ဂ့ၤန့ၢ်ဒံးတၢ်နံၤတၢ်အ့တက့ၢ်လီၤ. ကမၤလီၤသပှၢ်နမဲာ်, ဘၣ်ဆၣ်ကမၤဂ့ၤထီၣ်နတၢ်သ့ၣ်ညါနၢ်ပၢၢ်လီၤ.
4ပှၤတဂၤလၢထီဘိဆိကမိၣ်ဒၣ်ထဲတၢ်သူၣ်ဖှံသးညီန့ၣ်, မ့ၢ်ပှၤအမၢးတဂၤလီၤ. ပှၤလၢအကူၣ်တၢ်သ့တဂၤန့ၣ်, ဆိကမိၣ်တၢ်ဘၣ်ဃးတၢ်သံအဂ့ၢ်လီၤ.
5တၢ်ပျဲပှၤကူၣ်တၢ်သ့တဖၣ်သိၣ်က့ၤသီက့ၤနၤဆါဆါန့ၣ်, ဂ့ၤဒိၣ်န့ၢ်ဒံးတၢ်ပျဲပှၤအသးတထံတဖၣ်သးဝံၣ်စံးထီၣ်ပတြၢၤ နၤတက့ၢ်လီၤ.
6ဖဲပှၤဟးဂီၤဖိတဂၤနံၤဝဲန့ၣ်, တၢ်န့ၣ်လီၤဂာ်ဒ်တၢ်ဆှုၣ်တဖၣ် သီၣ်ကြဲးသီၣ်ကြီးလၢမ့ၣ်အူပူၤအသိးလီၤ. အခီပညီတအိၣ်နီတမံၤဘၣ်.
7ဖဲပှၤကူၣ်တၢ်သ့တဂၤလီန့ၢ်ပှၤတဂၤဂၤန့ၣ်, မ့ၢ်ဒၣ်အဝဲမၤအသးဒ်ပှၤဟးဂီၤဖိတဂၤအသိးန့ၣ်လီၤ. နမ့ၢ်ဟံးန့ၢ်ခိၣ်ဖးလာ်ဆှိးဒီး, နမၤဟးဂီၤနသကဲာ်ပဝးန့ၣ်လီၤ.
8တၢ်တမံၤမံၤအကတၢၢ်န့ၣ်ဂ့ၤဒိၣ်န့ၢ်ဒံးအတၢ်ကဲထီၣ်အခီၣ်ထံး တက့ၢ်လီၤ. တၢ်ဝံသးစူၤန့ၣ်ဂ့ၤန့ၢ်ဒံးတၢ်ပာ်ထီၣ်ထီသးတက့ၢ်လီၤ.
9ပၢၤဃာ်နတၢ်သူၣ်ဒိၣ်သးထီၣ်တက့ၢ်. တၢ်စၢဃးပှၤဂၤအတၢ်ကမၣ်နၣ်မ့ၢ်တၢ်မၢးလီၤ.
10“အိ, ဘၣ်မနုၤအဃိတၢ်မၤအသးတဖၣ်, ဂ့ၤဒိၣ်တက့ၢ်လၢမုၢ်နံၤ လၢပျၢၤတဖၣ်အပူၤလဲၣ်” န့ၣ်, သံကွၢ်နီတစုတဂ့ၤ. တမ့ၢ်တၢ်သူၣ်ဆးသးဆးအတၢ်သံကွၢ်တမံၤဘၣ်.
11ပှၤလၢအအိၣ်မူကိးဂၤဒဲးန့ၣ်ကြၢးကူၣ်သ့ကူၣ်ဘၣ်လီၤ. တၢ်အံၤဂ့ၤထဲသိးဒီးတၢ်ဒိးန့ၢ်ဘၣ်တၢ်န့ၢ်သါတမံၤ, 12ဒီးကဟ့ၣ်နၤတၢ်ဘံၣ်ဘၢပူၤဖျဲးအါထဲသိးဒီးတၢ်လၢစ့မၤဝဲ သ့တက့ၢ်န့ၣ်လီၤ. တၢ်ကူၣ်သ့ပာ်ပူၤဖျဲးနၤလီၤ. အဝဲအံၤမ့ၢ်တၢ်အိၣ်ဒီးတၢ်သ့ၣ်ညါအဘျုးအဖှိၣ်န့ၣ်လီၤ.
13ဆိကမိၣ်ထီၣ်တၢ်လၢကစၢ်ယွၤမၤတ့ၢ်ဝဲန့ၣ်တက့ၢ်. တၢ်လၢကစၢ်ယွၤမၤက့ၣ်တ့ၢ်အီၤန့ၣ်, မ့ၢ်မတၤမၤဘျၢကသ့ တဂၤလဲၣ်. 14ဖဲတၢ်ခဲလၢာ်လဲၤအသးဂ့ၤဂ့ၤဘၣ်ဘၣ်လၢနဂီၢ်ဒီး, သးခုတက့ၢ်. ဒီးဖဲတၢ်ကီတၢ်ခဲဟဲဝဲဒီး, သ့ၣ်နီၣ်ထီၣ်လၢကစၢ်ယွၤဆှၢလီၤတၢ်သူၣ်ဖှံသးညီဒီးတၢ်ကီတၢ် ခဲခံမံၤလိာ်တက့ၢ်. ခဲကိာ်တၢ်မနုၤကမၤအသးလဲၣ်န့ၣ်, နတသ့ၣ်ညါနီတစုဘၣ်.
15ယတၢ်အိၣ်မူမ့ၢ်တ့ၢ်တၢ်လၢအဘျုးတအိၣ်ဘၣ်လီၤ. ဘၣ်ဆၣ်ဒီးလၢအပူၤန့ၣ်ယထံၣ်တ့ၢ်တၢ်ခဲလၢာ်လီၤ. ပှၤအဂ့ၤတဂၤကသံဝဲဖဲပှၤတဂၤလၢအအၢဒၣ်လဲာ်အိၣ်မူဒံးဝဲအခါ န့ၣ်လီၤ. 16မၤသးဒ်န့ၣ်ဒီး, ဂ့ၤကဲၣ်ဆိးတဂ့ၤ, ကူၣ်သ့ကဲာ်ဆိးတဂ့ၤ. ဘၣ်မနုၤအဃိနကမၤသံလီၤနသးန့ၣ်လဲၣ်. 17ဘၣ်ဆၣ်အၢသီကဲၣ်ဆိးမ့ၢ်ဂ့ၤ. မၢးကဲၣ်ဆိးမ့ၢ်ဂ့ၤတဂ့ၤ. ဘၣ်မနုၤအဆၢကတီၢ်တချုးတုၤဒံးဘၣ်ဒီးနကသံန့ၣ်လဲၣ်. 18ပဒ့ၣ်ဟးဆှဲးတၢ်နးကဲာ်ဆိးခံမံၤလိာ်န့ၣ်တက့ၢ်. နမ့ၢ်အိၣ်ဒီးတၢ်ယူးယီၣ်ကစၢ်ယွၤဒီး, တမံၤဂ့ၤတမၠိဂ့ၤနကမၤ န့ၢ်မၤနၢၤတၢ်လီၤ.
19တၢ်ကူၣ်သ့မၤတၢ်လၢပှၤတဂၤအဂီၢ်ဒိၣ်န့ၢ်အါန့ၢ်ဒံးပှၤပၢတၢ် အဂၤတဆံမၤတၢ်သ့လၢဝ့ၢ်တဝ့ၢ်အဂီၢ်တက့ၢ်လီၤ.
20လၢဟီၣ်ခိၣ်ချၢအံၤပှၤလၢအမၤတၢ်အဘၣ်ထီဘိဒီးတမၤကမၣ်တၢ်နီ တစု, တအိၣ်ဝဲနီတဂၤဘၣ်.
21ပာ်နသးစုာ်ကနၣ်လၢပှၤအတၢ်ကတိၤကိးမံၤဒဲးန့ၣ်တဂ့ၤ. နကနၢ်ဟူဘၣ်ဖုးနခ့နပှၤကတိၤဒုၣ်ဒွဲၣ်စံးအၢနၤလီၤ. 22ဒီးနသ့ၣ်ညါလီၤနသးစ့ၢ်ကီးလၢနကတိၤဒုၣ်ဒွဲၣ်စံးအၢတ့ၢ်ဘၣ် ပှၤအဂၤတဖၣ်အါစုအါဘျီလီၤ.
23ယသူယတၢ်ကူၣ်သ့လၢတၢ်မၤကွၢ်တၢ်အံၤခဲလၢာ်လီၤ. ယပာ်လီၤတ့ၢ်ယသးလၢယကမ့ၢ်ပှၤကူၣ်တၢ်သ့လီၤ. ဘၣ်ဆၣ်တၢ်အံၤအိၣ်ယံၤဒီးယၤလီၤ. 24တၢ်အိၣ်မူအခီပညီမ့ၢ်တၢ်မနုၤလဲၣ်န့ၣ်, မတၤဃုထံၣ်န့ၢ်သ့ တဂၤလဲၣ်. ယိာ်ကဲၣ်ဆိးလၢပဂီၢ်, ကီကဲၣ်ဆိးလၢပကနၢ်ပၢၢ်အီၤ အဂီၢ်လီၤ. 25ဘၣ်ဆၣ်ဒီးယဟ့ၣ်လီၤယသးဆူတၢ်သ့ၣ်ညါဒီးတၢ်မၤလိ န့ၢ်တၢ်လီၤ. ယပာ်လီၤယသးလၢယကဃုန့ၢ်တၢ်ကူၣ်သ့ဒီးတၢ်စံးဆၢ တဖၣ်လၢယတၢ်သံကွၢ်တဖၣ်အဂီၢ်, ဒီးလၢယကမၤလိတၢ်သူၣ်တထံသးတဆးအံၤအၢဆံးအါဆံးအါမၢး ဆံးအါဆံးအါအဂ့ၢ်န့ၣ်လီၤ.
26ယထံၣ်န့ၢ်တၢ်တမံၤလၢအခၣ်ဝဲဒိၣ်န့ၢ်ဒံးတၢ်သံတက့ၢ်လၢအမ့ၢ်ဝဲ ပိာ်မုၣ်လၢအလီၤဂာ်ဒ်ထုတခါအသိးန့ၣ်လီၤ. တၢ်အဲၣ်လၢအဝဲဟ့ၣ်လီၤနၤကဖီၣ်နၤဒ်ပှာ်ဧိၤစၤဧိၤအသိးလီၤ. ဒီးအဝဲစုတီၤတဖၣ်လၢအဖိးဟုဃာ်နၤန့ၣ်ကစှီၤဃာ်နၤဒ်ထးသွဲအသိးလီၤ. ပှၤလၢအမၤမုာ်ယွၤအသးန့ၣ်ကပူၤဖျဲးဒီးအီၤလီၤ. ဘၣ်ဆၣ်အဝဲကဖီၣ်န့ၢ်ပှၤတၢ်ဒဲးဘးဖိလီၤ. 27ပှၤဆိကမိၣ်တၢ်အဒိၣ်အယိာ်တဂၤစံးဝဲဒၣ်, မ့ၢ်လီၤ, ယထံၣ်န့ၢ်တၢ်အံၤတစဲးဘၣ်တစဲးဖဲယဃုထံၣ်တၢ်စံးဆၢတဖၣ်အဆၢ ကတီၢ်န့ၣ်လီၤ. 28ယဃုထံၣ်န့ၢ်တၢ်စံးဆၢအဂၤတဖၣ်, ဘၣ်ဆၣ်ယတထံၣ်န့ၢ်နီ တမံၤဘၣ်. ယထံၣ်တ့ၢ်ပှၤပိာ်ခွါတဂၤလၢပှၤတကထိအကျါလၢယပာ်ကဲ အီၤန့ၢ်န့ၣ်လီၤ. ဘၣ်ဆၣ်ဒီးယတထံၣ်န့ၢ်ပိာ်မုၣ်နီတဂၤဘၣ်. 29တၢ်အံၤမ့ၢ်တၢ်လၢယမၤလိန့ၢ်တ့ၢ်ခဲလၢာ်လီၤ. ယွၤတ့လီၤပှၤကညီလိၤလိၤဒီးဘျၢဘျၢလီၤ. ဘၣ်ဆၣ်ဒီးပမၤဒၢက့ၣ်ဒၢကူလီၤပသးနးမးလီၤ.
Currently Selected:
လံာ်ပှၤစံၣ်တဲၤတဲလီၤတၢ် 7: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
