လံာ်ပှၤစံၣ်တဲၤတဲလီၤတၢ် 6

1ယပာ်သူၣ်ပာ်သးတ့ၢ်လၢတၢ်စံၣ်ညီၣ်တတီဒိၣ်မးတမံၤမၤတ့ၢ် အသးလၢဟီၣ်ခိၣ်အံၤန့ၣ်လီၤ. 2ကစၢ်ယွၤကဟ့ၣ်လီၤပှၤတဂၤဂၤလၢတၢ်ထူးတၢ်တီၤ, တၢ်လၤကပီၤ, ဒီးတၢ်စုလီၢ်ခီၣ်ခိၣ်ဒီးတၢ်ခဲလၢာ်လၢအသးလီဝဲန့ၣ်လီၤ. ဘၣ်ဆၣ်ဒီးတပျဲဘၣ်အဝဲလၢအကမုာ်လၤသးခုဝဲ လၢတၢ်န့ၣ်အဃိဘၣ်. အခိၣ်တလိာ်ပှၤအဂၤကမုာ်လၤသးခု လၢအလီၢ်န့ၣ်လီၤ. တၢ်အံၤမ့ၢ်တၢ်လၢအဘျုးတအိၣ်ဘၣ်, ဒီးတၢ်န့ၣ်ကမၣ်ခဲလၢာ်လီၤ. 3ပှၤတဂၤကအိၣ်ဒီးအဖိတကယၤဂၤဒီးအိၣ်မူအါနံၣ်အါလါ, ဘၣ်ဆၣ်အဝဲအိၣ်မူယံာ်ထဲလဲၣ်နာ်က့, မ့ၢ်တန့ၢ်ဘၣ်တၢ်သူၣ်ဖှံသးညီလၢအဂီၢ်ဒၣ်ဝဲဒီးမ့ၢ်တန့ၢ်ဘၣ် တၢ်ခူၣ်လီၤဘျၢအီၤဂ့ၤဂ့ၤဘၣ်ဘၣ်ဒီး, ယစံးယဲလၢဖိသၣ်တဂၤ အိၣ်ဖျဲၣ်ထီၣ်လၢအသံန့ၣ်ဂ့ၤဒိၣ်တက့ၢ်လီၤ. 4တၢ်န့ၣ်တမၤဂ့ၤဖိသၣ်န့ၣ်လၢကအိၣ်ဖျဲၣ်ထီၣ်နီတမံၤဘၣ်. တၢ်န့ၣ်လီၤမၢ်ကွံာ်ဝဲဆူတၢ်ခံးတၢ်နၤအပူၤ, တၢ်လီၢ်ဖဲအဘၣ်တၢ်သးပ့ၤနီၣ်ကွံာ်အီၤန့ၣ်လီၤ. 5တထံၣ်ဘၣ်မုၢ်ဆါအတၢ်ကပီၤနီတစုမ့ၢ်ဂ့ၤ, တသ့ၣ်ညါတၢ်အိၣ်မူလီၤဂာ်ဒ်လဲၣ်မ့ၢ်ဂ့ၤန့ၣ်ဘၣ်. ဘၣ်ဆၣ်ဒီးအစှၤကတၢၢ်န့ၣ်, ထံၣ်ဘၣ်တ့ၢ်တၢ်အိၣ်ဘှံး, 6တၢ်လၢအဂ့ၤဒိၣ်န့ၢ်ဒံးဒၣ်လဲာ်ပှၤလၢအအိၣ်မူအနံၣ်ခံကထိသနာ် က့တမုာ်လၤသးခုဘၣ်လၢတၢ်အိၣ်မူအပူၤနီတစုဘၣ်တက့ၢ်န့ၣ်လီၤ. နီၢ်နီၢ်န့ၣ်အဝဲသ့ၣ်ခံဂၤလိာ်လဲၤဒၣ်ဆူတၢ်လီၢ်တပူၤဃီန့ၣ်လီၤ.

7ပှၤကညီတဂၤမၤအတၢ်မၤခဲလၢာ်မ့ၢ်ဒၣ်လၢကမၤန့ၢ်တၢ်တမံၤမံၤလၢ ကအီၣ်ဝဲအဂီၢ်, ဘၣ်ဆၣ်အဝဲတအိၣ်ဒီးတၢ်လၢလၢလီၣ်လီၣ်လၢအဂီၢ်နီတဘျီဘၣ်. 8ပှၤလၢအကူၣ်တၢ်သ့တဂၤဂ့ၤဒိၣ်န့ၢ်ဒံးပှၤဟးဂီၤဖိတဂၤလၢကျဲဒ်လဲၣ်. တၢ်သ့ၣ်ညါကွၢ်ဆၢၣ်မဲာ်တၢ်အိၣ်မူန့ၣ်, ကမၤဂ့ၤပှၤအဖှီၣ်တဂၤဒ်လဲၣ်. 9တၢ်အံၤမ့ၢ်တၢ်လၢအဘျုးတအိၣ်ဘၣ်လီၤ. မၤသးဒ်တၢ်လူၤဖီၣ်ကလံၤအသိးန့ၣ်လီၤ. တၢ်သးမံဒီးတၢ်လၢအအိၣ်ဒီးနၤန့ၣ်ဂ့ၤဒိၣ်န့ၢ်ဒံးထီဘိ နကသူၣ်လီသးကွံတၢ်အဂၤတက့ၢ်န့ၣ်လီၤ. 10တၢ်ခဲလၢာ်လၢအမၤအသးန့ၣ်တၢ်ကူၣ်ပာ်တ့ၢ်အီၤယံာ်လံ, ဒီးပဝဲခဲလၢာ်ပသ့ၣ်ညါလၢပှၤတဂၤဂၤဂ့ၢ်လိာ်ဘှီလိာ်တၢ်ဒီး ပှၤလၢအဆူၣ်န့ၣ်ဒံးအီၤတဂၤတသ့ဘၣ်န့ၣ်လီၤ. 11နဂ့ၢ်လိာ်ဒီးအီၤဒံးယံာ်ဒီးတၢ်အဘျုးတအိၣ်ဘၣ်န့ၣ်ဒံးအါထီၣ် ဒီးနတဂ့ၤလၢၤနီတမံၤဘၣ်. 12တၢ်အဂ့ၤကတၢၢ်လၢပှၤကညီတဂၤအဂီၢ်လၢအဝဲအတၢ်အိၣ်မူ ဖုၣ်ကိာ်, တၢ်အိၣ်မူလၢအဘျုးတအိၣ်ဘၣ်, တၢ်အိၣ်မူလၢအလဲၤပူၤကွံာ်ဝဲဒ်တၢ်ကဒုအသိးန့ၣ်အပူၤအံၤ, မ့ၢ်တၢ်မနုၤလဲၣ်န့ၣ်, အဝဲသ့ၣ်ညါကသ့ဒ်လဲၣ်. အဝဲသံဝံၤအလီၢ်ခံ, တၢ်မနုၤကမၤအသးလၢဟီၣ်ခိၣ်ချၢအံၤလဲၣ် န့ၣ်, မ့ၢ်မတၤသ့ၣ်ညါကသ့တဂၤလဲၣ်.

Currently Selected:

လံာ်ပှၤစံၣ်တဲၤတဲလီၤတၢ် 6: KSWC

Highlight

Copy