လံာ်ပှၤစံၣ်တဲၤတဲလီၤတၢ် 12
12
1တချုးဒံးဘၣ်လၢမုၢ်နံၤတဖၣ်ဒီးနံၣ်တဖၣ်လၢအမၤသးအုးတၢ်ဟဲ ဒီးဖဲနကစံး, “ယအိၣ်မူတမုာ်တလၤဘၣ်ယၤဘၣ်” န့ၣ်, သ့ၣ်နီၣ်ထီၣ်က့ၤနတၢ်ဘၣ်တ့အကစၢ်ဖဲနသးစၢ်ဒံးအကတီၢ် အံၤန့ၣ်တက့ၢ်. 2အကတီၢ်န့ၣ်ကမ့ၢ်ဖဲ, မုၢ်, လါ, ဒီးဆၣ်တဖၣ်အတၢ်ကပီၤကခံးလီၤဝဲ လၢနဂီၢ်, ဒီးတၢ်စူၤအတၢ်အၢၣ်တဖၣ်တလဲၤပူၤကွံာ်နီတဘျီ အကတီၢ်, 3ဒီးနစုဒုၣ်စုတီၤလၢအဒီဒၣ်တ့ၢ်လံနၤတဖၣ်ကကနိးထီၣ်ဝဲ, ဒီးနခီၣ်လၢခဲအံၤအဂံၢ်ဆူၣ်တဖၣ်ကလီၤစၢ်ကွံာ်ဝဲ, နမဲတဖၣ်ကစှၤဝဲလၢနကအ့ၣ်အီၣ်တၢ်အီၣ်အဂီၢ်, ဒီးနမဲာ်ချံတဖၣ်ကယုာ်လီၤဝဲတုၤလၢနကထံၣ်တၢ်ဆှံဆှံအဂီၢ်, 4နနၢ်တဖၣ်ကတအၢဝဲတုၤနတနၢ်ဟူတၢ်အသီၣ်လၢကျဲခိၣ်ဘၣ်, နကနၢ်ဟူကဟၣ်ဂံာ်ဘုအသီၣ်မ့တမ့ၢ်, တၢ်ဒ့တၢ်အူအသီၣ်ကဒၢကဒၢ, မ့မ့ၢ်ထိၣ်ဖိတဘ့ၣ်အတၢ်သူၣ်ဝံၣ်သး ဆၢကထိၣ်ဂဲၤထၢၣ်နၤလၢနတၢ်မံအပူၤ, 5နကပျံၤတၢ်လီၢ်ထီၣ်ထီတဖၣ်ဒီးတၢ်ဟးလိာ်ကွဲကမ့ၢ်တၢ်လီၤဘၣ်ယိၣ်, နခိၣ်သူကဝါထီၣ်, နတွံၢ်ထီၣ်တွံၢ်လီၤနသးဒၣ်လဲာ်ကကီလၢနဂီၢ်, ဒီးနတၢ်သူၣ်လီသးကွံကလီၤမၢ်ကွံာ်ခဲလၢာ်လီၤ. ပလဲၤတၢ်ပတၢ်အိၣ်ဘှံးအလီၢ်လၢခံကတၢၢ်ဒီး, အန့ၣ်ဝံၤတၢ်ဟီၣ်တၢ်ယၢၤကအိၣ်လၢကျဲတဖၣ်အပူၤန့ၣ်လီၤ. 6သးသမူအပျံၤစ့ကထီၣ်တဲာ်ဝဲဒီးတၢ်အိၣ်မူအမ့ၣ်အူဒၢထူကလီၤ တဲာ်သ့ၣ်ဖးကွံာ်ဒ်ပျံၤလၢထံပူၤထီၣ်တဲာ်ဝဲ, ဒီးသပၢၤထံကဲထီၣ်တၢ်အက့အခီခဲလၢာ်အသိးန့ၣ်လီၤ. 7ပနီၢ်ခိတဖၣ်ကက့ၤဆူဟီၣ်ခိၣ်အကမူၣ်, ဒီးပတၢ်မူအသါက့ၤကဒါ က့ၤဆူကစၢ်ယွၤလၢအဟ့ၣ်လီၤတ့ၢ်ပှၤအအိၣ်န့ၣ်လီၤ.
8အဘျုးတအိၣ်ဘၣ်, အဘျုးတအိၣ်ဘၣ်, ပှၤဆိကမိၣ်တၢ်အဒိၣ်အယိာ်စံးဝဲဒၣ်. တၢ်ခဲလၢာ်မ့ၢ်တၢ်လၢအဘျုးတအိၣ်ဘၣ်လီၤ.
တၢ်ပာ်ဖှိၣ်က့ၤ
9ဘၣ်ဆၣ်မ့ၢ်လၢပှၤဆိကမိၣ်တၢ်အဒိၣ်အယိာ်တဂၤအံၤကူၣ်တၢ် သ့အဃိ, အဝဲသိၣ်လိဒံးဒၣ်ပှၤဂီၢ်မုၢ်လၢတၢ်လၢအဝဲသ့ၣ်ညါတ့ၢ် ဝဲန့ၣ်လီၤ. အဝဲမၤလိတၢ်ကတိၤဒိတဖၣ်ဒီးမၤကွၢ်အတၢ်မ့ၢ်တၢ်တီ, တီတီလိၤလိၤလီၤ. 10ပှၤဆိကမိၣ်တၢ်အဒိၣ်အယိာ်တဂၤအံၤကျဲးစၢးဃုထံၣ်န့ၢ်တၢ် ကတိၤမုာ်သူၣ်မုာ်သးတဖၣ်, ဒီးတၢ်ကတိၤလၢအဝဲကွဲးတ့ၢ်ဝဲတဖၣ်တီဝဲလိၤဝဲန့ၣ်လီၤ. 11ပှၤကူၣ်တၢ်သ့တဖၣ်အတၢ်ကတိၤလီၤဂာ်ဒီးနီၣ်ခိၣ်စူတဖၣ်လၢပှၤ ကွၢ်သိတဖၣ်သူဝဲလၢတၢ်ပၢဆှၢသိအဂီၢ်, ဒီးတၢ်ကတိၤဒိတဖၣ်လၢအဘၣ်တၢ်ထၢ ဖှိၣ်အီၤအိၣ်စံၣ်အိၣ်ကျၢၤဝဲဒ်ထးတဖၣ်လၢအဘၣ် တၢ်ဒိတံၢ်ဂၢၢ်ကျၢၤအီၤအသိးန့ၣ်လီၤ. တၢ်သ့ၣ်တဖၣ်အံၤဘၣ်တၢ်ဟ့ၣ်လီၤတ့ၢ်အီၤလၢကစၢ်ယွၤ, ပှၤကွၢ်သိထဲတဂၤဧိၤလၢပဝဲခဲလၢာ်အဂီၢ်န့ၣ်လီၤ.
12ယဖိခွါဧၢ, တၢ်အိၣ်ဒံးဝဲအဂၤတမံၤလၢတၢ်ပလီၢ်သူၣ်ပလီၢ်သး အဂီၢ်လီၤ. တၢ်ကွဲးလံာ်တဖၣ်န့ၣ်အကတၢၢ်ကတာ်တအိၣ်နီ တဘျီဘၣ်. ဒီးတၢ်မၤလိတၢ်အါကဲၣ်ဆိးန့ၣ်, ကမၤလီၤဘှံးကွံာ် နၤလီၤ.
13တၢ်ခဲလၢာ်ဝံၤအလီၢ်ခံန့ၣ်, တၢ်အိၣ်တီၢ်ဒၣ်ထဲတမံၤလၢတၢ်က စံးကတိၤအီၤအဂီၢ်လီၤ. အိၣ်ဒီးတၢ်ယူးယီၣ်ကစၢ်ယွၤတက့ၢ်. ဒီးစူၢ်အတၢ်မၤလိာ်တဖၣ်တက့ၢ်. အဂ့ၢ်ဒ်အံၤ, တၢ်တ့လီၤပှၤကညီလၢတၢ်အံၤအဂီၢ်လီၤ. 14ကစၢ်ယွၤကစံၣ်ညီၣ်တၢ်ခဲလၢာ်လၢပမၤအီၤ, ဂ့ၤမ့ၢ်ဂ့ၤ, အၢမ့ၢ်ဂ့ၤ, တုၤဒၣ်လဲာ်လၢတၢ်တဖၣ်လၢပမၤအီၤလၢတၢ်ခူသူၣ်အပူၤန့ၣ်လီၤ.
Currently Selected:
လံာ်ပှၤစံၣ်တဲၤတဲလီၤတၢ် 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
