မၤတၢ် 17
17
ဖဲဝ့ၢ်သ့းစၤလနံ
1အဝဲသ့ၣ်လဲၤခီဂာ်ဝ့ၢ်အၣ်ဖံပလံၤဒီးဝ့ၢ်အၤပလိၤနံဝံၤဒီး, ဟဲတုၤဝဲလၢဝ့ၢ်သ့းစၤလနံဖဲဘူၣ်ဘျီၣ်လၢအမ့ၢ်တၢ်ဘါ အလီၢ်အိၣ်ဝဲတဖျၢၣ်န့ၣ်လီၤ. 2ဒ်အဝဲဒၣ်အလုၢ်အလၢ်အိၣ်ဝဲအသိး, စီၤပီလူးလဲၤဆူဘူၣ်ဘျီၣ်လၢအမ့ၢ်တၢ်ဘါအလီၢ်ဒီးဖဲန့ၣ်, လၢပှၤယူဒၤဖိအမုၢ်အိၣ်ဘှံးနံၤသၢဘျီအတီၢ်ပူၤ, အဝဲဒၣ်ဂ့ၢ်လိာ်ဘှီလိာ်တၢ်ဒီးပှၤကမျၢၢ်တဖၣ်အိၣ်ဒီးတၢ်ယၢၤ ထီၣ်ဒီး 3တဲနၢ်ပၢၢ်အဝဲသ့ၣ်လၢတၢ်ကွဲးအသးစီဆှံတဖၣ်, ဒီးဟ့ၣ်တၢ်အုၣ်အသးလၢခရံာ်ကဘၣ်တူၢ်တၢ်ဒီးဂဲၤဆၢထၢၣ် က့ၤလၢတၢ်သံအဂ့ၢ်န့ၣ်လီၤ. စီၤပီလူးစံးဝဲ, “ယ့ၣ်ၡူးလၢယဘိးဘၣ်သ့ၣ်ညါသုလၢအဂ့ၢ်တဂၤအံၤမ့ၢ် ခရံာ်န့ၣ်လီၤ.” 4အဝဲသ့ၣ်တနီၤနာ်တၢ်လၢစီၤပီလူးစံးဝဲဒီးပာ်အသး တဖျၢၣ်ဃီဒီးစီၤပီလူးဒီးစီၤစံလၤန့ၣ်လီၤ. ပှၤကြံးခ်ဖိအါအါဂီၢ်ဂီၢ်လၢအဲၣ်ထူအဲၣ်ယွၤ တဖၣ်, ဒီးပိာ်မုၣ်အိၣ်ဒီးအလၤကပီၤတဖၣ်စ့ၢ်ကီး ပာ်က့ၤအသးတဖျၢၣ်ဃီဒီးအဝဲသ့ၣ်လီၤ.
5ဘၣ်ဆၣ်ဒီးပှၤယူဒၤဖိသ့ၣ်တဖၣ်အသးက့ၣ်ဒီးပာ်ဖှိၣ်ထီၣ် ပှၤအၢပှၤသီလၢကျဲမုၢ်ခိၣ်တနီၤ, ဒီးဒုးအိၣ်ထီၣ်ပှၤဂီၢ်မုၢ်တဖုလၢအမၤတၢထီၣ်တၢလီၤဝ့ၢ်ဒီ ဖျၢၣ်ညါဒီးလဲၤနုာ်ဆူၣ်ဆူစီၤယါစီၣ်အဟံၣ်ပူၤ, ဒ်သိးအကထံၣ်န့ၢ်စီၤပီလူးဒီးစီၤစံလၤဒီးကဟဲစိာ်ထီၣ်အီၤ ဆူပှၤဂီၢ်မုၢ်အအိၣ်အဂီၢ်န့ၣ်လီၤ. 6ဘၣ်ဆၣ်ဒီးဖဲအတထံၣ်အဝဲသ့ၣ်န့ၣ်, တွံၢ်ထီၣ်စီၤယါစီၣ်ဒီးအပျဲၢ်အဘီၣ်အဂၤတနီၤဆူဝ့ၢ်အကီၣ် ကးအမဲာ်ညါဒီးကိးပသူထီၣ်ဝဲ, “ပှၤသ့ၣ်တဖၣ်အံၤမၤတၢထီၣ်တၢလီၤတၢ်သကုၤဆးဒး လီၤ. ခဲကနံၣ်အံၤအဝဲသ့ၣ်ဟဲတုၤပဝ့ၢ်ပူၤလံ. 7ဒီးစီၤယါစီၣ်တူၢ်လိာ်ခီၣ်ဆၢအီၤလၢအဟံၣ်ပူၤလီၤ. အဝဲသ့ၣ်ခဲလၢာ်လုၣ်သ့ၣ်ခါပတာ်စီၤပၤဖးဒိၣ်အတၢ် သိၣ်တၢ်သီတဖၣ်, ခီဖျိအစံးဝဲလၢစီၤပၤဖးဒိၣ်အိၣ်ဝဲအဂၤ တဂၤလၢအမံၤမ့ၢ်ယ့ၣ်ၡူးန့ၣ်လီၤ. 8တၢ်ကတိၤသ့ၣ်တဖၣ်အံၤဒုးအိၣ်ထီၣ်တၢ်ဘၣ်ယိၣ်ဘၣ်ဘီ လၢပှၤဂီၢ်မုၢ်ဒီးပှၤခိၣ်ပှၤနၢ်တဖၣ်အသိးအကျါလီၤ. 9အဝဲသ့ၣ်မၢစီၤယါစီၣ်ဒီးပှၤအဂၤတဖၣ်ဟ့ၣ်လီၤစ့လၢ အကဘၣ်ဟ့ၣ်ဝဲဒ်သိးတၢ်ကပျၢ်လီၤအီၤအဂီၢ်, ဝံၤဒီးပျၢ်ဖျဲးကွံာ်အဝဲသ့ၣ်လီၤ.
ဖဲဝ့ၢ်ဘ့းရံၤ
10ဖဲမုၢ်နၤတုၤဃီၤန့ၣ်, တဘျီဃီအပျဲၢ်အဘီၣ်တဖၣ်ဆှၢစီၤပီလူးဒီး စီၤစံလၤဆူဝ့ၢ်ဘ့းရံၤ, ဒီးဖဲအဝဲသ့ၣ်လဲၤတုၤန့ၣ်လဲၤနုာ်ဝဲဆူဘူၣ်ဘျီၣ်လၢအမ့ၢ် တၢ်ဘါအလီၢ်န့ၣ်လီၤ. 11ပှၤဖဲန့ၣ်တဖၣ်ပာ်အသးလဲၢ်ဒိၣ်န့ၢ်ဒံးပှၤဝ့ၢ်သ့းစၤလနံဖိ တဖၣ်လီၤ. အဝဲသ့ၣ်ဒိကနၣ်တၢ်ကစီၣ်လၢတၢ်သူၣ်ဆူၣ်သးဂဲၤ အပူၤ, ဒီးဃုသ့ၣ်ညါနၢ်ပၢၢ်တၢ်ကွဲးအသးစီဆှံကိးနံၤဒဲးဒ်သိး အကသ့ၣ်ညါဘၣ်ဝဲတၢ်လၢစီၤပီလူးစံးကတိၤလၢအဂ့ၢ်တဖၣ်မ့ၢ်, တမ့ၢ်လဲၣ်န့ၣ်လီၤ. 12အဝဲသ့ၣ်အါဒံအါဂၤစူၢ်က့ၤနာ်က့ၤတၢ်, ဒီးပှၤကြံးခ် တူၢ်ဒိၣ်ကီၤဒိၣ်မုၣ်အါဒံအါဂၤဒီးပှၤကြံးခ်ပိာ်ခွါ အါဒံအါဂၤစ့ၢ်ကီးစူၢ်က့ၤနာ်က့ၤတၢ်လီၤ. 13ဘၣ်ဆၣ်ဒီးဖဲပှၤယူဒၤဖိလၢဝ့ၢ်သ့းစၤလနံတဖၣ်နၢ်ဟူ ဘၣ်ဝဲလၢစီၤပီလူးစံၣ်တဲၤတဲလီၤတ့ၢ်စ့ၢ်ကီးကစၢ်ယွၤ အကလုၢ်အကထါဖဲဝ့ၢ်ဘ့းရံၤန့ၣ်, အဝဲသ့ၣ်ဟဲဖဲန့ၣ်ဒီးထိၣ်ဂဲၤထီၣ်ဒီးမၤတၢထီၣ်တၢလီၤပှၤ ဂီၢ်မုၢ်တဖၣ်လီၤ. 14တဘျီဃီဖဲန့ၣ်, ပှၤစူၢ်က့ၤနာ်က့ၤတၢ်တဖၣ်ဆှၢစီၤပီလူးဒီးပှၤ အဂၤတနီၤဆူပီၣ်လဲၣ်ကၢၢ်နံၤ, မ့မ့ၢ်စီၤစံလၤဒီးစီၤတံၤမသ့းခံဂၤလၢာ်အိၣ်တ့ၢ်ဝဲဖဲ ဝ့ၢ်ဘ့းရံၤန့ၣ်လီၤ. 15ပှၤလၢအဆှၢစီၤပီလူးတဖၣ်လဲၤဃုာ်ဒီးအီၤတုၤလၢဝ့ၢ် အၤသ့ၣ်လီၤ. ဖဲန့ၣ်စီၤပီလူးမၤလိာ်ထွဲအခံဒ်သိးအကတဲ ဘၣ်စီၤစံလၤဒီးစီၤတံၤမသ့းလၢအကဟဲဆူအအိၣ်ချ့ချ့ တသ့ဖဲအသ့ဝံၤ, ဒီးအဝဲသ့ၣ်က့ၤကဒါက့ၤဆူဝ့ၢ်ဘ့းရံၤန့ၣ်လီၤ.
ဖဲဝ့ၢ်အၤသ့ၣ်
16ဖဲစီၤပီလူးအိၣ်ခိးစီၤစံလၤဒီးစီၤတံၤမသ့းဖဲဝ့ၢ်အၤသ့ၣ်အဖၢ မုၢ်န့ၣ်, ထံၣ်ဘၣ်ဝဲလၢတၢ်ဂီၤတၢ်ဖီၣ်အိၣ်ပှဲၤလၢဝ့ၢ်တဖျၢၣ်န့ၣ် အပူၤအဃိအသးဘၣ်တံာ်တာ်ဝဲဒၣ်အဒိၣ်အအါလီၤ. 17လၢတၢ်န့ၣ်အဃိ, အဝဲကတိၤဂ့ၢ်လိာ်ဘှီလိာ်တၢ်ဒီးပှၤယူဒၤ ဖိဒီးပှၤအဲၣ်ထူအဲၣ်ယွၤတဖၣ်ဖဲဘူၣ်ဘျီၣ်လၢအမ့ၢ်တၢ်ဘါ အလီၢ်အပူၤ, ဒီးကတိၤဂ့ၢ်လိာ်ဘှီလိာ်စ့ၢ်ကီးတၢ်ကိးနံၤဒဲးဒီးပှၤလၢ အလဲၤဘၣ်အတီၤဖဲဖၠါပူၤတဖၣ်န့ၣ်လီၤ. 18ပှၤအ့းပံၤကူၤရူးဖိအသရၣ်ဒီးပှၤစတီးအၤဖိအသရၣ်တနီၤ ကတိၤဂ့ၢ်လိာ်ဘှီလိာ်စ့ၢ်ကီးတၢ်ဒီးအီၤန့ၣ်လီၤ. အဝဲသ့ၣ်တနီၤစံးဝဲ, “ပှၤတသ့ၣ်ညါနၢ်ပၢၢ်တၢ်ဒီးလိာ်သ့အသးတဂၤအံၤမ့ၢ်အအဲၣ်ဒိး တဲတၢ်မနုၤလဲၣ်.”
ပှၤအဂၤတနီၤစံးဝဲ, “ဖျါလၢအဝဲကတိၤတၢ်ဘၣ်ဃးထံဂၤကီၢ်ဂၤအကစၢ်ယွၤ တဖၣ်အဂ့ၢ်လီၤ.” အဝဲသ့ၣ်စံးတၢ်ဒ်သိးအံၤန့ၣ်မ့ၢ်လၢစီၤပီလူးစံၣ်တဲၤတဲ လီၤတၢ်ဘၣ်ဃးယ့ၣ်ၡူးဒီးတၢ်ဂဲၤဆၢထၢၣ်သမူထီၣ်က့ၤအဂ့ၢ် အဃိလီၤ. 19လၢတၢ်န့ၣ်အဃိအဝဲသ့ၣ်လဲၤကိးစီၤပီလူးဆူဝ့ၢ်အကီၣ်ကး အမဲာ်ညါဖဲတၢ်လူၢ်အၤရံဒီးစံးဘၣ်အီၤ, “ပသးအိၣ်သ့ၣ်ညါဘၣ်ဃးတၢ်သိၣ်လိအသီတမံၤလၢနစံး ကတိၤလၢအဂ့ၢ်လီၤ. 20တၢ်လၢနစံးကတိၤနဲလၢအဂ့ၢ်တနီၤန့ၣ်သီၣ်လီၤဆီဘၣ်ပှၤ, ဒီးပအဲၣ်ဒိးသ့ၣ်ညါအခီပညီမ့ၢ်တၢ်ဒ်လဲၣ်န့ၣ်လီၤ.” 21(အဂ့ၢ်ဒ်အံၤ, အၤသ့ၣ်အပှၤဝ့ၢ်ဖိဒီးပှၤထံဖိကီၢ်ဖိလၢ အအိၣ်ဖဲန့ၣ်ကိးဂၤဒဲးသးအိၣ်သူအဆၢကတီၢ်ခဲလၢာ်ခီဖျိ အတၢ်တဲသကိး, တၢ်ဒိကနၣ်သကိးတၢ်ဂ့ၢ်လီၤတိၢ်လီၤဆီလၢအပၢၢ်ထီၣ်သီ ဒီးပၢၢ်ထီၣ်လၢခံကတၢၢ်တဖၣ်န့ၣ်လီၤ.)
22စီၤပီလူးဂဲၤဆၢထၢၣ်လၢဝ့ၢ်အကီၣ်ကးအမဲာ်ညါဒီးစံးဝဲ, “အၤသ့ၣ်အပှၤဝ့ၢ်ဖိသ့ၣ်ဧၢ, ယထံၣ်လၢတၢ်ကိးမံၤဒဲးအပူၤန့ၣ်, သုမ့ၢ်ပှၤလၢအဘါယွၤဆူၣ်မးလီၤ. 23အဂ့ၢ်ဒ်အံၤ, ဖဲယဟးလၢသုဝ့ၢ်ပူၤဒီးကွၢ်သုတၢ်ဘူၣ်တၢ်ဘါအလီၢ် တဖၣ်န့ၣ်, ယထံၣ်တၢ်လုၢ်လီၢ်တတီၤလၢတၢ်ကတိၤအိၣ်ကွဲးအသး လၢအဖီခိၣ်, ‘ကစၢ်ယွၤလၢတၢ်တသ့ၣ်ညါအီၤတဂၤအဂီၢ်’ န့ၣ်လီၤ. လၢတၢ်န့ၣ်အဃိ, ယွၤလၢသုဘူၣ်ထီၣ်ဘါထီၣ်ဒီးသုတသ့ၣ်ညါအီၤဒၣ်လဲာ်တဂၤန့ၣ်, ယစံၣ်တဲၤတဲလီၤန့ၢ်သုလၢအဂ့ၢ်ခဲကနံၣ်အံၤလီၤ. 24ကစၢ်ယွၤလၢအတ့လီၤပာ်လီၤဟီၣ်ခိၣ်ဒီးတၢ်အိၣ်လၢ အပူၤခဲလၢာ်န့ၣ်, မ့ၢ်မူခိၣ်ဒီးဟီၣ်ခိၣ်အကစၢ်, ဒီးတအိၣ်တဆိးလၢတၢ်လုၢ်ဟံၣ်လၢပှၤကညီဘှီအီၤလၢ အစုပူၤဘၣ်န့ၣ်လီၤ. 25ဒ်န့ၣ်အသိးအဝဲတလိၣ်ဘၣ်တၢ်လၢပှၤကညီဟ့ၣ်ဝဲသ့ခီဖျိ အဖံးမၤတၢ်လၢအဝဲအဂီၢ်နီတမံၤန့ၣ်ဘၣ်. အဂ့ၢ်ဒ်အံၤ, အဝဲအနီၢ်ကစၢ်ဒၣ်ဝဲမ့ၢ်ပှၤလၢအဟ့ၣ်ပှၤကိးဂၤဒဲးလၢတၢ်မူ ဒီးတၢ်သါဒီးတၢ်အဂုၤအဂၤခဲလၢာ်န့ၣ်လီၤ. 26ယွၤတ့လီၤဆိပှၤကညီတဂၤဒီးဒုးအိၣ်ထီၣ်ပှၤဟီၣ်ခိၣ်ဖိကိး ကလုာ်ဒဲးဒီးဒုးအိၣ်ဝဲဆိးဝဲလၢဟီၣ်ခိၣ်ဒီဘ့ၣ်အပူၤန့ၣ်လီၤ. အဝဲအနီၢ်ကစၢ်ဒၣ်ဝဲသုးကျဲၤဆိပာ်စၢၤတၢ်အဆၢအကတီၢ် လီၤတံၢ်လီၤဆဲးဒီးတၢ်အလီၢ်အကျဲဖဲအဝဲသ့ၣ်ကအိၣ်ကဆိးဝဲ အဂီၢ်န့ၣ်လီၤ. 27အဝဲဒၣ်တ့လီၤပာ်လီၤပှၤဟီၣ်ခိၣ်ဖိဒ်အံၤမ့ၢ်ဒ်သိးအဝဲသ့ၣ် ကဃုအီၤဒီးဘၣ်တဘၣ်ကထံၣ်န့ၢ်အီၤဖဲအဝဲသ့ၣ်ကလၢၢ်ဘၣ်အီၤ အခါန့ၣ်လီၤ. နီၢ်နီၢ်တခီ, ကစၢ်ယွၤအိၣ်တယံၤဒီးပဝဲနီတဂၤဘၣ်. 28ဒ်ပှၤတဂၤစံးတ့ၢ်ဝဲအသိး,
‘လၢအဝဲဒၣ်အပူၤပမူ, ပဟူးပဂဲၤ, ဒီးပမ့ၢ်တၢ်လီၤ.’
ဒ်သုပှၤကွဲးထါတနီၤစံးတ့ၢ်ဝဲအသိး,
‘ပဝဲစ့ၢ်ကီးပမ့ၢ်အဝဲဒၣ်အဖိတဖၣ်လီၤ.’
29ဒ်ပမ့ၢ်ကစၢ်ယွၤအဖိတဖၣ်အသိး, ပတကြၢးဆိကမိၣ်လၢယွၤမ့ၢ်တၢ်လၢအလီၤဂာ်ဒီးထူ, စ့, မ့တမ့ၢ်လၢၢ်လၢအဘၣ်တၢ်စိးပျၤဒီးဒုးအိၣ်ထီၣ်အက့ၢ် အဂီၤခီဖျိပှၤကညီအတၢ်သ့တၢ်ဘၣ်န့ၣ်ဘၣ်. 30ဖဲပှၤကညီတသ့ၣ်ညါဒံးကစၢ်ယွၤအဆၢကတီၢ်န့ၣ်, ယွၤကွၢ်ကပာ်အတၢ်ကမၣ်ဒ်န့ၣ်အသိးတမံၤလီၤ. မ့မ့ၢ်ခဲကနံၣ်အံၤအဝဲဒၣ်ဟ့ၣ်လီၤအကလုၢ်ဆူပှၤကိးဂၤဒဲးလၢ တၢ်လီၢ်ကိးပူၤဒဲးဒ်သိးအကဃၣ်ကွံာ်လၢအကျဲအၢကျဲသီ တဖၣ်န့ၣ်လီၤ. 31အဂ့ၢ်ဒ်အံၤ, အဝဲပာ်ဂၢၢ်ပာ်ကျၢၤမုၢ်တနံၤလၢအကစံၣ်ညီၣ် ဟီၣ်ခိၣ်ဒီဘ့ၣ်လၢတၢ်တီတၢ်လိၤအပူၤ, ခီဖျိပှၤတဂၤလၢ အဃုထၢတ့ၢ်ဝဲန့ၣ်လီၤ. အဝဲဟ့ၣ်တ့ၢ်လံပှၤကိးဂၤဒဲးလၢတၢ်အုၣ်အသးဘၣ်ဃးဒီးတၢ် တမံၤအံၤအဂ့ၢ်ခီဖျိအဒုးဂဲၤဆၢထၢၣ်က့ၤပှၤအဝဲန့ၣ်လၢတၢ်သံ န့ၣ်လီၤ.”
32ဘၣ်ဆၣ်ဒီး, ဖဲအဝဲသ့ၣ်နၢ်ဟူစီၤပီလူးကတိၤတၢ်ဘၣ်ဃးတၢ် ဒုးဂဲၤဆၢထၢၣ်က့ၤပှၤလၢတၢ်သံန့ၣ်, အဝဲသ့ၣ်တနီၤနံၤဘၣ်ဖၣ်လဲအီၤ, မ့မ့ၢ်အဂၤတဖၣ်စံးဝဲ, “ပသးအိၣ်နၢ်ဟူဘၣ်ကဒီးနကတိၤတၢ်ဂ့ၢ် တမံၤအံၤလီၤ.” 33အန့ၣ်ဝံၤဒီးစီၤပီလူးဟးထီၣ်ကွံာ်လၢအဝဲသ့ၣ်အအိၣ်န့ၣ်လီၤ. 34ပှၤတနီၤပာ်က့ၤအသးတဖျၢၣ်ဃီဒီးအီၤဒီးစူၢ်က့ၤနာ်က့ၤတၢ်လီၤ. လၢအဝဲသ့ၣ်အကျါအိၣ်ဒီးစီၤဒံၤနူၤစံၤလၢအမ့ၢ်ကီၣ်ကးဖိတဂၤ, ဒီးပိာ်မုၣ်တဂၤလၢအမံၤမ့ၢ်နီၢ်ဒမၤရံဒီးပှၤအဂုၤအဂၤတနီၤန့ၣ်လီၤ.
Currently Selected:
မၤတၢ် 17: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
