မၤတၢ် 15
15
တၢ်အိၣ်ဖှိၣ်ဖဲဝ့ၢ်ယရူၤၡလ့ၣ်
1အန့ၣ်ဝံၤအလီၢ်ခံ, ပှၤတနီၤဟဲလၢကီၢ်ယူဒၤဆူဝ့ၢ်အၣ်တံၤအီာ်ဒီး သိၣ်လီၤသီလီၤပှၤစူၢ်က့ၤနာ်က့ၤတၢ်တဖၣ်ဒီးစံး, “သုမ့ၢ်တဒိးတၢ်ကူးတရံးဒ်စီၤမိၤၡ့အတၢ်သိၣ်တၢ်သီ အိၣ်ဝဲအသိးဘၣ်န့ၣ်, သုဒိးန့ၢ်တၢ်အုၣ်က့ၤခီၣ်က့ၤတသ့ဘၣ်.” 2စီၤပီလူးဒီးစီၤဘၢ်နါဘၤဂ့ၢ်လိာ်ဘှီလိာ်တၢ်ဆူၣ်ဆူၣ် ကလဲာ်ဒီးပှၤသ့ၣ်တဖၣ်အံၤဘၣ်ဃးဒီးတၢ်ဂ့ၢ်တမံၤအံၤန့ၣ်လီၤ. အန့ၣ်သတးဒီး, တၢ်စံၣ်ညီၣ်ဃုထၢထီၣ်စီၤပီလူးဒီးစီၤဘၢ်နါဘၤ ဒီးပှၤအဂၤတနီၤလၢဝ့ၢ်အၣ်တံၤအီာ်, ဒ်သိးအကလဲၤဆူဝ့ၢ် ယရူၤၡလ့ၣ်ဒီးထံၣ်လိာ်ပှၤတၢ်မၢဖိဒီးသူၣ်က့သးပှၢ်ဖဲန့ၣ် တဖၣ်ဘၣ်ဃးတၢ်ဂ့ၢ်တမံၤအံၤန့ၣ်လီၤ.
3အဝဲသ့ၣ်ဘၣ်တၢ်ဆှၢလီၤအီၤလၢတၢ်အိၣ်ဖှိၣ်ဒီးဖဲအဝဲသ့ၣ် လဲၤခီဂာ်ကီၢ်ဖံၤနံက့ၤဒီးကီၢ်ၡၤမရံန့ၣ်, တဲဖျါထီၣ်ဝဲဘၣ်ဃးပှၤကလုာ်ဂၤတဖၣ်စူၢ်က့ၤနာ်က့ၤကစၢ်ယွၤ အဂ့ၢ်, ဒီးတၢ်ကစီၣ်အဝဲအံၤဒုးသးခုပှၤစူၢ်က့ၤနာ်က့ၤတၢ်ကိးဂၤ ဒဲးအဒိၣ်အအါလီၤ. 4ဖဲအဝဲသ့ၣ်လဲၤတုၤလၢဝ့ၢ်ယရူၤၡလ့ၣ်န့ၣ်, ဘၣ်တၢ်တူၢ်လိာ်ခီၣ်ဆၢအီၤလၢတၢ်အိၣ်ဖှိၣ်ဖိ, ပှၤတၢ်မၢဖိ, ဒီးပှၤသူၣ်က့သးပှၢ်တဖၣ်, ဒီးစံးဘၣ်တဲဘၣ်အဝဲသ့ၣ်ဘၣ်ဃးဒီး တၢ်ခဲလၢာ်လၢကစၢ်ယွၤမၤဝဲခီဖျိအဝဲသ့ၣ်န့ၣ်လီၤ. 5ဘၣ်ဆၣ်ဒီးပှၤစူၢ်က့ၤနာ်က့ၤတၢ်တနီၤလၢအဘၣ်ဃးဒီးပှၤ ဖၤရံၤၡဲအကရူၢ်ဂဲၤဆၢထၢၣ်ကတိၤတၢ်ဒီးစံး, “အလီၢ်အိၣ်လၢပှၤကလုာ်ဂၤတဖၣ်ကဒိးတၢ်ကူးတရံးဒီး ကဘၣ်တၢ်စံးဘၣ်တဲဘၣ်အီၤလၢအကစူၢ်စီၤမိၤၡ့အတၢ် သိၣ်တၢ်သီန့ၣ်လီၤ.”
6ပှၤတၢ်မၢဖိဒီးပှၤသူၣ်က့သးပှၢ်တဖၣ်အိၣ်ဖှိၣ်ဒ်သိးအကကွၢ် ဆိကမိၣ်သကိးဘၣ်ဃးတၢ်ဂ့ၢ်တမံၤအံၤန့ၣ်လီၤ. 7တၢ်ကတိၤဂ့ၢ်လိာ်ဘှီလိာ်အိၣ်ဝဲဒၣ်ဖးယံာ်ဝံၤအလီၢ်ခံ, စီၤပ့းတရူးဂဲၤဆၢထၢၣ်ဒီးစံးဝဲ, “ယဒီပုၢ်ဝဲၢ်သ့ၣ်ဧၢ, သုသ့ၣ်ညါလၢအပူၤကွံာ်ဖးယံာ်န့ၣ်, ကစၢ်ယွၤဃုထၢထီၣ် ယၤလၢသုကျါဒ်သိးယကစံၣ်တဲၤတဲလီၤတၢ်သးခုအကစီၣ် လၢပှၤကလုာ်ဂၤတဖၣ်, ဒ်သိးအဝဲသ့ၣ်ကနၢ်ဟူဒီးစူၢ်က့ၤနာ်က့ၤယ့ၣ်ၡူးအဂီၢ်လီၤ. 8ဒီးကစၢ်ယွၤလၢအထံၣ်သ့ၣ်ညါပှၤကိးဂၤအသးန့ၣ်, ပာ်ဖျါအတၢ်ဘၣ်သူၣ်ဘၣ်သးပှၤကလုာ်ဂၤတဖၣ်, ခီဖျိအဟ့ၣ်အဝဲသ့ၣ်လၢသးစီဆှံဒ်အဟ့ၣ်တ့ၢ်ပှၤအသိး န့ၣ်လီၤ. 9အဝဲဒၣ်တပာ်လီၤဆီပဝဲပှၤယူဒၤဖိတဖၣ်ဒီးအဝဲသ့ၣ်ပှၤကလုာ်ဂၤ တဖၣ်န့ၣ်ဘၣ်. အဝဲပျၢ်ကွံာ်အဝဲသ့ၣ်အတၢ်ဒဲးဘးမ့ၢ်လၢ အစူၢ်က့ၤနာ်က့ၤတၢ်အဃိန့ၣ်လီၤ. 10မ့မ့ၢ်ဒ်န့ၣ်ဒီး, ဘၣ်မနုၤအဃိသုအဲၣ်ဒိးမၤကွၢ်ကစၢ်ယွၤခီဖျိသုပာ်ထီၣ် တၢ်ဝံတၢ်ယိးလၢပမိၢ်ပၢ်ဖံဖုလၢပျၢၤမ့ၢ်ဂ့ၤ, ပဝဲဒၣ်မ့ၢ်ဂ့ၤ, ပဝံပယိးအီၤတန့ၢ်ဘၣ်န့ၣ်, လၢပှၤစူၢ်က့ၤနာ်က့ၤတၢ်တဖၣ်အံၤ အလိၤန့ၣ်လဲၣ်. 11တမ့ၢ်ဒ်န့ၣ်ဘၣ်. ပစူၢ်က့ၤနာ်က့ၤတၢ်ဒီးပဘၣ်တၢ်အုၣ်က့ၤခီၣ်က့ၤပှၤ ခီဖျိကစၢ်ယ့ၣ်ၡူးအဘျုးအဖှိၣ်လီၤ. အဝဲသ့ၣ်စ့ၢ်ကီးစူၢ်က့ၤနာ်က့ၤတၢ်ဒီးဘၣ်တၢ်အုၣ်က့ၤခီၣ်က့ၤအီၤ န့ၣ်လီၤ.
12ပှၤဒီဖုညါအိၣ်ဘှ့ၣ်အိၣ်ဘှီၣ်ဒီးဒိကနၣ်စီၤဘၢ်နါဘၤဒီး စီၤပီလူးအတၢ်ကတိၤတဲဖျါတၢ်ပနီၣ်လီၤလးဒီးတၢ်လီၤလး တဖၣ်လၢကစၢ်ယွၤမၤတ့ၢ်ဝဲခီဖျိအဝဲသ့ၣ်လၢပှၤကလုာ်ဂၤတဖၣ် အသိးအကျါန့ၣ်လီၤ. 13ဖဲအဝဲသ့ၣ်ကတိၤတၢ်ဝံၤန့ၣ်, စီၤယၤကိာ်ကတိၤထီၣ်တၢ်ဒီးစံးဝဲ, “ဒီပုၢ်ဝဲၢ်သ့ၣ်ဧၢ, ကနၣ်တၢ်လၢယစံးဘၣ်သုန့ၣ်တက့ၢ်. 14လၢကစၢ်ယွၤဒုးနဲၣ်ဖျါအတၢ်အံးတၢ်ကွၢ်ပှၤကလုာ်ဂၤတဖၣ် အဆိကတၢၢ်တဘျီခီဖျိအထုးထီၣ်ပှၤတကလုာ်လၢအဝဲသ့ၣ် အသိးအကျါဒ်သိးအကကဲအတၢ်ဒၣ်ဝဲအဂီၢ်အဂ့ၢ်န့ၣ်, စီၤၡံမိၣ်တဲဖျါထီၣ်တ့ၢ်လံဝဲလံ. 15တၢ်အံၤလီၤပလိာ်ဒီးဝံတဖၣ်အတၢ်စံးတၢ်ကတိၤလီၤ. ဒ်တၢ်ကွဲးအသးစံးဝဲအသိး,
16‘လၢခံန့ၣ်ယကဟဲက့ၤ,
ဒီးဒုးအိၣ်ထီၣ်က့ၤစီၤဒၤဝံးအဘီအမုၢ်လီၤ.
ယကသူၣ်ထီၣ်က့ၤအတၢ်ဟးဂူာ်ဟးဂီၤတဖၣ်,
ဒီးမၤဂၢၢ်ကျၢၤက့ၤကဒီးအီၤလီၤ.
17တုၤနုၤတစု, ပှၤဟီၣ်ခိၣ်ဖိအဂၤခဲလၢာ်,
ပှၤကလုာ်ဂၤခဲလၢာ်လၢယကိးတ့ၢ်အီၤလၢအကကဲယတၢ်ဒၣ်ယဲ တဖၣ်န့ၣ်, ကဟဲဆူယအိၣ်လီၤ.
18ကစၢ်လၢအဒုးသ့ၣ်ညါပှၤကညီ
တၢ်ဂ့ၢ်တမံၤအံၤယံာ်တ့ၢ်လံတဂၤန့ၣ်,
စံးဝဲဒ်န့ၣ်လီၤ.’ ”
19စီၤယၤကိာ်ကတိၤဒံးတၢ်ဒီးစံးဝဲ, “တၢ်လၢယထံၣ်န့ၣ်, ပတကြၢးမၤတံာ်တာ်ပှၤကလုာ်ဂၤတဖၣ်လၢအဃၣ်က့ၤ အသးဆူကစၢ်ယွၤအအိၣ်န့ၣ်ဘၣ်. 20မ့မ့ၢ်တခီ, ပကြၢးကွဲးလံာ်ဆူအဝဲသ့ၣ်အအိၣ်ဒီးစံးဘၣ်အီၤလၢ အသုတအီၣ်တၢ်အီၣ်တကဆှီဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိး နီတမံၤလၢအဘၣ်တၢ်လုၢ်ထီၣ်အီၤဆူတၢ် ဂီၤတၢ်ဖီၣ်န့ၣ်တဂ့ၤ. ဒီးအကဟးဆှဲးတၢ်မၤကမၣ်မုၣ်ကမၣ်ခွါ, ဒီးအသုတအီၣ်ဆၣ်ဖိကီၢ်ဖိလၢအဘၣ်တၢ်စံၢ်သံအီၤ, ဒီးတၢ်အသွံၣ်တမံၤလၢ်လၢ်တဂ့ၤ. 21အဂ့ၢ်ဒ်အံၤ, စီၤမိၤၡ့အတၢ်သိၣ်တၢ်သီဘၣ်တၢ်ဖးတ့ၢ်အီၤယံာ် တ့ၢ်မးလၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤကိးယူဒၤဖိ အမုၢ်အိၣ်ဘှံးနံၤဒဲး, ဒီးအဝဲအကလုၢ်ကထါတဖၣ်ဘၣ်တၢ်စံၣ်တဲၤတဲလီၤအီၤလၢဝ့ၢ်ကိး ဖျၢၣ်ဒဲးအပူၤန့ၣ်လီၤ.”
လံာ်ပရၢဆူပှၤကလုာ်ဂၤလၢ အစူၢ်က့ၤနာ်က့ၤတၢ်တဖၣ်အအိၣ်
22တုၤနုၤတစု, ပှၤတၢ်မၢဖိဒီးတၢ်အိၣ်ဖှိၣ်အပှၤသူၣ်က့သးပှၢ်တဖၣ်, ဃုာ်ဒီးတၢ်အိၣ်ဖှိၣ်ဒီဖုညါ, ပာ်လီၤအသးလၢအကဃုထၢထီၣ်ပှၤတနီၤလၢအဝဲသ့ၣ်အသိးအကျါ ဒီးမၢလီၤအီၤဆူဝ့ၢ်အၣ်တံၤအီာ်တပူၤဃီဒီးစီၤပီလူးဒီးစီၤဘၢ်နါ ဘၤလီၤ. အဝဲသ့ၣ်ဃုထၢထီၣ်ပှၤခံဂၤလၢအဘၣ်တၢ်ပာ်ဒိၣ်ပာ်ကဲ အီၤလၢပှၤစူၢ်က့ၤနာ်က့ၤတၢ်ဖိတဖၣ်, စီၤစံလၤဒီးစီၤယူဒၤလၢအဘၣ်တၢ်ကိးစ့ၢ်ကီးအီၤလၢစီၤဘၢ်စဘါ န့ၣ်လီၤ. 23အဝဲသ့ၣ်ဆှၢလီၤလံာ်ပရၢလၢလာ်အံၤခီဖျိပှၤသ့ၣ်တဖၣ်န့ၣ်လီၤ.
“ပဝဲဒၣ်လၢအမ့ၢ်သုဒီပုၢ်ဒီဝဲၢ်, ပှၤတၢ်မၢဖိဒီးတၢ်အိၣ်ဖှိၣ်အသူၣ်က့သးပှၢ်တဖၣ်ဆှၢလီၤ တၢ်ဆၢဂ့ၤဆၢဝါဆူပဒီပုၢ်ဝဲၢ်ကလုာ်ဂၤခဲလၢာ်လၢအအိၣ် ဝဲဆိးဝဲဖဲဝ့ၢ်အၣ်တံၤအီာ်, ကီၢ်စူၤရံ, ဒီးကီၢ်ကံၤလံၤကံတဖၣ်အအိၣ်န့ၣ်လီၤ. 24ပနၢ်ဟူဘၣ်လၢပှၤလၢပသိးပကျါတနီၤလဲၤမၤတံာ်တာ်ဒီး မၤဟးဂီၤသုသးခီဖျိအတၢ်စံးတၢ်ကတိၤန့ၣ်လီၤ. ဘၣ်ဆၣ်ဒီး, အဝဲသ့ၣ်တမ့ၢ်ပှၤလၢပမၢလီၤအီၤဒ်သိးအကလဲၤ မၤတၢ်ဒ်န့ၣ်ဘၣ်. 25လၢတၢ်န့ၣ်အဃိ, ပပာ်ဖှိၣ်ထီၣ်ပသးတပူၤဃီဒီးဘၣ်သူၣ်ဘၣ် သးကိးဂၤဒဲးလၢပကဃုထၢထီၣ်ပှၤတနီၤဒီးမၢလီၤအီၤဆူသုအိၣ် န့ၣ်လီၤ. အဝဲသ့ၣ်ကလဲၤဃုာ်ဒီးပတံၤသကိးလၢပအဲၣ်အီၤဒိၣ်မး, စီၤဘၢ်နါဘၤဒီးစီၤပီလူး, 26လၢအဟ့ၣ်လီၤအသးလၢာ်လၢာ်ဆ့ဆ့လၢတၢ်မၤပကစၢ် ယ့ၣ်ၡူးခရံာ်အတၢ်မၤအပူၤန့ၣ်လီၤ. 27လၢတၢ်န့ၣ်အဃိ, ပမၢလီၤစီၤယူဒၤဒီးစီၤစံလၤလၢအကတဲဘၣ်သုလၢအနီၢ် ကစၢ်ဒၣ်ဝဲ, တၢ်တမံၤဃီလၢပကွဲးတဲဘၣ်သုန့ၣ်လီၤ. 28သးစီဆှံဒီးပဝဲ, ပသးလီၤပလိာ်သကိးလၢတၢ်သိၣ်တၢ်သီလၢအကါဒိၣ်နီၢ်နီၢ် တဖၣ်အံၤအမဲာ်ညါ, ပတပာ်ထီၣ်တၢ်ဝံတၢ်ယိးအဂၤလၢသုလိၤနီတမံၤဘၣ်န့ၣ်လီၤ. 29တၢ်အီၣ်လၢအဘၣ်တၢ်လုၢ်ထီၣ်တ့ၢ်အီၤဆူတၢ်ဂီၤတၢ်ဖီၣ်န့ၣ်, အီၣ်အီၤတဂ့ၤ. အီၣ်တၢ်သွံၣ်တဂ့ၤ. ဆၣ်ဖိကီၢ်ဖိလၢအဘၣ်တၢ်စံၢ်သံအီၤန့ၣ်အီၣ်အီၤတဂ့ၤ. ဒီးဟးဆှဲးတၢ်မၤကမၣ်မုၣ်ကမၣ်ခွါန့ၣ်တက့ၢ်. သုမ့ၢ်ဟးဆှဲးတၢ်သ့ၣ်တဖၣ်အံၤဒီး, ကမ့ၢ်သုမၤတၢ်လၢအကြၢး ဝဲဘၣ်ဝဲန့ၣ်လီၤ. လၢတၢ်ဆၢဂ့ၤအါအပူၤ.”
30ပှၤစိာ်တၢ်ကစီၣ်တဖၣ်အံၤဘၣ်တၢ်မၢလီၤအီၤ, ဒီးအဝဲသ့ၣ်လဲၤဆူဝ့ၢ်အၣ်တံၤအီာ်, ဖဲအဝဲသ့ၣ်ကိးဖှိၣ်ပှၤစူၢ်က့ၤနာ်က့ၤတၢ်ခဲလၢာ်ဒီးဟ့ၣ်လီၤ အဝဲသ့ၣ်လံာ်ပရၢန့ၣ်လီၤ. 31တုၤအဝဲသ့ၣ်ဖးဘၣ်လံာ်ပရၢန့ၣ်ဒီး, အသးပှဲၤဒီးတၢ်သူၣ်ခုသးခုလၢတၢ်ကစီၣ်လၢ အဟ့ၣ်ဂံၢ်ဟ့ၣ်ဘါတၢ်အဃိန့ၣ်လီၤ. 32စီၤယူဒၤဒီးစီၤစံလၤလၢအမ့ၢ်ဝံတဖၣ်, ကတိၤတၢ်ဒီးအပျဲၢ်အဘီၣ် တဖၣ်ဖးယံာ်, ဒီးဟ့ၣ်ဆူၣ်ထီၣ်အဂံၢ်အဘါဒီးဟ့ၣ်အီၤတၢ်သူၣ်ဒူသးဒူန့ၣ် လီၤ. 33အဝဲသ့ၣ်အိၣ်ဖဲန့ၣ်စှၤနွံဝံၤအလီၢ်ခံ, ဘၣ်တၢ်ပျၢ်က့ၤအီၤမုာ်မုာ်လၢပှၤစူၢ်က့ၤနာ်က့ၤတၢ်တဖၣ်, ဒီးအဝဲသ့ၣ်က့ၤက့ၤဆူပှၤလၢအမၢလီၤတ့ၢ်အီၤတဖၣ်အအိၣ် န့ၣ်လီၤ. 34(ဘၣ်ဆၣ်ဒီးစီၤစံလၤပာ်လီၤအသးလၢအကအိၣ်တ့ၢ်ဖဲန့ၣ်လီၤ.)
35စီၤပီလူးဒီးစီၤဘၢ်နါဘၤအိၣ်ဒံးဝဲဖဲဝ့ၢ်အၣ်တံၤအီာ်န့ၣ်လီၤ. အဝဲသ့ၣ်ဒီးပှၤအဂၤအါဒံအါဂၤသိၣ်လိဒီးစံၣ်တဲၤတဲလီၤ ကစၢ်အကလုၢ်ကထါန့ၣ်လီၤ.
စီၤပီလူးလီၤဖးဒီးစီၤဘၢ်နါဘၤ
36တၢ်ဆၢကတီၢ်လဲၤပူၤကွံာ်ဝဲစှၤလါဝံၤအလီၢ်ခံန့ၣ်, စီၤပီလူးစံးဘၣ်စီၤဘၢ်နါဘၤ, “မ်ပက့ၤကဒါက့ၤဆူဝ့ၢ်ကိးဝ့ၢ်ဒဲး ဖဲပစံၣ်တဲၤတဲလီၤတ့ၢ်ကစၢ်အကလုၢ်ကထါ, ဒ်သိးပကထံၣ်ဘၣ်အဝဲသ့ၣ်အတၢ်အိၣ်မူလၢတၢ်စူၢ်ယွၤနာ်ယွၤ အပူၤ မ့ၢ်တၢ်ဒ်လဲၣ်န့ၣ်တက့ၢ်.” 37စီၤဘၢ်နါဘၤအဲၣ်ဒိးလဲၤကိးဃုာ်စီၤယိၤဟၣ်မၢ်ကူးလီၤ. 38မ့မ့ၢ်စီၤပီလူးထံၣ်လၢအတကြၢးကိးအီၤဘၣ်, အဂ့ၢ်မ့ၢ်လၢအဝဲတလဲၤသကိးတ့ၢ်တၢ်ဒီးအဝဲသ့ၣ်တုၤလၢအတၢ်ဖံး တၢ်မၤဝံၤတစုဘၣ်, မ့မ့ၢ်က့ၤကဒါက့ၤဝဲဒီးပာ်တ့ၢ်အဝဲသ့ၣ်ဖဲကီၢ်ပၣ်ဖူၤလံ အဃိန့ၣ်လီၤ. 39ဖဲန့ၣ်, တၢ်ဂ့ၢ်လိာ်ဘှီလိာ်အိၣ်ထီၣ်ဝဲဒၣ်ဆူၣ်ဆူၣ်ကလဲာ် လၢအဝဲသ့ၣ်ခံဂၤအဘၢၣ်စၢၤ, ဒီးဟးဖှၣ်ခံလိာ်အသးလီၤ. စီၤဘၢ်နါဘၤကိးစီၤမၢ်ကူးဒီးဒိးထီၣ်ကဘီဒီးလဲၤဆူကီး ကူပြူးလီၤ. 40မ့မ့ၢ်စီၤပီလူးဃုထၢစီၤစံလၤဒီးဟးထီၣ်ကွံာ်ဝဲဖဲန့ၣ်အိၣ်ဒီး ပှၤစူၢ်က့ၤနာ်က့ၤတၢ်တဖၣ်အတၢ်အးလီၤအဝဲသ့ၣ်ဆူကစၢ် အဘျုးအဖှိၣ်အတၢ်အံးက့ၤကွၢ်က့ၤအပူၤန့ၣ်လီၤ. 41အဝဲဒၣ်ဒီးစီၤစံလၤလဲၤခီဂာ်ကီၢ်စူၤရံဒီးကီၢ်ကံၤလံၤကံ ဒီးဟ့ၣ်ဂံၢ်ဟ့ၣ်ဘါမၤဂၢၢ်မၤကျၢၤတၢ်အိၣ်ဖှိၣ်ဖဲန့ၣ်တဖၣ်လီၤ.
Currently Selected:
မၤတၢ် 15: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
