မၤတၢ် 12
12
တၢ်မၤအၢမၤနးအါထီၣ်
1အကတီၢ်ဖဲန့ၣ်, စီၤပၤဟ့ၤရိာ်စးထီၣ်မၤအၢမၤနးတၢ်အိၣ်ဖှိၣ်ဖိတနီၤလီၤ. 2ခီဖျိအဝဲဟ့ၣ်လီၤအကလုၢ်န့ၣ်, စီၤယိၤဟၣ်အဒီပုၢ်ဝဲၢ်စီၤယၤကိာ်ဘၣ်တၢ်မၤသံကွံာ်အီၤလၢနး န့ၣ်လီၤ. 3ဖဲအဝဲဒၣ်ထံၣ်ဘၣ်လၢတၢ်မၤတမံၤအံၤဘၣ်သူၣ်ဘၣ်သးပှၤယူဒၤဖိ တဖၣ်န့ၣ်, အဝဲဟ့ၣ်လီၤကဒီးအကလုၢ်လၢပှၤကဖီၣ်ဃာ်စီၤပ့းတရူး စ့ၢ်ကီးန့ၣ်လီၤ. (တၢ်မၤတမံၤအံၤန့ၣ်, မ့ၢ်ဝဲဒၣ်ဖဲဘူၣ်ကိၣ်တအိၣ်ဘၣ်ဒီးကိၣ်မံၣ်အဆၢကတီၢ်န့ၣ်လီၤ.) 4တၢ်ဖီၣ်ဃာ်စီၤပ့းတရူးဝံၤအလီၢ်ခံန့ၣ်, အဝဲဘၣ်တၢ်ဒၢနုာ်အီၤလၢဃိာ်ပူၤဒီးဖဲန့ၣ်တၢ်ဟ့ၣ်လီၤအီၤဆူ သုးဖိလွံၢ်ကရူၢ်အစုပူၤဒ်သိးအကပၢၤဃာ်အီၤ, တကရူၢ်ဝံၤတကရူၢ်လၢအဆၢကတီၢ်ဒၣ်ဝဲလီၤ. ပှၤပၢၤတၢ်ဖိတကရူၢ်အိၣ်ဒီးပှၤသုးဖိလွံၢ်ဂၤလီၤ. စီၤဟ့ၤရိာ်ကူၣ်ထီၣ်ဖးလီၤလၢအကသမံသမိးအီၤလၢပှၤဂီၢ်မုၢ် အမဲာ်ညါဖဲဘူၣ်လဲၤကပာ်ဝံၤအလီၢ်ခံန့ၣ်လီၤ. 5လၢတၢ်န့ၣ်အဃိ, စီၤပ့းတရူးဘၣ်တၢ်ဒုးဃာ်ပာ်အီၤလၢဃိာ်ပူၤ, ဘၣ်ဆၣ်တၢ်အိၣ်ဖှိၣ်ဖိတဖၣ်ဃ့ဘါထုကဖၣ်ကစၢ်ယွၤသပှၢ်ပှၢ်လၢ အဝဲဒၣ်အဂီၢ်လီၤ.
စီၤပ့းတရူးဘၣ်တၢ်ဒုးထူၣ်ဖျဲးထီၣ်ကွံာ်အီၤလၢ ဃိာ်ပူၤ
6တချုးဖဲစီၤဟ့ၤရိာ်သါကထုးထီၣ်ဒီးဆှၢထီၣ်အီၤဆူပှၤဂီၢ်မုၢ် အအိၣ်အမဲာ်ညါတနၤန့ၣ်, စီၤပ့းတရူးမံဘၣ်အသးလၢပှၤ သုးဖိခံဂၤအကဆူးလီၤ. အဝဲဒၣ်ဘၣ်တၢ်စၢဃာ်အီၤလၢပျံၤထးခံဘိ, တဘိအိၣ်စၢဃာ်အသးလၢပှၤသုးဖိဖဲစုစ့ၣ်တဂၤ, ဒီးအဂၤတဘိအိၣ်စၢဃာ်အသးလၢပှၤသုးဖိဖဲစုထွဲတဂၤ, ဒီးပှၤသုးဖိပၢၤတၢ်တဖၣ်အိၣ်ခိးတၢ်ဖဲဃိာ်အကျဲစၢၤန့ၣ်လီၤ. 7သတူၢ်ကလာ်, ကစၢ်အကလူးတဂၤအိၣ်ဆၢထၢၣ်ဖဲန့ၣ်, ဒီးတၢ်ကပီၤထီၣ်ဝဲလၢဃိာ်အဒၢးပူၤန့ၣ်လီၤ. ကလူးတရုၤ စီၤပ့းတရူးအဖံဘၣ်ခိၣ်, ထိၣ်ဂဲၤထၢၣ်အီၤဒီးစံးဝဲ, “မၤချ့ချ့, ဂဲၤဆၢထၢၣ်တက့ၢ်.” တဘျီဃီဖဲန့ၣ်ပျံၤထးတဖၣ်လီၤတဲာ်ကွံာ်လၢစီၤပ့းတရူးအစု ခံခီအလိၤန့ၣ်လီၤ. 8ဒီးကလူးန့ၣ်စံးဘၣ်အီၤ, “စၢဃံးထီၣ်နယီၢ်တကိးဒီး ဒိးထီၣ်နခီၣ်ဖံး တက့ၢ်.” စီၤပ့းတရူးမၤဝဲဒ်တၢ်စံးဘၣ်အီၤအသိး, ဒီးကလူးန့ၣ်စံးဘၣ်အီၤ, “သိးထီၣ်နဆ့ကၤဖီခိၣ်ဒီးဟဲပိာ်ယခံတက့ၢ်.” 9စီၤပ့းတရူးပိာ်ထီၣ်အခံဆူဃိာ်အချၢလီၤ. ဘၣ်ဆၣ်ဒီးတၢ်လၢကလူးမၤဝဲမ့ၢ်တၢ်နီၢ်နီၢ်, တမ့ၢ်လဲၣ်န့ၣ်အဝဲတသ့ၣ်ညါဘၣ်. အဝဲဒၣ်ဆိကမိၣ်လၢအထံၣ်တၢ်ထံၣ်လၢညါခီန့ၣ်လီၤ. 10အဝဲသ့ၣ်လဲၤခီဂာ်ပှၤပၢၤတၢ်အလီၢ်တၢတတီၤ, ဝံၤအလီၢ်ခံ, ခံတီၤတတီၤ, ဒီးလၢခံကတၢၢ်တုၤဃီၤဆူတြဲၤထး ဖဲကျဲစၢၤနုာ်လီၤဆူဝ့ၢ် ပူၤန့ၣ်လီၤ. တြဲၤအိးထီၣ်အသးဒၣ်ဝဲလၢအဝဲသ့ၣ်အဂီၢ်, ဒီးအဝဲသ့ၣ်ဟးထီၣ်ဝဲဒၣ်လီၤ. အဝဲသ့ၣ်ပိာ်လီၤကျဲမုၢ်ဒိၣ်တဘိ, ဝံၤအလီၢ်ခံ, ကလူးဟးဖးဒီးစီၤပ့းတရူးသတူၢ်ကလာ်လီၤ.
11တုၤနုၤတစုစီၤပ့းတရူးသ့ၣ်ညါတၢ်မၤအသးဒီးအီၤဒ်လဲၣ်အဂ့ၢ်ဒီးစံးဝဲ, “ခဲကနံၣ်အံၤယသ့ၣ်ညါလၢတၢ်တမံၤအံၤမၤအသးနီၢ်နီၢ်လီၤ. ကစၢ်ဆှၢလီၤအကလူး, ဒီးအဝဲဒၣ်အုၣ်က့ၤခီၣ်က့ၤယၤလၢစီၤပၤဟ့ၤရိာ်အတၢ်စိတၢ်က မီၤ, ဒီးလၢတၢ်ခဲလၢာ်လၢပှၤယူဒၤဖိမုၢ်လၢ်လၢအကမၤဝဲအပူၤန့ၣ် လီၤ.”
12ဖဲအဝဲဒၣ်သ့ၣ်ညါတၢ်မၤအသးဒီးအီၤနီၢ်နီၢ်မ့ၢ်တၢ်ဒ်လဲၣ်န့ၣ်, အဝဲလဲၤဆူစီၤယိၤဟၣ်မၢ်ကူးအမိၢ်နီၢ်မၤရံအဟံၣ်ဘၣ်ဖဲပှၤ အါဒံအါဂၤအိၣ်ဖှိၣ်ရိဖှိၣ်ဖဲန့ၣ်ဒီးဃ့ဘါထုကဖၣ်တၢ်အဖၢမုၢ်လီၤ. 13ဒီးစီၤပ့းတရူးဒိတကျိာ်ဟံၣ်မဲာ်ညါအတြဲၤ, ဒီးတၢ်ခ့တၢ်ပှၤပိာ်မုၣ်လၢအမံၤမ့ၢ်နီၢ်ရိဒ့ၤဟဲဒ်သိး အကကွၢ်မတၤဒိတကျိာ်တြဲၤလဲၣ်န့ၣ်လီၤ. 14အဝဲဒၣ်သ့ၣ်ညါစီၤပ့းတရူးအကလုၢ်, ဒီးသူၣ်ခုသးခုဝဲတုၤဒၣ်လဲာ်တအိးထီၣ်တြဲၤဘၣ်ဒီးက့ၤဃ့ၢ် နုာ်ဒီးဘိးဘၣ်သ့ၣ်ညါပှၤဂၤတဖၣ်လၢစီၤပ့းတရူးအိၣ်ဆၢထၢၣ်လၢ တၢ်ချၢန့ၣ်လီၤ. 15အဝဲသ့ၣ်စံးဘၣ်အီၤ, “မ့ၢ်နပျုၢ်ဧါ.” ဘၣ်ဆၣ်အဝဲစံးသပှၢ်ပှၢ်လၢအမ့ၢ်ဝဲတီဝဲလီၤ. လၢတၢ်န့ၣ်အဃိအဝဲသ့ၣ်စံးဆၢဝဲ, “ကမ့ၢ်ဒၣ်အဝဲအကလူးလီၤ.”
16ဖဲန့ၣ်အခါ, စီၤပ့းတရူးဒိတကျိာ်ဒံးဒၣ်တၢ်လီၤ. လၢခံကတၢၢ်အဝဲသ့ၣ်အိးထီၣ်တြဲၤဒီးဖဲအထံၣ်အီၤန့ၣ်ကမၢ ကမၣ်ဝဲဒိၣ်မးလီၤ. 17အဝဲဒၣ်ဒုးနဲၣ်အစုဒ်သိးအဝဲသ့ၣ်ကအိၣ်ဘှီၣ်, ဒီးတဲနၢ်ပၢၢ်အဝဲသ့ၣ်ဘၣ်ဃးကစၢ်ထုးထီၣ်ကွံာ်တ့ၢ်အီၤ လၢဃိာ်ပူၤဒ်လဲၣ်အဂ့ၢ်န့ၣ်လီၤ. အဝဲဒၣ်စံးဝဲ, “တဲဘၣ်စီၤယၤကိာ်ဒီးပှၤစူၢ်က့ၤနာ်က့ၤတၢ်ဖိအဂၤတဖၣ်လၢ တၢ်တမံၤအံၤအဂ့ၢ်န့ၣ်တက့ၢ်.” ဝံၤဒီးဟးထီၣ်လဲၤဆူတၢ်လီၢ် အဂၤတပူၤလီၤ.
18ဖဲမုၢ်ဆ့ၣ်ဝါထီၣ်န့ၣ်, တၢ်သဘံၣ်ဘုၣ်အိၣ်ထီၣ်ဝဲလၢပှၤပၢၤတၢ်ဖိတဖၣ်အသိးအကျါ အဒိၣ်အအါဒီးအဝဲသ့ၣ်စံးလိာ်အသး, “တၢ်ကဲထီၣ်အသးဒီးစီၤပ့းတရူးဒ်လဲၣ်.” 19စီၤဟ့ၤရိာ်ဟ့ၣ်လီၤအကလုၢ်လၢပှၤကဃုအီၤ, ဘၣ်ဆၣ်အဝဲသ့ၣ်တထံၣ် အီၤဘၣ်. လၢတၢ်န့ၣ်အဃိအဝဲသမံသမိးပှၤပၢၤတၢ်ဖိတဖၣ်ဒီးဟ့ၣ်လီၤ အကလုၢ်လၢတၢ်ကမၤသံအဝဲသ့ၣ်လီၤ.
တၢ်မၤအသးတမံၤအံၤဝံၤအလီၢ်ခံန့ၣ်, စီၤဟ့ၤရိာ်ဟးထီၣ်လၢကီၢ်ယူဒၤဒီးအိၣ်ဝဲဆိးဝဲတစိၢ်တလီၢ် ဖဲဝ့ၢ်ကဲၤစါရံၤန့ၣ်လီၤ.
စီၤဟ့ၤရိာ်သံဝဲအဂ့ၢ်
20စီၤဟ့ၤရိာ်အသးထီၣ်ဘၣ်ပှၤထါယၢၣ်ဖိဒီးပှၤစံဒိၣ်ဖိတဖၣ်အဒိၣ် အအါလီၤ. လၢတၢ်န့ၣ်အဃိအဝဲသ့ၣ်လဲၤတပူၤဃီဒ်သိးအကထံၣ်လိာ်အသး ဒီးစီၤဟ့ၤရိာ်အဂီၢ်လီၤ. အဆိကတၢၢ်အဝဲသ့ၣ်ထုးန့ၢ်စီၤဘျၤစတူးအသးဆူအအိၣ်လၢ အကမၤစၢၤအီၤအဂီၢ်, အဂ့ၢ်မ့ၢ်လၢအဝဲမ့ၢ်ပှၤကွၢ်ထွဲစီၤပၤအနူၢ်အစီၤ အဃိလီၤ. အန့ၣ်ဝံၤအလီၢ်ခံအဝဲသ့ၣ်လဲၤဆူစီၤပၤဟ့ၤရိာ်အအိၣ်ဒီး ဃ့တၢ်ဃူတၢ်ဖိးလၢအီၤ, အဂ့ၢ်မ့ၢ်လၢအဝဲသ့ၣ်အထံအကီၢ်ဒိးန့ၢ်ဘၣ်အတၢ်အီၣ်တၢ်အီလၢ စီၤပၤအထံအကီၢ်အအိၣ်အဃိန့ၣ်လီၤ.
21ဖဲမုၢ်တနံၤလၢအဘၣ်တၢ်ဃုထၢလီၤဆီအီၤန့ၣ်, စီၤဟ့ၤရိာ်ကူထီၣ်သိးထီၣ်အစီၤပၤအကူအသိး, ဆ့ၣ်နီၤလၢအလီၢ်ပစိာ်အဖီခိၣ်, ဒီးကတိၤလီၤတၢ်ဆူပှၤဂီၢ်မုၢ်အအိၣ်လီၤ. 22အန့ၣ်ဒီး အဝဲသ့ၣ်ကိးပသူထီၣ်ဝဲ, “အဝဲအံၤ တမ့ၢ်ပှၤကညီတဂၤ ကတိၤတၢ်ဘၣ်. မ့ၢ်ကစၢ်ယွၤတဂၤကတိၤတၢ်လီၤ.” 23သတူၢ်ကလာ်, ကစၢ်အကလူးတဂၤတီၢ်စီၤဟ့ၤရိာ်, အဂ့ၢ်မ့ၢ်လၢအဝဲတဟ့ၣ်တၢ်လၤကပီၤဆူကစၢ်ယွၤအအိၣ်အဃိန့ၣ်လီၤ. ဒီးထိးကလဲာ်လၢအပူၤအီၣ်ကွံာ်အီၤဒီးအဝဲဒၣ်သံဝဲန့ၣ်လီၤ.
24မ့မ့ၢ်ကစၢ်ယွၤအကလုၢ်ကထါဘၣ်တၢ်ရၤလီၤအီၤဆူညါကွ့ၢ်ကွ့ၢ်, ဒီးပှၤစူၢ်က့ၤနာ်က့ၤတၢ်ဖိအနီၣ်ဂံၢ်အါထီၣ်ဝဲဒၣ်န့ၣ်လီၤ.
25ဒီးစီၤဘၢ်နါဘၤဒီးစီၤစီလူး, မၤဝံၤအတၢ်မၤဒီးဟးထီၣ်လၢဝ့ၢ် ယရူၤၡလ့ၣ်, ကိးဃုာ်စီၤယိၤဟၣ်မၢ်ကူးဒီးအဝဲသ့ၣ်လီၤ.
Currently Selected:
မၤတၢ် 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
