မၤတၢ် 1
1
1စီၤသီးဖံၤလူးဧၢ, လၢယလံာ်အခီၣ်ထံးတဘ့ၣ်အပူၤ, ယကွဲးတၢ်ဘၣ်ဃးကယဲၢ်တၢ်လၢယ့ၣ်ၡူးမၤဝဲဒီးသိၣ်လီၤသီ လီၤဝဲခဲလၢာ်စးထီၣ်မုၢ်တနံၤလၢအဝဲဒၣ်မၤအတၢ်မၤ, 2တုၤလီၤလၢမုၢ်တနံၤလၢယွၤဟံးထီၣ်အီၤဆူမူခိၣ်န့ၣ်လီၤ. တချုးအဘၣ်တၢ်ဟံးထီၣ်အီၤဒံးဘၣ်ဒီး, ခီဖျိသးစီဆှံအစိကမီၤန့ၣ် အဝဲဒၣ်မၤလိာ်တ့ၢ်အပှၤတၢ်မၢဖိလၢအဃုထၢတ့ၢ်ဝဲတဖၣ်တၢ်လၢ အဝဲသ့ၣ်ကဘၣ်မၤဝဲတဖၣ်န့ၣ်လီၤ. 3အဝဲဒၣ်တူၢ်သံအသးဒီးဂဲၤဆၢထၢၣ်သမူထီၣ်က့ၤဝံၤအလီၢ် ခံလၢအသီလွံၢ်ဆံအတီၢ်ပူၤန့ၣ်, လီၣ်ဖျါထီၣ်အသးတဘျုးဘျီလၢအပျဲၢ်အဘီၣ်တဖၣ်အမဲာ်ညါ ဒီးစံးဘၣ်တဲဘၣ်အဝဲသ့ၣ်ဘၣ်ဃးယွၤအဘီမုၢ်အဂ့ၢ်န့ၣ်လီၤ. အပျဲၢ်အဘီၣ်တဖၣ်ထံၣ်ဘၣ်အီၤဒီးအဝဲသ့ၣ်အသးတဒ့ဒီဘၣ် လၢအဝဲဒၣ်မူဝဲနီၢ်နီၢ်အဂ့ၢ်န့ၣ်ဘၣ်လီၤ. 4ဖဲအဝဲဒၣ်အိၣ်သကိးဒံးဒီးအဝဲသ့ၣ်အဖၢမုၢ်န့ၣ်, မၤလိာ်အဝဲသ့ၣ်ဒ်အံၤ, “ဟးထီၣ်ကွံာ်လၢဝ့ၢ်ယရူၤရှလ့ၣ်တဂ့ၤ. မ့မ့ၢ်အိၣ်ခိးသုဝဲတုၤသုန့ၢ်ဘၣ်တၢ်ဟ့ၣ်တမံၤလၢ ယစံးဘၣ်တ့ၢ်သုလၢယပၢ်အၢၣ်လီၤအီလီၤလၢအကဟ့ၣ်ဝဲန့ၣ် တက့ၢ်. 5စီၤယိၤဟၣ်ဘျၢပှၤလၢထံ, မ့မ့ၢ်လၢစှၤနံၤစှၤသီအတီၢ်ပူၤန့ၣ်, သုကဘၣ်တၢ်ဘျၢသုလၢသးစီဆှံန့ၣ်လီၤ.”
ယ့ၣ်ၡူးဘၣ်တၢ်ဟံးထီၣ်အီၤဆူမူခိၣ်
6တုၤပှၤတၢ်မၢဖိတဖၣ်ထံၣ်လိာ်သကိးအသးဒီး ယ့ၣ်ၡူးန့ၣ်အဝဲသ့ၣ်သံကွၢ်အီၤ, “ကစၢ်ဧၢ, ခဲကနံၣ်အံၤမ့ၢ်နကဟ့ၣ်က့ၤပှၤအံၣ်စရ့လးဖိလၢဘီမုၢ်န့ၣ်ဧါ.”
7ယ့ၣ်ၡူးစံးဆၢက့ၤအဝဲသ့ၣ်, “တၢ်ဆၢကတီၢ်ဒီးတၢ်ကတီၢ်လီၤဆီတဖၣ်န့ၣ်, အိၣ်ဒၣ်လၢယပၢ်အစုပူၤလၢအကစံၣ်ညီၣ်ပာ်လီၤဝဲလၢအစိကမီၤဒၣ် ဝဲဒီးတၢ်တပျဲသုသ့ၣ်ညါတၢ်ဆၢကတီၢ်အံၤန့ၣ်ဘၣ်. 8မ့မ့ၢ်တုၤသးစီဆှံဟဲလီၤလၢသုလိၤဝံၤဒီးသုကလၢ ထီၣ်ပှဲၤထီၣ်ဒီးတၢ်စိတၢ်ကမီၤ, ဒီးသုကကဲထီၣ်ပှၤအုၣ်အသးတဖၣ်လၢယဂီၢ်လၢဝ့ၢ် ယရူၤရှလ့ၣ်အပူၤ, လၢကီၢ်ယူဒၤဒီကီၢ်ညါဒီးကီၢ်ၡၤမရံ ဒီးပၢၢ်တုၤလၢဟီၣ်ခိၣ်အကတၢၢ်န့ၣ်လီၤ.” 9အဝဲဒၣ်စံးတၢ်အံၤဝံၤဒီးတၢ်ဟံးထီၣ်အီၤဆူမူခိၣ်, ဒီးဖဲအပျဲၢ်အဘီၣ်တဖၣ်ကွၢ်စူၣ်အီၤအဖၢမုၢ်န့ၣ်, တၢ်အၢၣ်တလိၣ်မၤဘၢကွံာ်အီၤဒီးအဝဲသ့ၣ်တထံၣ်အီၤလၢၤဘၣ်.
10ဖဲအဝဲသ့ၣ်ကွၢ်စူၣ်ဒံးတၢ်ဆူမူခိၣ်အကတီၢ်န့ၣ်, သတူၢ်ကလာ်ပှၤခံဂၤကူသိးတၢ်အဝါဟဲအိၣ်ဆၢ ထၢၣ်ဖဲအဝဲသ့ၣ်အကပၤ 11ဒီးစံးဝဲ, “သုဝဲပှၤကီၢ်ကၤလံၤလါဖိသ့ၣ်ဧၢ, ဘၣ်မနုၤသုအိၣ်ဆၢထၢၣ်ဖဲအံၤဒီးကွၢ်ထီၣ်တၢ်ဆူမူခိၣ်န့ၣ်လဲၣ်. ယ့ၣ်ၡူးလၢသုထံၣ်တၢ်ဟံးထီၣ်ကွံာ်အီၤလၢသုအိၣ်ဆူမူခိၣ်တဂၤအံၤ, ကဟဲက့ၤကဒါက့ၤဒ်သုထံၣ်ဘၣ်အလဲၤထီၣ်ဝဲအသိးန့ၣ်လီၤ.”
ပှၤလၢအထီၣ်က့ၤစီၤယူဒၤအလီၢ်
12အန့ၣ်ဒီးအပျဲၢ်အဘီၣ်တဖၣ်လၢအအိၣ်ဝဲလၢကစၢၢ်သ့ၣ်စၤယံး အဒီခိၣ်န့ၣ်, က့ၤကဒါက့ၤဝဲဆူဝ့ၢ်ယရူၤရှလ့ၣ်လၢအအိၣ်စီၤစုၤယံၤဝဲမံး လးတဝာ်န့ၣ်လီၤ. 13တုၤအက့ၤတုၤလၢဝ့ၢ်ယရူၤရှလ့ၣ်န့ၣ်ဒီး, အဝဲသ့ၣ်လဲၤထီၣ်ဝဲဆူဒၢးတဖျၢၣ်အပူၤလၢဟံၣ်ထးခီတဆီ, ဒၢးတဖျၢၣ်ဃီလၢအဝဲသ့ၣ်အိၣ်ဆိးဝဲတစိၢ်တလီၢ်လၢအပူၤ န့ၣ်လီၤ. ပှၤအိၣ်ဖဲန့ၣ်တဖၣ်မ့ၢ်ဝဲစီၤပ့းတရူး, စီၤယိၤဟၣ်, စီၤယၤကိာ်, စီၤအၣ်ဒရ့း, စီၤဖံလံးပူး, စီၤသိၤမါ, စီၤဘၢ်သလီးမဲ, စီၤမးသဲ, စီၤအၤလဖဲအဖိခွါစီၤယၤကိာ်, ပှၤအဲၣ်အထံအကီၢ်စီၤၡံမိၣ်, ဒီးစီၤယၤကိာ်အဖိခွါ စီၤယူဒၤတဖၣ်လီၤ. 14အဝဲသ့ၣ်ပာ်ဖှိၣ်ထီၣ်အသးတလီၢ်လီၢ်ဒ်သိးအကဘါထု ကဖၣ်သကိးတၢ်ဃုာ်ဒီးပိာ်မုၣ်တဖၣ်, ဒီးယ့ၣ်ၡူးအမိၢ်နီၢ်မၤရံ, ဒီးယ့ၣ်ၡူးအပုၢ်ပိာ်ခွါတဖၣ်န့ၣ်လီၤ.
15လၢခံစှၤသီန့ၣ်စီၤပ့းတရူးဂဲၤဆၢထၢၣ်ကတိၤတၢ်လၢပှၤ စူၢ်က့ၤနာ်က့ၤယ့ၣ်ၡူးတဖၣ်အမဲာ်ညါ, ပှၤခဲလၢာ်လၢအပာ်ဖှိၣ်ထီၣ်အသးကအိၣ်အဂၤတကယၤခံဆံ, ဒီးစံးဝဲ, 16“ယဒီပုၢ်ဝဲၢ်သ့ၣ်ဧၢ, တၢ်ကွဲးအသးလၢအပာ်ဖျါသးစီဆှံအတၢ်ဒုးစံးဒုးကတိၤစီၤဒၤ ဝံးဖဲအဝဲကတိၤဆိပာ်စၢၤဘၣ်ဃးစီၤယူဒၤလၢအမ့ၢ်ပှၤဆှၢ ပှၤလၢအလဲၤဖီၣ်ယ့ၣ်ၡူးအဂ့ၢ်န့ၣ်, ကဘၣ်လၢထီၣ်ပှဲၤထီၣ်ဝဲလီၤ. 17စီၤယူဒၤမ့ၢ်ပှၤတဖုတကရၢဃီဒီးပှၤ, အဂ့ၢ်မ့ၢ်လၢအဘၣ်တၢ်ဃုထၢထီၣ်အီၤလၢအကလဲၤ က့ၤဖံးမၤသကိးတၢ်ဒီးပှၤအဃိန့ၣ်လီၤ.”
18(စ့လၢစီၤယူဒၤမၤန့ၢ်ဝဲခီဖျိအမၤတၢ်လၢအအၢတမံၤန့ၣ်, အဝဲဒၣ်ပှ့ၤန့ၢ်ဟီၣ်ခိၣ်တကဝီၤ, ဒီးလီၤတဲာ်ဆှိခိၣ်လၢအပူၤန့ၣ်လီၤ. အဟၢဖၢပိၢ်ဖးဒီးအပှံာ်အကဖုတဖၣ်လီၤလဲာ်ကွံာ်ခဲလၢာ်လီၤ. 19ပှၤအိၣ်လၢဝ့ၢ်ယရူၤၡလ့ၣ်ပူၤခဲလၢာ်နၢ်ဟူဘၣ်တၢ်မၤအသးအံၤ သတးဒီး, လၢအဝဲသ့ၣ်အကျိာ်ဒၣ်ဝဲ ကိးတၢ်လီၢ်တကဝီၤန့ၣ်လၢ, “အၤက့းလဒၤမါ”, အခီပညီမ့ၢ်ဝဲ, “တၢ်သွံၣ်အပျီန့ၣ်လီၤ.”)
20“အဂ့ၢ်ဒ်အံၤ တၢ်အိၣ်ကွဲးအသးလၢလံာ်စံးထီၣ်ပတြၢၤအပူၤစံးဝဲ,
‘မ်အဟံၣ်အဃီအိၣ်ကလီ, ဒီးပှၤသုတအိၣ်
လၢအပူၤနီတဂၤတဂ့ၤ’ (စံး ၆၉:၂၅).
တၢ်ကွဲးစ့ၢ်ကီးအသး,
‘အတၢ်မၤန့ၣ်မ်ပှၤအဂၤတဂၤ
ကနုာ်လီၤမၤအီၤန့ၣ်တက့ၢ်’ (စံး ၁၀၉:၈).
21“အန့ၣ်သတးဒီး, ပကဘၣ်ဃုထၢထီၣ်ပှၤတဂၤလၢအကဟဲပာ်ဖှိၣ် အသးဒီးပှၤဒီးကဲထီၣ်သကိးပှၤအုၣ်အသးလၢကစၢ်ယ့ၣ်ၡူးဂဲၤဆၢထၢၣ် သမူထီၣ်က့ၤလၢတၢ်သံအဂ့ၢ်န့ၣ်လီၤ. အဝဲကဘၣ်မ့ၢ်ပှၤတဂၤလၢအအိၣ်တ့ၢ်လံလၢပသိးပကျါဖဲ ကစၢ်ယ့ၣ်ၡူးလဲၤထီၣ်က့ၤလီၤဒီးပှၤဒီကတီၢ်ညါအဖၢမုၢ်,
22စးထီၣ်လၢစီၤယိၤဟၣ်စံၣ်တဲၤတဲလီၤအတၢ်ဘျၢပှၤလၢထံအဂ့ၢ်, တုၤလီၤလၢယ့ၣ်ၡူးဘၣ်တၢ်ဟံးထီၣ်ကွံာ်အီၤလၢပအိၣ်ဆူမူခိၣ် တစုန့ၣ်လီၤ.”
23အန့ၣ်ဒီးအဝဲသ့ၣ်ဟ့ၣ်ထီၣ်ဝဲပှၤခံဂၤအမံၤ, စီၤယိၤသးကိးဝဲလၢစီၤဘၢ်စဘါ (တၢ်ကိးစ့ၢ်ကီးအမံၤလၢစီၤယူစတူး) ဒီးစီၤမးသံလီၤ. 24အန့ၣ်ဝံၤအဝဲသ့ၣ်ဃ့ဘါထုကဖၣ်တၢ်ဒီးစံးဝဲ, “ကစၢ်ဧၢ, ပှၤကိးဂၤဒဲးအသးအတၢ်ဆိကမိၣ်န့ၣ်နသ့ၣ်ညါနဲလီၤ. သတးဒီး, ဒုးနဲၣ်ပဝဲဒၣ်တဖၣ်အံၤလၢပှၤခံဂၤအံၤအကျါနဃုထၢတ့ၢ်နဲ ဖဲလဲၣ်တဂၤ 25လၢအကဟံးန့ၢ်စီၤယူဒၤအလီၢ်ဒ်ပှၤတၢ်မၢဖိတဂၤအသိးအဂီၢ်န့ၣ် တက့ၢ်. စီၤယူဒၤညိကွံာ်တ့ၢ်တၢ်လီၢ်န့ၣ်လၢအကလဲၤဆူအလီၢ် အကျဲဒၣ်ဝဲန့ၣ်လီၤ.” 26အန့ၣ်ဒီးအဝဲသ့ၣ်ဖီၣ်တၢ်ဖး ဒ်သိးကဃုထၢထီၣ်ပှၤတဂၤလၢပှၤခံဂၤ အကျါလီၤ. ဒီးပှၤလၢအဘၣ်တၢ်ဃုထၢထီၣ်အီၤမ့ၢ်စီၤမးသံ, ဒီးအဝဲဒၣ်အံၤဘၣ်တၢ်ပာ်ဖှိၣ်ဃုာ်အီၤလၢပှၤတၢ်မၢဖိတဆံတဂၤ အကရူၢ်ပူၤန့ၣ်လီၤ.
Currently Selected:
မၤတၢ် 1: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
